Tö la-evṙen nö el ngam mupākö òfis i Frāns nā prötör Nikōla hēk sistör Sëlin ik ureh. Harī-i pöri ngaich ngam asaënmen cha hēk tufömngöre māṅ inrē cha-a. Hěng ngam kanihngen cha. Ngöṙô cha-a: “Kô-en anū-ö nö tufömngöre nö in ai hēk kuchīken inrē, unôichngöre pöri ai öi fēken yik ureh holre, kūö ai öl vī holre tö më prötör sistör el ngam tö tufömngöre māṅ.” a Ōt nup min kanihngen yěi chuh el nup fömngöre māṅ. Asūp inlahen meh mihôiṅ? Asūp inlahen më tahëng prötör sistör mihôiṅ nö hayööken meh? Asuh öp min inkòlô taneūngne meh yěm hanòl yip prötör sistör el ngam tufömngöre māṅ hēk asuh inrē mihôiṅ öp kahëtö meh?

YĔM KIHNGEN, NGAICH KĒKEN NË TÖFËN INLĒNÖ

1. Hayöönglenre in Yāvē. (Sal. 37:5) 20 samyeūheu nö el ngam töhěng māṅ ang sistör Kasumī ngam aṅ Chapān. Ik sā ngam pīhö ò pöri nö tahëngö kamngö chūök nö kamān, tahëngöre ngaich ngam māṅ cha. Höng ṙālen minë töng sitih pöri ngam sistör nö in Yāvē. Ngöṙô anga-aṅ: “Ṙōlheuh chū-ö fēkö inlahen re öich sā töng hěng tak hēk yīhi pinrūtölōn inrē. Örheūheu pöri chū-ö öich keuheūtnyö ṙô ellōnre öich in Yāvē hěngöre örheūheu inrē anga-aṅ nö kētö nganöönö chu.”

Sitih inlahen mihôiṅ ayī-ö, asīöp ngam ṙinātö-ellōnre in Yāvē? Yěi lōnu ṙūng tö öp kun chōn nö sīöp, ngaich örheūheu ṙūng ayī-ö rös röön e tö mak, hěngöre havai ngam tumlat e inrē. Ngatī inlahen ayī-ö hòṅ kētöre la-evṙen yěi lōnu tö ngam ṙinātö-ellōnre nö ṙūöhlöre. Ang prötör Nikōla ngam tö vënyu inlahen taheui, haköp inlahen hē Aprahām, Yēsū hēk Pôl anga-aṅ më maharööḵngenre nö hateungngö kuilōn Yāvē. Lökten in e ngam ṙinātö-ellōn ò nö ṙūöhlöre tö Yāvē min nö hayööken ò. Yēḵ meh min  örheūheu vë-ekūö ngam Paipöl, istötī mat e ngaich öt kihngen min më-eṅ chuh el nup tufömngöre māṅ. Hěnghöre haruskö alaha yip tahëng inrē min më-eṅ öm vë-eny nup haköpre.

2. Um asātöre. (Mum. 7:10) Ik sā prötör Chūël nö löktö Pēnin i Afrika nö chuh Amerika nö iyöng. Ngöṙô anga-aṅ: “Yěich meuk kūö yip tarik ṙūng, ngaich hòṅ hang nup istorī cha-a inlahen tinrīken chu.” Harīkngöre ngam mufē ò nö meukö u hēk chěingen inrē anga-aṅ lökten nö ṙūöhngöre tö yip prötör sistör. Ik sā ò pöri nö mikahtökūö tö inlahen më prötör sistör, ngaich halööktö ngam mufē re anga-aṅ. Ngöṙô anga-aṅ: “Öp töng yòh kamngö hī ikūö ngih panam, ṙòkhöre ayī-ö tarik höng aṅ kūö e, ngam ṙinò-ò hī pöri tö harīkngöre. Lökten pòrô öi tö harīkngöre tinrīken, hòṅ hō-en höö ayī-ö.” Um asātö ngam tufömngöre māṅre nö in ök tö hötṙěh māṅ. Ngöṙô ngam painīör sister ang En-Līs nö vë-eny inlahen e: “Hö-ö chin öich chamöh nuk urěh inlahen re, pöich haköp inlahen nup tö tufömngöre inlahngen in nup tufömngöre kamngö.”

Hö-ö yin më minṙöinylen inrē nö asāten meh nö in nuk urěh inlahen meh el öp hötṙěh māṅ. Lohten nö harīkngöre nup tinrīken meh nö el ngam tufömngöre māṅ, öt tö vaich pöri angū-ö. Tövai an ngam inlahen meh min yěm urěh öm mikahtökūöre tö inlahen ngam kamngö in e, ngaich möl öm kētö inlēnö. (Mum. 3:1, 7b) Um höng ṙò-òv tö inlahen öp tahëng. Pò meh hòṅ hameuktöre inrē öm tövai inchōḵ elmat. Ngaich mihôiṅ cha-a min nö haköplu nö in meh.—2 Kòr. 1:24.

3. Hanòltöre in më prötör sistör. (Filip. 1:27) Yēḵ meh chuh in öp tahëng kamngö, ngaich hòṅ pōyen ṙētak më-eṅ keuheūtngenre tö nup la-enre. Um ṙāngö töhěng mīting hēk asā tölngö kanò-ò meh ngatī inlahen öm chuh el patī pūlngö öm mīting. Yēḵ meh min öt chuh el mīting, ngaich sitih inlahen yip prötör sistör min nö mikahtökūöre tö meh? Sitih inlahen inrē min nö hayööken meh? Ngam sistör tö Lūsinta minë-eny nö holtö nap tönët tak kūönre nö iyöng Saôt Afrika. Vënyö inlahen re cha-a nö sitih inlahen nö nòlhöt nö el ngam tufömngöre māṅ: “Ngöṙô yik hol chu nö in chu, yěm chuh el öp tufömngöre māṅre min, ngaich ilööṙen öm hanòlö prötör sistör, holröön cha öm ahānga hēk kētöre inrē in nup asaënmen (assignment) el mīting. Ngöṙô inrē ihöö in yip prötör tö cha nö mihôiṅ nö mīting fòr fīl sörvis nö i patī ih.”

Yēḵ meh holṙen më prötör sistör el ngam māṅ, ngaich lökten in e min më-eṅ hēk cha-a nö sīöplöre “ṙinātö-ellōn”. En-Līs, ngam tö kakkö inlahen taheui tö hī nö töölöṙô anga-aṅ tö më minṙöinylen nö kalahtenre nö holṙen më prötör sistör nö ahānga aṅ ngam māṅ. Ngaich kô-en anga-aṅ nö ngatī inlahen. Ngöṙô anga-aṅ: “Kôta mat chū-ö tö e nö tövai nö inlahen chu hanôltöre in më prötör sistör.” Yěm kētöre inrē im inhëtö ngam Patī Pūlngö hēk im la-en minānö, ngaich in e maheuk min më prötör sistör tö meh öm māṅre ṙô tö ngam māṅ cha. Asā kanò-òṅ meh kētöre in në la-en hēk ihôi më prötör sistör inrē, ngatī inlahen min nö vītöre nö hol meh më prötör sistör, ngaich ngam tufömngöre māṅ min nö sā mikūönö meh.

4. Vī tufömngöre holre. (2 Kòr. 6:11-13) Ṙūöhtö mikahkūöre tö më prötör sistör öm vë-ekūö cha hēk urēhěkūö ngam ṙētak öm yihtakūö el mīting hēk unôichrit e inrē mihôiṅ öm sökngöre. In e min më prötör sistör nö meuk inlahen meh öm chumkūöṙen  tö cha. Kalahtenre öm köplōn tö minë-eny cha. Yēḵ meh min öm kē minë-eny cha hēk hameuktöre öm hangenlōn tö cha, ngaich lööṙen inlahen cha-a min nö vë-ekūö meh hēk hanôlö meh inrē.

Um piṙūtkö inlahen yip prötör sistör el ngam tufömngöre māṅ yěn öt ööi re cha-a tö meh hēk yěn hö-ö. Pöm mihôiṅ kētö ṙētak cha nö mikahtökūöre tö meh. Asūp mihôiṅ inlahen meh? Chumkūöṙen tö inlahen sistör Lūsinta ngöṙô anga-aṅ: “Havëten më prötör sistör ihöö nö i patī re, löktö in e ngam innôlö ih nö vai nö in cha söl ing töngamuh.” Mihôiṅ më-eṅ inrē kalahtenre ngatī inlahen.

“HA-ÖINYTÖ YĪHI HÖÖ”

Yěn hěng tak öp yamihtökūö nö el ngam tufömngöre māṅ, ngaich lohten min anga-aṅ nö aṙē-ěv alaha. Asūp mihôiṅ inlahen meh? Ngöṙô ang Pôl misī: “Sā inlahen Kristu nö ha-öinytö yīhi yīö, ngatī inrē yī-ö ha-öinytö yīhi höö.” (Rōm. 15:7, NWT) Yī-ö minṙöinylen, mihôiṅ yin yī-ö inrē asīnkö inlahen Yēsū holtö hanangenlōnre öi höngkūö më tufömngöre prötör sistör hēk mihôiṅ inrē öi hayööken cha. (Ngëichkö ngam pòks “ Yěm Harīḵngö Māṅre.”) Mihôiṅ më rīkre prötör sistör el ngam māṅ, tö më kun nyīö inrē nö ngatī inlahen hēk mihôiṅ inrē nö vī-i cha nö holre.

Ngih hēk inlahen hī mihôiṅ ha-öinytö yīhi höö, öi havëten cha nö i patī re. Hěnghöre mihôiṅ öm chöhtö inlahen tī re hayööken cha. Yēḵ öp töhěng tak sistör nö chuh in öp tahëng panam, ngaich mihôiṅ öp töhěng tak sistör el ngam māṅ aṅ in ngam panam nö hayööken ò nö vë-eny nang ò tö inlahen ngam panam hēk harunten ò inrē nö sitih inlahen mihôiṅ nö kē pösre (bus) hēk trēnre (train). In e anga-aṅ nö teūngen tö inyöökenre nö löktö in ngam sistör hēk öt vaichngö inrē anga-aṅ tö ngam hanangenlōn ngam sistör tö ò.

ĪṘŪÖHEN KŪ-Ö URĔH

Yēḵ ngam kūön chehechōn nö vöö nö meutnyi tö ngam fôngöre ngaich öt hē min anga-aṅ nö heuveū-en nö kiteū. Yē ò pöri nö hòṅ kiteū ngaich hòṅ kēngö ngam pinhë-ekūöre anga-aṅ. Ngatī ṙēngen më-eṅ yěm chuh el ngam tufömngöre māṅ, lohten min nö pōyen nup pinṙūtölōn meh, mihôiṅ min öm aṙē-ěv hanôltöre in më prötör sistör. Hòṅ kēngen ngam  miṙē-evre pöri më-eṅ. Ngaich möl min öm kū-ö urěh hēk kētöre inrē öm la-evṙen el ngam tufömngöre māṅ im linökölōn Yāvē. Ngöṙô nā Nikōl nā Sëlīn: “Pōyen haköplö in yěi chuh el minë tahëng māṅ. Rö-ö pön ōtre nup tinrīken hī tö hòṅ halööktu yěi chuh in nup tufömngöre chūökö hēk yěi hanôl yip tahëng inrē, lökten in e nö sīöp minë tövai tinrīken hī.” Ik sā prötör Chīn-Chāls nö holtö më mikūönöre nö chuh in ngam tahëng kamngö nö iyöng, ngaich kiröngen yanöölen ngam mikūönö ò. Ngöṙô anga-aṅ: “Kū-ö urěh më kūön chu nö im linöökö lōn Yāvē nö el ngam tufömngöre māṅ hēk röhtö inrē nö in Yāvē. In e ngaich ngam kūön ai kikānö nö kētö asaënmenre el mīting. Ngaich önpöptais (unbaptized) pöplisör ngam kūön ai kikōnyö.”

Lohten më-eṅ lōnu töre chuh in nup tahëng māṅ tö lōnu tö tarik, ōt pöri lohten öp lāinyngen meh öt teungten. Yěn ngatī angū-ö ngaich mihôiṅ öm kē inyööken in minë inlēnö taheui tö kētö nö in ngih ātiköl hēk mihôiṅ inrē öm harīktö inlahen tīre öm la-evṙen el ngam urěh māṅre. Sā inlahen re më-eṅ örheūheu hayöönglen re in Yāvē, hanôl më prötör sistör ngaich ṙūöhlö inlahen re öm kētöre in minë la-en el ngam māṅ. Hěnghöre kalahtenre inrē öm holṙen yip tahëng öm ahānga, hangönlö ngam innôlöre in më prötör sistör hēk vī tufömngöre holre. Ōt hòng mikahkūö meh tö tufömngöre prötör sistör yamihtökūö nö el ngam māṅ tö hòṅ lōnu tö inyöökenre? Hayööken cha man. Pò ngam hanangenlōn nö inkahkö hī öi Kristīön hēk maharöhten hī inrē in Yāvē. (Yôh. 13:35) Mihôiṅ man ṙātö-ellōnre tö “në töngatī tökētu nö ṙanāmölōn ngam Tēv.”—Hep. 13:16.

Pōyen nup kanihngen yip prötör sistör chamuh el nup tufömngöre māṅ, mihôiṅ pöri cha-a nö la-al u. Mihôiṅ inrē më-eṅ ngatī inlahen. Ngöṙô ang Ënlīs: “Yěi harīngö māṅre, ngaich hòṅ kumröngnyö ngam ellōnre ayī-ö, löktö in e chū-ö pōyen vahī tö holre.” Ngöṙô ang sistör Kasūmi: “Yēḵ meh öm chuh el öp tahëng māṅ, ngaich meuk inlahen tī Yāvē më-eṅ nö chumkūöṙen tö meh. Töt insā-av angū-ö ngih nö ekspirīön.” Köplōn hòng më-eṅ töp ekspirīön Chūël? Ngöṙô anga-aṅ: “Pōyen vahī chin ngaich tö holre, lökten öich māṅre lōn tö ngam tö tufömngöre māṅ. Haṙivlōn min chū-ö yēḵ chu öich ṙāngen e.”