Ik sā yik chamöh līöthen nö ul ngaich teūngen cha-a tö minë tö laku ṙôken īt minë tö yūsö nö i vīni ngam elpanam Pēpilön. Ngöṙô ök ih chamöh līöthen ang Ropört Koltvī, tö në īt nö tö vī-i nö ‘latunyī tö ngam panam, pön in e cha-a nö teūngen tö ngam tövai tumlat hēk tö minë ngòh tīre inrē nö tilī minë īt.’

Kôti kūö inrē më chamöh līöthen tö inlahen më mā aṅ Pēpilön nö yūsö u nö in minë tötlöng la-en. Ngöṙô ök ih pròfësör Pôl-Aolā Polyū, aṅ elngam Yunivörsity of Tòrentō, ngam tö akahakūö tö minë inlahngen më aṅ Asiriā hēk tö ngam ëlô cha inrē, ngöṙô anga-aṅ: ‘Pōyen nuk taneunglen ih chehen i Pēpilön ngaich meuk nuk tökūichö ihö imat u tö inlahen yik tarik misī yěn öt hang chööngö më rācha hēk öt milēḵṙen tö minë töhet chehen ngaich kavalhötvö cha-a nö ikūö ngam töhū kūö tameūyö.’ Sā ngih töhěng inchō elmat, teūngen cha-a tö ök chööngö ök Rācha Nēpukatnēsör nö tölṙô yik tarikre nö: ‘Fëlngen cha, föngö kūö cha nö ikūö ngam tökiröng tameūyö.’

Lohten ayī-ö öi fē-ělre tö ngam inlahngen imat ngam Paipöl im līpöre Tanīěl tö 3 mirūlö. Vënyu nang ayī-ö in e tö inlahen ngam Rācha Nēpukatnēsör, nö asöklö öp tökiröng humlum insā nö in ngam tö ṙakö kūö panam Tura latunyī töm panam Pēpilön ngaich hōten yik pumnāmö tarik nö sōntö kūöre nö vë-ekūö ò. Sōḵ pöri hē Satrāk, Mësāk, Apĕtnikō nö sōntö kūöre nö in e. Lökten ngam Rācha Nēpukatnēsör nö tainy, ngaich tölṙô inṙāichtökūö ngam töhū kūö tameūyö hēk nö “sat köl kumlēḵ ṙanāchö,” ngaich tölṙô kinvalhöt më tö lūöi tak tarik nö ikūö ngam “töhū kūö tameūyö.” Laklöng pöri cha-a tök töhěngtak mā-ahanga.—Tan. 3:1-6, 19-28.

Minë īt taneūngen yip chamöh līöthen nö i Pēpilön, nö inmeuktö minë ṙô aṅmat ngam Paipöl nö tökô-en. Kūichtö minë nöönyö inrē yik rācha nö imat minë īt. Ngö kinūichngö ön nö imat ngam töhěng īt: “Chū-ö chin Nēpukatnēsör, Rācha aṅ Pēpilön . . . Vahīlö chu ön ngih, elyöngö rācha . . . Örheūheu yin min më michaplö chu nö hayöngken e.” Sāta ṙô angū-ö nö in ngam līpöre Tanīěl 4:30. Vënyu ngam Rācha Nēpukatnēsör nö eū-eu re nö ngöṙô: “Röh öng nö ngih tökiröng Pēpilön, nö vahīlö chu i kumlēḵ chööngö chu nö elyööngö rācha, ineū-eu minā-a chu inrē?”