TÖHAKÖÖPÖ ĀTIKÖL 30
Tö Sitih Manah Öng Nö In Meh Ngam Tö Ha-ehangen Ineūka
“Ṙātö kumnyah Chin ihôi meh töngam kikānö.”—RAN. 3:15.
TINKÖÖKÖ 15 Ha-öny Ngam Lanòh Kūön Yāvē
RAHËICHTAMAT *
1. Asuh ök la-en Yāvē unôichrit inlahen nā Ātöm nā Ēva nö faluṙen? (Ranehlö 3:15)
UNÔICHRIT inlahen nā Ātöm nā Ēva nö faluṙen, ilööṙen ngam Tēv nö kilēḵngôre, ngam kamëtö maheūṅkkö yip kūön cha min. Imat ngam līpöre Ranehlö 3:15 angū-ö nö kūichiyö.—Vë-evkūö.
2. Asuh öp inrīkngöre ngam kinlēngô im Ranehlö 3:15 tö nup tahëng tö eūka?
2 In ngam raneh līpöre ngam Paipöl ön ngam tö eūka kinlēḵngô. Sön pöri angū-ö nö ōt nö in minë tahëng līpöre imat ngam Paipöl nö sāta ṙô anū-ö nö in e. Tö sā ṙēngen ngam aṅ likeun tö yōho, nö yōho minë mōtī tö ngam ta-īö nö mahamūlö e, ngatī ṙēngen ngam Paipöl minë līpöre tahëng, ngaich ngam tövënyu nö in ngam līpöre Ranehlö 3:15 nö hamūlö ngaich ngam tövënyu nö in e tö Yāvē min nö tīnten ngam ṙamānyen cha nö kamëngen ngam Sī-ö hēk ha-etngen yip tötlöök inrē hol ò. * Ngaich yēḵ cha min nö ha-etiyö ngaich iṙôk ṙanamlōn min yip Tarik Yāvē!
3. Asuh nup min haköp hī in ngih ātiköl?
3 In ngih ātiköl in min öi teūngen tö sanapṙô nup intöönö, i alaha ngam tö eūka im Ranehlö 3:15: Achīö öich më tö eūka im kinlēḵngô? Sitih inlahen min ngam kinlēḵngô nö teungtökūö? Hēk asuh öp yanöölen hī öi löktö in ngam kinlēḵngô?
ACHĪÖ ÖICH MË TÖ EŪKA IM KINLĒḴNGÔ?
4. Achīö ang ngam “pēch,” kūöyòh öi mihôiṅ ngatī ṙô?
4 In ngam Ranehlö 3:14, 15 nö vënyu inlahen ngam “pēch” tö ngam “kūön” ò, hēk tö ngam “kikānö” tö ngam “kūön” ò inrē. Hayööken hī ngam Paipöl öi akahakūö tö cha. * Töi mikahtökūö re sin tö ngam pēch. Hö-ö ön nö tökô-en nö pēch. Kūöyòh öi ngatī ṙô? Yēḵ ò öre nö tökô-en nö pēch ngaich öt löktu anga-aṅ nö akah elnang tö minë tövënyu tö Yāvē nö el ök panô-òṅ Ēten. Achīö ang rih? Ngöṙô ön ngam Inmeukhömat 12:9 nö vë-eny inlahen ngam “pēch misī” nö öt tahëngu anga-aṅ pön höng ngam Sī-ö ngam tö Sātān invëka inrē. Achīö pöri ngam kūön ngam pēch?
NGAM PĒCH
Anga-aṅ an ngam Sī-ö ‘töhötṙeh pēch,’ tö vënyu im Inmeukhömat 12:9 (Ngëichköm perekrāf 4)
5. Achīö yip kūön ngam pēch?
5 Yēḵ ngam Paipöl nö ṙôten yip kūön, ngaich rö-ö angū-ö nöng kakkö yip kūön ngam tarik yip lamöknyö in ò. Pön ṙōlheuh inrē yip ma-asīnkö inlahen hēk la-en öp tarik nö kaheukö nö kūön ò. Lökten in mihôiṅ öi kaheuk yip tötlöök ma-ahānga hēk tö yip tarik inrē nö kūön ngam pēch yip ma-asīnken ngam Sī-ö nö öt holṙen ngam Tēv Yāvē hēk lā-al ò inrē. Kaheūkö yik inrē ma-ahānga misī inuk ṙētak Nō-a nö kūön ngam Sī-ö, yik ṙamāngö ngam chūök re el halīöngö ngaich yônti nö ing panam, hēk yip tarik inrē yip ma-asīnken ngam yöng re ngam Sī-ö nö ötlöngö la-en nö ing panam.—Ran. 6:1, 2; Yôh. 8:44; 1 Yôh. 5:19; Yūt 6.
KŪÖN NGAM PĒCH
Yip tötlöök ma-ahānga hēk yip tarik ma-asīnken ngam Sī-ö nö öt holṙen Yāvē hēk la-al yip tarik ò inrē (Ngëichköm perekrāf 5)
6. Kūöyòh ang ngam “kikānö” nö ötkô nö Ēva?
6 Tā-a hēk töi mikahtökūöre tö ngam “kikānö.” Hö-ö an ngam kikānö nö Ēva. Kūöyòh? Ngih lāinyngen e. Sā mikahkūö hī ngaich tö ngam pēch, nö ngam Sī-ö anga-aṅ ngam ma-ahānga tö ṙô. Ngaich eūka inlahen ngam kūön ngam kikānö nö “rööntö” kui ngam pēch min. Yēḵ ò öre nö kūön Ēva ngaich sitih kanô-òṅ öre anga-aṅ nö fëlngö ngam ma-ahānga ngam tökalēḵ tö ò! Achīö ang rih ngam kikānö?
7. Achīö ang ngam kikānö tö ṙô ngam Inmeukhömat 12:1, 2, 5, hēk 10 inrē?
7 Ngam manā-aṅ līpöre ngam Paipöl ön mahayööken hī öi akahakūö tö ngam kikānö. (Vë-evkūö Inmeukhömat 12:1, 2, 5, 10.) In e ayī-ö öi vënyu nang tö ò nö aṅhav kui tö minë tö 12 taneusömat nö sapīöv ngaich elröön ò ngam chingëṅt. Kayônyö nyīö anga-aṅ ngam inmeuktö ngam Pūlngö ngam Tēv. Akahakūö ayī-ö tö ngam inyööngö tö ngam Tēv nö el halīöngö nö rultenre nö hayöng. Lökten ngam kikānö nö ötkô nö aṅ ing panam pön höng el halīöngö. Tö ngö manah angū-ö inrē tö ngam kikānö nö inmeuktö ngam söngkötön ngam Tēv ngam më el halīöngö acha-a më tö kööṅnyu ṙôken ma-ahānga.—Kal. 4:26.
NGAM KIKĀNÖ
Ngam söngkötön Yāvē el halīöngö ngam chūök më tö kööinyu kööinyu ṙôken ma-ahānga (Ngëichköm perekrāf 7)
8. Achīö ang ngam raneh kūön ngam kikānö, ihē angū-ö nö teungtökūö? (Ranehlö 22:15-18)
8 Mikahtökūö hī ön inrē ngam Paipöl tö ngam raneh kūön ngam kikānö. Vënyu anga-aṅ nö hòṅ lamöknyö im mikūönö Aprahām. (Vë-evkūö Ranehlö 22:15-18.) Ngaich sā ṙô ngam tö-eūka ang Yēsū nö löknyö im mikūönö Aprahām nö fötnyu. (Lūk. 3:23, 34) Ötkô inrē ngam tö kilě-ěyö kūön nö töng tarīka, pön töhòṅ ha-etngö minë la-en ngam Sī-ö. Ngaich ik sā Yēsū nö vōkö hē ò ngaich nö 30 samyeūheu, hē e ngam Tēv Yāvē nö löktö im töhet kumlēḵ re tī nö hacham elkui ò ngaich katöllen ò. Hē e takô ang Yēsū nö kaheukö nö raneh nö kūön ngam kikānö. (Kal. 3:16) Kapah ngaich ang Yēsū, ha-aṅlöng pöri anga-aṅ tö Yāvē ngaich kētu sapīöv anga-aṅ tö ngam minā-aṅ minlēḵṙen inrē, ‘kě-ěvkūö inrē tö minë chööngö nö ṙòkhöre el halīöngö ing panam inrē’ töölô inrē anga-aṅ nö ‘ha-etngö minë la-en ngam Sī-ö.’—Hep. 2:7; Mët. 28:18; 1 Yôh. 3:8.
KŪÖN NGAM KIKĀNÖ
Yēsū Kristū hēk tö më tö 1,44,000 ṙôken mahayöng nö holṙen ò (Ngëichköm perekrāf 8-9)
9-10. (a) Achīö yip inrē kūön ngam kikānö tahëng tö Yēsū, ihē cha-a nö vītöre nö kūön ngam kikānö? (b) Asuh nup hēk min mikahkūö hī?
9 Ōt yip tahëng inrē kūön ngam kikānö. Cha-a yin tövënyu inlahen tö Pôl nö in yik Yahūti hēk töt Yahūti inrē töhachāmö elkui. Ngöṙô anga-aṅ, “Ngaich yē yīö aṅ in Kristū, ngaich yī-ö kūön Aprahām, tö-amīnu sā ngam kinlēḵngô.” (Kal. 3:28, 29) In e mikahkūö ayī-ö tö Yāvē yěn hacham elkui ngòh töhěng tak Kristīön nö löktö im töhet kumlēḵ re tī, ngaich kaheukhötre anga-aṅ nö in më kūön ngam kikānö. Tö ngö manah angū-ö tö Yēsū hēk yip hamòl ò inrē min nö hayöng yip tö 1,44,000 ṙôken, cha-a nyöre tökaheukö nö kūön ngam kikānö. (Inm. 14:1) Ṙòkhöre cha-a nö sā mufē ngam Yöng re Yāvē sā la-en ò inrē.
10 Ngaich in öi akahakūö tö më tö eūka töm kinlēḵngö im Ranehlö 3:15. Ta-a hēk töi mikahtökūöre tö nup töngaich nö teungtökūö in minë tö-eūka hēk asuh öp yanöölen hī inrē öi löktö in e.
SITIH INLAHEN MIN NGAM KINLĒḴNGÔ NÖ TEUNGTÖKŪÖ?
11. Tö sitih manah ngam pinlāḵngen kulôichröön ngam kūön ngam kikānö?
11 Vënyu inlahen ngam pēch im Ranehlö 3:15, nö “paṙôkö tī tö kulôichröön” ngam kūön ngam kikānö. Teungtökūö ngam kinlēngô hē ngam Sī-ö nö vīhöt ellōn yik Yahūti hēk tö yik aṅ Rōm inrē nö fëlngen Yēsū. (Lūk. 23:13, 20-24) Ngaich sā inlahen öp tö palā-aiṙen kulôichröön ṙung nöng haroh tum sumkam nö ötkô nö halöinykenre. Ngatī inlahen ang Yēsū ik sā ò nö kapah, ngaich lūöi hang sumkam anga-aṅ nö ötkô nö la-evṙen sin.—Mët. 16:21.
12. Ihē ngam Sī-ö nö rööntu kui, hēk sitih inlahen rinööntö kui anga-aṅ inrē?
12 Eūka inlahen hēk ngam kūön ngam kikānö nö rööntö kui ngam pēch. Sitih inlahen taneungtökūö pöri ngam kinlēngô yěn ngaich ang Yēsū nö kapah? Unôichrit tö lūöi sumkam anga-aṅ nö ha-aṅlöng ngaich kě-ěvkūö tö ngam nômö töt hētu nö keuheūt. Ngaich ip tö halēniṙen ṙētak re min anga-aṅ nö ha-etngö ngam Sī-ö. (Hep. 2:14) Kě-ělkūö alaha re min ang Yēsū tö yip hol ò inrē min mahayöng nö ha-etngö yip kūön ngam pēch acha-a yip lā-al ngam Tēv.—Inm. 17:14; 20:4, 10. *
ASUH ÖP YANÖÖLEN HĪ ÖI LÖKTÖ IN NGAM KINLĒḴNGÔ?
13. Sitih inlahen öi töngamuh teūngen tö yanöölen re in ngam tö-eūka?
13 Iṙôken yanöölen öi tö kūö taneungtökūö ngam tö eūka. Ik sā Yēsū nö ing panam ngaich in minë la-en ò hēk inlahen ò nö vāyö tinrīken nö in yip tarik nö asīnkö inlahen ngam Yöng re anga-aṅ. (Yôh. 14:9) Lökten in ò ayī-ö öi akahakūö tö ngam Tēv Yāvē hēk hāngenlōn inrē tö ò. Teūngen inrē ayī-ö tö yanöölen re in minë ṙô Yēsū nö haköphöti, hēk in minë inlēnö inrē kahëtö ò töngamuh nö el minë māṅ. Haköpten hī anga-aṅ öi vāyö tinrīken hòṅ ngam Tēv Yāvē nö ṙamlōn nö in hī. Ngaich ik sā ò hēk nö pala-aiṙen kulôichröön ngam tö ngö manah hē ò nö kapah. Ngaich yöölen ayī-ö im tö kitaknyu mahām ò. Pô ò nö kēten ngam töhet nômö re ngaich löktö in e ang Yāvē “nö ahetlen hī i nup tökööl hī.”—1 Yôh. 1:7.
14. Kūöyòh öng nö öt ilööṙen nö teungtökūö ngam tö vënyu nö el ök panô-òṅ Ēten?
14 Ngam tö eūka tö Yāvē nö el ök panô-òṅ Ēten öt ilööṙen angū-ö nö teungtökūö. Kūöyòh ayī-ö mihôiṅ ngatī ṙô? Pön öt ilööṙe yanīhih ngam kūön ngam kikānö. Ngaich unôichrit e hēk nö holṙen ngam Sī-ö yip tarik. Öt höng angū-ö pön hòṅ ṙētakvö inrē ngam inlahen ngam kūön ngam pēch hēk tö ngam kūön ngam kikānö nö lā-al höö. Yēḵ hī öi hòṅ mikahtökūöre tö ngam tö eūka ngaich akahakūö ayī-ö tö inlahen ngam Sī-ö tö ngih panam inrē nö kunyah elmat tö më tarik Yāvē. Ha-ehenyen ṙô inrē ang Yēsū nö in yik haköptöre tö cha min nö kunyāhavö. (Māk. 13:13; Yôh. 17:14) Hěngòng samyeūheu rô-òten öi meuk inlahen më tarik Yāvē nö ngatī inlanken nö kunyāhavö.
15. (a) Kūöyòh öng nö kirööngö kumnyah elmat ngih panam tö hī? (b) Kūöyòh ayī-ö ötkö öi vöö tö ngam Sī-ö?
15 Ik sā Yēsū ngaich nö hayöng ik 1914 ngaich unôichrit e ngaich anga-aṅ nö sukten ngam Sī-ö nö löktö el halīöngö nö ing panam tī. (Inm. 12:9, 12) Hö-ö pöri ngam Sī-ö nöng hökngenre. Pön akahakūö anga-aṅ tö ngam ṙētak re nö ṙahëichyen lökten anga-aṅ nö holtö inngëṅṙöre nö hameuktö tanainyö re nö in yip tarik ngam Tēv. (Inm. 12:13, 17) Lökten angū-ö ngih chö-öny ngam panam ngam Sī-ö nö kirööngen kumnyah elmat töngamuh tö më tarik ngam Tēv. Mihôiṅ pöri ayī-ö öt pa-ekūö tö ngam Sī-ö hēk tö më hamòlṙen ò inrē. Mihôiṅ öi köplōn tö ṙô Pôl ngam tö ngö kinūichngö, “Chiāp lā-al hī yē ngam Tēv nö in hī?” (Rōm. 8:31) Sā Yāvē ngaich nö hateungngö ngam ṙô re im Ranehlö 3:15 in e mihôiṅ öi hameuktöre tö hī mihôiṅ öi ṙātö-ellōn re öi in ò.
16-18. Asuh nuk yanöölen hē Körtis, Ursulā hēk Chesikā inrē kūö cha nö akahakūö ngaich tö manah minë tö eūka im Ranehlö 3:15?
16 Yēḵ hī öi köplōn tö ngam kinlēḵngô Yāvē im Ranehlö 3:15 ngaich mihôiṅ min ayī-ö lā-al minë kanihngen re. Ngatī ṙô ang prötör Körtis ngam misnörī nö i Kuām. Ngöṙô anga-aṅ, “Ōt nuk ṙētak chu öich ngölōn, ötkô chin min la-al në kanihngen re, yēḵ chu pöri fě-ělre tö minë töngaich nö teung kinlēḵngô ngam Tēv im Ranehlö 3:15, ngaich ngönlöre ṙinātö-ellōn chū-ö in Yāvē.” Hökkö ngam ṙētak an prötör Körtis hē në kanihngen min nö hö-övö.
17 Vë-eny inlahen re hēk ang sistör Ursulā ngam aṅ Chörmönī. Ik sā ò nö chumkūöṙen nö haköp inlahen ngam tö-eūka im Ranehlö 3:15. Ngönlöre ṙinātö-ellōn anga-aṅ tö ngam Paipöl nö kô-en nö kahūich ngam Tēv. Meuk minë tahëng inrē anga-aṅ kinlēḵngô imat ngam Paipöl nö sitih inlahen anū-ö nö tāpöre nö in höö. Ngöṙô hēk anga-aṅ: “Ṙūöhlöre ngam hanāngenlōn chu tö ngam Tēv Yāvē ik sā chu meukö ò nö öt ṙāngen hī höng ip töng inlahen hī. Pön kētö maheūṅkkö hī anga-aṅ.”
18 Ngöṙô ang Chesikā ngam aṅ Maikrōnēsiā, “Köplōn chin töp sakāmö, öp hē chu akahakūö tö ngih nö kanô-en. Akah elmat ngaich chū-ö tö ngam kinlēḵngô im Ranehlö 3:15 nö teungtökūö. Akahakūö inrē ngaich chū-ö tö Yāvē nö öt lōn ò në inlahen hī töngamuh öi kihngen. Ngönlöre inrē ngam ṙinātö-ellōn chu tö chu yēḵ chu min löklōn Yāvē töngamuh ngaich kuchiken min chū-ö töngamuh ngaich mööḵlö kumchikṙen min hēk tö e ip yamih ṙētak.”
19. Kūöyòh öi mihôiṅ ṙātö-ellōn re tö ngam manā-aṅ ṙô ngam tö-eūka min nö ötlöktu nö öt teung?
19 Ngaich in öi akahakūö tö ngam tö-eūka im Ranehlö 3:15 ngaich nö teungtökūö. Akahakūö inrē ngaich ayī-ö tö ngam kūön ngam kikānö hēk tö ngam kūön ngam pēch inrē. Ngaich inrē ngam raneh kūön ngam kikānö nö paṙôkö kulôichröön ngaich inrē nö pēt ngam vah ò. Tökalēḵ an töngamuh ngaich nö Rācha, kě-ěvkūö inrē tö tö töt hētu nö keuheūt nômö. Ngaich inrē nö hòṅ chuh i kinheūṅten ngam kintöllö yip tahëng kūön ngam kikānö. Pōyen ngaich minë tö-eūka tö teungtökūö. Lökten öi mihôiṅ ṙātö-ellōnre tö ngam chööḵ minë tö-eūka ngam inlahen rinööntö kui ngam pēch, nö öthō min nö öt teung. Möl min hē e yip tarik Yāvē nö öt hěngö pinhë-eṅkūö! Hanöng saha taneungtökūö e pöri ta-a töi ui cheingö. Ṙātö-ellōnre pöri öi in Yāvē tö ò min nö löktö in ngam kūön ngam kikānö nö kētö ‘inkôlò yip tarik ikūö ngih panam.’ —Ran. 22:18.
TINKÖÖKÖ 23 Hayöng An Nö Ngaich Ngam Pūlngö Yāvē
^ Yēḵ hī hòṅ akah elnang tö minë ṙô ngam Paipöl, ngaich hòṅ urěh ayī-ö öi akahakūö tö manah ngam tö eūka im līpöre Ranehlö 3:15. Yēḵ hī min öi chumkūöṙen haköp inlahen ngih tö eūka, ngaich sīöp min ngam ṙinātö-ellōn hī öi in Yāvē, in minë kinlēngô ò inrē tö u nö öt löktu nö öt teungtökūö.
^ See Appendix B1, “The Message of the Bible,” in the New World Translation.
^ Ngëichkö ngam pòks “Achīö Yip Tö Kakka Im Ranehlö 3:14, 15.”
^ Ngëichkö ngam pòks “ Sitih Inlahen nö Teūngtökūö Ngam tö Eūka Im Ranehlö 3:15.”
