TÖHAKÖÖPÖ ĀTIKÖL 1
TINKÖÖKÖ 2 Yahōva Těrē Nām
Harōilen Yāvē
ṘÔ ING SAMYEŪHEU 2025: ‘Harōilen Yāvē, kūö ngam töhet minë-eny ò.’—SAL. 96:8.
ASUH ÖP MIN HAKÖP HĪ
Mikahtökūöre in min tö hī öi sitih inlahen ha-öinyö Yāvē ngam tö hòṅ kētu nöönyö.
1. Asuh nup töngamuh tö mötllö nö ngahëichkö më tarik?
PŌYEN yip tarik töngamuh töng ngamëichköre nöng fēkö inlahen re, tö sā yip rīkre tarik mahameuktö nup la-en re nö el ngam sōsöl mitiā pön hòṅ eū-eu tö tarik. Kūönen pöri më tarik maha-öinyö Yāvē. In ngih ātiköl in min öi mikahtökūöre tö manah ngam kinëtö nöönyö Yāvē hēk kūö yòh öi hòṅ kētö nöönyö ò hēk mikahtökūöre inrē min ayī-ö öi sitih inlahen mihôiṅ kētö nöönyö Yāvē hēk sitih inlahen inrē ang Yāvē nö harōilö ngam minë-enyre ip yamih ṙētak.
TÖ SITIH MANAH ANG NGAM KINËTÖ NÖÖNYÖ YĀVĒ?
2. Sitih inlahen ang Yāvē nö harōilö ngam minë-enyre nö ikui ök rôngö Sināi? (Ngëichkö ngam lamā-uk nyat.)
2 Asuh öp manah ngam inrōilö? Yěn yih ṙung ngam ṙô inrōilö nö imat ngam Paipöl, ngaich töngö manah angū-ö inrōilö ngòh töhěng tak tarik. Lökten yip tarik nö pingangkūö yěn meukö ò. Ik sā Yāvē misī nö ṙānyen yik Israel nö i Aikup, ngaich hameuktöre anga-aṅ nö harōilö ngam minë-eny re. Asëhkūö re ik sā yik tö pōyen tarik aṅ Israel nö sökhak nö lātaṙeū ngam rôngö Sināi, ngaich kapahare cha-a nö hòṅ hang ngam ṙô ngam Tēv. Hěng ngaich ök tökufëy taṙul mahanyattö kūi ök rôngö. Chalô ngaich tö ngam tökalēḵ kumyeūnö ngaich löknyö in ök rôngö ök lūl nö sā inlahen tökalē-ekūö tameūyö. Kayīna ngam panam ngaich kalē-eṙô minë kunṙôkö hēk tö minë hanyālö inrē. (Man. 19:16-18; 24:17; Sal. 68:8) Pōitô ngaich nuk römpět nö keuheūtngöre chūök. Pingangkūö ngaich yik aṅ Israel nö meuk ngam kanôlò Yāvē.
Hameukhö mat më Israel ang Yāvē tö ngam töt insā-av nööinyöre nö ikui ngam ṙôngö Sināi (Ngëichköm perekrāf 2)
3. Asūp inlahen hī mihôiṅ harōilen Yāvē?
3 Mihôiṅ öi ayī-ö tarik harōilen Yāvē? Heūṅ mihôiṅ in. Öi sitih inlahen? Vë-eny yip tahëng tö minë töt insā-av la-en ò hēk minë tövai inrē tinrīken ò. Yěi hayöökaṙen inrē tö Yāvē öi kēken nup tölöök la-enre, ngaich kēten u ayī-ö nö nöönyö ò. (Isa. 26:12) Mihôiṅ in pōyen haköplö öi in Rācha Tāvit. Örheūheu anga-aṅ nö harōilen Yāvē. Hěngheuh anga-aṅ nö in ök miyöngö Israel nö ngöṙô nö vë-ekūötēv, “Ō mā Tēv kinröngö meh an, minhôiṅyö meh, kanôlò Meh, kanô-òṅ meh, minā-aṅ meh inrē pòn ṙòkhöre nup elhalīöngö eltumlat inrē nö Më-ë Meh.” Ngöṙô hēk Tāvit unôichrit ṙô ò nö vë-ekūötēv nö ‘ikūö yik tömaṙôngö . . . hakôlò ngam Mā Tēv yin.’—1 Kin. 29:11, 20.
4. Sitih inlahen ang Yēsū nö ha-öinyö Yāvē?
4 Ik sā Yēsū misī nö ing panam ngaich örheūheu anga-aṅ nö harōilö minënyö ngam Yöngre. Ngaich yē ò ṙung nö hameuktö nuk pinngangkūö, ngaich vë-ekūö yik tarik anga-aṅ tö ò nöng löktö im inyööken re tö Yāvē nö hameukten u. (Māk. 5:18-20) Ha-öinyö Yāvē anga-aṅ nö löktö i minë ṙô re nö vënyö inlahen ngam Yöngre hēk ngam tinrīken ò inrē nö in yip tarik. Ik sā Yēsū nö haköphöti nö el ngam patī pūlngö. Ngaich hěng tak ök yöngnyīö tö 18 samyeūheu rò-òten nö aṅhav el alaha tök tötlöök ma-ahānga. Angū-ö lāinyngen ngam yöngnyīö nö singutnyöre uk ngaich ötrēhěn nö kô nö hachiplöre. Kò-òren öi afītöre tö inlahen ò nö iṙôkö kanihngen lohten anga-aṅ. Haṙivlōn ang Yēsū nö meukö ò. Lökten nö chuh in ò ngaich holtö hanangenlon re nö ngöṙô, kuròh ngaich man ṙānyu ṙā-ang im ötkumlēḵ-enre. Ngaich ik sā Yēsū nö ṙāḵtö eltīre nö in ò ngaich ilööṙen anga-aṅ nö chiplöre. Ha-öiny ngam Tēv ngaich anga-aṅ! (Lūk. 13:10-13) Kirööngen ṙô ngam yöngnyīö nö ha-öiny tī Yāvē kūö ò nö lööken. Pōyen nup inrē mihôiṅ inlahen hī öi ha-öinyö Yāvē öi sā inlahen ngam yöngnyīö taheui.
KŪÖ YÒH ÖI HÒṄ KETÖ NÖÖNYÖ YĀVĒ?
5. Kūö yòh öi hòṅ hameuktö minlēḵṙen re tö Yāvē?
5 Milēḵṙen in ayī-ö tö Yāvē lökten öi ha-öinyö ò. Pōyen nup mihôiṅ lāinyngen hī öi mileḵren tö Yāvē. Pò Yāvē nö aṅhav in tö ngam töt kūöngu kumleḵ. (Sal. 96:4-7) Löktö in minë tö vīlöng inrē öi akahakūö tö ò nö tökiröngen mikah. Yāvē inrē kamëtö nômö hī hēk kē-ěkūö hī inrē anga-aṅ tö minë tötṙanāngen chehen. (Inm. 4:11) Tö chiplö ang Yāvē. (Inm. 15:4) Teungten anga-aṅ nö in minë töng sitih la-enre hēk örheūheu inrē nö hateungngö minë kinlēḵngôre. (Yôs. 23:14) Lökten ang pròfět Yarimiā nö ngöṙô nö vë-eny inlahen ò, “pòn vē tö-akahaṙa in vē pumnāmö tarik i nup pūlngö cha inrē nö ṙòkhöre öt hěng tak tösā meh”! (Yar. 10:6, 7) Kô-en nö pōyen minë lāinyngen hī mihôiṅ öi kētö minlēḵṙen ngam Yöngre Yāvē. Hěnghöre hangenlōn inrē ayī-ö tö ò.
6. Kūö yòh öi hangenlōn tö Yāvē?
6 Kūö ngam hanangenlōn hī tö Yāvē lökten öi ha-öinyö ò. Kūö nup tövai tinrīken Yāvē ayī-ö öi hangenlōn tö ò. Pò ò nö tö aṙē-ěvlōn tööḵlö inrē tö neūkölon. (Sal. 103:13; Isa. 49:15) Hameuktö hanangenlōnre inrē anga-aṅ nö in hī, yěn meukö hī öi haṙivlōn ngaich haṙivlōn inrē anga-aṅ. (Sak. 2:8) Havëten hī anga-aṅ öi hanòlö ò. Lōnu inrē anga-aṅ tö hī öi mikahtökūöre tö ò hēk haröhtöre inrē öi in ò. (Sal. 25:14; Inl. 17:27) Īnu ang Yāvē tö ngam inyāchngö, ngaich “ngëichkö nup el halīöngö el tumlat inrē, hachohlö yāich An nö ṙā-ang el tumlat.” (Sal. 113:6, 7) Tö-akaha takô anga-aṅ nö Tēv hī. Lökten öi öt ansökngen öi ha-öinyö ò.—Sal. 86:12.
7. Asuh öp ihih tötṙanāngen kinë-ekūö hī la-en?
7 Lōnu in tö yip taṙòkhöre tarik nö mikahtökūöre tö Yāvē lökten öi ha-öinyö ò. Pōyen yip töngamuh tarik töt akahakūö tö ngam kanô-en inlahen Yāvē. Kūö ngam Satān nö sūöichkö inlahen ò nö keuheūtngöre chūök hēk hanyatngö mat më tarik inrē tö nup tökô-en. (2 Kòr. 4:4) Lökten nö ngölōn yip tarik tö ngam Tēv nöng örheūheu nö tainy, töng hamökkö inlahen re inrē nö kētö sācha. Ngö mufē inrē cha-a tö ngam Tēv nö töt chumkūöṙen hēk tī ò inrē në kanihngen ikūö ngih panam tö ṙô cha. Akahakūö pöri ayī-ö tö ngam kanô-en inlahen ngam Tēv. Ngaich angū-ö ngih ṙētak hī mihôiṅ öi vënyö nang yip tahëng tö minë tövai tinrīken Yāvē hòṅ cha nö ha-öinyö ò. (Isa. 43:10) Vënyu nang in tö ngam Salmai tö 96 mirūlö öi sitih inlahen mihôiṅ ha-öinyö Yāvē. Ta-a chěi töi kakken minë tö kūichhötvö inlahen ngam Tēv im Salmai. Hē-e min ayī-ö kò-òren öi kakkö ngam inlahen re öi sitih inlahen mihôiṅ kētö nöönyö Yāvē ngam tö hòṅ ha-öinyö.
SITIH INLAHEN MIHÔIṄ ÖI KĒTÖ NGAM NÖÖYÖ YĀVĒ?
8. Vë-eny öp töhěng mihôiṅ inlahen hī ha-öinyö Yāvē? (Salmai 96:1-3)
8 Vë-evkūö Salmai 96:1-3. Nup töng ṙô hī öi vë-eny inlahen Yāvē, löktö in u öi ha-öinyö ò. Vënyu nang yin më tarik Yāvē nö löktö in në miröökö, “tikökhökūö ngam Mā Tēv [Yāvē],” “hakòlô ngam minë-eny ò,” “kaheuk sakāmö hameuktö ngam inyööken aṅ in Ò. Vënyö ngam kanôlò Ò i vē pumnāmö tarik.” Lökten in u ayī-ö mihôiṅ öi ha-öinyö ngam Yöngre Yāvē. Holtö ngam töt pinhë-ekūö re misī yik tö chiplö Yahūti hēk tö yik raneh senchuri Kristīön nö harōilö ngam minë-eny Yāvē. Öt ṙākenre cha-a nö vënyö minë tinrīken Yāvē hēk tö nup inlahen tī ò inrē nö in cha. (Tan. 3:16-18; Inl. 4:29) Sitih inlahen ayī-ö töngamuh öi mihôiṅ harōilö minë-eny Yāvē?
9-10. Asūp haköplö hī in ngam ekspirīön Enychölinā? (Ngëichkö ngam nyat.)
9 Töi ngëichkö ngih ekspirīön inlahen Enychölinā a ngòh mi-iyöng Amërika. Töng fömnyöre anga-aṅ nö im chūökre nö la-evṙen. Öt pinhë-evkūö anga-aṅ nö vënyö inlahen Yāvē nö in yip holre hēk harōilö ngam minë-eny ò inrē. Halēnlöng hē e öp töhěng mīting nö el ngam òfis, ngaich havëtu yip tö tufömngöre tö la-evṙen nö in e. Kö vënyö nup inlahenre cha-a nö el ngam mīting. Ngöṙô lōn ang Enychölinā, hameuktö nup nyat chin min hēk vë-enyre inrē öich Vamënyen Yāvē hēk ṙamlōn inrē öich in minë inlahenre. Ök urēhěkūö ò pöri tarik, vë-enyre anga-aṅ sin nö lamöktökūö nyīni-i re nö in më Vamënyen Yāvē. Ötlēnö ṙô anga-aṅ nö vënyö inlahen më Vamënyen Yāvē. Ngöṙô ang Enchölinā, “Tarūka nômö chū-ö hē chu hangṙô ò. Ngöṙô mufē pöri chū-ö, ‘iṙôken minyôny-aṅ ang nö vë-eny inlahen Yāvē, öt halöngngen ò chin nö ngatī ṙô. Hòṅ vë-eny nang cha chin tö Yāvē nö öt tö ngatī inlahen nö Tēv.’”
10 Ik sā öp tarik nö keuheūtöṙô nö vënyö inlahen re. Ngaich rahëchnyenṙô ang Enychölinā nö vë-ekūötēv nö ellōnre. Ngaich haṙēmṙô re anga-aṅ nö in ngam tarik nö ngöṙô, “Ngatī chin chū-ö inrē lamöktökūö nyīni-i re öich Vamënyen Yāvē, ṙömöng köp chin inrē töngamuh öich löklōn ò.” Ik ranehnyö ṙô ò, tarōlaṙen ṙô ngaich cha-a nö el ngam uròhò, īnu pöri ang Enychölinā tö lanāmö. Hameukhö mat cha anga-aṅ tö minë nyat cha nö könvensön nö holtö më holre nö ṙamölōn. Holtö mikah elmatre anga-aṅ nö vë-eny nang më holre tö ngam ṙinatö-ellōnre. (1 Pīt. 3:15) Asuh ngaich ök ṙòng e? Ik sā Enychölinā nö keuheūtöṙô nö ṙò-òv, lāmta ngaich ngam tarik. Vë-enyre inrē anga-aṅ tö ò nö köplōn tö nuk ṙanamlōnre ik sā ò nö in më Vamënyen Yāvē. Ngöṙô ang Enychölinā: “Höng Yāvē tö hòṅ kētu nööinyö, lökten ayī-ö hòṅ lārītö ò öi ṙò-òv. Tökiröng inrē angū-ö nö minlēḵken hī öi harōilö ngam minë-eny ò.” Yēḵ yip tarik töngamuh nö ötlēḵkôre tö ngam minë-eny Yāvē, ngaich angū-ö ṙētak hī mihôiṅ harōilö ngam minë-eny ò hēk ha-öinyö ò inrē.
Löktö in minë ṙôre, in minë töpōiṙāi chehenre hēk löktö in ngam tinrīkenre öi mihôiṅ ha-öinyö Yāvē (Ngëichkö minë perekrāf 9-10, 12, 14) b
11. Sitih inlahen yik Kristīön nö örheūheu nö hang ngam lökngörit chööngö in ngam Salmai 96:8?
11 Vë-evkūö Salmai 96:8. Löktö in nup töpōiṙāi chehenre öi mihôiṅ ha-öinyö Yāvē. Ngatī inlahen yin nö örheūheu më tarik Yāvē. (Inch. 3:9) Sā inlahen yik Israel misī ik sā cha nö vī ök chūök vinë-ekūötēv, ngaich kētö minë tōnēsön cha-a nö i mineukṙen e. (2 Rā. 12:4, 5; 1 Kin. 29:3-9) Yik rīkre mahaköp nö in Yēsū nö kētö minë ‘aṅ in re cha-a kanôlò’ nö hayööken më mahaköp nö hateūngö minë hanakten cha. (Lūk. 8:1-3) Ik raneh senchurī inrē yik rīkre Kristīön tö teunghu tö ngam tökiröng inyāchö, ngaich hayöökaṙen cha-a tö yik tahëng holmaneukre nö sömtu rilīf. (Inl. 11:27-29) Ngatī inrē ayī-ö töngamuh öi holtö ellōnre öi kētö minë tōnēsön öi ha-öinyö Yāvē.
12. Yēḵ hī öi kētö minë tōnēsön, sitih inlahen angū-ö nö löktö nööinyö Yāvē? (Ngëichkö ngam nyat.)
12 Töi chumkūöṙen tö ngih töhěng ekspirīön inlahen minë kahëtö hī tōnēsön, nö lökten in u ang Yāvē nö ha-öinyö. Marô-òten hē e ngam tökiröng inyāchö nö i Chimpavē ik 2020. Hěng ngih ripōt vamënyen inlahen yik tö lāku ṙôken tarik tö kapah kūöre nö hakten tö nya-aṅkūö. Iyöng in e ngòh sistör hī ang Priskā. Örheūehu anga-aṅ nö kiröönngöre nö ahānga el ṙētak ngam Wednesday hēk Friday inrē. Höng iṙūöhen anga-aṅ nö im la-en inhānga, pòrô nö ōt ngam inyāchö hē e. Uroh inrē nö yih ngam ṙētak unvòhò, iṙūöhen pöri ngam sistör nö im la-en inhānga. Ik sā yik aṅ chiṙö patī ò nöng meūkö ò nö ahānga nö im ṙētak ngam inlahen ò öre nö la-evṙen nö el ngam panò-òṅ. Ngaich ngöṙô cha-a nö ötlēkö elnang ò: “Töng kapah man kòl min më-eṅ tökūö neūköre.” Ṙatö-ellōnre pöri ngam sistör tö Yāvē min nö chumkūöṙen tö ò. Lökten anga-aṅ nö ngöṙô nö in cha: “Örheūheu ang Yāvē nö chumkūöṙen tö më tarikre.” Unôichngöre ngaich ngam sistör nö teūngen tö minë rilīf re lamöktö el ngam söngkötön. Kūö minë tōnēsön kahëtö më prötör sistör tö keuheūtngöre chūök nö ing panam. Löktö in u më prötör sistör aṅ Chimpavē nö teūngen tö minë tötṙanāngen chehen. Pingangkūö më aṅ chiṙö patī ngam sistör, ngaich ngöṙô nö in ò: “Kô-en ngam Tēv meh nö örheūheu nö chumkūöṙen tö meh. Lōnu in īhö hòṅ mikahtökūö re tö inlahen ò.” Unôichrit e ngaich më tö sat tak aṅ chiṙö patī ngam sistör nö yihtökūö nö el mīting.
Mihôiṅ ayī-ö öi löktö in minë töpōiṙāi chehenre öi ha-öinyö Yāvē (Ngëichköm perekrāf 12) c
13. Sitih inlahen öi ha-öinyö Yāvē öi löktö in minë tinrīken re? (Salmai 96:9)
13 Vë-evkūö Salmai 96:9. Löktö in minë tinrīken re öi ha-öinyö Yāvē. Yip kūönṙô tö la-evṙen hēk yip tö hòṅ la-evṙen inrē nö el ngam töhet chūök nö hòṅ īnu cha-a tö hanëtö. (Man. 40:30-32) Ngatī inrē ayī-ö töngamuh öi hòṅ īnu tö hanëtö. Ngamuh pöri tö mötlö tötṙanāngen nö ih hī öi hòṅ ha-et ngam tinrīken re. (Sal. 24:3, 4; 1 Pīt. 1:15, 16) Hòṅ ma-ainyren ayī-ö luhngen ngam hötṙeh tinrīken ngaich hayutlöre tö ngam tufömngöre tinrīken. (Kòl. 3:9, 10) Töngö manah, tö hī ötkô öi fēkö nup ṙô hēk nup la-en surīkhö Yāvē. Ngamuh pöri mihôiṅ inlahen hī öi pītnyöre asīnkö inlahen Yāvē. Hòṅ asā mufē ò ayī-ö hēk sā inlahen ò inrē öi hameuknyö minë tövai tinrīken. Yip tarik sin töng iṙūöhen nö kēken minë tötlöök la-en hēk tö tainy inrē, löktö im inyööken re cha-a tö Yāvē nö halööktitre hēk hayutlöre inrē tö ngam tufömngöre tinrīken.
14. Asūp haköplö hī in ngam ekspirīön Chëk? (Ngëichkö ngam nyat.)
14 Töi chumkūöṙen tö ngih ekspirīön Chëk. Tö tainy hēk tö angëḵ anga-aṅ nö tarik, uroh yip tarik nö Sī-ö ngöṙô tö ò. Pōyen nup fālen Chëk kahëken ò lökten anga-aṅ kētu sācha tö ngam kinpaha. Ik sā ò nö hökkö ngam inlahen re nö kētu sācha, ngaich istötī anga-aṅ nö in öp töhěng tak prötör ngam yamih nö el chēl nö haköpten më tarik. Pōyen misī nuk tötlöng kahë ò la-en. Halööktitre pöri anga-aṅ nö ṙāngen minë hötṙeh tinrīkenre ngaich kētöre nö im vinôkö. Yěi chumkūöṙen öi ngëichkö inlahen Chëk, nö harīkngöre takô ngam tinrīken ò. Ik ṙētak ngam kinëtö sācha ò nö fëli. Ōt yik rīkre amahati chamuh in ò nö havë-engritre hēk meutnyi mak mat inrē cha-a. Ngöṙô öp töhěng tak pulīs: “Öthěng tak tö sā ötlanöökö Chëk hēk öthěng tak pöri ngaich tö sā vanayö tinrīken ò.” Unôichrit ngam töhěng afta inlahen Chëk nö kapah, ngaich kēken ngam mīting ngam töhěng tak prötör nö el ngam chēl, meukkūö öp töhěng tak anga-aṅ aṅ el ngam chēl tö möl takô nö yih nö el ngam mīting. Kūö yòh anga-aṅ nö yihtökūö? Pön pingangkūö anga-aṅ nö meuk inlahen Chëk nö halööktitre, lökten ngaich anga-aṅ nö hòṅ haköp inlahen Yāvē ngaich vītöre nö Vamënyen Yāvē. Löktö in ngih ekspirīön öi akahakūö tö hī mihôiṅ ha-öiny ngam Yöngre Yāvē öi löktö in minë tinrīkenre!—1 Pīt. 2:12.
Mihôiṅ öi löktö in minë tinrīken re öi ha-öinyö Yāvē (Ngëichköm perekrāf 14) d
SITIH INLAHEN ANG MIN YĀVĒ NÖ HARŌILÖ NGAM MINË-ENYRE IP YAMIH ṘĒTAK?
15. Sitih inlahen ang Yāvē min nö harōilö ngam minë-enyre? (Salmai 96:10-13)
15 Vë-evkūö Salmai 96:10-13. In minë manā-aṅ miröökö ngam Salmai tö 96 öi vënyu nang tö Yāvē nö rācha, ngaich öthō anga-aṅ nö haroklūṙen yěn akah fālen. Röhta ön ngam inlahen ò min nö harōilö ngam minë-enyre. Nö sitih inlahen? Löngö tī nö akah fālen. Röhta inlahen ang Yāvē nö ha-etngen ngam tökiröng Pēpilön, kūö minë tö minyôny tinlööken nö hachōchngen ngam töhet minë-eny ò. Yip tarik min mameuk inlahen pinyāngö ngam tökiröng Pēpilön, lohten min nö rīkre yip ṙamatö-ellōnre nö in Yāvē ngaich holṙen hī öi ha-öinyö Yāvē. (Inm. 17:5, 16; 19:1, 2) Ngaich ip ṙētak ngam Armakētòn kinyūngö Yāvē min nö ha-etī ngam panam ngam Satān hēk tö yip tarik inrē tötlamëkôre tö ngam minë-eny ngam Tēv. Yip tö hangenlōn pöri tö Yāvē, hamang chööngö ò hēk holtö ṙanamlōnre inrē nö ha-öinyö ò, cha-a min tö laklöng tö ò. (Māk. 8:38; 2 Tös. 1:6-10) Yěn keuheūt min ngam töhěng köṅny samyeūheu inyööngö Kristū, keuheūten min inrē ngam manā-aṅ kinlaha, ngaich hē e takô min Yāvē nö ha-etlö ngam töhachōchiyö minë-enyre. (Inm. 20:7-10) Ngaich möl min ngam ‘tumlat nö tööḵlö tö inkaha kanôlò ngam Mā Tēv, sā inlahen ngam mai nö tööḵlö tö ngam mak.’—Hap. 2:14.
16. Asūp ngaich afēkö meh inlahenre? (Ngëichkö ngam nyat.)
16 Fēkö ngam inlahen hī man ip hē e öi ṙòkhöre ha-öinyö Yāvē ngam tö minā-av tö e! Hanöng sā ngam sakāmö pöri nö öl nö yih, töi iṙūöhen ui ṙāken re ha-öinyö Yāvē. Tötṙanāngen angū-ö nö inlahen hī, lökten më Yōm La-en nö kūichngen ngih ṙô ing samyeūheu 2025 nö lökngörit im Salmai 96:8 ngam tö ngö: ‘Harōilen Yāvē, kūö ngam töhet minë-eny ò.’
Ṙöhtö inlahen ang Yāvē min nö harōilen ngam nööinyöre! (Ngëichköm perekrāf 16)
TINKÖÖKÖ 12 Yahova, Mahān Pörmëshvör
a Harīkiyö minë-eny yip rīkre tarik.
