Lōnū an Yāvē nö in yip tö hòṅ pīhövö nö ṙamlōn nö in höö hēk köp inrē. (Mët. 19:4-6) Yēḵ meh öm hòṅ pīhövö, isuh öm min teungēn tö yip sā lōn meh nö pihö meh? Vamīlen hi an Yāvē anga-aṅ tö akahakūö tö inlahen hi öi isuh teunglen tö pīhöre. Pōyen nun minë chūök inlēnö kahētö ò, yēḵ hi min öi hangö u ṙamlōn min öi in ngam pīnihöre. Ta-a chěi töi ngeichkö minë inchööngten.

Ngam Raneh: “Tulöng michīl an ngam ellōn tö taṙòkhöre öt kôlò takô inrē.” (Yar. 17:9) Hòṅ kööpölōn ayī-ö tö ngih ṙô. Lökten ṙung nët tak ngaich nap mameūk kūöre ilööṙen cha-a nö yikngen höö, hēk yal inrē nö vë-ekūö höö öt ngaich öt akaha-elmat tö inlahen re nö kēḵ fāisla re. Yēḵ öp tarik pöri tö ngatī inlahen nöng chöö-öinytö ngam elkūilōnre nö kēm faisla re, fēḵ unôich min anga-aṅ. (Inch. 28:26) Töp lökten öi ötkò öi urěhnyôṅ öi vë-eny ṙô ellōnre yei öl akahakūö töp tarik hēk ötkò inrē öi kilēḵngôṅre.

Ngam Innëtö, im Inchōḵ-oṙô 22:3 ngam tö ngöh: “Meuk kanihngen ngòh töaka-ha tarik ngaich hayungöre, iṙūhöṙöön pöri töt akaha ngaich kihten tökūö e.” Asuh nup min kanihngen yei yūs ngam tēting ēp hēk töm vēpsait? Ōt yip ngaich më el ngam online nö tēting. Haṙivölōn öi meūk inlahen chā pön höng nyāmka hēk hā-ôsiyö inrē. Ōt yip töng keuheūtö rūpiö. In cha më tö ngāti inlanken ōt inrē më vamënyen Yāvē.

Ōt nun hēk minë tahëng ēp töt löng. Minë ēp hēk vēpsait kömpīutör pròkram chūök kamngö chamöh yip tövaita nö pihö höö. Öt urôh pöri ngam inlahen cha nö köpsöṙen hēk ṙamlōn inrē nö in höö. Hòṅ chumkūṙen in, töm inpīhö nö tökiröng nö fesla. Höng in ngam kömpiūtör prōkrām hòng min öi kēḵ fesla ngam töng vahi tarik? Hēk im paipöl ṙöng, ngam töt hō nö vaich?—Inch. 1:7; 3:5-7.

Ngam linūyö, im Inchōḵ-oṙô 14:15 ngam tö ngöh: “Ṙatö ellōnre ön ngòh yāich nö i -tökeuheūttöre ngëichkö talöököre pöri ngam tö akaha.” Urěhkūö meh öm hòṅ pihöövö, hòṅ mikahtökūöre më-eṅ tö ò. Kihngen pöri min öm ngatī inlahen öm in ngam tēting ēp hēk im vēpsait. Pòrô öm meūk nup inlahngen ò tö vë-nyu hēk  mēseich inrē, tö akahakūö hòng min më-eṅ tö ò yem ngatī inlahen? Pōyen yip ngaich tö ngatī mufē tö re nö teunglen tö tökò-en hanangenlōnre. Yěn lā-kūö cha pöri öp tarik, ngaich pingangkūö cha-a. Pön harikngöre, hēk öt sāta inrē nö ip kuilōn cha.

Ngö ṙô ök ih kamuch: “Rö-ö chin ūichhak holtöṙah tötöl, öt rēhěn chin holröön mahanyatkö elmat kiröönngöre.” (Sal. 26:4) Ngatī yip el minë tēting ēp hēk vēpsait nö minyôiny ngaich hayunngö nup tinrīkngenre pön lōnu töre nö hō-ovö. Pòrô min öi vë-kūö cha höng öt akahakūö pöri tö nup tinrīken cha. Hòṅ ngëichkö në intöönö ön ngòh vamënyen Yāvē. Tö sā në, yěn hěng tak öp tö ngö ṙô vamënyen Yāvē chin chu-ö, ilööṙen hòng me-eṅ ṙatö-ellōre tö ò nö ngaich nö vôkö? Tö vayö rīlēsön hòng ang-aṅ nö in Yāvē? Tö vayö minë-eny hòng nö el ngam māṅ? Tö vai hòng inrē nö inchōḵkūö hēk “tötlöök hol” ṙöng? (1 Kòr. 15:33; 2 Tim. 2:20, 21) Hō-ovö lōn hòng nö asīnkö ṙô ngam paipöl nö hapīhö? Hòṅ akahakūö in tö sanāp ṙô në intöönö, ötkò pöri min öi akahakūö öi lökten in öp tēting ēp hēk vēpsait. Acha-a pöri mihôiṅ yip prötör sistör yip tökahakūö tö inlahen öp tarik. (Inch. 15:22) Ötkò ön ngòh lamöklōn Yāvē nö fēkö inlahenre nö pīhö tö yip, töt vamë-ekūö ò ötkò min nö “haṙongtö kaneunre” nö in ò.—2 Kòr. 6:14; 1 Kòr. 7:39.

Sā hi ngaich akahakūö tö hi yěi yūs ngam tēting ēp hēk vēpsait kihngen min ayī-ö. Ōt pöri minë tövai chūök hi Mihôiṅ öi chöh pīhöre. Öi isuh mihôiṅ? I kamngö minë chūök manūlö, el assemly,könvensön mihôiṅ inrē öi lā-kūö öi mikahtökūöre tö ò.

Kūö ngih COVID-19 pöri ngaich öi öt mūlhen höö el mīting. Lökten öi höng el ònlain. Löktö in u öi mīting, mihôiṅ öm mikahtökūöre tö më tö öl nö pīhövö tahëng, mihôiṅ öm hang nup minkahten kahëtö cha, hang nup sanāprô cha inrē (1 Tim. 6:11, 12) Yěn hěng tak öp ööi lōn meh, yem hòṅ ṙuhtö mikahkūöre mihôiṅ öm chuh in öp breakout room öm meukkūö ò. Mihôiṅ inrē, öm kēnyö rētak re el online. In e min öm akahakūö Mihôiṅ töp tinrīnken ò tö vai hēk töt ööi meh inrē tö sā ò nö tö sitih inlahen yěn vë-ekūö holre. (1 Pīt. 3:4) Akahakūö ngaich min nā-a tö höö. Akahakūö inrē tö nup kuilōn höö yěn hěngṙen hēk yěm hòṅ pihövö hēk yěm hö-ö.

Vë chamöh pīhöre yěn hang ṙô ngam paipöl cha-a, örheūheu min cha-a nö ṙamölōn. Mihôiṅ öi ngö ṙô tö cha, “anga-aṅ ngòh tö kôtökūö tö pīhöre kôtökūö tö tölöök chehen, ngaich teūngen tö neūkölōn nö ṙā-ang im Mā Tēv.”—Inch. 18:22.