Hatön Meh
Rīkre yip tarik tö ngö ṙô tö ‘Yāvē nö anga-aṅ tö kakka inlahen’ nö im Salmai 12:7, in ngam Tufömngöre Panam Translēsön pöri angū-ö nö kakkö yip ‘yāich tarik.’ Kūö yòh nö ngatī?
Löktö in minë tahëng miröökö öi akahakūö tö ngam Salmai 12:7 nö ṙôtö yip tarik angū-ö.
Ngö ṙô ang Tāvit nö im Salmai 12:1-4 tö yip ‘tökô-en nö öt köpsören ngaich nö ing panam.’ Ngö ṙô hēk anga-aṅ nö im Salmai 12:5-7:
“‘Pò më yāich nö ötlēkaṙen,
Pò ngam inlöinyö chanöökö töhaṅten,
Ngaich chin öich choholre.
‘Ngö ṙô ngam Mā Tēv.’
Lā im chūök öt pinlā-ngen tī chin min tö ò ngam hayëngen cha;
Töhet nup ṙô ngam Mā Tēv. Rupīö tö kalaha lanöökö nö i kūö ngam panam,
Tösat heuh inhetlö. Ō Mā Tēv, aṅten cha man min;
Laklen cha man min löktö kūö in ngih tumkölchap höng örheūheu.”
Kakka yip tö haṙivölōn nö in ngam tö 5 miröökö hēk ngö ṙô inrē angū-ö tö Yāvē min nö laklen cha.
Hēk ngö ṙô inrē ngam tö 6 miröökö ‘töhet nup ṙô ngam Mā Tēv rupīö tö kalaha lanöökö.’ Ṙòkhöre yin më tarik ngam Tēv nö hō-en ngih ṙô.—Sal. 18:30; 119:140.
Ngö ṙô ngam Salmai 12:7 nö in nup translēsön nup tahëng Paipöl, “Ō Mā Tēv, aṅten cha man min.” Vënyu inlahen pöri ‘minë ṙô ngam Tēv’ nö in ngam tö 6 miröökö, lökten yip rīkre tarik nö ṙatö-ellōnre tö ngam ṙô “laklen cha min” im tö 7 miröökö nö tö ngö manah angū-ö tö Yāvē min nö laklö ngam ṙô re. Akahakūö in tö Yāvē nö laklö ngam Paipöl tö yik tö kunyaha elmat tö re. Pön hòṅ asökngö ngam inlahen e cha-a hēk sichngen e inrē.—Isa. 40:8; 1 Pīt. 1:25.
Laklen yip tarikre pöri ang Yāvē. Sā vinënyö e nö im tö 5 miröökö, laklen yip tö ‘haṙivlōn’ anga-aṅ hēk tö yip tö “hakihtuṙen.” Laklen cha inrē min anga-aṅ in nup yamih ṙētak.—Yōp 36:15; Sal. 6:4; 31:1, 2; 54:7; 145:20.
Lökten nö söklöre ngih intöönö, achīö yip ih tö laklöng im tö 7 miröökö, yip tarik ngam ṙô ngam Tēv ṙöng?
Yěi chumkūöṙen tö ṙô ngam Salmai, ngaich lökten in e ayī-ö öi akahakūö tö e nö kakken yip tarik.
Im ranehnyö ṙô ngam Salmai tö 12 mirūlö nö kakka yip ‘tökô-en tarik’ Yāvē, më chūök yip tötlöök tarik nö minyôiny aṅ. Vënyu pöri angū-ö nö im tö 3 miröökö tö ‘Yāvē min nö rökngö minuh yip maharōi ṙôre.’ Unôichrit e ang Yāvē nö kētö ṙinatö-ellōn hī tö ò min nö kē-ělkūö alahare nö la-evṙen nö chö-öinytö yip tarikre, pò ngam ṙô Yāvē nö töhet.
Lökten ayī-ö mihôiṅ ngö ṙô öi vënyö ngam tö 7 miröökö nö ṙôten yip tarik angū-ö tö laklöng, yip yāich tö hakihtuṙen tö yip tötlöök.
Kūö yòh pöri ngam tö 7 miröökö nö ngö ṙô ngam translēt e nö in minë tahëng Paipöl, “laklen cha man min?” Ṙenten angū-ö nö ngatī pön ngatī kinūichngö nö im līpöre ṙô Heprāi iskriptör. Ngö kinūichngö pöri angū-ö nö im Krīk septūachet ‘tö ò min nö laklen hī.’ Tö ngö manah tö ngam Tēv min nö laklen yip tö chiplö tarikre, yip tö hakihtuṙen. Laklen cha min anga-aṅ tö ngih tötlöök tumkölchap ngam töng tanten nö in minë tötlöök la-en. (Sal. 12:7, 8) Ngö kinūichngö angū-ö nö in ngam ṙô Heprāi iskriptör tö translētö nö im ṙô Aramik, ‘O Mā Tēv laklen yip tarikre man min, kēnyen cha inrē öm ṙā-ang in ngih michaplö tötlöök.’ Tö hěng ön ngih inrē nö lāinyngen hī öi mihôiṅ ngatī ṙô tö ngam Salmai 12:7 nö öt kakkö ngam ṙô ngam Tēv angū-ö pön kakkö më tarik.
Kētu maheukkö yin më tökô-en tarik nö in ngam Salmai 12:7 tö ngam Tēv min nö laklen cha.
