1-2. (a) Kūö yòh vē tarik nö öt ṙātö-ellōn re nö in vē mahayöng töngamuh? (b)  Asuh nup min tö kakka tö hī in ngih ātiköl?

 KIHNGEN ngaich tarik töngamuh nö ṙatö-ellōnre nö in vē mahayöng pön kôtamat cha-a tö më mahayöng hēk tö më kamhôka nö lārītö më tökôlò ngaich hayë-eiṙen më töng yāich tarik. Tökô-en nun minë tökūichi imat ngam Paipöl, “I saha ngam tarik nö hayöng tarik nö chökhuṙen tö ò.” (Mum. 8:9) Pön rö-ö pöri nöng angū-ö, pön më mahaköptö tinlööken inrē nö ötlöngö inlahen nö kēken minë la-en re. Ṙën ngaich tarik nö öt ṙatö-ellōnre nö in ngam Tēv kūö nup töngatī maheuk re. Lökten ngòh tarik yěn mikahtökūöre tö ngam Paipöl ngaich kihngen anga-aṅ nö ṙatö-ellōnre nö in Yāvē hēk in më mahayōm söngkötön. Lökten nö hòṅ asīöp ṙinātö-ellōn re ngòh mahaköp Paipöl nö in Yāvē hēk im söngkötön ò inrē.

² Pòrô in ayī-ö tö samyeūheuvö öi löklōn Yāvē sön pöri öi hòṅ asīöp ngam ṙinatö-ellōnre. Ōt nup muh tö söklöre inlahen hī öi ṙatö-ellōnre öi in minë la-en Yāvē yěn tölöng. In ngih ātiköl in min öi mikahtökūöre tö minë tölūöi lāinyngen. Ngam raneh yěi haköp nup inlahen yip aṅmat ngam Paipöl. Ngam innëtö, yěi teūngen tö minë inlēnö re löktö im söngkötön Yāvē. Ngam linūöyö, la-al minë yamih kanihngen re inup yamih ṙētak.

3. Asuh nup mihôiṅ tösöklöre intöönö elkuilōn hī yěi haköpmat ngam Paipöl?

 ³ Ṙatö-ellōnre in Yāvē yēḵ meh haköpmat ngam Paipöl. Yēḵ hī ṙung haköpmat ngam Paipöl ngaich pi-a ṙung më-eṅ  öt akah elmat tö nup la-en Yāvē. Tö sā ṙô ngam līpöre kinṙeūkö tö inlahen Yāvē nö fëlngen ök aṅ Israel kūö ò nö hamūl ngòh hē el tökiröng sakamö. (Kin. 15:32,35) Sā ṙô ngam tövënyu im līpöre 2 Samuel tö Tāvit nö asěhken Petsipa, fëlngen ök pīhö ò inrē Uriyā. Sön pöri ang Yāvē nö aṙēlen ò. (2 Sa. 12:9, 13) Pi-a lohten öi ngö mufē tö Yāvē nö kūö yòh nö fëlngen ngam tarik töng rahëichyen falen ngaich aṙēlen Tāvit anga-aṅ ngam tökirööngen falen? Yē hī vë-ekūöm Paipöl ngaich hòṅ afītöre ayī-ö tö minë tölūöi ṙô. Ngaich teūngen min ayī-ö tö sanapṙô minë intöönö.

4. Sitih mikahlōn öi tö Yāvē nö örheūheu nö löngö kahë tö fësla?

⁴ Öt keuheūtnyö vahënyö re ngam Paipöl tö inlahen nup tö kūichi inlahen. Yěi ngëichkö ngam inchōḵ elmat tö sā hī ngaich akahakūö tö Tāvit nö halööktit minë vanaichö re. (Sal. 51:2-4) Öt vënyu inlahen pöri tö ngam Paipöl ök i aṅ Israel ök tumṙōlngö chööngö el tökiröng sakamö ötrěhěn in öi akahakūö töm tinrīken ò tö sitih inlahen anga-aṅ nö tarik haṙivlōn hòng anga-aṅ tö nuk la-en re ṙōlheuh hòng anga-aṅ nö tiṙōlngö minë chööngö ngam Tēv hē ò nö fēlöng hang hòng anga-aṅ höö ṙöng. Öt timhöre mikahkūö in tö inlahen ò lökten öi ötkô lök ṙô re. Ngih pöri mikahkūö hī tö ngam Tēv nö ma akah fālen (Chöö. 32:4) Hö-ö ön ngam Tēv nö sā tarik nö ṙātö ellōnre nö hang nup töng ṙô. Öt harit rit tarik hēk öt miyëḵ inrē. Nup tömeukö tö ò ngaich ngatī inlahen anga-aṅ nö kēḵ nup fësla. (Vë-evkūö Ranehlö 18:20, 21; I.Chööngö 10:17.) Sā ṙôken mikahkūö hī tö Yāvē hēk tö minë chööngö ò ngaich ngatī min ngam ṙinātö-ellōn hī tö Yāvē nö öthō nöt löngö tī nö kēḵ fësla. Pi-a lohten nö ōt nup intöönö nö elkuilōn hī yěi haköpmat ngam Paipöl. Asā ṙôken mikahkūö hī pöri tö ngam Tēv Yāvē ngatī ṙinātö-ellōn ayī-ö tö ò nö ṙòkhöre nup kahëken ò nö tölöök.—Ps. 145:17.

5. Asuh öp mihôiṅ inlahen hī tökūö ngam öt hanëtö hī? (Haköp ngam pòks “ Kuö Ngam Öt Hanëtö Re In Öi Öt Keuheūt Maheuk Re.”)

⁵ Kūö ngam töt hanëtö re ayī-ö öi mihôiṅ öi öt ṙòkhöre maheuṅk tö nup tölöng  la-en. Sā vinī-i Yāvē lökten ayī-ö hòṅ lōnu töre öi hòṅ in ngam tölöng inkaha falen. (Ran. 1:26) Kūö ngam töt hanëtöre ayī-ö mihôiṅ öi vaichö maheuṅk tö nup la-en pòrô öi akahakūö tö inlahen öp la-en kahëken re. Ngatī inlahen ök Yôna ik sā yik aṅ Niněvě nö halööktit re tö minë falen re. Ngaich hameuktö miṙēḵlōn re ang Yāvē nö in cha. In e ang Yôna nö līn ngaich ngö lōn anga-aö tö Yāvē nö vaichö kahë tö fësla. (Yôna 3:10–4:1) Chumkūöṙen pöri ayī-ö nö ōt öp lāinyngen Yāvē nö hameuktö ngam miṙēḵlōn re, pön pōyen tö tö 120,000 ṙôken yik töt kô-òngvah. Unôich pöri ang Yôna nö fē-ělre nö rö-ö Yāvē nö vaich pön anga-aṅ.

6. Mihôiṅ ang Yāvē nö keuheūtnyö ṙô re nö vë-eny nup fësla re nö in hī, mikahtö elmat hī?

⁶ Mihôiṅ ang Yāvē nö öt keuheūtnyöre ṙô nö vënyö minë fësla kahë re. Kô-en ön nö ṙōlheuh urēhěkūö ò nö kēḵ minë fësla re ngaich vë-eny nang yip tarik re anga-aṅ hēk hatöntöre inrē. (Ran. 18:25; Yôna 4:2, 3) Ṙōlkataheuh ön inrē nö vë-eny minë chö-öny re nö i alaha ngam fësla re. (Yôna 4:10, 11) Rö-ö pöri angū-ö nö tö ngö manah tö ò nö örheūheu nö vënyen u. Pò ò nö anga-aṅ vamī në taṙòkhöre lökten anga-aṅ yěn hòṅ kě-ělkūö alaha re mihôiṅ anga-aṅ nö öt hatöntöre nö in hī. Yěn unôichrit e inrē nö kēken nup la-en anga-aṅ ngaich mihôiṅ anga-aṅ inrē nö öt vënyen u.—Isa. 40:13, 14; 55:9.

7. In chiö öi mihôiṅ kihngen öi ṙatö-ellōnre ngaich kūö yòh?

⁷ Mihôiṅ in öi ṙatö-ellōnre in minë la-en Yāvē nö ṙòkhöre nö löng. Yip töhalēnlöng pöri prötör el ngam söngkötön nö mahayōmken hī, öi kihngen lohten hameuktö ṙinatö-ellōnre öi in cha. Mihôiṅ öi ngölōn, asīnken minë inchöngten re hòng cha-a tö Yāvē hēk löklōn re ṙöng. Ngatī inlahen mufē yik mā misī. Ta-a töi ngëicha in ngam inchōḵ elmat in ngam  perekrāf 3. Sā öp ih tarik tumṙōl chööngö nö in ngam töhet sakamö. Söklöre ngam intöönö nö elkuilōn öp mak alaha ò. Urēhěkūö Môsös nö vë-eny inlaha ngam sācha ngam kinpāha ngaich hatöntöre hòng anga-aṅ nö in Yāvē. Ngaich ngölōn ök hol Uriyā tö inlahen Tāvit nö Rācha lökten min anga-aṅ nö öt kô-òngvah töm sācha re. Akahalōn pöri ayī-ö tö Yāvē nö ṙātö ellōnre nö in vē mahachōḵ kūö hī. Lökten hī yēḵ hī öt ṙatö-ellōnre in cha, ngaich sitih inlahen min ayī-ö öi ṙātö-ellōnre in Yāvē?

8. Sitih inlahen inchōḵkūö öich vē Kristīön töngamuh?

⁸ Ngam mupakö alaha ngam söngkötön Yāvē nö ing panam nö yip mahayōmken e nö yip tö-akaha mahalanṙen.” (Mët. 24:45) Ngatī inlahen ik raneh senchurī yik Yōm La-en nö ngatī ṙēngen cha-a töngamuh nö mahayōmken yip tarik ngam Tēv nö kētö inchöngten yip minröinylen. (Vë-evkūö Inlahen 16:4, 5.) Ngaich ngatī inlahen yip minröinylen nö asā minë inlēnö nö kēken minë la-en nö el ngam māṅ. Lökten nup inlēnö lamöktö el ngam söngkötön nö in yip minröinylen ngaich hāngö u cha-a. Ngaich yēḵ hī öi hāngö u ayī-ö inmeuktö hī öi ṙamölōn hēk ṙatö-ellōnre tö minë la-en Yāvē.

9. Ihē öi mihôiṅ kihngen öi hang minë fësla më minröinylen?

⁹ Hēṙu in ṙung öi kihngen öi hang nup chööngö yip minṙöinylen el ngam māṅ. Tö sā në, el nuk i-a samyeūheu minë inrīkköre inlahen minë māṅ hēk el ngam  sörkit inrē. Mihôiṅ yip minröinylen nö tölṙô yip tö haroh tumtak pöplisör nö chuh el nup tahëng māṅ nö hayööken. Yēḵ hī öre ayī-ö öi tīni öi chuh in e, kiröönngöre öi öre? Pi-a öi kihngen kūö hī öi ṙāngö yip holre hēk yip mak alaha re. Hěng ngih chöönyö hī inrē öi kihngen öi hang minë chööngö. Hö-ö ön Yāvē nö vë-eny minë-eny yip pöplisör yip tö tīniyö nö chuh el nup tahëng māṅ nö in yip minröinylen. Pön höng cha-a kamtöllen yip pöplisör. Ṙatö-ellōnre pöri ngam Tēv nö in cha lökten ayī-ö inrē hòṅ ṙatö-ellōnre öi in cha, hang minë ṙô cha inrē. *

10. Kūö yòh öi hòṅ hang minë fësla më minröinylen ?

¹⁰ Hēṙu in ṙung öt hō-en nup fësla yip minröinylen. Sön pöri ayi-ö hòṅ kēken nup chööngö cha. Yēḵ hī min ngatī inlahen ngaich lanāmö min nö ihôi hī hēk hinengö inrē. (Efi. 4:2, 3) Ngih inrē yěḵ më body of elder nö kēḵ fësla ngaich hòṅ hāngö u ayī-ö. Ngaich köp min ngam hanangenlōn hēk ngam ṙanamölōn min nö el ngam māṅ. (Vë-evkūö Heprāi 13:17.) Ngih inrē tökiröng chöönyö hī öi hòṅ hang minë fësla më minröinylen, ṙatö-ellōnre Yāvē nö in më minröinylen lökten nö katöllen cha nö ngamëichkö minë māṅ. Yēḵ hī ṙatö-ellōnre in cha töng sā ṙamātö-ellōnre ayī-ö in ngam Tēv Yāvē.—Inl. 20:28.

11. Sitih inlahen ôi ṙatö-ellōnre tö minë inlēnö ṙamā-ang in më minṙöinylen?

¹¹ Sitih inlahen öi ṙatö-ellōnre tö minë inlēnö ṙamā-ang in më minröinylen nö tölöng. Yēḵ më minröinylen ṙung nö kēken nup la-en nö el minë māṅ ngaich urěh cha-a ṙung nö vë-ekūötēv nö havëkö ngam töhet fanöinylö. Ngaich ngëichkö minë lökngörit chööngö aṅmat ngam Paipöl cha-a ngaich hēk kēken minë inlēnö lamöktö el ngam söngkötön. Lōnu më minṙöinylen nö haṙamlōn Yāvē lökten cha chumkūöṙen nö ngëichken yip tarik el ngam māṅ. Akahalōn cha-a inrē töre nö kētö kinṙötöre nö in ngam Tēv Yāvē. (1 Pīt. 5:2, 3) Afītöre tö ngih tö inlahen yip tarik aṅkūö ngih panam, tinlööken ngaich hēk mahayöng inrē nöng lamā-al kūöre. Hinëngö pöri nö in yip vamë-ekūö ngam Tēv Yāvē. Ṙën nö ngatī inlahen kūö Yāvē nö kētö inkòlô ngam söngkötön!

12. Sitih mikahlōn öich më minṙöinylen tö ngam tö faluṙen tarik yěn halööktit re hēk hö-ö?

¹² Hěng ön ngih tökiröng la-en kahëtö ngam Tēv Yāvē nö in më minṙöinylen, ngam inlahen cha nö ha-etlö ngam māṅ. Yěn hěng tak Kristīön tö kiröngö fālen ngaich lōnu ngam Tēv tö më minṙöinylen nö kēḵ fësla re nö ṙānyen ò nö ṙa-ang el ngam māṅ hēk hö-ö. Öt tö lööṙen pöri angū-ö nö in cha. Hòṅ mikahtö kūöre yip minröinylen töp tö faluṙen tarik, yěn kô-en anga-aṅ nö haṙivlōn tö ngam fālen re. Pi-a anga-aṅ nö haṙivlōn tö ṙô re. Hameukten u hòng anga-aṅ nö in minë la-enre? Minë fālen ò haṙivlōn hòng anga-aṅ tö u? Yēḵ ò nö kūö innôlö nö faluṙen, mihôiṅ anga-aṅ nö ṙāngö yip hol re? Në inrē la-en më minṙöinylen. Urěh vë-ekūö ngam Tēv ngëichkö minë töhameuktu inlahen ngëichkö minë lökngörit minë chööngö aṅmat ngam Paipöl. Hēk ngëichkö tinrīken ngam tarik ngaich möl cha-a nö kēḵ fësla re nö ṙānyen ngam tarik nö ṙā-ang el ngam māṅ hēk hö-ö. Ōtre öp inrē inlahen öp tarik nö hòṅ ha-uknyu.—1 Kòr. 5:11-13.

13. Sitih inlahen mufē öi kò-òren yēḵ öp tö ha-uknyu nö holmaneuk hī?

 ¹³ Yěn hěng tak öp tarik tö ha-uknyu tö yip minṙöinylen nö öt holmaneuk meh, ngaich lööṙen öi hang minë fësla cha. Yēḵ cha öre nö hol meh hēk mak alaha meh. Ṙātö ellōnre öm öre in më minṙöinylen öm in minë fësla cha? Mihôiṅ öi ngö mufē tö më minröinylen, kô-en hòng lohten cha-a nö ṙòkhöre ngahëichka tö minë fālen ngam tarik? Sā mat ngam Tēv hòng cha-a nö ngëicha? Ta-a töi mikahtö kūö re tö inlahen re yěi hòṅ löng mufē.

14. Asuh öp kanöplōn hī yěn ha-uknyu öp holmaneuk hī öp hol hī inrē?

¹⁴ Hòṅ köplōn ayī-ö tö ngam in-ukhönyö nö tö halēnlöng tö ngam Tēv Yāvē nö yanöölen ngam māṅ hēk yanöölen ngam tö faluṙen inrē. Yēḵ ngam töfaluṙen pöri nö öt halööktit re ngaich höngngöh anga-aṅ nö el ngam māṅ ngaich yip tahëng min nö meuk minë tötlēn kahëken ò ngaich asīnken ò min cha-a nö kēkö nup tötlöng. (Kal. 5:9) Ötrēhěn anga-aṅ nöng fēken minë fālen re lökten òn öt halööktit re. Ötrēhěn anga-aṅ nö chöh inlahen taneungen re töm inyööken re lamöktö im Tēv Yāvē. (Mum. 8:11) Mihôiṅ öi ṙatö-ellōnre in më minröinylen tö cha nö chumkūöṙen nö kēḵ nup fësla nö i alahare. Akahalōn cha-a töre nö sā inlahen yik kamhôka i Israel tö ‘ngam kinṙôka inrē nö rö-ö nö lamöktö i tarik, pön lamöktö in ngam Tēv.’—2 Kin. 19:6, 7.

15. Kūö yòh öi töngamuh hòṅ hang minë inlēnö lamöktö in Yāvē?

¹⁵ Röhta mana-ngen ön ngih panam lökten ayī-ö hòṅ ṙatö-ellōnre in minë la-en kahëken Yāvē. Pò hī min halēnö tö nup töt ööi re inlēnö hē el öp tökiröng kanihngen. Hē e min ngam Tēv nö halēnö hī nö löktö in yip mahayōmö hī, ngaich ngölōn min ayī-ö tö minë inlēnö yěn lamöktö im Tēv hēk yěn lamöktö in yip minṙöinylen. Hē u anū-ö kanihngen ṙatö-ellōnre hòng ayī-ö in ngam Tēv in ngam söngkötön ò inrē? In e min nö meukö minë inlahen hī. Yēḵ hī töngamuh hang minë inlēnö re lamöktö el ngam söngkötöng ngam Tēv ngaich ngatī inlahen min ayī-ö inup yamih.—Lūk. 16:10.

16. Kūö yòh öi kihngen ip yamih ṙētak öi hameuktö ṙinatö-ellōnre in Yāvē?

¹⁶ Hěng öp ihih inrē afēkö hī. Ṙatö-ellōn re öm min më-eṅ ip ṙētak öp manāngen ngih panam, yēḵ ngam Tēv nö kahòka? Maheuṅkuvö in tö më tarik hēk tö  yip aṅpatī nö akahakūö tö Yāvē hēk laklö ngam nômöre inrē. Öt akahakūö in tö cha yěn kò-òngvah min ip Armakētòn hēk hö-ö, pön höng eltī Yāvē angū-u. Löktö in Yēsū tī min anga-aṅ nö aṙē-ělö hēk öt aṙē-ělö. (Mët. 25:31-33; 2 Tös. 1:7-9) Sön hòng min ayī-ö ip hē e öi hang ngam fësla Yāvē hēk ṙāngenre ṙöng öi löklōn ò? Hòṅ löktökūö ing töngamuh in öi hòṅ ṙatö-ellōnre in Yāvē ngaich ngatī inlahen min ayī-ö ip yamih ṙētak.

17. Asuh nup min inkôlò hī in ngam fësla Yāvē in öp yamih ṙētak?

¹⁷ Yēḵ Yāvē min nö ha-etngö ngih panam nö vītö ngih tufömngöre panam ngaich kò-òren më-eṅ öm fē-a ip ṙētak öm sitih mufē. Öt ōt min ngam tövaich tinlöökö ngaich öt ōt min inrē nup la-en ngam sörköör nup löktö minë kanihngen töngamuh. Ṙòkhöre min öi öt vāhavö, öt kanöinyuvö hēk öt kapah inrē. Hö-öv min ngam sī-ö tö yip tötlöök ma-ahānga pön nyëki min cha-a nö 1000 samyeūheu rô-òten nö el inköövö. Ngaich halööktitvö min nup tī cha kanihngen. (Inm. 20:2, 3) Hē e min ayī-ö öi iṙôkö ṙanamlōn pò hī öi ṙatö-ellōnre in minë la-en kahëken ngam Tēv Yāvē.

18. Asuh öp haköp hī in yik aṅ Israel? (Kinṙeūkö 11:4-6; 21:5)

¹⁸ Ōt min nup ṙētak hī el öp tufömngöre panam öi hòṅ hameuktö ṙinātö-ellōn re in minë la-en Yāvē. Fēkö inlahen yik aṅ Israel man unôichrit inlaha cha nö ṙānyu nö ṙā-ang Aikup. Hòṅ ha-öiny ngam Tēv öre cha-a, vaichtö ötlēkôre pöri cha-a. Mināch elmat cha-a tö ngam nya-aṅkūö re manna ngam kahëtö Yāvē pön fēkö nuk nya-aṅkūö re nö i Aikup. (Vë-evkūö Kinṙeūkö 11:4-6; 21:5.) Yēḵ hī min ayi-ö öt chumkūöṙen ngaich mihôiṅ min ayī-ö öi sā inlahen cha unôichrit öp yöng kanihngen min. Öt akahakūö in tö ṙôken nup la-en min hēk rö-òten ngih panam min nö vīlöng nö Peretāis. Yēḵ hī löktökūö ing töngamuh öi harunöre ha-öiny minë kinë-ekūöre tö Yāvē ngaich ngatī inlahen min ayī-ö ip yamih ṙētak.

19. Asuh nup haköp hī ngaich el ngih ātiköl?

¹⁹ Ngaich in mikahtökūöre in ngih ātiköl tö hī öi hòṅ ṙinātu-ellōn in minë la-en Yāvē tö u nö tölöng. Hòṅ ṙatö-ellōnre inrē öi in cha yip töhalēnlöng tö ò nö hayöngken hī. Ta-a töi haköplōn re tö ngam ṙô Yāvē nö löknyö elvāng ök pròfět Isayā, “Im höng nganöhö an ngam kumlēḵ yīö im inyönglen inrē.”—Isa. 30:15.