YĚN halēn inpīhö misī yik aṅ Israel ngaich ōt nuk kahëtö ngam kikōnyö nö in më aṅpatī ngam kikanö. Tö sā ṙēngen ò nö mihôiṅ nö kētö rupīö hēk nup töpōiṙāi chehen hēk töṙeūla inrē. Hēkpī pöri ngam kikōnyö nö la-evṙen nö i patī ngam kikanö. Sā inlahen Yāköp urěhěkūö ò nö hòṅ pīhövö tö Rēchöl. Sat samyeūheu anga-aṅ nö la-evṙen nö i patī ök yöng ò kikōnyö. (Ran. 29:17, 18, 20) Asuh pöri ök chöö-öny ngam kui panam kinëtö ṙāi töhapīhö kikanö nö kētu?

Ngöṙô ang Kërön Māyörs ngam töpōihöl nö haköp Paipöl, “Holṙen ngam yöng re misī ngam kikanö nö la-evṙen nö el panô-òṅ. Ngaich hěng hang tak tarik alaha ngam yöng ò yěn hapīöhtu ngam kūön ò kikanö. Lökten nö ṙën ngen minë la-en ngam kikanö minë ṙāi kahëtö ngam kikōnyö. Rö-ö pöri nöng angū-ö, pön ngönlöre inrē ngam ihôi minë tönët mikūönö minë töngaich nö hanöng kisanö re min. Meukṙen höö inrē min anū-ö hē el kanihngen. Öt pinhë-evkūö inrē min ngam yöng ngam kikanö nö kētö ngam kūön re pön akahalōn ngaich anga-aṅ tö ngam kikōnyö nö mihôiṅ nö ngëichkö ngam kūön ò.

Öt tö ngö manah ngam kinënyö ṙāi ngam töhapīhö kikanö, tö ò nö chehen nö tö kēnyu ṙāi hēk töhavaha inrē. Ngöṙô ngam līpöre Ancient Israel—Its Life and Institutions nö vë-eny: “This obligation to pay a sum of money, or its equivalent, to the girl’s family obviously gives the Israelite marriage the outward appearance of a purchase. But the [bride-price] seems to be not so much the price paid for the woman as a compensation given to the family.”

Ṙòmöng ōt nup panam töngamuh tö köptī tö ngam custom kinënyö ṙāi tö hapīhö kikanö. Yip Kristīön inyööngö mi-iyöng in u anū-ö panam, hòṅ köplōn cha-a, nö un tô-òlkūö nup havëkö cha töp kanô-òṅ mina yöng ngam kikōnyö. (Filip. 4:5; 1 Kòr. 10:32, 33) In e min cha-a nö hameuktöre nö öt tö yal hēk öt “töhāngen tö rupīö.” (2 Tim. 3:2) Öthō inrē min ngam kikōnyö nö asökngö ngam inpīhö tö kūö lōn re nö hateung ngö minë havëkö mina yöng ngam kikanö. Hēk ṙāngenre inrē sin nö painīör tö kūö lōn re nö hòṅ kamailö rupīö minë tö havëka nö ṙāi ngam töhapīhö kikanö.

Hēkpī pöri nö ngam Sörköör kamëtö chööngö i alaha ngam kinëtö ṙāi ngam töhapīhö kikanö. Hë e nap Kristīön inyööngö nö hòṅ hang ngam chööngö sörköör. Kūö yòh? Pön ngö kinūichngö angū-ö nö imat ngam Paipöl, “Kö el katòh më lātulöng chööngö yin yēḵ.” Nup chööngö pöri tö sāta nö inup chööngö ngam Tēv.—Rōm. 13:1; Inl. 5:29.