ṘAMLŌN mina sistör nā Līsā nā Ën nö haköp ngam kanô-en aṅmat Paipöl nö in yip Vamënyen Yāvē. Ṙamlōn nan inrē töngamuh nö haköp ngam kanô-en, afēkö minë haköp re inrē aṅmat ngam Paipöl. Öt angū-ö pöri tamūökten cha nö haköp ngam kanô-en. Ngö ṙô ang sistör Līsā, * “Yēḵ chu meuk ngam hanangenlōn hēk chumkūöṙen më Vamënyen Yāvē tö taṙòkhöre tarik, ngaich lökngöre ellōn chū-ö tö e.” Ngö ṙô inrē ang Ën, “Öt uroh öich kūö minë haköpre ṙô aṅmat ngam Paipöl. Ngam hanangenlōn töm chumkūöṙen më Vamënyen Yāvē pöri tö mötlö lanökngöre tī tö ngam ellōn chu.” Löktö in e mikahlōn in tö ngam hanangenlōn hēk tö ngam neūkölōn nö lökngöre tī tö ellōn taṙòkhöre tarik.

Sitih inlahen öi rih min ayī-ö hameuktö neūkölōnre öi in yip tahëng, hòṅ hī öi hareuskö alaha cha? Nët nun nö kò-òren në inlahen hī öi hameuktö ngam neūkölōn. Ngam raneh, inup ṙô re hēk inup la-en re inrē. Mikahtökūöre in min inrē tö inlahen hī öi in chīö öi hameuktö ngam neūkölōnre.

Vënyu inlahen an ngam tö-akaha yöngnyīö nö in ngam Inchōḵ-oṙô 31 mirūlö ngam tö ngö ṙô “i rōi litāk ò inrē öp inköp tö neūkölōn.” (Inch. 31:26) Tö ngö manah angū-ö tö ò yěn ṙò-òv hēk ngam inlahen ṙô ò yěn ṙò-òv, in ngam tinrīken ò angū-ö nö meūkö tö ò nö tö aheūkölōn tö yip tahëng. Hòṅ ngatī tinrīken yin inrē më töpīhövö kikōnyö hēk inyööngö inrē, yēḵ cha nö vë-ekūö holre. Akahakūö yin inrē më inyööngö kikōnyö tö cha yěn öt ṙēmö ṙô nö vë-ekūö më kūön re, ngaich mihôiṅ min më nyīö nö chök tö nup ṙô cha, lohten min nö sō nö hang nup cha inrē. Yēḵ më inyööngö pöri nö holtö hanangenlōnre hēk miṙēḵlōnre inrē nö vë-ekūö më kūönre, ngaich mihôiṅ min cha-a nö hangihtö ṙô cha hēk kēkö kaha nup ṙô cha inrē.

Hòṅ sitih inlahen ṙô öi yěi ṙò-òv, pòrô yěi tö kūönu hēk töt kūönu? In ngam raneh pāt ngam Inchōḵ-oṙô 31:26 an ngam sanapṙô e, ngam tö ngö: “Ṙôtö mikah anga-aṅ nö vā-any kūöre.” Tö ngö manah an chěi tö hī öi hòṅ urěh öi afītöre tö nup ṙô re yěi hòṅ ṙônyen u. Mihôiṅ öi hatöönöre öi ngö ṙô, ‘Ṙamlōn yip vö min tarik nö hang ngih ṙô chu hēk haṙivlōn ṙöng yěn hāngö e?’ (Inch. 15:1) Yēḵ hī min öi ngatī inlahen öi hatöönöre, ngaich öthō min ayī-ö öi öt chumkūöṙen tö nup ṙô re yěi ṙò-òv.

Ngö ṙô an hēk ngam tahëng Inchōḵ-oṙô: “Hĕng tak ap umuh tökësô sā sanët tö saphötvökūö.” (Inch. 12:18) Söö in yěi urěh afītöre tö nup ṙô re hēk tö nup inlahen talöökö ṙô re yěi ṙò-òv. Ngatī inlahen min ayī-ö öi lak minë ṙô re lamöknyö rōi ngam litāk re. Kô-en takô pöri yěi tö ööire öi ṙônyö nup tölöök ṙô, ngaich öthō min öi tānyö ṙô, līnö ṙô hēk hūkö elnang yip vahë-ekūöre. (Efi. 4:31, 32) Holtö hanangenlōn re hēk minlēḵṙen re pöri min ayī-ö öi vë-ekūö cha hòṅ cha nö reuslöre alaha tö nup ṙô hī. Yāvē an tövai nö inchōḵ-okūö hī yěi vë-ekūö holre. Hē ò nö vë-ekūö ök tarik re Ĕlaicha, hē ò nö vöö, höng tīntö ök töhěng tak anga-aṅ ma-ahānga nö hareuskö alaha ò. Vë-eny nang hī an ngam Paipöl tö inlahen ṙô ò nö ṙēmö ṙô hēk öt pōitiṙô nö vë-ekūö Ĕlaicha. (1 Rā. 19:12) Asuh öp rih tahëng inlahen hī yěi hòṅ hameuktö ngam neūkölōnre?

Yěi hòṅ asīnken Yāvē, ngaich hòṅ meūkö ngam neūkölōn nö in minë ṙô hī tö minë la-en hī inrē. (Efi. 4:32; 5:1, 2) Ngatī ṙô ang Līsā, ngam tö kakka taheui nö vë-eny lanökngöre ellōnre nö meuk inlahen më Vamënyen Yāvē nö hayööken ò,  tö ngam mikūönö ò inrē. Ngö ṙô anga-aṅ, “Hē ih öi haṙī-ing patī re, ngaich öt ṙētakvö īhö. Yih ngaich nak tö nët tak pamīhöre nö hayööken ih, Vamënyen Yāvē cha-a. Lökngöre ellōn chū-ö öich meuk inlahen cha nö hayööken ih, öl rēhěn hē e chū-ö öich haköpmat ngam Paipöl.” Angū-ö ngaich lökten chu öich kētöre haköpmat ngam Paipöl, pöich lökngöre ellōn tö nup inlahen cha nö hayööken ih.

Ngatī ök inrē Ën nö lökngöre ellōn nö meuk tinrīken më Vamënyen Yāvē. Ngö ṙô anga-aṅ: “Kihngen in töngamuh öi ṙatö-ellōnre i tarik tö kūö minë inlahen cha. Lökten chū-ö kihngen öich ṙatö-ellōnre öich in më Vamënyen Yāvē. Ngö lōn ngaich chū-ö, ‘kūö yòh aich vöh më Vamënyen Yāvē nö ngatī chumkūöṙen tö chu.’ Hē chu ngaich öich haköpmat ngam Paipöl öich in cha, löktö in e ngaich chū-ö öich akahalōn tö cha nö kô-en nö chumkūöṙen tö chu. Sīöp ngaich ngam ṙinatö-ellōn chu nö in cha.” Asuh ngaich öp tö vai ṙòng e? Ngö ṙô anga-aṅ: “Sīöp ngam ṙinatö-ellōn chu ngaich, nö in minë haköp chu.”

Ngaich in öi meuk inlahen vē holmaneukre el ngam māṅ nö hameuktö minë tövai la-en re nö in nā Līsā nā Ën. Lökten cha-a nö lökngöre ellōn, ngaich angū-ö tö tī-iv tö cha nö haköp ngam kanô-en. Hē cha nö meuk ngam hanangenlōn më  holmaneuk hī, sīöp ngaich ngam ṙinatö-ellōn cha nö in Yāvē hēk in më tarik ò inrē.

Mihôiṅ min tarik nöng kūö inruklöre nö hangenlōn hēk ṙamlōn ṙô inrē yěn vë-ekūö holre. Kô-en an angū-ö nö tövai nö tinrīken cha. Yěn höng angū-ö pöri lāinyngen cha nö hameuktö miṙēḵlōnre nö in yip tahëng, ngaich ötkô öi vënyen e nö tö sāḵta nö in ngam miṙēḵlōn ngam Tēv tö tarik.—Ngëichkö ṙôm Inlahen 28:2.

Yēḵ hī hòṅ asīnken ngam Tēv öi hameuktö neūkölōnre öi in yip tahëng, ngaich höng ngam töhet kumlēḵ min tö mihôiṅ nö hayööken hī. (Kal. 5:22, 23) Yēḵ hī öi hòṅ asīöp ngih tinrīken ngaich hòṅ halöngten ngam töhet kumlēḵ ngam Tēv ayī-ö nö lökngöre tī tö ngam mufē hī hēk tö minë la-en hī inrē. Yēḵ hī min öi ngatī inlahen ngaich hameuktöre ayī-ö öi hangenlōn tö Yāvē. Hòṅ asīnken Yēsū inrē ayī-ö, lökten öi hameuktö chumkūöṙenre tö yip tarik hēk hangenlōn inrē tö cha. Ngam hanangenlōn hī tö Yāvē hēk tö yip tahëng inrē tö tī-iv min tö hī öi hameuktö miṙēḵlōnre öi i taṙòkhöre tarik. Yēḵ hī min öi ngatī inlahen ngaich ṙamlōn min ang Yāvē nö in hī.

Chöngṙen in ṙung öi hameuktö hanangenlōnre öi höng in yip mikahkūöre hēk in yip töhangenlōn hēk tö chumkūöṙen tö hī. (2 Sa. 2:6 Kòl. 3:15) Sitih inlahen pöri min yěi ngölōn töre öi öt yanööluṙen yěi hameuktö neūkölōn öi in yip tahëng, ngaich hòṅ sitih inlahen ayī-ö?

Töi asehkūöre sin tö hī ayī-ö öi tökirööngen tökööl, sön Yāvē nöng hameuktö neūkölōnre nö in hī. “Tökiröng miṙēḵlōn” ngö ṙô an ngam Paipöl tö e. Ṙōl van kinūichö angū-ö nö imat ngam tufömngöre kinlēḵngô. Yāvē an tövai nö inchōkūö hī nö mahameuktö ngam tökiröng miṙēḵlōnre. Haköplu ayī-ö öi in minë ṙô ò pöi hōtu öi hameuktö miṙēḵlōnre öi in yip tahëng. Ngamuh pöri intöönö: Sitih inlahen ang Yāvē nö hameuktö miṙēḵlōnre tö hī?

Kē-ěkūö taṙòkhöre tarik ngam Tēv Yāvē tö ngam kuföt, ngam mak tö në taṙòkhöre chehen aṅkūö ngih panam, pöi hōtu öi aṅ. (Mët. 5:45) Kô-en ang Yāvē nö hameuktö miṙēḵlōnre nö in yip tarik, pòrô cha-a nöng öt akahakūö tö ò. (Efi. 2:4, 5, 8) Tö sā inlahen ò nöng kēngö nômö ngam töng hěng maneuk Kūön re nö chö-önyten tö taṙòkhöre tarik. Ngö ṙô tī ök Pôl nö kūich: ‘tö Yāvē nö tökiröngö miṙēḵlōn nö kēnyö ṙāi ngam nômö hī nö aṅtī tö ngam kūön re.’ Rö-ö nöng anū-ö hameuktö ò nö in hī, pöi yěi ṙōlheuh ṙung öi köölö fālen hēk miṙivngölōn Yāvē inrē. Sön anga-aṅ nöng örheūheu nö hachōkūö hī hēk haköpten hī inrē. Sā sanuktöre ngam kumṙah minë tölöök inlēnö nö chuh in hī. (Chöö. 32:2) Kò-òren in ma-ainyre öi havahalvah ngam miṙēḵlōn ò tö hī, sön öi höng öt kanò-òv. Yēḵ Yāvē min nö öt hameuktö ngam miṙēḵlōnre nö in hī, ngaich öt maheūṅkkuvö min ayī-ö in öp yamih ṙētak.—Ngëichkö ṙôm 1 Pītör 1:13.

Lökten in yěi afītöre tö minë miṙēḵlōn Yāvē tö hī, ngaich hòṅ ha-öönyan ayī-ö. Hòṅ ngatī inlahen ayī-ö öi hameuktö neūkölōnre öi in yip tahëng. Lökten in min öt höng katöllö chūök re öi hameuktö miṙēḵlōnre tö tarik. Hameuktö ngam miṙēḵlōnre pöri min ayī-ö tö taṙòkhöre tarik öi höng örheūheu. (1 Tös. 5:15) Yēḵ hī min öi örheūheu öi hameuktö ngam hanangenlōn re öi in yip aṅ patī re, in yip hol maneuk re, ip chūök hī la-evṙen, el iskul hēk in yip aṅ chīṙö hī inrē, ngaich teūngen min ayī-ö tö ṙanamlōn. Sā inlahen mahameūyöre min cha-a hē el laneūchö, yěn meuk ngam neūkölōn hī tö cha.

Ōt hòng tö ngatī el ngam mikūönö meh hēk el ngam māṅ inrē nö tö hòṅ hareuska alaha tö meh öm hameuktö ngam hanangenlōn re tö ò? Lohten min nö ōt yip hol hī tö hòṅ mānlöng kui tö patī re, hòṅ hayöökaṙen yip muh nö in nup tahëng la-en, ōt min yip tötkô nö havah chehen re ngaich hòṅ hayööken cha ayī-ö, ōt min yip tufömngöre tarik tö vënyu nang tö hī tö ngam tölöök inhānga nö tö hòṅ hayöökaṙen tö hī. Mihôiṅ öm min më-eṅ öm hameuktö ngam neūkölōnre öm in cha.

Ta-a chěi töi asīnken Yāvē, inup ṙô re hēk inup la-en re inrē öi hameuktö tinrīken re öi tö aheūkölōn.