1. Asuh öp kuilōn Yāvē?

 LŌNU an Yāvē tö ngam Pūlngö nö keuheūtngöre chūök inhangka nö ikūö ngih panam. (Māk. 13:10; 1 Tim. 2:3, 4) Lökten ang Yāvē nö kē-ěkūö ngam Kūön re tö ngih la-en pò ngih la-en nö hòṅ kēkaṙen. Höng Yēsū an tö heuveū-en nö hayōmken ngih la-en. Lökten in mihôiṅ ṙatö-ellōnre tö ngam la-en inhānga nö öthō nö öt keuheūten min, urěhēkūö ngam manāngen nö yih nö sā lōn Yāvē.—Mët. 24:14.

2. Asūp min haköp hī in ngih ātiköl?

² In ngih ātiköl min öi mikahtökūöre tö Yēsū, nö sitih inlahen nö löktö in më tö-akaha mahalanṙen nö hachōkūö hī nö löktö im ṙô ngam Tēv, ngaich hachōkūö hī inrē öi keuheūtngöre chūök ahanga ikūö ngih panam. (Mët. 24:45) Mikahtökūöre inrē min ayī-ö öi sitih inlahen mihôiṅ holṙen Yēsū hēk tö më tö-akaha mahalanṙen.

3. Asuh öp chööngö kinë-ekūö Yēsū?

³ Yēsū an töngamuh yōmkūö ngam la-en tölöök inhānga. Kūö yòh mihôiṅ öi ngatī ṙô? Töi chumkūöṙen, urēhěkūö Yēsū nö chuh el halīöngö meukkūö yik haköptöre anga-aṅ nö i Këlelī, ngaich asuh öp ṙô ò nö in cha. Ngö ṙô anga-aṅ: “Ṙòkhöre nun në chööngö nö kētu nö in Chu, el halīöngö, ing panam inrē. Lökten kuṙòh vīten vē taṙòkhöre tarik nö mahaköp.” (Mët. 28:18, 19) In e mikahkūö ayī-ö tö Yēsū nö kē-ěvkūö tö ngam chööngö nö mahayōmkö ngam la-en inhankö ngam tölöök inhānga.

4. Kūö yòh öi mihôiṅ ngö ṙô tö Yēsū töngamuh nö yōm ngam la-en inhangkö ngam tölöök inhānga?

⁴ Vë-eny ang Yēsū tö ngam la-en inhanga hēk vinītö tarik nö mahaköp nö keuheūtngöre chūök nö i “taṙòkhöre tarik.”  Ngaich kētö ṙinatö-ellōn yip mahaköp anga-aṅ nö “söl ip manāngen ngih panam” min nö holtöṙah cha. (Mët. 28:20) Lökten ayī-ö mihôiṅ öi ngö ṙô tö Yēsū töngamuh nö yōmkūö ngam la-en tölöök inhanga.

5. Sitih inlahen öi hateungngö ṙô minë tö eūka im Salmai 110:3?

⁵ Öt yahlö mufē ang Yēsū yěn ōt min tarik ma-ahangkö ngam tölöök inhanga hēk yěn hö-ö. Pön akahakūö anga-aṅ in ngih manā-aṅ sakāmö ngam tö kūichi nö in ngam līpöre Salmai ngam tö eū-nyu nö teūngtökūö: “Hòṅ yip tarik Meh nö kētöre ip sakāmö minhôiṅyö Meh: i vanāiyö ngam hanëtö meh.” (Sal. 110:3) Yēḵ meh öm ma-ahangkö ngam tölöök inhānga, ngaich mahateungngö ṙô ngam tö eūka më-eṅ hěnghöre holṙen Yēsū hēk tö më tö-akaha mahalanṙen inrē. Ngaich ön ngih la-en nö keuheūtngöre chūö kinëka, pòrô nö yih minë tahëng kanihngen.

6. Asuh nup kanihngen töngamuh la-al hī?

⁶ Ngam töhěng kanihngen, tö më tarik nö la-al hī. Yip tö sō-en ngam tinlööken, hēk yip yōm tinlööken hēk më mahayöng nö vë-eny minë inlahen hī nö tövaich. Yēḵ yip mak alaha hī hēk tö yip aṅ patī hī inrē nö hang në tö ngatī ngaich sōten hī cha-a öi ilinöökö lōn Yāvē ngaich sōtu inrē öi in ngam la-en inhānga. Ōtre nup panam chūök yip prötör sistör hī nö ötlēkaṙen hēk kē-ě inrē cha-a nö el chēl. Hö-ö pöri angū-ö nö pinngangkūö, pön urěhnyi ṙô ang Yēsū nö vë-eny: “Surīkhu yin min tö taṙòkhöre tarik töpòkūö Mine-eny Chu.” (Mët. 24:9) Yēḵ hī ötlēkaṙen, ngaich hòṅ köplōn ayī-ö tö e nö kūö yòh nö ngatī inlahen pò ngam la-en hī nö tölöng ngaich ṙamlōn ang Yāvē nö in ngam la-en hī. (Mët. 5:11, 12) Löktö in më tarik tī ngam Sī-ö nö ötlēken hī. Ötkô pöri ayī-ö vöö pò Yēsū nö tökalē tö cha. Löktö im inyööken hī tö Yēsū töngamuh ngih la-en nö keuheūngöre chūök nö ikūö ngih panam nö ahangkö ngam tölöök inhānga. Ta-a chěi hēk töi mikahtökūöre.

7. Sitih inlahen öng töngamuh nö teūngtökūö ngam tö eūka im Inmeukhömat 14:6, 7?

⁷ Pōyen në ëlô ikūö ngih panam töngamuh, angū-ö ngih hēk kanihngen hī yěi ahangkö ngam tölöök inhānga öi in minë ëlô. Ngaich pöri ang Yēsū nö löktö in ngam maheuk Yôhan nö vë-eny nö ing manā-aṅ sakāmö min nö keuheūtngöre ëlô min ngam inhangkö ngam tölöök inhānga. (Vë-evkūö Inmeukhömat 14:6, 7.) Ngaich ön töngamuh nö ngatī inlahen. Ngaich töngamuh öi pōilö inlahen öi vë-eny ngam inhangkö ngam tölöök inhānga öi in minë ëlô. Ngaich töngamuh inrē yip tarik nö in ngam website jw.org nö pōyen tö-tö 1,000 ṙôken ëlô ngam Paipöl hēk tö minë kun līpöre inrē nö vë-evkūö! Ngaich inrē më kamë istöti nö in ngam tufömngöre līpöre Mihôiṅ Man Örheūheu Ṙamlōn! nö pōyen tö tö 700 ṙôken ëlô angū-ö nö halēnlöng. Ngaich yip töt hang ngaich halēnlöng minë tö ṙōlkangen vitiō. Ngaich yip töt meuk ngaich halēnlöng minë ëlô prēl līpöre nö inlēnten cha. Ngaich töngamuh ayī-ö kôta mat öi hang minë tö eūka ṙô ngam Paipöl nö teungtökūö in minë tö ‘keuheūttöre ëlô pumnāmö tarik,’ ngaich töngamuh inrē nö haṙunöre cha-a nö in ngam “töhet ëlô” tö ngö manah tö cha nö haköp ngam kanô-en. (Sak. 8:23; Sef. 3:9) Ṙën anū-ö nö ngatī inlahen kinëken hēk teungten inrē, pò Yēsū nö kô-en nö heuveū-en nö mahayōm ngam la-en inhangkö ngam tölöök inhānga.

8. Asuh nup i tövai ṙòng tö meukö nö im la-en inhānga?

⁸ Ngaich in töngamuh meuk minë ṙòng ngam la-en nö vai im inlahen ngam inhangkö ngam tölöök inhānga. Pòn keuheūtngöre chūök nö 240 pumnāmö nö pōyen tö tö 80,00,000 ṙôken më mahanôltöre nö in ngam söngkötön Yāvē, ngaich örheūheu i töhěng  samyeūheu nö köinyu ṙôken yip kamëtöre nö in ngam vinôkö nö nôlhöt nö in ngam söngkötön ngam Tēv! Ngamuh pöri ṙanamlōn hī pò cha nö “hayutlöre tö ngam tufömngöre tarik” tö ngö manah tö cha nö asīöp minë tövai tinrīken. (Kòl. 3:8-10) Pōyen yik in cha sin kamëken minë la-en tötlöng, tö sā cha sin nö famël tarik, tö atöltuṙen hēk maha-öiny panam inrē, ngaich pöri cha-a nö halööktitre. Ngaich teungta ṙô ngam tö eūka im Isayā 2:4 ngam tö kūichi, tö cha min nö ‘öt hēk nö haṙūnöre nö kiyung.’ Ngaich yēḵ hī ayī-ö töngamuh öi asīöp minë tövai tinrīkenre, ngaich tūöktöre ellōn yip tarik nö im söngkötön Yāvē yěn meuk inlahen hī, yēḵ hī min ngatī inlahen ngaich asīnken ngam mahachō kūö re ayī-ö ang Yēsū. (Yôh. 13:35; 1 Pīt. 2:12) Minë tövai ṙòng ngam la-en inhānga hö-ö nun nö töng kamnahngen re. Pön höng ṙòkhöre anū-ö nö löktö i inyööken hī tö Yēsū.

9. Im Mëtiv 24:45-47 asuh öp tö eūka inlahen ngam manā-aṅ sakāmö?

⁹ Vë-evkūö Mëtiv 24:45-47. Vë-eny nang hī ang Yēsū tö ò nö ing manā-aṅ sakāmö nö halēnlö ngam ‘tö-akaha mahalanṙen’ ngam mahachō kūö hī min nö im ṙô ngam Tēv. Ngaich ngatī inlahen töngamuh ang Yēsū nö löktö in më töng rahëichyen hol më töhachāmö elkui Kristīön nö kētö minë tö ‘löngö ṙētak nya-aṅkūö’ nö in yip tarik ngam Tēv in cha inrē yip töng hō tö minë ṙô ngam Tēv. Ma-anyre yin töngamuh më prötör nö im la-en re, hö-ö pöri cha-a nö ngö mufē töre nö mahayōm ngam ṙinatö-ellōn hī. (2 Kòr. 1:24) Pön ṙatö-ellōnre cha-a tö Yēsū nö anga-aṅ “mahachōkūö töchööngu inrē.”—Isa. 55:4.

10. Minë līpöre tö hameuknyu nö im nyat asuh öp līpöre tö yöölen tī tö meh öm kētöre öm i linöökö lōn Yāvē?

¹⁰ Löktökūö ik 1919 më tö-akaha mahalanṙen nö halēnlen minë līpöre nö yöölen tī tö  më tarik nö haköp ngam kanô-en. Sā ṙēngen minë nya-aṅkūö nun minë līpöre nö löngö ṙētak kinë-eti pön yöölen tī anū-ö tö më tarik nö haköp mat ngam Paipöl. Ik samyeūheu 1921 më tö-akaha mahalanṙen nö halēnlö ngam līpöre Ranöng Ngam Tēv-HI ngaich halēnlö minë līpöre ngaich më tö-akaha mahalanṙen minë tufömngöre töhakööpö mat, tö sā në “Hökngen Ngam Tēv Nöng Anga-aṅ Tökô-en,”-HI Ngam Kanô-en Ma-asölten Hī Im Nômö Tö Örheūheu Aṅ-HI, Mihôiṅ Man Örheūheu Aṅ Ikūö Ngih Panam Öm El Peretāis-HI, Tökô-en Mikah Ma-asölten Hī Im Nômö Tö Örheūheu Aṅ-HI, Asuh Nup Tökô-en Inköphöti Ṙô ngam Paipöl?-HI, Asūp Ṙô Ngam Paipöl Nö Haköpten Hī?-HI hēk tö ngam tufömngöre līpöre töngamuh Mihôiṅ Man Örheūheu Ṙamlōn! Asuh öp līpöre mahayööken meh më-eṅ öm akahakūö tö Yāvē hēk haröhtöre inrē öm in ò?

11. Kūö yòh nö töt ṙanāngen ngam inlahen hī iṙūöhen haköp inlahen Yāvē hēk tö ngam Paipöl?

¹¹ Rö-ö ön ngam Paipöl istuten nöng anga-aṅ tö hòṅ nya-aṅkūö. Pöi hòṅ ṙôkhöre öi iṙūöhen haköp inlahen Yāvē hēk haköp mat ngam Paipöl inrē. Ngö ṙô tī ang Pôl nö kūich: “Nya-aṅkūö töpōyö pöri tarik, ngih töngëḵ nya-aṅkūö.” Ngö ṙô inrē ang Pôl nö vë-eny nang hī tö hī yěi nya në nya-aṅkūö min, hēk kēkö kaha minë haköpre inrē, “ngaich akah tölöök, tötlöök inrē” min ayī-ö. (Hep. 5:14) Öt löngngöre tinrīken yin vë tarik töngamuh ing panam lökten ayī-ö mihôiṅ öi kihngen öi hang minë inchöngten kahëtö Yāvē. Chumkūöṙen pöri ang Yēsū nö löngö ṙētak tī nö kē-ěkūö hī tö minë nya-aṅkūö, hòṅ hī asīöp ngam ṙinātö-ellōnre. Ngaich löktö in më tö-akaha mahalanṙen tī anga-aṅ nö kē-ěkūö hī tö minë nya-aṅkūö.

12. Sitih inlahen ayī-ö sā Yēsū öi haṙōilö minë-eny ngam Tēv?

¹² Sā inlahen Yēsū in ayī-ö harōilö minë-eny ngam Tēv. (Yôh. 17:6, 26) Ik samyeūheu 1931 nö kētu ngam minë-eny hī öi ‘Vamënyen Yāvē’  nö löknyö mat ngam Paipöl. In e ayī-ö öi hameuktöre öi milēḵṙen tö ngam minë-eny Yāvē, hēk hòṅ akahka inrē öi vamënyen ngam minë-eny ò. (Isa. 43:10-12) Löktökūö in e angū-ö samyeūheu ik Òktopör chingëṅt nö katānö ngam minë-eny Yāvē nö imat ngam līpöre Chūökamahati. Yěi ṙô tö ngam Paipöl ngam New World Translation of the Holy Scriptures nö ṙātu ngam minë-eny ngam Tēv nö in minë kamngö chūök u. Iṙòken inrīkngöre öng ngam söngkötön hī tö minë keurcha. Uroh cha-a nö kēngen ngam minë-eny ngam Tēv nö imat ngam Paipöl, hö-ö pöri ayī-ö öi ngatī pöi ha-öiny ngam minë-eny ò.

13. Kūö yòh öm më-eṅ ṙatö-ellōnre tö Yēsū nö löktö in ngam tö-akaha mahalanṙen tī nö hachōkūö ngam söngkötön? (Yôhan 6:68)

¹³ Löktö in ngam ‘tö-akaha mahalanṙen’ ang Yēsū nö hayōmken ngam söngkötön hēk ṙūöhlö alaha hī in ngam töhet vinë-ekūötēv. Sitih mufē öm më-eṅ töre öm nôlhöt öm el ngam söngkötön. Lohten më-eṅ öm sā mufē Pītör ngam tö ngö ṙô nö in Yēsū: “Ò, Mā! Chuh in chīö öi min? I minë ṙô Meh, an ngam nômö tö örheūheu-aṅ.” (Yôh. 6:68) Sitih inlahen öi öre ing töngamuh yěi öt nôlhöt öi el ngam söngkötön Yāvē? Angū-ö ngih söngkötön löktö tī Yēsū nö kē-ěkūö hī tö minë ‘tö löngö ṙētak nya-aṅkūö,’ löktö in e ngam innôlö hī öi in Yāvē nö ngön, ngaich löktö in e tī anga-aṅ nö haköpten hī öi sitih inlahen ahangkö ngam tölöök inhānga. Hayööken hī inrē ang Yēsū öi hayutlöre tö ngam “tufömngöre tarik” hòṅ hī ṙamölōn tī tö Yāvē.—Efi. 4:24.

14. Sitih inlahen öng ngam söngkötön Yāvē nö hayööken meh ik ṙētak ngam COVID-19 invah?

¹⁴ El ṙūngö ngih kanihngen inrē ang Yēsū nö halēnö hī. Ik sā ranultökūö ngam COVID-19  invah nö ing panam, pōyen yik tarik töt akahakūö tö inlahen re. Löktö in ngam söngkötön tī pöri ang Yēsū nö halēnö hī öi sitih inlahen öi chumkūöṙen tö re. Örheūheu inrē nö fēlen hī ngam söngkötön tö hī yěi chuh lātunyi ngaich hòṅ māsu ayī-ö ngaich havai ṙòvatre inrē tö höö. Tölöṙô inrē më minṙöinylen nö hatönkö inlahen më prötör sistör el minë māṅ hēk ngëichkö nup hanakten cha inrē. Hōten cha nö chumkūöṙen töre hēk haröhtöre inrē nö in Yāvē. (Isa. 32:1, 2) Teūngen inrē ayī-ö tö minë ripōt lamöktö in më Yōm La-en minë kamëtö inlēnö hī tö reuslöre alaha tī inrē tö hī.

15. (a) Asuh nup inlēnö hī el ṙungö ngih invah inlahen ngam mīting hēk inlahen ngam tölöök inhānga? (b) Ngaich asuh öp ṙòng e?

¹⁵ Ngaich ilööṙen hēk ayī-ö öi halēnö el ṙūngö ngam invah, öi sitih inlahen öi kēken minë mīting hēk sitih inlahen inrē öi ahangkö ngam tölöök inhānga. El online ngaich ayī-ö öi kēken minë mīting, ësemplī hēk könvensön inrē. Tölöṙô inrē öi höng ngöh öi i patī öi ahangkö ngam tölöök inhānga, löktö in minë chitri hēk fūn inrē, ngaich kētö inkôlò minë la-en hī ang Yāvē. Pōyen nup panam chūök yip pöplisör nö sīöplöre ṙôken ngaich pōyen ngaich inrē më holmaneuk hī tö teūngen tö tövai ekspirīön re nö ahangkö ngam tölöök inhānga.—Ngëichkö ngam pòks “ Pōyen Tī Ang Yāvē Nö Kētö Inkôlò.”

16. Asup mihôiṅ ṙinatö-ellōn hī?

¹⁶ Pōyen yip töngölōn, höng yah nun minë inlēnö lamöktö el ngam söngkötön el ṙūngö ngih invah. Pōyen pöri ngaich yip tö kôta mat nö meuk minë inlēnö tö kētu nö kô-en anū-ö nö löng. (Mët. 11:19) Yēḵ hī öi fēkö inlahen Yēsū nö chumkūöṙen tö hī hēk vayö inlahen inrē nö hayōmken hī, ngaich sīöplöre ngam ṙinatö-ellōn hī öi in Yāvē in Yēsū inrē tö cha nö öt löktu nö ṙāngen hī pòrô öp tö sitih.—Vë-evkūö Heprāi 13:5, 6.

17. Sitih lōn öm më-eṅ töre öm holṙen Yēsū öm la-evṙen?

¹⁷ Iṙôken ṙanamlōn öi tö Yēsū nö hayōmken hī. Nôlhöt in öi el ngam söngkötön öi in më tarik tö ṙōlkangen tinrīken, ëlô hēk panam inrē. Örheūheu in halēnö tö minë ṙô ngam Tēv hēk haköptuvö hēk haṙunö inrē öi ahangkö ngam tölöök inhānga. Ngamuh inrē inköptö hī öi hangenlōn tö höö hēk hayutlöre inrē tö ngam tufömngöre tinrīken. Ṙamlōn in ayī-ö pöi holṙen Yēsū öi la-evṙen!