TÖHAKÖÖPÖ ĀTIKÖL 28
TINKÖÖKÖ 123 Hō-en Ngam Inyööngö Yāvē
Mihôiṅ Man Akahakūö Tö Ngam Tökô-en!
“Lökten söklöre, nyëkṙatre tö ngam kanô-en.”—EFI. 6:14.
ASUH ÖP MIN HAKÖP HĪ?
Sitih inlahen mikahkūö öi min tö ngam kanô-en lamöktö in Yāvē hēk tö minë tö minyôny ṙô ngam Satān hēk tö yip tö kunyaha elmat inrē.
1. Sitih inlahen mufē öm më-eṅ tö ngam kanô-en aṅ mat ngam Paipöl?
KIRÖNGEN hanangenlōn in tö minë kanô-en ṙô ngam Tēv, pön in e ngam ṙinātö-ellōnre hī. (Rōm. 10:17) Ṙātö-ellōnre inrē ayī-ö, tö Yāvē nö halēnlö ngam māṅ më Kristīön, ngaich ngam māṅ nö “machööḵlö rööntö ngam kanô-en.” (1 Tim. 3:15) Holtö ṙanamlōnre ayī-ö öi el katòh më prötör mahayōmken hī, pöi ṙātö-ellōnre tö cha nöng löknyö mat ngam Paipöl yěn mikahtö elnang hī tö minë kanô-en hēk asā minë kuilōn ngam Tēv inrē minë inchō-okūö hī kahëtö cha.—Hep. 13:17.
2. Asuh öp kanihngen hī mihôiṅ unôchrit hī haköp ngam kanô-en?
2 Hō-en minë kanô-en in aṅ mat ngam Paipöl hēk ṙinātu-ellōnre inrē tö Yāvē töngamuh nö lööngö tī nö hachō-okūö ngam söngkötön re, sön pöri öi mihôiṅ lō-ongkūö tö ngam talöökö kanô-en. (Vë-evkūö Yāköp 5:19.) Hēk lōnu ngam Satān tö hī öi yīhi kintööngölōn hēk ṙāngenre ṙātö-ellōnre in minë ṙô ngam Paipöl hēk minë inlēnö lamöktö el ngam söngkötön.—Efi. 4:14.
3. Kūö yòh öi hòṅ köptī tö ngam kanô-en? (Efisös 6:13, 14)
3 Vë-evkūö Efisös 6:13, 14. Röhta inlahen ngam Satān nö löktö in minë tö minyôny ṙô re nö vīlö ellōn më mahayöng nö la-al Yāvē hēk tö më tarik ò inrē. (Inm. 16:13, 14) Rö-ö nöng angū-ö pön kalēḵ alaha anga-aṅ nö hòṅ halō-ongkūö më tarik Yāvē. (Inm. 12:9) Lökten nö töt ṙanāngen ngam inlahen hī hòṅ köptī tö ngam kanô-en, ngaich mikahtökūöre tö nup tö kô-en hēk tö minyôny inrē. (Rōm. 6:17; 1 Pīt. 1:22) Yē hī min ngatī inlahen ngaich öt kô-òngvah min ayī-ö töp tökiröng kanihngen!
4. Asuh nup min kahakkö hī in ngih ātiköl?
4 Chumkūöṙen in min ngëichkö në tö nët tinrīken in ngih ātiköl ngam lökten hī min akahakūö tö nup tökô-en hēk tötkô-en. Ngaich meuk inlahen e min ayī-ö yěn sā ṙô ngam Paipöl hēk yěn hö-ö. Hěnghöre hō-en minë inchō-okūöre inrē ayī-ö lamöktö el ngam söngkötön. Rö-ö nöng angū-ö pöi kakken minë tö lūöi inlēnö ngam lökten hī mihôiṅ köptī tö ngam kanô-en.
MINË TÖTṘANĀNGEN TINRĪKEN HĪ AKAHAKŪÖ TÖ NGAM TÖKÔ-EN
5. Asuh nup min inlahen hī yěi pa-ekūö tö Yāvē?
5 Pa-ekūö tö Yāvē. Yē hī min öi pa-ekūö tö Yāvē, ngaich inmeuktö hī min kiröngen hanangenlōn tö ò hēk öt lōnu inrē ayī-ö öi kētöre in nup la-en tö mihôiṅ min nö haṙivlōn tī tö ò, lökten ayī-ö hòṅ ma-ainyre mikahtökūöre tö nup tölöng hēk tövaich nö imat Yāvē hēk asuh inrē nup tö kô-en. Ngaich la-evṙen ayī-ö tö nup la-en chūök ò nö ṙāmlōn. (Inch. 2:3-6; Hep. 5:14) Lökten ui halöngten ngam pinhë-ekūöre tö tarik, pön angū-ö min lökngen ngam hanangenlōn hī nö kūönngöre nö in Yāvē hēk haṙivlōn inrē min anga-aṅ.
6. Sitih inlahen yik tö sömtak nöng ilök ṙô re nö vënyö ngam kanô-en tö kūö pinhë-ekūö tö yik tarik?
6 Yē hī min mötlö pinhë-ekūö tö tarik ngaich mihôiṅ min ayī-ö marôvat tö ngam kanô-en, chumkūöṙen tö inlahen yik tö 12 mā yik aṅ Israel yik tö töölô nö hayunkö matre nö ngëichkö öp panam kinlēḵngô, kūö ngam pinhë-ekūöre më tö söm tak tö më aṅ Kanā-an lökten nö kūönngöre ngam hanangenlōn cha tö Yāvē, ngö ṙô cha-a nö in yik rīkre aṅ Israel, “Ötkô in kirööngöre la-al yip tarik pò cha nö kalēḵ tö hī.” (Kin. 13:27-31) Yēḵ hī sā mat më tarik öi ngëicha ngaich kô-en më aṅ Kanā-an nö kalēḵ tö më aṅ Israel, öt kô-en pöri angū-ö nö ngatī pön in më aṅ Israel ang Yāvē ik hē e. Vaichngö pöri më tö söm tak, hòṅ afēkö inlahen nup tī Yāvē öre cha-a nö in yik aṅ Israel misī, yē cha öre nö ngatī inlahen ngaich in e cha-a nö akaha elmat tö më tarik aṅ Kanā-an nöng töng hö-öv nö ikūö Yāvē. Harikngöre tinrīken pöri na Yôsua na Kalěp tö yik tö sömtak. Pò cha nö pa-ekūö tö Yāvē hòṅ haṙamlōn ò inrē lökten cha-a nö ngöṙô nö in yik tarik, ‘yěn lōn Yāvē angu-ö nö in hī ngaich kēhöt hī min anga-aṅ nö ip panam hēk kēten e inrē nö in hī.’—Kin. 14:6-9.
7. Sitih inlahen öi mihôiṅ asīöp ngam pinhë-ekūöre tö Yāvē? (Ngëichkö ngam nyat.)
7 Yěn ōt min ngam pinhë-ekūö hī tö Yāvē, ngaich urěh min ayī-ö fēkö nup fësla re yěn tö hō-ov anū-ö tö ò hēk yěn hö-ö. (Sal. 16:8) Asūp mihôiṅ inlahen hī, yěi hòṅ asīöp ngam pinhë-ekūöre tö Yāvē? Yěn ōt öp tö hěng inlahen haköp meh imat ngam Paipöl ngaich mihôiṅ më-eṅ hē e hatöönöre, ‘asūp öre inlahen chu yē chu öich ichūök cha?’ Tö sā meh fēkö inlahenre öm sökhak öm in yip tö söm tak mā öm hang minë vahënyö cha tötkô-en, ngöṙô cha-a töre nö ötkô min nö la-al më aṅ Kanā-an. Asuh öp ngaich min inlahen meh? Ṙātö-ellōnre hòng min më-eṅ öm in minë ṙô cha, pa-ekūö röng më-eṅ tö më tarik? Pa-ekūö hòng më-eṅ tö Yāvē hēk haṙamlōn ò ṙöng? Kô-en yik michaplö më aṅ Israel nö öt akahakūö tö nup tö kô-en hēk tötkô-en. Öt rēhěn cha-a inrē nö ṙātö-ellōnre tö ṙô nā Yôsua nö Kalěp nö kô-òṙô. Lökten ngaich cha-a nö öt teunghöt nö in ngam kinlēḵngô panam.—Kin. 14:10, 22, 23.
In chīö öm ṙātö-ellōnre? (Ngëichköm perekrāf 7)
8. Asūp tinrīken tö hòṅ asīöpö tö hī hēk kūö yòh?
8 Hayāichngöre. Hameuktö ngam kanô-en an Yāvē nö in yip tarik tö yāichö ellōn. (Mët. 11:25) Īnu in ayī-ö tö ngam inyāichngö lökten öi kē inyööken re in yip tahëng öi haköp ngam kanô-en. (Inl. 8:30, 31) Hòṅ chumkūöṙen pöri ayī-ö töre ui aṅhav in tö ngam tanāilölōn, örheūheu pöri öi īnu tö ngam inyāichngö. Ngòh tarik tö tāilölōn höng ṙātö-ellōnre anga-aṅ tö minë chööngö aṅ mat ngam Paipöl hēk minë inlēnö lamöktö el ngam söngkötön nö tölöng. Ngöṙô lōn pöri inrē anga-aṅ tö minë mufēre nö öt vaich.
9. Sitih inlahen öi köptī tö ngam inyāichngö?
9 Hòṅ köplōn ayī-ö töre öi töng kūönö imat Yāvē, yěi hòṅ īnu tö ngam inyāichngö. (Sal. 8:3, 4) Hòṅ havëkö kūö Yāvē inrē ayī-ö tö inlahen re örheūheu īnu tö ngam inyāichngö hēk hīnöre inrē haköp inlahen ò. Ngaich mööḵlö mat min ayī-ö tö ngam mufē Yāvē. Hēk yěn kētö inlēnö anga-aṅ nö löktö in ngam ṙô re hēk ngam söngkötönre, ngaich hāngö u min ayī-ö. Yē hī vë-ekūö ngam Paipöl, hòṅ ngëichkö inlahen Yāvē ayī-ö nö hangenlōn tö yip mahayāichngöre hēk kunyaha elmat tö yip tö aṅhav in töm tanāilölōn. Chumkūöṙen töre um īnu tö ngam tanāilölōn yěm teūngen tö nup tökiröng la-en. Köptī pöri töm inyāichngö.
KÖPTĪ TÖ NGAM KANÔ-EN
10. Löktö in chīö tī ang Yāvē nö hachō-okūö më tarikre?
10 Ṙātö-ellōnre tö minë inchō-okūöre tö ngam söngkötön Yāvē. Löktö in Môsös hēk Yôsua tī ang Yāvē nö hachō-okūö yik tarikre misī. (Yôs. 1:16, 17) Hēk ik sā yik aṅ Israel nö akahakūö tö löktö minë inchō-okūöre nöng löktö in Yāvē. Ngaich hāngö u cha-a töp lökten cha nö kiröngen taneūngen tö inkòlô. Unôichrit e ngaich pöri ik sā minë māṅ nö vīlöng. Ngaich löktö in më tö 12 mahaköp ang Yāvē nö kētö inchō-okūö yik Kristīön. (Inl. 8:14, 15) Unôichngöre hēk më mahaköp nö holten më minṙöinylen nö la-evṙen nö i Yērusalem. Ik sa yik Kristīön nö hāngö u, ngaich lökten in e ngam ‘ṙinātö-ellōn cha nö ngönlöre hēk kaheuk sakāmö cha-a nö ṙūöhlöre ṙôken.’ (Inl. 16:4, 5) Ngatī töngamuh yěi hang nup inchō-okūöre tö ngam söngkötön Yāvē, ngaich teūngen ayī-ö tö tö pōyen inkòlô. Sitih mufē ang min Yāvē yěm öt hangṙô yip tö halēnlöng tö ò? Ta-a töi mikahtökūöre tö öp sanapṙô e öi höng im inlahen më aṅ Israel ik sā cha nö chuh ip panam kinlēḵngô.
11. Sitih inlahen yik aṅ Israel ik sā cha nö la-al kūö Môsös? (Ngëichkö ngam nyat.)
11 Katöllen Môsös hē e ang Yāvē nö mahachō-okūö yik aṅ Israel, rīkre pöri yik tarik aṅ Israel hēk tö yik tökiröngö minā-aṅ nö la-al kūö Môsös. Ngöṙô cha-a nö in Môsös: ‘Yĕh meuk vē ṙôngö tarik nö töhet nö ṙòkhöre, ngaich ihôi cha ang Yāvē.’ (Kin. 16:1-3) Kô-en më ṙôngö më tarik aṅ Israel misī nö töhet nö ikūö Yāvē, ngaich katöllen Môsös pöri ang Yāvē nö mahachō-okūö cha. (Kin. 16:28) Lökten ik sā cha nö la-al kūö Môsös, ngaich töng lamā-al kūö Yāvē cha-a. Uroh cha-a nö öt afēkö minë kuilōn Yāvē nö in cha kūö lōnre tö minë minā-aṅ. Lökten ang Yāvē nö fëlngen cha hēk tö yik hamòlṙen cha inrē tö köinyu ṙôken aṅ Israel. (Kin. 16:30-35, 41, 49) Ngatī töngamuh, yē yip töt hamang minë inchō-okūöre tö ngam söngkötön Yāvē. Ngaich öt ṙamölōn ang Yāvē nö in cha.
Achīöp min tö kētu hinòlṙen tö meh? (Ngëichköm perekrāf 11)
12. Kūö yòh öi mihôiṅ ṙātö-ellōnre in ngam söngkötön Yāvē?
12 Mihôiṅ in ṙātö-ellōnre öi in ngam söngkötön Yāvē. Kūö yòh? Pön yē më prötör mahachō-okūö hī nö ngöṙô lōn tö hī hòṅ tumfömlöng mikah elmat öi in minë inköphöti hēk hòṅ harīki inrē minë inlahen hī im la-en inhānga, ngaich öt heūlngöre cha-a nö in u anū-ö la-en. (Inch. 4:18) Hòṅ haṙamlōn Yāvē cha-a lökten nö ngatī inlahen, angū-ö ngih töt ṙanāngen nö in cha hěnghöre chumkūöṙen inrē cha-a tö minë kahë re fësla nö hòṅ lökngörit imat ngam Paipöl nö asā minë tö chiplö inköphöti minë tö kēkaṙen tö më tarik Yāvē.
13. Asuh ön minë tölöök ṙô inköphöti, ngaich hòṅ asuh öp inlahen hī?
13 “Köptī tö minë tölöök ṙô inköphöti.” (2 Tim. 1:13) Asuh öp manah minë ‘tölöök ṙô inköphöti,’ minë tö kētu inköphöti aṅ mat ngam Paipöl. (Yôh. 17:17) Lamökngörit in minë inköphöti ön ngam ṙinātö-ellōn hī. Haköpten hī inrē ngam söngkötön Yāvē tö hī öi hòṅ köptī tö u anū-ö inköphöti. Yē hī min ngatī inlahen ngaich ṙātö-ellōnre min ayī-ö tö Yāvē nö kētö minë tö pōyen inkòlô hī.
14. Kūö yòh yik rīkre Kristīön nö öt köptī tö ngam ‘tölöök ṙô inköphöti’?
14 Asuh öp min inlahen hī yěi öt köptī tö minë ‘tölöök ṙô inköphöti’? Chumkūöṙen tö inlahen yik rīkre Kristīön ik raneh senchurī, nö vënyö inlahen ngam sakāmö Yāvē nö ngaich nö yih, ngam töng öt kô-en. Ṙën cha-a nö ngatī inlahen kūö cha nö teūngen tök töhěng chitri, ngöṙô lōn cha-a tö e nö lamöktö in Pôl. Öt rēhěn cha-a nö hòṅ mikahtökūöre tö e yěn tö kô-en. Pön höng ilööṙen cha-a nö ṙātö-ellōnre nö in e hēk vënyö nang yik tahëng. Yēḵ cha öre nö köplōn tö ṙô Pôl nö haköpten cha, ngaich öthō öre cha-a nö lō-ongkūö. (2 Tös. 2:1-5) Lökten ang Pôl nö kētö inlēnö cha nö ötkô nö ilöö ṙātö-ellōnre nöng in nup töng ṙô. Mikahtökūö cha inrē anga-aṅ tö inlahen ngam chitri yěn lamöktö in ò hēk yěn hö-ö. Ngöṙô tī anga-aṅ nö kūich nö in ngam manā-angrit ngam chitri: “Ngam sinlāmö tī chu chu-ö Pôl aṅtītö eltīre, ngam minkahngö i mat në tökūichö līpöre: ngatī tī chu-ö kūich.”—2 Tös. 3:17.
15. Hòṅ sitih inlahen öi yěi sōḵ lō-ongkūö in nup tövaich ahangre? Kētö öp töhëng inchō-elmat. (Ngëichkö ngam nyat.)
15 Asūp haköplö hī in ngam chitri kahūich Pôl nö in yik aṅ Tösölònikēôl? Yē hī hang nup ṙô tö vaich töt sāḵta nö in minë inköphöti aṅ mat ngam Paipöl, ngaich hòṅ holtö mikah elmatre ayī-ö öi la-evṙen. Chumkūöṙen tö inlahen yik prötör hī yik mi-i Sōviöt Yunīön. Hěngheuh më mā mahayöng nö kūich ök chitri tö sā kinūichö nup chitri lamöktö el ngam vörlt hetkuātörs nö chamuh in më prötör. Im chitri më prötör nö töölöṙô nö vīlö öp tahëng hēk söngkötön re. Ngam mineūkö ngam chitri nö sā tö kô-en angū-ö. Hö-ö pöri nö lō-ongkūö më tö chiplö prötör nö meukö e. Akaha elmat cha-a tö minë tö kūichö aṅ mat e nö öt sāḵta ṙô nö imat ngam Paipöl. Ngatī inlahen yin töngamuh më tö kunyaha elmat tö hī nö halō-ongkūö hī nö löktö in ngam intörnet hēk el ngam sōsöl mitiā inrē nö ahangkö nup tötkô-en ṙô, hěnghöre hòṅ vīlö nup kunyah elmat inrē nö ihôi hī. Lökten ui veut kahë tö nup ṙô, holtö mikah elmat re pöri hēk mikahtökūöre tö nup haköpre hēk ha-angre inrē yěn tö sāḵta nö i ṙô ngam Paipöl. Yēḵ hī min öi ngatī inlahen ngaich öthō min öi lō-ongkūö.—2 Tös. 2:2; 1 Yôh. 4:1.
Um ṙātö-ellōn in nup ṙô tö sā tökô-en vinënyi (Ngëichköm perekrāf 15) a
16. Hòṅ sitih inlahen öi yěn öt köp yip tahëng nö im kanô-en? (Rōma 16:17, 18)
16 Holṙen me töchiplö tarik Yāvē öm ha-öinyö ò. Lōnu an Yāvē tö hī öi hēngö inlahen öi ha-öinyö ò. Yip töt köp pöri nö im kanô-en ngaich vënyö nup ṙô cha-a tötkô-en nö in yip tahëng hēk vīlö ngam kumyah inrē nö el ngam māṅ. Lōnu ang Yāvē tö hī öi ‘ṙūöhngöre’ tö yip tö ngatī inlahen, hòṅ hī öt lō-ongkūö tö ngam kanô-en.—Vë-evkūö Rōma 16:17, 18.
17. Asuh nup min yanöölen hī yěi akahakūö tö ngam tökô-en hēk tö ngam töt kô-en hēk köptī inrē tö ngam kanô-en?
17 Yē hī min öi akahakūö tö inrīkngöre ngam tökô-en hēk tö nup töt kô-en hēk yē hī köptī tö ngam kanô-en, ngaich ṙöhta min ayī-ö in Yāvē hēk ngön inrē ngam ṙinātö-ellōn hī. (Efi. 4:15, 16) Öt lō-ongkūö inrē min ayī-ö in minë tö minyôny ṙô ngam Satān hēk öt fëhnguṙen min yěn yih öp tökiröng kanihngen. Lökten öi köptī tö ngam kanô-en ngaich örheūheu min ngam ‘Tēv lanāmö nö in yīö.’—Filip. 4:8, 9.
TINKÖÖKÖ 122 Haköpöre!
a INLAHEN VINËNYÖ NGAM NYAT: Inlahen inmeuknyö ngam Sōviöt Yunīön īnuk urěh samyeūheu. Hěng öp chitri taneūngen më prötör hī tö sā kinūichö nup chitri lamöktö el ngam vörlt hetkuātörs, ngam chirti pöri nö löktö in më tö kunyaha elmat tö hī. Ngatī töngamuh më tökunyah elmat tö hī, nö halō-ongkūö hī nö löktö in ngam sōsöl mītiā hēk tö ngam intörnet nö vënyen ngam söngkötön Yāvē nö töminyôny.
