TÖHAKÖÖPÖ ĀTIKÖL 5
TINKÖÖKÖ 108 Yahova Kā Atöl Piyār
Hangenlōn Yāvē Tö Hī, Ngaich Kē-ěkūö Hī Tö Inkòlô
‘Mahayööken tökööl tarik ang Yēsū Kristū nö yih nö ing panam.’—1 TIM. 1:15.
ASUH ÖP MIN HAKÖP HĪ?
Asuh nup taneūngen hī inkòlô öi lökten in ngam ṙāi ṙinānyi, ngaich sitih inlahen mihôiṅ ayī-ö öi ha-öinyö Yāvē.
1. Asuh öp mihôiṅ inlahen hī öi haṙamlōn Yāvē?
FĒKÖ inlahenre man yēḵ meh öm kētö kift (gift) öp töhěng tak hanangenlōnre. Töt insā-av ngam kift kahëtö meh öm in ò hēk kiröngen yanöölen inrē min anga-aṅ nö löktö in e. Yēḵ ò pöri min nöng öt chumkūöṙen tö ngam kift kahëtö meh hēk höng vaichngö inrē tö e. Ngaich lohten min më-eṅ haṙivlōn. Yēḵ ò pöri nö yūsö e hēk kētö thanks meh inrē tö kūö e, ngaich lohten min më-eṅ öm keuheūtnyöre tö ṙanamlōnre. Ngatī ṙēngen ang Yāvē nö kē-ěkūö hī tö ngam töt insā-av inlōnti hī. Kiröngen hanangenlōn anga-aṅ tö hī töp lökten ò nö kēngö ngam töng hěng maneuk kūönre nö chö-öinyten hī. Yē hī min öi ha-öinyö Yāvē kūö ò nö hangenlōn tö hī hēk kētö ngam ṙāi ṙinānyi inrē nö chö-öinyten hī, ngaich kiröngen ṙanamlōn min anga-aṅ.—Yôh. 3:16; Rōm. 5:7, 8.
2. Asuh nup haköp hī in ngih ātiköl?
2 Sā chanuhu ngam ṙētak pöri mihôiṅ min nö kūönngöre ngam minlēḵṙen hī tö ngam ṙāi ṙinānyi. Sā inlahen töng öt chumkūöṙen hēk töng vaichngö min ayī-ö tö ngam inlōntire kahëtö Yāvē. Öt lōnu in töre öi ngatī inlahen töp lökten nö töt ṙanāngen ngam inlahen hī öi hòṅ örheūheu fēkö inlahen minā tī nā Yāvē nā Yēsū nö in hī hēk örheūheu inrē öi milēḵken e. In ngih ātiköl in min öi vënyu nang tö hī öi hòṅ sitih inlahen yěi hòṅ milēḵken e. Mikahtökūöre inrē min ayī-ö tö nup taneūngen hī töngamuh inkòlô öi lökten im ṙāi ṙinānyi hēk nup taneūngen hī inrē min ip yamih ṙētak. Mikahtökūö inrē min ayī-ö tö hī mihôiṅ öi sitih inlahen kētö thanks Yāvē tö kūö ngam inlōnti hī urēhěkūö ngam kinpaha Yēsū hēk unôichrit e inrē.
ASUH NUP TÖNGAMUH TANEŪNGEN HĪ INKÒLÔ
3. Asuh nup töngamuh inkòlô hī öi lökten in ngam töhalēnlöng ṙāi ṙinānyi?
3 Pōyen nun töngamuh minë inkòlô hī öi lökten im ṙāi ṙinānyi kahëtö Kristū. Tö sā Yāvē nö aṙē-ěl minë tökööl hī nö lökten im ṙāi ṙinānyi. Rö-ö pöri angū-ö nö töngö manah tö ò nöng hòṅ hateungngö ngam la-enre, pön lōn ò angū-ö nö hòṅ aṙēlen hī. Keuheūtnyöre ök ihih tö ṙanamlōnre kamūich ngam Salmai ik sā ò nö aṙēlöng tö Yāvē. Lökten ngaich anga-aṅ nö ngöṙô: “Pò Meh, Mā [Yāvē], Öm tölöök, hamöngöre inrē Öm aṙē-ĕl.—Sal. 86:5; 103:3, 10-13.
4. Chö-öinyten chīö ang Yāvē nö halēnlö ngam ṙāi ṙinānyi? (Lūkös 5:32; 1 Timôtī 1:15)
4 Ōtre yip tarik lohten tö ngölōn tö cha nöng öt kanò-òv nö teūngen töm inṙē-ělre aṅ in Yāvē. Yěi ngëicha tö hī öi ṙòkhöre öt kanò-òv öi teūngen tö e. Akahakūö misī ang Pôl tö e, töp lökten ò nö ngöṙô, “Pò chu manā-angkūö kanūönö i yip tanīnöṙô. Tö lökten chu öt kô tanīnöṙô invëka.” Unôichngöre pöri hēk anga-aṅ nö ngöṙô, “Kūö lōn ngam Tēv pöri, chū-ö öich sāre töngamuh.” (1 Kòr. 15:9, 10) Yē hī ngaich öi haṙivlōn tö nup tököölre ngaich halööktitre, ngaich aṙēlen ang Yāvē. Rö-ö pöri nö kūö hī öi hòṅ teūngen tö ngam inṙē-ěl, kūö Yāvē öri nö kiröngen hanangenlōn tö hī. Lökten yēḵ meh öm haṙivlōn öm fēkö ngam inlahenre höng öt kanò-òv öm teūngen tö ngam inṙē-ělre aṅ in Yāvē, ngaich hòṅ sitih inlahen më-eṅ. Köpölōn më-eṅ tö ò nö rö-ö nö chö-öinyten yip tölöök nö kētö ngam ṙāi ṙinānyi, chö-öinyten yip tö haṙivlōn pöri anga-aṅ tö tököölre, ngaich havantöre nö in ò.—Vë-evkūö Lūkös 5:32; 1 Timôtī 1:15.
5. Ṙòkhöre hòng ayī-ö öi hòṅ teūngen tö ngam inṙē-ělre kahëtö Yāvē nö in hī? Mikahtö elmat hī.
5 Pòrô ngaich öi samyeūheuv ṙò-òten öi löklōn Yāvē, ngaich ötkô ayī-ö öi ngöṙô lōn tö hī öi hòng ayī-ö tö hòṅ teūngen tö ngam inṙē-ělre aṅ in Yāvē. Rö-ö an Yāvē pön kô-en nö milēḵṙen takô tö minë inlahen hī öi samyeūheuv ṙò-òten öi löklōn ò. (Hep. 6:10) Hö-ö pöri angū-ö nö tö ngatī manah, tö ò nö kēngö ngam töng hěng maneuk kūönre nö ṙāi nagm inlahen hī öi löklōn ò hēk raneushö hī inrē. Pön höng kūö ngam ṙanamlōnre anga-aṅ nö kēten e nö inlōnti hī. Lökten yēḵ hī min öi ngölōn tö nup töng inlahen hī öi löklōn Yāvē. Ngaich hòṅ havalvah nup inlahen hī anga-aṅ nö hòṅ aṙēlen hī. Tö vaich min ngam inlahen hī yěi ngatī mufē sā öp töng ngöṙô min ayī-ö tö ngam inlahen Yēsū nö kapah nöng yanëḵngen.—Asātô e nö in ngam Kalatī 2:21.
6. Kūö yòh ök Pôl nö ma-ainyre nö i linöökö lōn Yāvē?
6 Akahakūö misī ang Pôl tö inlahen re yěn pòrô anga-aṅ nö öp tö yòh inlahen, öthō pöri nöng anga-aṅ tö hòṅ teūngen min tö ngam inṙē-ěl aṅ in Yāvē. Kūö yòh pöri anga-aṅ nö ma-ainyre nö i linööklōn Yāvē? Ṙën anga-aṅ nö ngatī inlahen, pò ò nö ha-öiny ngam inlahen tī Yāvē, nö hameuktö ngam tökiröng miṙēḵlōnre nö in ò. (Efi. 3:7) Sā inlahen Pôl in ayī-ö töngamuh öi ngöt i linöökö lōn Yāvē, kūö hī öi kētö thanks ò, rö-ö nö kūö öi hòṅ teūngen tö ngam inṙē-ěl aṅ in ò.
7. Asuh öp töngamuh taneūngen hī inkòlô öi lökten in ngam tö halēnlöng ṙāi ṙinānyi? (Rōma 5:1; Yāköp 2:23)
7 Hěng ön inrē ngam taneūngen hī inkòlô töngamuh öi lökten im ṙāi ṙinānyi, ngam inlahen hī mihôiṅ öi vī ngam innòlôre öi in Yāvē hēk haröhtöre inrē in ò. a Sā haköp hī vahë in ök urěh ātiköl tö ngam innôlö hī in Yāvē nö öt löktö kūö finötnyö hī angū-ö. Löktö im ṙāi ṙinānyi pöri ayī-ö mihôiṅ öi halāmtöre öi in Yāvē hēk haröhtöre inrē öi in ò.—Vë-evkūö Rōma 5:1; Yāköp 2:23.
8. Kūö yòh öi hòṅ ha-öiny inlahen tī Yāvē?
8 Kūö ngam innôlö hī in Yāvē töp lökten hī mihôiṅ öp töng yòh ṙētak öi vë-ekūö ò. Angū-ö ngih tökiröng takô inrē nö inkòlô hī. Yēḵ yip rīkre tarik nö holṙô re nö vë-ekūötēv, ngaich hangṙô cha ang Yāvē, hang nup ṙô hī inrē anga-aṅ yěi hěng tak öi vë-ekūötēv. Teūngen in ṙung tö lanāmö elkuilōnre hēk hanöhlöre yē hī öi vë-ekūötēv. Ötkô pöri ayī-ö öi höng hòṅ chö-öinyten u öi vë-ekūötēv, pön lökten in e mihôiṅ nö ngönlöre ngam innôlö hī öi in Yāvē. (Sal. 65:2; Yāk. 4:8; 1 Yôh. 5:14) Ik sā Yēsū misī nö ing panam, ngaich örheūheu ṙô anga-aṅ nö vë-ekūö Yāvē, pön ṙatö-ellōnre anga-aṅ tö Yāvē min nö hang ṙô ò ngaich angū-ö inrē lökten ngam innôlö cha nö ngönlöre. (Lūk. 5:16) Pōyen ṙô in kētö thanks Yāvē, pò hī mihôiṅ öi hanôltöre öi in ò hēk vë-ekūö ò inrē öi höng lökten in ngam tökētu ṙāi ṙinānyi.
ASUH NUP MIN TANEŪNGEN HĪ INKÒLÔ IP YAMIH ṘĒTAK
9. Asuh nup min inkòlô taneūngen yip tarik tö köp nö löklōn Yāvē ip yamih ṙētak nö lökten im tö halēnlöng ṙāi ṙinānyi?
9 Asuh nup min inkòlô yip tö chiplö tarik Yāvē ip yamih ṙētak nö lökten im ṙāi ṙinānyi? Örheūheu min cha-a nö iyöng kūö ngih panam. Pōyen yip tarik tö ngöṙô lōn tö e nö öt kanò-òv nö ngatī, pön öthěngheuh cha-a nö hang tarik töt kinpahav. Ik sā Yāvē pöri nö vīlen hī öi tarik, ngaich lōnu hē e anga-aṅ tö hī öi örheūheu aṅ. Yēḵ Ātöm öre nö ötköölö fālen, ngaich öthō öre ayī-ö ngatī mufē, pöi örheūheu öre öi aṅ. Kô-en in lohten öi öt hěngheuh öi ngö mufē tö hī mihôiṅ öi örheūheu öi aṅ. Ötrēhěn pöri ayī-ö ngö mufē tö Yāvē nö kēngö ngam hanangenlōnre kūönre nö chö-öinyten hī pön hōten hī öi örheūheu öi aṅ. Kô-en ngam ṙāi ṙinānyi nö tö pōiṙāi nö lömöktö in Yāvē nö inlōnti hī.—Rōm. 8:32.
10. Asūp tö hökka tö më tö hachāmö elkui Kristīön hēk tö më tahëng kiteūm?
10 Rö-ö in min pöi teūngen tö ngam nômö tö örheūheu aṅ ip yamih ṙētak, lōnu pöri ang Yāvē tö hī öi löktökūö ing töngamuh öi afēkö inlahen e. Hökkö ngam ṙētakre yin më töhachāmö elkui Kristīön nö hol Yēsū min nö hayöng nö el halīöngö. (Inm. 20:6) Ngaich hökkö ngam ṙētakre më tahëng kiteūm nö örheūheu nö hang min nö ikūö ngih panam yēḵ e nö peretāis ngam chūök cha nin nö öt hěngö kanihngen. (Inm. 21:3, 4) Maheukku öm më-eṅ min töre öm örheūheu aṅ ikūö ngih panam? Uh ngö mufē chěi tö ngih raneushö meh nö töng kūönen. Pön kirööngen min ngam ṙanamlōn hī hēk kuchīken inrē öi ikūö ngih panam. Angū-ö ön ngih hē e lāinyngen hī öi vīlöng öi ikūö ngih panam.
11-12. Asuh nup min inkòlô tö hökka tö hī el ngam peretāis? (Ngëichkö ngam nyat.)
11 Asehkūöre man tö öp kumchikṙen hī min öi el öp tufömngöre panam. Öthō min më-eṅ öm vahav ötrēhěn inrē nö ōt ngam kinpaha. (Isa. 25:8; 33:24) Hateunngö nup tö sitih kuilōn meh min ang Yāvē nup tö sāḵta nö in minë kuilōn ò. Asuh öp min lōn meh la-en ip tufömngöre panam? Asuh öp min la-en chūök meh öm hòṅ ṙūöhlö heuneū-enre? Hòṅ ṙūöhtö mikahkūöre höng min më-eṅ tö inlahen ngam saëns, töṙeūla hēk chehechōn? Lōnu hòṅ min më-eṅ töre tikökṙô re hēk röng ranöng? Hòṅ lōnu hòng röng min më-eṅ töre öm harūnöre törô-ing hēk pēnting? Lōnu in inrē min ip tufömngöre panam tö yip tarik yip tö heuveū-en nö vī minë aṅ tī hēk vī tisaën minë tö marò-òlkui patī hēk tö heuveū inrē nö asöklen u. Rö-ö nöng anū-ö, pöi hòṅ lōnten yip tarik inrē min yip tö heuveū nö vī panò-òṅ, teūch hēk hēk tö heuveū-en inrē nö vī nya-aṅkūö. (Isa. 35:1; 65:21) Pōyen ṙētak man min yēḵ meh öm el ngam tufömngöre panam öp töng lōn meh min ṙôken haköp meh tö nup la-en tö tufömngöre.
12 Yěn ha-aṅlöng min yip tarik ip tufömngöre panam, ngaich holtö ṙamlōnre min ayī-ö öi ha-öinytö yīhi cha keuheūtngöre chūök ngam ṙanamlōn hē e! (Inl. 24:15) Asehkūö man tö hī öi löktö in minë vahī kūö kuntī Yāvē min öi mikahtökūöre tö ò, irôken kumchiken öi min ip hē e. (Sal. 104:24; Isa. 11:9) Yē hī inrē min ṙòkhöre öi het öi öt falūṙen, ngaich holtö ṙanamlōn re min ayī-ö löklōn Yāvē. Tökiröng ön angū-ö nö inkòlô hī. Kēngen minë inkòlôre hòng min më-eṅ tö kūö lōnre öm ‘hòṅ kumchikngenre kēken tökööl’? (Hep. 11:25) Hö-ö öt ngatī! Nup inlahen hī töngamuh öi harööḵngenre in nup inlahenre, mööḵngöre tö u min mup inkòlô hī öi el öp tufömngöre panam. Köplōn, tö ngam inlahen hī min öi rö-ö höng meukken re öi örheūheu aṅ el öp peretāis. Pön kô-en angū-ö min nö ngatī ip yamih ṙētak. Ṙën anū-ö nö teungten nö ngatī, pò Yāvē nö kēten ngam hanangenlōnre kūönre nö chö-öinyten hī!
Asuh nup inkôlö tö hökka tö meh nö el Peretāis? (Ngëichköm perekrāf 11-12)
HAMEUKTÖ MINLĒḴṘENRE TÖ NGAM HANANGENLŌN YĀVĒ
13. Sitih inlahen öi mihôiṅ hameuktö minlēḵṙenre tö ngam hanangenlōn Yāvē tö hī? (2 Kòrin 6:1)
13 Asūp inlahen hī mihôiṅ hameuktö ngam minlēḵṙen re öi in ngam kahëtö Yāvē ṙāi ṙinānyi? Urěhlö ngam linökölōn Yāvē öi in minë la-en re. (Mët. 6:33) Tölöng inrē angū-ö nö inlahen hī. Lökten ang Yēsū nö kēngö nômöre tö pòkūö hī, “pòn sōtu yip tö aṅ nöng kanahngenre nö ha-aṅhare, in Ò pöri ngam pòkūö cha nö kapah, ngaich choholre nö hēk.” (2 Kòr. 5:15) Yěi kalēḵ alaha löklōn Yāvē, in e min öi mihôiṅ hameuktöre öi öt vaichngö tö ngam tökiröng mirēḵlōn Yāvē tö hī hēk kiröngen ṙô inrē min öi ha-öiny minë tī ò.—Vë-evkūö 2 Kòrin 6:1.
14. Sitih inlahen öi mihôiṅ hameuktö ngam ṙinatö-ellōnre in Yāvē?
14 Ngih töhěng inlahen hī hēk mihôiṅ hameuktö ngam minlēḵṙen re tö ngam hanangenlōn Yāvē tö hī, öi ṙatö-ellōnre in ò ngaich hang minë inlēnö kahëtö ò. Asūp mihôiṅ inlahen hī? Urēhěkūö hī kē fëslare, ngaich hòṅ afēkö ngam lōn Yāvē ayī-ö nö in hī, tö sā hī yěi ṙūöhlö ngam inlahen re im inköpö hēk tö sitih inlahen inrē nup kimānö kahë hī. (1 Kòr. 10:31; 2 Kòr. 5:7) Yēḵ hī hayönglenre in Yāvē öi kē nup fëslare, ngaich vai min ngam ṙòng u, pò ngam ṙinatö-ellōn hī min nö sīöplöre nö in Yāvē, ngönlöre ngam innòlô hī öi ò hēk köp inrē min ngam maheukkö hī.—Rōm. 5:3-5; Yāk. 2:21, 22.
15. Sitih inlahen öi mihôiṅ hameuktö ngam minlēḵṙen re tö Yāvē urēhěkūö kinëken ngam Memorīöl hēk unôichrit afta e?
15 Yěi löngö tī öi yūs ngam ṙētakre urēhěkūö kinëken ngam Memorīöl hēk unôichrit ngam afta, in e min öi hameuktö minlēḵṙen re tö ngam hanangenlōn Yāvē tö hī. Urēhěkūö e më-eṅ öm lēntöhöichṙen hòṅ meh yihtökūö el ngam Memorīöl. Rö-ö nö angū-ö pöm havëten yip tahëng inrē nö yihtökūö nö in ngam Memorīöl. (1 Tim. 2:4) Mihôiṅ min më-eṅ vënyö nang ò tö nup inlahen hī in e. Kò-òren inrē öm hameukhö ò tö minë vitiō Kūö Yòh Ök Yēsū Nö Kapah? hēk Afēkö Ngam Kinpaha Yēsū nö el ngam jw.org. Ngaich më minṙöinylen nö hòṅ havëten më prötör sistör ṙamāngenre nö chuh el mīting hēk ahānga inrē. Asëhkūö re man, yēḵ öp tö chatngen sin sīṅp nö havantöre nö in Yāvē, ngaich kiröngen min ngam ṙamlōn nö el halīöngö ing panam inrē. (Lūk. 15:4-7) Örheūheu in ṙung meukkūö höö el Memorīöl, kalahten pöri öi hameuktö ngam tökiröng hanangenlōnre öi in yip tö tufömngöre yamihtökūö hēk in yip tö marô-angen inrē nö öt yihtökūö nö in ngam Memorīöl.—Rōm. 12:13.
16. Kūö yòh öi hòṅ ṙūöhlö inlahen re öi im la-en inhānga urēhěkūö kinëken ngam Memorīöl hēk unôichrit ngam afta e inrē?
16 Ṙūöhlö inlahen öm më-eṅ kētöre i linöklōn Yāvē urēhěkūö ngam Memorīöl hēk unôichrit ngam afta inrē? In e min më-eṅ hameuktö minlēḵṙen tö minë inlahen tö tī nā Yāvē nö nā Yēsū nö in meh. Yēḵ meh ṙūöhlö inlahenre öm löklōn Yāvē, in e më-eṅ min öm meuk inlahen Yāvē nö holṙen meh hēk ṙūöhlöre inrē min ngam ṙinatö-ellōn meh. (1 Kòr. 3:9) Rö-ö nöng anū-ö, pöm hòṅ kaheuk sakāmö inrē vë-ekūö ngam Tēli Teks hēk minë tö kētu inrē miröökö i alaha ngam Memorīöl el ngam līpöri pustika mumting. Mihôiṅ inrē öm ṙūöhtö mikahkūö re tö minë miröökö öm rīchörch yēḵ meh öm pörsönöl istötī.
17. Asūp tökiröngen ṙanamlōn Yāvē? (Ngëichkö ngam pòks “ Sitih Inlahen Öi Hameuktö Minlēḵṙenre Tö Hanangenlōn Yāvē?”)
17 Lohten min ayī-ö öi öt ṙòkhöre inlahen öi kēken minë tö vënyu nö in ngih ātiköl tö kūö nup ṙētak hī nö öt lönglen. Köplōn pöri tö Yāvē, nö öt asāten nup ötkanò-ò hī anga-aṅ öi in yip tahëng, pò ò nö ngëichkö ṙôken ngam hanangenlōn hī ò. Yēḵ hī hameuktö minlēḵṙenre tö ngam inlōnti kahëtö Yāvē hēk tö ngam tökētu ṙāi ṙinānyi, ngaich kiröngen ṙanamlōn min ang Yāvē.—1 Sa. 16:7; Māk. 12:41-44.
18. Kūö yòh öi kiröngenre ṙô ha-öiny minë tī nā Yāvē nā Yēsū nö in hī?
18 Kūö ngam tö kētu ṙāi ṙinānyi öi teūngen tö inṙē-ěl minë tököölre, hanôlö Yāvē hēk teūngen inrē tö ngam nômö tö-örheūheu aṅ. Ta-a chěi ui vaichngö tö ngam hanangenlōn Yāvē tö hī. Örheūheu öi ha-öiny minë tī ò nö kē-ěkūö hī tö minë inkòlô. (1 Yôh. 4:19) Ta-a chěi töi hameuktö minlēḵṙen re tö Yēsū, ngam tökiröngen hanangenlōn tö hī nö uroh nö kēngö nômöre tö pòkūö hī!—Yôh. 15:13.
TINKÖÖKÖ 154 Piyār Hëi Atöl
a Urēhěkūö ngam kahëtö Kristū ṙāi ṙinānyi ang Yāvē misī nö aṙēlen yip tö chiplö tarikre. Ṙën anga-aṅ nö ngatī inlahen, pön ṙinatu-ellōn anga-aṅ tö ngam kūönre min nö söl kinpahare nö chiplö nö in ò. Tö ngaich angū-ö nö imat nö urēhěngö kinëti ngam ṙāi ṙinānyi—Rōm. 3:25.
