TÖHAKÖÖPÖ ĀTIKÖL 3
TINKÖÖKÖ 35 ‘Chiyāta Ehëmiyat Röknëvalī Pātëṅ Pehechanò’
Kē Nup Fësla Tö ṙamlōn Tī Tö Yāvē
‘Ranehlö an ngam pinhë-eṅkūö tö ngam Mā Tēv, lātuhēt mat inrē ngam inkaha ngam töhet.’—INCH. 9:10.
ASUH ÖP MIN HAKÖP HĪ?
Sitih inlahen öi mihôiṅ löngö kahë tö fëslare yēḵ hī öi aṅhav in tö ngam mikah hēk mikah elmat?
1. Asuh nup mihôiṅ yamih kanihngen hī?
KAHEUK sakāmö in ṙung öi kē minë tö ṙōlkangen fësla. Ōtre minë fësla tö lööṙen tö sā ngih, asuh öp min nāsta hī hēk iṙē-ang mat öi min öi haṙòh. Ōtre pöri nup fësla tö kihngen nö kē-ě tö hī, kūö hī öt akahakūö tö inlahenre yěi hòṅ kēḵ u. Pöi yěi kēḵ u min anū-ö fësla ngaich mihôiṅ min nö lökngöre ngam el alaha hī, ngam ṙanamlōn hī hēk lökngöre inrē yip aṅ patī hī, mihôiṅ inrē min angū-ö nö lökngöre tī tö ngam inlahen hī öi ha-önyö Yāvē. Ṙòkhöre in öi lōnu töre öi kēḵ nup fësla nup tö yöölen tī tö hī hēk tö yip aṅ patī hī inrē. Möthë öi lōnu tö Yāvē nö ṙamlōn nö in nup töng kahë hī fësla.—Rōm. 12:1, 2.
2. Asuh nup mihôiṅ mahayööken meh öm löngö kahë tö fëslare?
2 Yēḵ meh min öm (1) urěh mikahtökūöre tö nup inlahngen nup kahë re fësla, (2) mikahtökūöre tö ngam mufē Yāvē i alaha e hēk (3) aṙū-uti mufē inrē öm fēkö inlahen e, ngaich möl min öm löngö kahë tö fëslare. Anū-ö nun min në tö kakka tö hī in ngih ātiköl, mikahtökūöre inrē min ayī-ö tö hī sitih inlahen mihôiṅ öi harun ngam mikah hēk mikah elmatre inrē.—Inch. 2:11.
URĔH MIKAHTÖKŪÖRE TÖ NGAM INLAHEN
3. Hachō elmat hī nö kūö yòh nö töt ṙanāngen ngam inlahen hī öi hòṅ mikahtökūöre tö inlahen nup kahërse fësla yēḵ hī öi hòṅ löngö kahë tö fësla.
3 Yēḵ meh öm hòṅ kēḵ öp tölöng fëslare, ngaich hòṅ urěh më-eṅ hòṅ mikahtökūöre töp inlahen e. Kūö yòh angū-ö nö tötṙanāngen? Fēkö inlahen öp töhěng tak tarik tö īnu tö ngam tökiröng invah. Chuh in öp tòktör anga-aṅ nö hameuktöre. Ilööṙen hòng min ngam tòktör nö le-ënan nöng öt hatöönö ò tö inlahen ngam invah ò hēk höng öt cheköpö ò inrē? Öthō öp min tö akaha tòktör nö ngatī inlahen. Ngatī inlahen min më-eṅ öm löngö kahë tö fëslare, yěm urěh öm mikahtökūöre tö inlahen öp kahëre fësla. Sitih inlahen pöri më-eṅ mihôiṅ mikahtökūöre tö inlahen e?
4. Sitih inlahen öm mihôiṅ mikahtökūöre tö öp tö hěng inlahen? (Inchōḵ-oṙô 18:13) (Ngëichkö ngam nyat.)
4 Ṙōlheuh in mihôiṅ öi höng löktö in minë intöönö öi akahakūö tö nup inlahen. Tö sā ṙāngen meh öre yěm havëka chuh el öp töhěng pāti (party). Sitih inlahen mihôiṅ më-eṅ kēḵ fëslare yěm hòṅ chuh in e hēk yěm hö-ö? Yēḵ meh öt uroh mikahkūö tö inlahen öp tarik vamīlö ngam pātī hēk öt akahakūö inrē tö nup tö halēnlöng tö ò nö im pāti, ngaich mihôiṅ më-eṅ öm chuh in ò öm hatön öm ngöṙô: “Ihē öng min ngih pāti nö kēkaren hēk isuh inrē? Iṙôken min yip yamihtökūö nö in e? Achīö öp min ngamëichken e? Achīö inrē min yip yamihtökūö nö in e? Asuh min inrē nup tö kēkaren nö el e? Silôṙö hòng min ngam ka-eūt nö in e?” Yēḵ meh min öm akahakūö tö sanapṙô në intöönö ngaich löngö kahë min më-eṅ tö fësla.—Vë-evkūö Inchōḵ-oṙô 18:13.
Hatön öm mikahtökūöre tö ngam inlahen (Ngëichköm perekrāf 4) a
5. Hòṅ asuh öp inlahen meh unôichrit meh öm mikahtökūöre tö öp töhěng inlahen?
5 Unôichrit meh öm mikahtökūöre tö ngam inlahen ngaich hòṅ ōtre inrē nup tö hòṅ afēka tö meh. Tö sā meh yěm akahalōn tö yip tarik min yamihtökūö nö el ngam party nö töt hamang minë töhet chööngö Yāvē acha-a hēk silôṙö inrē min ngam ka-eūt nö el öp pāti, öt mahayōmkūöṙen inrē ngam pāti, sitih inlahen öm min? Öt ngöṙô lōn hòng më-eṅ töre öm höng kihngen min yěm chuh el ngam party? (1 Pīt. 4:3) Mihôiṅ inrē më-eṅ öm fēken në: Ngam ṙētak ngam pāti nö ṙātu, hö-ö hòng angū-ö nö ṙētak meh hòṅ chuh el mīting hēk ṙētak meh inrē öm ahānga? Yēḵ meh min öm afītöre öm fēkö në tö ngatī inlahen, ngaich lööṙen min më-eṅ öm kēḵ öp tölöng fëslare. Hěng pöri inrē öp ihih inlahen meh urērěkūö meh öm kēḵ fëslare. Ngaich man taheui öm ngëichkö ngam mufēre öm kēḵ öp fëslare hòṅ ngëichkö ngam mufē Yāvē pöri më-eṅ inrē nö i alaha ngam tö hòṅ kahë meh fësla. Hòṅ mikahtököre më-eṅ tö ngam mufē ò nö i alaha e.—Inch. 2:6.
MIKAHTÖKŪÖRE TÖ MUFĒ YĀVĒ
6. Sā ṙô ngam Yāköp 1:5 asuh öp tö hòṅ havëkö hī öi in Yāvē, ngaich kūö yòh?
6 Yēḵ hī öi hòṅ mikahtökūöre tö ngam mufē Yāvē tö öp töhěng inlahen, ngaich hòṅ vë-ekūö ò ayī-ö öi vë-ekūötēv. Pön kilēḵngôre anga-aṅ tö ò min nö kētö mikah hī ngam lökten hī min öi akaha elmat tö ò yěn ṙamölōn nö in öp kahë hī fësla hēk hö-ö. Kē-ěkūö hī öi ṙòkhöre ang Yāvē tö ngih mikah nö ‘öt miṙēngen hī hēk öt hatanyken hī inrē.’—Vë-evkūö Yāköp 1:5.
7. Sitih inlahen öm mihôiṅ mikahtökūöre tö ngam mufē Yāvē? Kētö inchōḵelmat.
7 Unôichrit inlahen meh öm havëkö mikahre öm in Yāvē, ngaich hòṅ chumkūöṙen më-eṅ tö ò nö sitih inlahen nö kētö sanap nup ṙô meh öm vë-ekūötēv. Yěi ngëichkö ngam inchōḵ elmat, yēḵ meh öre öm mahavöt ngaich lō-ongkūö më-eṅ. Hatön ngam töhěng tak tarik pöri më-eṅ ngam mi-iyöng in ngam kamngö. Höng kiröönngöre hòng min më-eṅ öm höng öt hangihtöṙô ò? Hö-ö yiröh. Yēḵ ò min nö vënyö nang meh tö ngam talöökö, ngaich chumkūöṙen min më-eṅ öm hangihtöṙô ò. Ngatī inlahen ayī-ö öi havëkö mikahre öi in Yāvē, ngaich hòṅ chumkūöṙen ayī-ö tö nup kahëtö ò sanapṙô hī. Hòṅ pītnyöre ayī-ö öi hòṅ mikahtökūöre tö ngam mufē Yāvē öi höng lökten in minë chööngö aṅmat ngam Paipöl hēk minë lökngörit chööngö inrē. Tö sā meh yěm havëtu öm chuh el öp pāti, hòṅ urěh më-eṅ öm fēkö në intöönö: Sitih ṙô öng ngam Paipöl nö vënyö inlahen minë pāti minë chūök meh tarik nö öt ṙap minë elkuilōnre tövaich? Sitih ṙô inrē angū-ö tö inlahen ngam tötlöng innôlö hēk tö ngam inlahen hī urěhlö ngam Pūlngö ngam Tēv hēk yěi uěhlö minë kuilōnre?—Mët. 6:33; Rōm. 13:13; 1 Kòr. 15:33.
8. Sitih inlahen öm yěm hòṅ ṙahëichtöre lōn tö nup tö hòṅ mikahkūöre? (Ngëichkö ngam nyat.)
8 Pī-a më-eṅ öm ngölōn tövai an min ngam inlahen chu yěich ṙahëichtöre mikahkūö töp inlahen. Öm sitih inlahen? Mihôiṅ më-eṅ öm kēḵ inyöökenre öm in yip tö ekspirīönu prötör hēk sistör. Hēk kò-òren öm hakôtenre öm risörch. Pōyen nun minë in hī pöplikēsön chūök hī mihôiṅ öi risörch, tö sā ṙēngen ngam līpöre Yöhōva Kē Sakshiyô Kē Līyē Kōchpīn Kā-et hēk tö ngam Vöchön Chō Tikāyē Rah mihôiṅ më-eṅ öm höng teūngen tö töpōyen mikahkūöre öm höng lökten in u. Hòṅ chumkūöṙen pöri më-eṅ töp lāinyngenre öm kūö yòh öm risörch, kūö meh öm hòṅ haṙamlōn Yāvē öm lökten in nup kahëre fësla.
Mikahtökūöre man tö minë mufē Yāvē (Ngěichköm perekrāf 8) b
9. Ihē öi mihôiṅ ṙatö-ellōnre tö Yāvē nö ṙamölōn tö nup katöllö hī fësla? (Efisös 5:17)
9 Ihē öi mihôiṅ ṙatö-ellōnre tö Yāvē nö ṙamölōn tö nup katöllö hī fësla? Urěh sin ayī-ö hòṅ mikahtökūöre tö ò. Ngöṙô an ngam Paipöl: “Ranehlö mikah an ngam pinhë-eṅkūö tö ngam Mā Tēv, lā tuhēt mat inrē ngam inkaha ngam Töhet.” (Inch. 9:10) Teūngen min ayī-ö tö mikah elmatre yē hī öi akahakūö tö ngam Tēv. Töngö manah yěi akahakūö min tö nup tinrīken ò, kuilōn ò hēk tö nup ööilōn ò hēk töt ööilōn ò inrē. Lökten öm ngöṙô hatöönöre, ‘Sā ṙôken mikahkūö chu tö Yāvē, ngaich tö hòṅ sitih inlahen nup kahë chu fësla hòṅ ò nö ṙamölōn?’—Vë-evkūö Efisös 5:17.
10. Kūö yòh ang nö töt ṙanāngen ngam inlahen hī öi hòṅ mötlö inlahen öi hang minë lökngöri chö-öngö aṅ mat ngam Paipöl tö minë kuilōn më yöng hī hēk tö minë kuilōn ngih panam inrē?
10 Lohten in ṙung hēṙu öi hòṅ kē nup fësla tö ṙamlōn tī tö Yāvē, ngaich öt ööire pöri yip holmaneuk hī töngamuh. Tö sā ṙēngen yip aṅ patī ngam töhěng tak prötör nö hòṅ hapīhö ò nö in ngam kikānö, pön hòṅ pōyen taneūngen tö nup lōnre nö löktö in ngam mikūönö ò, öt tö ngön pöri ngam innôlö ngam kikānö nö in Yāvē. Ngih tahëng hēk, lohten minā yöng ngam sistör nö timlö alaha ò nö pīhövö tö ngam tökòlô kikōnyö ngam töt ngöt nö i linökölōn Yāvē. Tövai ngam kuilōn minā inyööngö lohten, pön sōten ngam kūönre kikānö nö hěngö hanakten. Hòṅ fē-a pöri ngam prötör hēk tö ngam sistör nö ngö, Yēḵ chu min öich pīhövö tö ò, ngön hòng min ngam innôlö chu öich in Yāvē? Asūp lōn Yāvē nö in ngam prötör hēk sistör? Mihôiṅ man fēkö ṙô ngam Mëtiv 6:33. Ṙūöhlö alaha më Kristīön angū-ö nö ‘urěhlö ngam Pūlngö ngam Tēv.’ Milēḵṙen in ayī-ö tö më yöngre tö më taṙòkhöre inrē tarik, mötlö pöri ngam inlahen hī öi hòṅ haṙamlōn Yāvē.
AṘŪ-UTI MUFĒ FĒKÖ MINË TÖ ṘŌLKANGEN INLAHENRE YĔM KĒ FËSLA
11. Asūp mihôiṅ mahayööken meh öm aṙū-utī mufē fēkö inlahen nup fësla lamākūöre? (Filipī 1:9, 10)?
11 Ngaich man akahakūö töp lökngörit chööngö aṅmat ngam Paipöl tö mihôiṅ nö hayööken meh öm kē fëslare. Hòṅ afītöre pöri më-eṅ öm fēkö inlahen minë lamakūöre fësla. (Vë-evkūö Filipī 1:9, 10.) Akahakūö min më-eṅ tö ṙòng nup katöllöre, yēḵ meh öm aṅhav in tö ngam mikah, ngaich angū-ö min mahayööken meh öm lööṙen kē nup fëslare. Ōtre pöri nup fësla töt lööṙen. Ṙōlheuh ṙung öi kihngen öi kē nup fëslare. Pò hī öi höng öt akaha elmat. Yēḵ meh pöri öm aṅhav in tö ngam mikah elmat. Ngaich angū-ö min mahayööken meh öm löngö kahë tö fësla.
12-13. Yěi aṅhav in min tö ngam mikah ngaich sitih inlahen mihôiṅ më-eṅ öm katöllö kinmānöre?
12 Asehkūöre man tö inlahenre, yěm chöh kinmānöre kūö meh hòṅ ha-aṅ nômö ngam mikūönöre, ngaich nët minë taneūngen meh kinmānö. Hòṅ katöllö lōnre më-eṅ töp kinmānöre in u. Mikahtökūöre më-eṅ tö inlahen minë tö nët kinmānö, nö asūp min la-en meh in u hēk irô-òtö kanta öm la-evṙen, iṙò-òlkūö min më-eṅ yěm kamān nup tahëng inrē. Nëtre minë kinmānö nö löng nö sā ṙô ngam tökētu aṅmat ngam Paipöl lökngörit chööngö. Hěng min lohten öp ööilōn meh kinmānö in u hēk kūö meh inrē öm pōi rineūsö öm in e. Urēhěkūö meh pöri öm kē ngam fëslare, ngaich ōt nup ṙô hēk tö hòṅ chumkūökaṙen tö meh.
13 Mihôiṅ öm afītöre tö inlahen minë tö nët kinmānö, yēḵ chu min öich kamān, ngaich öt kihngen hòng chū-ö min öich chuh el mīting? Ṙētakvö hòng min chū-ö öich in ngam mikūönöre hēk chumkūöṙen inrē tö cha? Teungten hòng min chū-ö öich hayööken cha nö haröhtöre nö in Yāvē? Yēḵ meh min öm afēkö në tö ngatī intöönö, ngaich öt mötlö lōn min më-eṅ tö ngam rupīö. Chumkūöṙen pöri min më-eṅ öm ngëichkö ngam innôlö re in Yāvē hēk in ngam mikūönöre, pön angū-ö në töt ṙanāngen. Ngaich möl min më-eṅ kē fëslare tö nup tö ṙamlōn tī tö Yāvē, kē-ěkūö min anga-aṅ tö inkòlô.
14. Yěi īnu min tö ngam mikah elmat hēk hanagenlōn hī inrē tö yip tarik ngaich sitih inlahen min ayī-ö chumkūöṙen töre ui tī-iv tö cha nö fukngö nö im ṙinatö-ellōn?
14 Yěi īnu min tö ngam mikah elmat ngaich fēkö inlahen yip holre min ayī-ö nö un lökngöre tö minë kahë hī fësla. Lökten min ayī-ö öt la-evṙen tö nup la-en tö mihôiṅ nö tī-iv ‘tö yip tahëng nö fukngö nö im ṙinatö-ellōn.’ (Filip. 1:10) Yēḵ hī öi kē minë kanahngenre fësla, ngaich hē e ayī-ö hòṅ chumkūöṙen tö e, tö sā hī yěi katöllö chinhenen re, sitih inlahen tī öi vī keūnyöre hēk sitih inlahen tī inrē öi havayöre. Lohten ayī-ö tö ööire tö nup tö tahëngö istāil inyut hēk ōt inrē nup ööilōn hī inlahen minë keūnyö hī. Ngaich hòṅ afītöre pöri ayī-ö öi ngöṙô, hö-ö ang min ngih inlahen chu nö lökngen fanukngö yip prötör sistör el ngam māṅ hēk yip tahëng inrē aṅ elkahôiṙen? Yē hī min aṅhav in tö ngam mikah elmat, ngaich milēḵṙen min ayī-ö tö yip tahëng. Hangenlōn in tö më tarik lökten öi höng öt afēkö ngam yanöölenre īnu pöri tö ngam tölngöre. (1 Kòr. 10:23, 24, 32; 1 Tim. 2:9, 10) Yěi hī min ngatī inlahen ngaich teungten min ayī-ö öi kē nup töng fësla, löktö in u min nö meukö ngam hanangenlōn hēk milēḵṙen hī tö yip tahëng.
15. Asūp tövai inlahen hī urēhěkūö hī kē nup tökiröng fëslare?
15 Ngöṙô ök misī Yēsū urēhěkūö hī kētöre in nup töng inlahen re, ngaich hòṅ urěh ayī-ö öi ‘kaheuk ṙôken ṙāi’ u. (Lūk. 14:28) Chumkūöṙen man yē meh hòṅ kē öp fëslare, ngaich hòṅ afēkö nup tö hòṅ inlahenre më-eṅ yěm hòṅ kē-ě e. Iṙôken kahëti min më-eṅ tö ṙētakre in e. Asuh nup min chehen tö yūsö nö in e hēk iṙôken kumlēḵ alaha inrē min më-eṅ öm la-evṙen tö e. Rīkre nup muh lohten vahënyö meh inlahen in yip aṅ patīre nö sitih inlahen mihôiṅ cha-a nö ṙòkhöre nö hayööken meh. Kūö yòh min angū-ö nö tölöng yěm ngatī inlahen? Pöm mihôiṅ min lökten in e öm akahakūö tö ngam kahëre fësla nö mihôiṅ nö halööktitvö hēk akahakūö inrē min më-eṅ lohten tö ngam inlahenre min nö tölöng, yēḵ meh min öm kēḵ öp tahëng fëslare. Yēḵ meh min öm ngëichkö ngam mufē elkuilōn yip aṅ patīre hēk hang ṙô cha inrē. Ngaich kū-ö urěh min cha-a nö hayööken meh, ngaich teungten min më-eṅ öm kē ngam fëslare.—Inch. 15:22.
KĒ NGAM TÖLÖNG FËSLA
16. Asuh nup ihih tö kēkaṙen tö meh yēḵ öm hòṅ löngö kahë tö fëslare? (Ngëichkö ngam pòks “ Sitih Inlahen Öi Löngö Kahë Tö Fëslare.”)
16 Yěm ngaich kētöre in në inlahen tö vënyu nö in ngih ātiköl, ngaich mihôiṅ min më-eṅ kē öp tölöng fëslare. Tö sā meh ngaich öm mikahtökūöre tö nup inlahen hēk chumkūöṙen më-eṅ ngëichkö minë löngörit chööngö aṅ mat ngam Paipöl öm mikahtökūöre tö ngam mufē Yāvē. Ngaich teungten min më-eṅ öm kē ngam tölöng fëslare. Ngam tö ṙamölōn tī min tö Yāvē. Ngaich mihôiṅ min më-eṅ öm havëkö kūö Yāvē tö inyööken re öm teungten kē ngam fëslare.
17. Asuh öp tötṙanāngen inlahen hī yěi hòṅ löngö kahë tö fëslare?
17 Lohten nö pōyen nuk tölöng kahë meh fësla in nuk urěh ṙētak. Köpölōn tö hī yěi hòṅ kē nup tölöng fëslare, ngaich ötkô ayī-ö öi hayönglenre öi in nup mikahre hēk heuneū-enre inrē hayönglen re pöri ayī-ö öi in ngam mikah lömöktö in Yāvē. Pön höng anga-aṅ mihôiṅ kamë-ekūö hī tö ngam mikah hēk mikah elmat inrē hòṅ hī öi akahaṙa. (Inch. 2:1-5) Ngatī inlahen ang Yāvē nö hayöngken hī löngö kahë tö fëslare ngam tö ṙamlōn tī min tö ò.—Sal. 23:2, 3.
TINKÖÖKÖ 28 Kòn Hëi Yahova Ka Tost
