Haköpten hī ang Yēsū öi vī lanāmö i holre. Hěng heuh pöri anga-aṅ nö ngöṙô nö i yik haköptöre, “Uh Chin, tö lōn yīö, tamīntö kumchikṙen ing panam. Rö-ö Chin yih, Öich tīntö kumchikṙen; sanët pöri. Pò Chu ngaich yih, tī-iv tö tarik nö lā-al yöngre tö kikōnyö; ngam kūön kikānö nö lā-al ngam yöng kikānö; ngam kan kūön lā-al ngam yöng pīhö kikānö.” (Mët. 10:34, 35) Tö sitih manah öng ngam ṙô Yēsū?

Rö-ö ang Yēsū nö hōten më aṅ ngam mikūönö nö lā-al höö. Akhahakūö pöri anga-aṅ tö cha yěn ōt yip in cha min tö hòṅ haköp minë inköphöti ṙô Yēsū, ngaich ōt min yip tö sōḵ nö hāngö u, töp lökten më aṅ ngam mikūönö min nö kunyah elmat tö höö ngaich taṙōl ngam mikūönö. Lökten ang Yēsū nö hōten yik tö hòṅ haköp nö in ò hēk tö hòṅ kēḵ ngam vinôkö inrē, nö akahalōn tö re min nö ngatī inlahen.

Hōu in tö ngam Paipöl öi “lām i taṙòkhöre tarik.” (Rōm. 12:18) Mihôiṅ pöri nö hēkpī minë inköphöti ṙô Yēsū nö sā inlahen “sanët” nö harēvngen më aṅ ngam töhěng mikūönö. Nö sitih inlahen? Yěn hěng tak öre öp mahaköp ngaich öt ööire ngam tahëng, ngaich hakihten ngam holre min anga-aṅ ngaich vītöre nö “tökunyahaṅelmat” töm aṅ patī re.—Mët. 10:36.

Pōyen yip Kristīön töngamuh tö kihngen tö kūö yip aṅpatī cha nö öt sā ṙinātö-ellōn cha. Hēkpī cha-a nö töölô nö kēken nup la-en nup tövaich nö imat Yāvē. Töölô min cha-a nö fēkö nup tökiröng sakāmö. Hē e min cha-a nö hòṅ katöllö lōn re yěn haṙamlōn më aṅpatī re hēk yěn haṙamlōn Yāvē hēk Yēsū inrē. Hěng heuh ang Yēsū nö ngöṙô, “Ngòh tömötlö hanāngenlōn tö yöngre tö Chu, öt tökô nö in Chu.” (Mët. 10:37) Öt tö ngö manah pöri ngam ṙô Yēsū tö hī öi sōtu hāngenlōn tö mina yöng re. Pön höng fēlen hī anga-aṅ tö ngam tö hòṅ mötlö nö afēkaṙen tö hī. Yēn sōḵngen hī öre yip aṅ patī hī öi löklōn Yāvē, höng iṙūöhen ayī-ö hāngenlōn tö cha. Mööḵlö pöri ngam hanāngenlōn hī tö Yāvē.

Haṙivlōn in yěi hakihtuṙen tö aṅ patī re. Hòṅ köplōn pöri ayī-ö tö ngam ṙô Yēsū, “Ngòh tötkamëḵ ngam töhakālöre, nö tömrit Chu, öt kô anga-aṅ nö in Chu.” (Mët. 10:38) Akahalōn ayī-ö tö re min öi tö hakihtuṙen yěi tamömrit Yēsū, rōlheuh nöng aṅpatī hī yip mahakihten hī. Yēḵ hī pöri min havai tinrīken re in cha, ngaich mihôiṅ min cha-a nö yīhi kuilōn nö hòṅ haköp minë ṙô ngam Tēv.—1 Pīt. 3:1, 2.