TÖHAKÖÖPÖ ĀTIKÖL 23
TINKÖÖKÖ 28 Achīö Yip Hol Yāvē?
Ha-öinytö Yanīhi meh in el ngam Inrūkui Yāvē
“In cha öp min elyöngö chu; ngaich chū-ö min Tēv cha, ngaich cha-a min nö tarik chu.”—ISI. 37:27.
ASUH ÖP MIN HAKÖP HĪ?
In ngih ātiköl in min mikahtökūöre nö kūö yòh nö tökiröng ngam inlahen hī iyöng el ngam inrūkui Yāvē hēk tö sitih manah inrē angū-ö. Mikahtökūöre inrē min ayī-ö tö Yāvē nö sitih inlahen nö chumkūöṙen tö më aṅ el ngam inrūkuire.
1-2. Asūp ṙô Yāvē nö havëten më tö chiplö tarikre?
SITIH mat öm më-eṅ ngëichken Yāvē? Lohten öm ngö ṙô Yöng hī an Yāvē ngaich kūön ò ayī-ö. Hēk Tēv hī anga-aṅ ngaich tarik ò ayī-ö. Lohten inrē öm ngö ṙô tö Yāvē nö Hol meh. Öt hěngheuh hòng pöri më-eṅ öm afēkö inlahenre öm havëtu tö Yāvē öm iyöng el ngam inrūkui ò?
2 Ngatī ṙô misī ang Rācha Tāvit nö kakkö inlahen Yāvē. Ngö ṙô anga-aṅ, “Mā Tēv, Achīö ap min mi-iyöng el ngam inrūkui meh: achīö min mi-iyöng kui ngam rung meh töhet?” (Sal. 15:1) Ngö ṙô ang Tāvit tö Yāvē nö havëten më tö chiplö tarikre nö iyöng el ngam inrūkui ò, ngaich kaheūkö cha anga-aṅ nö holre. Tö ngö manah tö hī mihôiṅ öi iyöng el ngam inrūkui Yāvē hēk hanôlö ò inrē. Kô-en nö tökiröng ngam inlahen hī havëtu tö ngam mākūö në taṙòkhöre panam öi iyöng el ngam inrūkui ò.
LŌNU YĀVĒ TÖ HĪ YIHTÖKŪÖ EL NGAM INRŪKUI Ò
3. (a) Achīö ök ramneh mi-iyöng el ngam inrūkui Yāvē? (b) Sitih inlahen mufē aich tö höö?
3 Höng hěngtak misī ang Yāvē urēhěkūö ò nö vīlö në tövīlöng. Unôichngöre pöri anga-aṅ nö vīlö ngam töng hěng maneuk kūönre, nö sā mahavëten ò nö iyöng el ngam inrūkui ò. Anga-aṅ an ramneh nö mi-iyöng el ngam inrūkui Yāvē hēk holtö ṙanamlōnre ang Yāvē nö havëten ò. Ngö ṙô an ngam Paipöl tö Yāvē nö ‘teūngen tö ṙanamlōnre’ nö löktö in ngam kūönre hēk örheūheu inrē ngam kūön Yāvē nö ṙamlōn nö ikūö ò.—Inch. 8:30.
4. Achīö yik hēk tö havëka tö Yāvē nö iyöng el ngam inrūkui ò?
4 Unôichrit e hēk ang Yāvē nö vīlö më ma-ahānga hēk havëten cha nö iyöng el ngam inrūkui ò. Kaheukö më ma-ahānga nö imat ngam Paipöl nö ‘kūön ngam Tēv’ hēk vënyu inrē cha-a nö ṙamlōn nö iyöng in Yāvē. (Yōp 38:7; Tan. 7:10) Höng cha-a tö samyeūheuv ṙò-òten nö iyöng el ngam inrūkui Yāvē hēk hol ò inrē nö el halīöngö. Hēk pöri ang Yāvē nö ṙūöhnyö ṙòkö ngam inrūkuire, nö vīlö më tarik ngaich havëten cha nö iyöng el ngam inrūkuire. Tö sā hē Enòk, Nō-a, Aprāham hēk Yōp inrē. Vënyu nang in tö ngam Paipöl tö cha nö hamòlröön Yāvē nö kiröön tö ngö manah tö cha nö hang nup töng ṙô ò, angū-ö lainyngen cha nö kaheukö nö hol ò hēk tö havëtu inrē nö iyöng el ngam inrūkui ò. Ran. 5:24; 6:9; Yōp 29:4; Isa. 41:8.
5. Asuh öp mikahkūö hī in ngam tö eūka tö kūichi im Isikīěl 37:26, 27?
5 Löktökūö misī ang Yāvē nö havëten më holre nö iyöng el ngam inrūkui re. (Vë-evkūö Isikīěl. 37:26, 27.) Löktö in ngam tö eūka tö Isikīěl öi akahakūö tö Yāvē nö lōnu tö më tarikre nö havai ngam innôlöre nö in ò. Kilēḵngôre anga-aṅ misī nö in cha töre min nö vītö ngam “lanāmö” nö in cha. Ngaich ngih kinlēḵngô töngamuh nö teungtakūö ing ṙētak hī. Holṙenre nö ha-öinyö Yāvē töngamuh më tö maheuṅku nö chuh el halīöngö hēk yip tö maheuṅku nö ing panam. Sā tö hěng kiteūm cha-a nö el ngam inrūkui ò. Yôh. 10:16.
ÖP TÖNG CHŪÖK HĪ CHUMKŪÖṘEN ANG YĀVĒ TÖ HĪ
6. (a) Ihe öng ngòh tarik nö mihôiṅ nö iyöng el ngam inrūkui Yāvē? (b) Isuh chūök öng ngam inrūkui Yāvē?
6 In nuk ṙētak misī, mihôiṅ ngòh tö hěngtak tarik nö heūheure nö el ngam inrūkuire, lökten in e anga-aṅ nö laklöre tö ngam tavūöi hēk kumṙah. Yēḵ ò pöri nö yamihku nö el ngam inrūkuire, ngaich chumkūöṙen anga-aṅ nö ngëichken ò. Ngatī töngamuh yěi kētöre in Yāvē, sā ṙēngen mi-iyöng el ngam inrūkui ò ngaich ayī-ö. (Sal. 61:4) Öt hěngö hanakten in tö nyā-aṅkūö yěi el ngih inrūkui, keuheuttöre aṅ in ayī-ö tö minë löktö hī mihôiṅ hangön ngam innôlöre in Yāvē. Hěnghöre ōt inrē yip tö sā hī nö el ngam inrūkui, më hol hī ngaich töngamuh. Yēḵ meh öm chuh tahëng panam öm yihtökūö in öp tö hěng könvensön ngaich meukkūö më tö pōyen lohten më-eṅ prötör sistör tö sā meh nö mi-iyöng el ngam inrūkui Yāvē. Lökten in e ayī-ö öi akahakūö tö ngam inrūkui Yāvē nö keūheutngöre chūök ikūö ngih panam, pò më tarik ò nö keuheūtngöre chūök.—Inm. 21:3.
7. Kūö yòh öi mihôiṅ ngö ṙô tö yik tarik ngam Tēv tö ngaich nö kapah nö ṙömöng el ngam inrūkui ò? (Ngëichkö ngam nyat.)
7 Sitih ṙô öi mihôiṅ tö yik tarik Yāvē tö ngaich nö kapah? Ōt hòng cha-a nö el ngam inrūkui ò? Heuṅ ōt yip. Kūö yòh mihôiṅ öi ngatī ṙô? Pò cha nö köpngö nö el mufē Yāvē, sā ṙēngen tö ṙömöng aṅ cha-a nö imat ò. Ngö ṙô ang Yēsū nö kakken e, “Ngam invanlö vē tökapah pöri, hameukhumat öi ngaich tö Môsös, im, chūök inlahen ök töyul; hē ò nö havëkö ngam Mā. Ngam Tēv Aprahām, ngam Tēv Yāköp inrē. Rö-övö An nö Tēv yik tö kapah; Tēv vē ta aṅ pöri. Pò vē taṙòkhöre tarik nö aṅ nö in Ò.”—Lūk. 20:37, 38.
Yik tarik tö ngaich nö kapah tö chiplö nö i linökö lōn Yāvē, ṙömöng ōt cha-a nö iyöng el ngam inrūkui ò (Ngëichköm perekrāf 7)
INKÔLÒ HĒK LA-EN
8. Asuh nup inkôlò taneūngen yip mi-iyöng el ngam inrūkui Yāvē?
8 Teūngen ön ngòh tarik tö haneūheure yěn el ngam inrūkui, laklöre anga-aṅ tö ngam tavuöi, kumṙah hēk tö nup tahëng inrē. Ngatī ṙēngen ayī-ö yěi el ngam inrūkui Yāvē, ngaich laklöng ayī-ö. Teūngen inrē ayī-ö tö ngam tövai maheūkköre ip yamih ṙētak ngam lökten hī mihôiṅ laklöre tö minë pinlāngen minë tö mihôiṅ nö tī-iv tö ngam innôlö hī in Yāvē nö pasū. Hanöng sā hī haröhtöre in Yāvē, ngaich öt heuveū-en min ngam Satān nö hakihten hī. (Sal. 31:23; 1 Yôh. 3:8) Ip tūfömngöre panam inrē min ang Yāvē nö laklen hī tö ngam kinpaha.—Inm. 21:4.
9. Asūp tö hòṅ inlahen hī yěi hòṅ iyöng el ngam inrūkui Yāvē?
9 Tökiröng an nö inkôlò hī ngam inlahen hī havëtu tö Yāvē iyöng el ngam inrūkui ò hēk kaheukö inrē öi hol ò. Mihôiṅ ön nö söl manā-aṅ nö köp ngam innôlö hī in ò. Asuh pöri öp tö hòṅ inlahen hī? Tö sā meh öre yěm havëtu töp holre öm chuh patī ò. Sā öp ṙô ò nö in meh, ngatī inlahen min më-eṅ kūö meh hòṅ haṙamlōn ò. Tö sā ò nö tölṙô meh öm luhnyö kunröpö re yěm yôkhötre el ngam patī. Ngatī ṙēngen ayī-ö öi havëtu tö Yāvē el ngam inrūkui ò hēk lōnu ayī-ö töre höngngöh el e. Lökten ayī-ö hòṅ mikahtökūöre töp kuilōn ò. Kūö ngam hanangenlōnre ayī-ö tö Yāvē lökten öi ma-ainyre haṙamlōn ò. (Kòl. 1:10) Rö-ö pöri ang Yāvē nöng hol hī pön yöng hī hēk Tēv hī inrē. Öt hěngheuh in öi vaichngö tö e hēk hameuktö ngam minlēḵṙenre ayī-ö tö ò. (Sal. 25:14) Tööḵlö ayī-ö tö pinhë-eṅkūöre tö Yāvē lökten öi öt hěngheuh kētöre in nup la-en tö mihôiṅ nö haṙivlōn tī tö ò. Kuiyūlōn in töre öi akahakūö töm ‘tölngöre öi holröön ngam Tēv öi kiröön.’—Mai. 6:8.
ÖT ATÖLTUṘEN ANG YĀVĒ NÖ IN YIK AṄ ISRAEL
10-11. Ngam inlahen Yāvē nö in yik aṅ Israel ik sā cha nö el ök tönyalnyī i Sināi, asuh öp mikahkūö hī lökten in e tö inlahen Yāvē nö töt atöltuṙen?
10 Öt atöltuṙen ang Yāvē nö in më yamihtökūö nö iyöng el ngam inrūkui ò. (Rōm. 2:11) Kakkö inlahen e in min hēk mikahtökūöre inrē tö inlahen Yāvē nö in yik aṅ Israel ik sā cha nö el ök tönyalnyī i Sināi.
11 Unôichrit inlahen ò nö ṙānyö yik tarikre nö ṙā-ang Aikup, vīlö yik kūönṙô anga-aṅ tö la-evṙen nö el ngam töhet chūök. Hěnghöre kē-ěkūö yik lēvi inrē tö nuk tö nôlta la-en nö el ngam töhet chūök. Yik tarik pöri tö la-evṙen nö el ngam töhet chūök hēk tö röhta inrē nö in e, möḵlö chumkūöṙen hòng ang Yāvē tö cha tö yik tahëng? Hö-ö öt ngatī. Öt tö hěngheuh an Yāvē nö atöltuṙen.
12. Sitih inlahen ang Yāvē nö hameuktöre nö öt atöltuṙen tö tarik? (Maneutnyi 40:38) (Ngëichkö ngam nyat.)
12 Kētö ṙātak taṙòkhöre ang Yāvē nö hanôlö ò pòrô misī öp tö hěngtak aṅ Israel töla-evṙen nö el ngam töhet chūök hēk yěn hö-ö. Pòrô nö tö röhta hēk tö marôvat.Tö sā Yāvē nö chumkūöṙen tö më taṙòkhöre aṅ Israel nö hòṅ meuk ngam taṙul hēk tö ngam tameūyö ikui ngam töhet chūök, pòrô nöng öp töng yòh kamngö chūök cha. (Vë-evkūö Maneutnyi 40:38.) Meuk ngam taṙul misī yik aṅ Israel yěn kē-ěyö nö ṙā-ang kui ngam töhet chūök, ngaich unôichrit e inrē cha-a nö kiröön nö kumtö nuk chehenre. (Kin. 9:15-23) Hěnghöre yěn föörö inrē nuk tö nët chāntī römpĕt, ngaich hangṙô u inrē misī cha-a nö pōitô. In e cha-a nö akahalōn tö ngam ṙētak cha ngaich nö hòṅ kiröönngöre. In e mikahkūö ayī-ö yěn ōt öp tarik töla-evṙen nö el ngam töhet chūök, ngaich öt tö ngö manah angū-ö tö ò nö tö mötlö tö yip tahëng nö imat Yāvē. Pön mihôiṅ nö ṙòkhöre yik aṅ Israel nö iyöng el ngam inrūkui Yāvē, hanôlö Yāvē hēk ṙatö-ellōnre inrē tö ò min nö laklen cha hěnghöre hachō-okūö cha inrē. Ngatī ayī-ö töngamuh pòrô öp töng kamngö chūök hī iyöng, mihôiṅ ayī-ö öi ṙatö-ellōnre tö Yāvē nö hangenlōn tö hī, chumkūöṙen tö hī hēk örheūheu inrē min anga-aṅ nö laklen hī.
Öt atöltuṙen ang Yāvē nö in yik aṅ Israel (Ngëichköm perekrāf 12)
SÖL ING TÖNGAMUH AN YĀVĒ NÖ ÖT ATÖLTUṘEN
13. Kūö yòh öi mihôiṅ ngö ṙô tö Yāvē töngamuh nö öt atöltuṙen?
13 Rīkre yip prötör sistör töngamuh tö röhta nö in ngam vöörlt hetkuātör hēk ngam mupākö òfis më Vamënyen Yāvē hēk rīkre inrē më töla-evṙen nö in minë kamngö u. Töp lökten cha nö kētöre nö in minë la-en tö kēkaṙen nö el ngam Pētěl, kēnyö ṙētakre inrē cha-a nö mikahtökūöre tö më prötör mahachōkūö cha nö im kamngö. Rīkre yip prötör tö la-evṙen tö ngam la-en sörkit ovösīör hēk ōt inrē yip prötör sistör tö tahëngö inlahen nö keuheuttö ṙētakre nö im linökö lōn Yāvē. Öt uroh pöri nö ṙòkhöre më prötör sistör nö röhta nö in minë mupākö òfis hēk öt uroh ṙôken inrē yip kumheuttöre nö i linökö lōn Yāvē. Yēḵ meh më-eṅ öm tö hěngtak öm in cha, ngaich mihôiṅ öm ṙatö-ellōnre töre öm mihôiṅ iyöng el ngam inrūkui Yāvē, hanôlö ò inrē hēk kirööngen hanangenlōn anga-aṅ tö meh. Akahakūö ang Yāvē tö hī hēk chumkūöken hī inrē. (1Pīt. 5:7) Löngö ṙētak tī inrē ang Yāvē nö kē-ěkūö më tarikre tö nyā-aṅkūö, hachō-okūö cha inrē nö lök el ngam tö löng talöökö hēk laklen cha.
14. Asūp hēk löktö mikahkūö hī tö Yāvē nö töt atöltuṙen?
14 Hěng ön ngih löktö mikahkūö hī tö Yāvē nö töt atöltuṙen. Pön kētö ngam Paipöl anga-aṅ nö i taṙòkhöre tarik nö ikūö ngih panam. Tö kūichi ön sin ngam Paipöl nö im ëlô Heprāi, Aramik hēk Krīk. Öt ṙòkhöre pöri ayī-ö töngamuh heuveū-eu ṙô tö në ëlô. Höng cha-a hòng tö ngönö innôlö nö in Yāvē yip heuveū ṙô tö në ëlô? Hö-ö öt ngatī.—Mët. 11:25.
15. Asuh öp löktö mikahkūö hī tö Yāvē nö öt atöltuṙen tö tarik? (Ngëichkö ngam nyat.)
15 Yěn vī holre ang Yāvē ngaich öt ngëichken öp holre anga-aṅ yěn tö pōihöl nö haköp hēk yěn tö heuveū-euṙô nö im ṙô Heprāi, Aramik hēk Krīk. Lōnu ang Yāvē tö taṙòkhöre tarik ikūö ngih panam nö teūngen tö yanöölenre nö löktö in minë inlēnö aṅmat ngam Paipöl, pòrô anga-aṅ nö tö pōihöl nö haköp hēk tö kūönhöl. Lökten anga-aṅ nö translēt ngam Paipöl nö in minë tököinyu ëlô. Töp lökten më tarik töngamuh ing panam nö mihôiṅ nö haköp mat ngam Paipöl, teūngen tö yanöölenre nö lökten in nup tö kūichi aṅmat e hēk mikahtökūöre inrē tö inlahenre yěn hòṅ hanôlö Yāvē.—2 Tim. 3:16, 17.
Sitih inlahen mikahkūö öi tö Yāvē nö öt atöltuṙen im inlahen ngam Paipöl nö ṙōlkangen ëlô? (Ngëichköm perekrāf 15)
UM HĔNGHEUH ṘĀNGEN NGAM INRŪKUI YĀVĒ
16. Hòṅ sitih inlahen öi yěi hòṅ köp iyöng el ngam inrūkui Yāvē sā ṙô ngam Inlahen 10:34, 35?
16 Tökiröng an ngam inlahen hī öi havëtu tö Yāvē öi el ngam inrūkui ò. Öt tökô òv nö asīnkö inlahen Yāvē nö kirööngen hanangenlōn tö hī hēk chumkūöken hī inrē. Hö-ö an Yāvē nö tö atöltuṙen. Pòrô öp tö yòh kamngö chūök ngòh tarik, tökūönhöl nö haköp hēk tö pōihöl, aṅ tahëng panam, tö tahëngö ëlô, kikōnyö hēk kikānö lōnu ang Yāvē töre nö hanôlö cha. Yēḵ yip hamang nup inchöngtenre pöri min tö Yāvē, acha-a min tö hō-ov tö ò hēk höng acha-a min mi-iyöng el ngam inrūkui ò.— Vë-evkūö Inlahen 10:34, 35.
17. Asuh öp min haköp hī ip tahëng ātiköl?
17 Vënyu nang in töm ṙô Tāvit nö in ngam Salmai 15:1 nö ngö ṙô, “Achīö ap min mi-iyöng el ngam inrūkui meh: achīö min mi-iyöng kui ngam rung meh töhet?” Höng löktö in Tāvit tī ang Yāvē nö kūich sanapṙô në intöönö nö im Salmai. Anū-ö nun min tö kakka tö hī ip yamih ātiköl. Ngaich mikahtökūö min ayī-ö tö inlahenre öi havai ngam innôlöre in Yāvē hēk haṙamngölōn ò inrē.
TINKÖÖKÖ 32 Lā Rītö Yāvē!
