1. Asuh nup inkôlò meh tö tī Yāvē?

LOHTEN më-eṅ teūngen töm kanô-en öm lökten in nap yöng re, i chūök meh kamān, el iskul hēk lohten nö ōt yik chamuh patī meh nö vë-eny nang meh tö e. (Māk. 13:10) Kē-ě istöti ngaich më-eṅ lohten öm chumngëṅtuvö ṙô haköpmat Paipöl. Sīöp ngaich ngam hanangenlōn meh tö Yāvē kūö meh meuk ngam hanangenlōn ò tömeh. Maheūṅkku ngaich më-eṅ tö ngam nômö tö örheūheu aṅ pön tūökten meh ang Yāvē im kanô-en. (Yôh. 6:44) Kirööngen ṙô më-eṅ öm ha-öinyö Yāvē kūö ò nö halöinykö ellōn öp kamë istötī meh nö haköpten meh tö mine ṙô ò, lökten meh ngaich kētöre löklōn ò.

2. Asuh nup min haköp hī el ngih ātiköl?

² Sā hī ayī-ö teūngen töm kanô-en, hòṅ ngatī inlahen ayī-ö hayööken yip tahëng nö mikahtökūöre tö e. Lööṙen më-eṅ lohten yěm ahangköm tölöök inhānga, kihngen pöri yěm kēḵ istötī. Yēḵ meh ngatī kanihngen, yöölen man min tö minë tövënyu el ngih ātiköl. Mikahtökūöre min ayī-ö tö nup kanihngen hī ngaich sitih inlahen ayī-ö mihôiṅ la-al u. Töi urěh sin ngëickö inlahen hī, kūöyòh ötkô öi höng ma-ahangköm tölöök inhānga pöi hòṅ mahaköphöti inrē.

3. Kūöyòh öi ayī-ö ahangköm tölöök inhānga?

³ Nët nuk chööngö kahëtö Yēsū nö in yik haköptöre. Ngam raneh, hōten cha anga-aṅ nö ahangköm  Pūlngö. (Mët. 10:7; Lūk. 8:1) Vë-eny nang cha ang Yēsū tö cha nö ngö inlahen, yěn ōt yip hamang hēk yěn ōt yip töthamang. (Lūk. 9:2-5) Tölṙô cha anga-aṅ nö ahangköm tölöök inhānga “i në taṙòkhöre panam.” (Mët. 24:14; Inl. 1:8) Pòrô nö ōt yip tö sōḵ nö hang, hōten yik haköptöre pöri ang Yēsū nöng iṙūöhen nö ahangköm tölöök inhānga.

4. Sā ṙô ngam Mëtiv 28:18-20, asuh öp inrē la-en hī holre töm inhangköm tölöök inhānga?

⁴ Asuh ngam innëtö chööngö? Hōten yip haköptöre anga-aṅ nö chöh yip tarik tö hō-olōn nö haköp ngaich haköpten cha tö mine chööngö kahëtö ò. Pōyen pöri yip vamënyen ngam inhānga töm inköphöti nöng la-en yik Kristīön inuk raneh senchurī. Kô-en hòng nö ngatī? Hö-ö, pön tö hōtu ngam la-en nö iṙūöhen, “söl ip manāngen ngih panam.” (Vë-evkūö Mëtiv 28:18-20.) Kētö ngam chööngö inrē ang Yēsū nö in yik haköptöre yik töpōyen tö tö taneūyòng. (1 Kòr. 15:6) Hameukhömat Yôhan inrē ang Yēsū nö el heūvö tö ngam kuilōn re, nö hōten taṙòkhöre tarik nö haköptu tö nup inlahen Yāvē.—Inm. 22:17.

5. Sā ṙēngen yòh ngam la-en inhānga töm inköphöti tö ṙô Pôl nö im līpöre 1 Kòrin 3:6-9?

⁵ Asīntö ngam la-en vinītö mahaköp ang Pôl nö in öp tameūich. Ngö ṙô anga-aṅ nö in yik aṅ Kòrin: “Teūchhöti chū-ö, ṙösö tö Apòlös, ngam Tēv pöri kamëtö ṙôken . . . Yī-ö yin panô-òṅ ngam Tēv, patī ngam Tēv.” (Vë-evkūö 1 Kòrin 3:6-9.) Töla-evṙen ayī-ö el “panô-òṅ ngam Tēv,” sā tameūichtö ngam kulöl ayī-ö yěi ahangköm tölöök inhānga ngach sā ṙamösö e yěi haköphöti. (Yôh. 4:35) Köpölōn pöri ayī-ö tö ngam Tēv nö anga-aṅ ma-asīöp.

6. Yēḵ hī haköphöti hòṅ asuh nup la-en hī inrē?

⁶ Chöh yip tarik ayī-ö yip tö “hōtu nö im nômö tö örheūheu-aṅ.” (Inl. 13:48) Yēḵ hī pöri lōnu tö cha nö mahaköp ngaich hòṅ hayööken cha ayī-ö nö (1) akah elnang, (2) ṙātö ellōnre, hēk (3) kēkö kaha minë haköp re inrē. (Yôh. 17:3; Kòl. 2:6, 7; 1 Tös. 2:13) Ṙòkhöre ayī-ö el ngam māṅ öi hòṅ hameuktö hanangenlōnre tö yip tö tufömngöre ma haköpmat Paipöl, hòṅ ṙamölōn ayī-ö öi ha-öinytö yanīhi cha yěn yihtökūö nö el mīting. (Yôh. 13:35) Mööḵlö inlahen pöri ngam kamë istöti nö hòṅ hayööken ò nö ṙāngö nup “töngëḵ” tö töphöt ṙinātö ellōn hēk la-en inrē. (2 Kòr. 10:4, 5) Lohten min öm chumngëṅtu haköpten ò. Öt yëḵngen pöri ngam lumrāḵ meh haköpten ò, ṙamölōn min më-eṅ öm meukö ò nö kētöre nö löklōn ngam Tēv.

7. Kūöyòh öi ahangköm tölöök inhānga hēk haköptö tarik inrē?

⁷ Kūö hanangenlōn hī tö Yāvē ayī-ö öi ahangköm tölöök inhānga hěnghöre haköptö yip tarik inrē. (1 Yôh. 5:3) Fēkö inlahen re man. Akahakūö më-eṅ tö ngam la-en inhangköm tölöök inhānga nö öt lööṙen, sön pöri öm höng kētöre kūö hanāngenlōn meh tö Yāvē. Lohten öm kicheyöre ik raneh van meh chuh kūö patī öm ahangköm tölöök inhānga. Sön pöri më-eṅ höng iṙūöhen pô meh akahakūö tö e nö tinöölô hī tö Yēsū. Ngaich man lohten ing rò-òten re öm heuveūlöre ahangköm tölöök inhānga.  Ngaich sitih inlahen yěm kēḵ istötī? Ṙòmöng vöö hòng më-eṅ yěm töölô kēḵ istöti. Yěm ngatī, ngaich mihôiṅ më-eṅ vë-ekūötēv öm havëkö kūö Yāvē tö hinòlṙen re hòṅ ò nö asīöp ngam kuilōn meh min öm vītö tarik nö mahaköp.

8. Sā ṙô ngam Mākös 6:34, asuh öp min mahayööken hī haköptö yip tahëng?

⁸ Ngam hanangenlōn hī tö tarik ön min inrē mahayööken hī haköpten cha töm kanô-en. Sā Yēsū ik sā ò lang nö heuhtöre, kinheūten ò nö ahangköm pūlngö, chalô ngaich tömë tarik nö yihtöre nö chuh in ò pön hòṅ hang nuk ṙô ò nö haköphöti. Meuktöre Yēsū tö cha ngaich “marô-òtô nö haköpten cha.” (Vë-evkūö Mākös 6:34.) Aṙē-ělōn ang Yēsū tö yik tarik, akahakūö inrē anga-aṅ tö mufē cha, tö nuk kanihngen cha inrē lökten anga-aṅ nö hayööken cha. Ngatī inlahen vē tarik töngamuh inrē inë ṙētak hī. Höng meukö cha-a nöng ṙamlōn pōyen pöri minë kanihngen cha, öt maheūṅkkuvö cha-a. Sā nup sīṅp cha-a tö kayööyaṙen töt mahayōmku. Vënyu cha-a tö Pôl nö öt akahakūö tö ngam Tēv öt maheūṅkku inrē. (Efi. 2:12) El ngam talöökö cha-a “chamuh i ötlanöökö.” (Mët. 7:13) Yēḵ hī min afēkö inlahen më tarik, yīhi miṙēlōn min ayī-ö tö cha. Hěng ngam inlahen tī hī hayööken cha yēḵ hī haköpten cha tö mine ṙô ngam Tēv.

9. Sā ṙô ngam Filipī 2:13, sitih inlahen ang Yāvē nö hayööken meh?

⁹ Lohten më-eṅ vöö kētöre kēḵ istöti pöm akahalōn tö hī öi tö hòṅ kēnyö ṙētakre halēn ngam istötī hēk kēḵ istötī inrē. Yēḵ meh ngatī lōn ngaich mihôiṅ më-eṅ havëkö kūö Yāvē tö inyööken re, hòṅ ò nö hayööken meh min öm chöh istötī re. (Vë-evkūö Filipī 2:13.) Vënyu nang ayī-ö tö Yôhan tö ngam Tēv nöt löktu nöt hang nup ṙô hī havëkö kūö ò yěn sāta nup havëkö hī in ò. (1 Yôh. 5:14, 15) Yāvē min ma asīöp ngam kuilōn meh haköptö tahëng tö mine ṙô ò.

10-11. Asuh nup lāinyngen hī mihôiṅ öi sōḵ kēḵ istötī?

¹⁰ Öt ṙāngenre ayī-ö tö ngam la-en kinë-ekūöre pòrô nö pōyen minë kanihngen hī. Ta-a chěi töi ngëchkö minë kanihngen hī ngaich sitih inlahen ayī-ö mihôiṅ la-al u.

¹¹ Höng lōnu chin öt teungten pöri. Ōt yip pöplisör töt kô nö havötköre tökūö kanöinyö re invah re inrē. Yēḵ meh tö ngatī kanihngen, mihôiṅ më-eṅ höng i patī re kēḵ istötī öm löktö el fôn ṙô. Sā inlahen hī vahë ik sā hī ötkô havötköre tö kūö ngam invah COVID-19. Ōt mine hēk tahëng talöökö inlahen hī kò-òren chöh istötī re. Pōyen ṙung yip tarik töt meūkö kūö tö hī yěi chuh kūö patī öi ahangköm tölöök inhānga, el harap pöri höng löö öi yōm peuheū teūngen tö cha. Mihôiṅ öm rih kēnyö ṙētak re haköpten cha el minë ṙētak meh teūngen tö cha? Lohten öm hòṅ ka-euilö kūö tö peuheū hēk el hatööm inrē öm haköpten cha. El hatööm ök Yēsū hē ò nö haköpten Nikòtimös pön hē e anga-aṅ nö ṙētakvö.—Yôh. 3:1, 2.

12. Asuh nup mahayööken meh min öm heuveū-en kēḵ istötī?

¹² Öt heuveū chu-ö kēḵ istötī. Lohten më-eṅ ngö lōn, hòṅ rahëichtöre heuneū-en chin öre ngaich möl öich kēḵ istötī tahëng. Yēḵ meh ngatī mufē,  haköplōn re man tö në tölūöi ṙô mahayööken meh min öm kēḵ istötī. Ngam raneh, Yāvē an kamtöllen meh öm haköphöti. (2 Kòr. 3:5) Innëtö, Yēsū tamölṙô meh öm haköphöti, ngam ‘tö kē-ěvkūö tö në chööngö el halīöngö ing panam inrē.’ (Mët. 28:18) Ngaich ngam linūöyö, mihôiṅ man kēḵ inyööken re i tahëng yěm öt heuveū-en. Sā Yēsū misī nö havëkö heuneū-eu ṙô re nö ṙô-òvö nö im Yöng re. (Yôh. 8:28; 12:49) Yěm hòṅ harunöre kēḵ istöti mihôiṅ më-eṅ kēḵ inyööken re in öp fīlt sörvis ovörsīör meh, in öp painīör hēk pöplisör inrē tö heuveu-en nö kēḵ istöti. Mihôiṅ öm hol cha yěn kēḵ istöti hòm meuk inlahen cha yěn kēḵ istötī.

13. Kūöyòh öi hòṅ haköphöti asā nup tö tufömngöre inlahen inköphöti?

¹³ Kihngen chin yūs minë tö tufömngöre chehetī mahaköphöti. Harīkngöre inlahen in töngamuh yěi kēḵ istötī, pön tumfömlöng mine chehetī hī öi haköphöti. Sā ngam līpöre, Mihôiṅ Man Örheūheu Ṙamlōn!, öt pōyen mine perekrāf imat e, lökten ngam kamë istötī nö hòṅ chumkūöṙen nö halēnkö ngam istötī urēhěkūö ò nö hòṅ istöti. Yūs minë vitiō inrē ayī-ö hēk yūs ngam JW Laëprëri inrē. Mihôiṅ öm hatöntöre i tahëng yěm öt heuveū-en yūsö u. Kô-en in öt lööṙen halööktit nup tö nehngenre ngaich nö inlahen hī haköphöti. Mihôiṅ pöri më-eṅ kēḵ inyööken re in Yāvē hòṅ meh asīnkö mine tö tufömngöre inlahen hī im inköphöti. Ngö ṙô ök ihih töhěng tak painīör, “kuchiken chin yěich kēḵ istötī ngatī ngam kahë istöti chu inrē.”

14. Hòṅ asuh öp kanöplōn hī yěn sōḵ më tarik nö hang ṙô hī, sitih inlahen öi ngönlöre tö ṙô ngam 1 Kòrin 3:6, 7?

¹⁴ Öt lööṙen chin teūngen tö istötī re. Öt ṙòkhöre yip tarik nö yal nö hang ngam tölöök inhānga. Sitih inlahen pökeh ayī-ö yěi hòṅ köpsöṙen ṙanamlōn im la-en re? Köpölōn më-eṅ ötlöktu nöt harīkngöre inlahen min më tarik, yô-ôv hē min cha-a më tö sōḵ sin nö hang vītöre min cha-a kò-òren nö yal nö hang mine ṙô ngam Tēv. (Mët. 5:3) Yip tö sōḵ sin nö kēḵ minë līpöre vītöre ngaich cha-a nö haköpmat ngam Paipöl. Pön Yāvē an Mākūö ngih la-en. (Mët. 9:38) Hōten hī anga-aṅ öi höng teūch, ṙös röönti u inrē, Anga-aṅ pöri min ma-asīöp. (1 Kòr. 3:6, 7) Lökten ayī-ö hòṅ köpölōn, pòrô öm öt teūngen tö istötī re umuh pöri ngam kuilōn meh öm hayööken tarik angu-ö ngëchka Yāvē nö I meh. Meuk ngam lumrāḵ meh anga-aṅ öm chöh më tarik yip hamang ngam tölöök inhāngö, rö-ö nö ngëchkö ṙôken meh kahëḵ istötī meh! *

15. Sitih lōn ang Yāvē yěn meuk yip tarik nö haköpmat Paipöl hēk kēkö kaha nup haköp re inrē?

¹⁵ Ṙamölōn ang Yāvē yěn meuk yip tarik nö haköpmat ngam Paipöl ngaich vë-eny nang tahëng tö nup haköp re. (Inch. 23:15, 16) Iṙôkö ṙanamlōn ang pökeh Yāvē töngamuh nö meuk ṙôken yip tarik tö hôṅ haköp! Pòrô el ṙūngö ngam invah vahë ik 2020 nö 77,05,765 ṙôken yik tö kē-ě istötī, in cha  yik tö 2,41,994 ṙôken kamëtöre nö löklōn Yāvē ngaich kēḵ ngam vinôkö. Cha-a min hēk vē tufömngöre mahaköp chamöh yip tarik tö hòṅ haköpmat Paipöl ngaich haköpten cha. (Lūk 6:40) Mihôiṅ in ayī-ö inrē haṙamlōn Yāvē yēk hī haköptö tahëng tö mine ṙô ò.

16. Asuh öp tö mihôiṅ afēkö hī?

¹⁶ Kô-en nö öt lööṙen ngam inköptö tarik tö ṙôm Tēv, öt kihngen pöri ayī-ö yēḵ hī kēḵ inyööken re in Yāvē. Mihôiṅ in afēkö inlahen re öi kalah chöh töng hěng tak kahë istötī re? Ngaich hayööken hī min ang Yāvē öi chöh istötī re.

17. Asuh öp min taneūngen hī yěi kēḵ istötī?

¹⁷ Tökiröng ön nö la-en ngam inhānga hēk töm inköphöti inrē! Kô-en ayī-ö ṙamölōn tö tī e. Hangihtöṙô Pôl nö vë-eny ṙanamlōn re nö hayööken yik aṅ Tösalònikē: “Asuh ṙöng ap, maheūṅkkö ih, ṙanāmölōn, sapīöv ineū-euṅ? Röh öi yī-ö, i kūö ngam Mā Yēsū ip yanīhih Ò? Pò yīö ineū-euṅ ih, ṙanāmölōn ih inrē.” (1 Tös. 2:19, 20; Inl. 17:1-4) Pōyen yip tö sāta mufē nö in Pôl töngamuh. Ngatī ṙô sistör Istefnī nö vë-eny ṙanamlōn re, “Öt tö ōtngörevö ṙanamlōn hēk tö sā ta nö im ṙanamlōn hī yě hī öi hayööken më tarik nö chuh in Yāvē.”