1. Asuh ök ṙô Yēsū nö i yik mahaköp tö inlahen ngam ṙētak ngam manāngen ngaich sitih ṙô anga-aṅ nö fēḵlen cha?

 URĒHĚKŪÖ kinpaha Yēsū yik tö fëntak mahaköp nö yihtöre nö in ò ngaich hatöönö ò nö ngö ṙô: “Asuh öp min inrē . . . manāngen ngih panam?” (Mët. 24:3) Pön hòṅ mikahtökūöre cha-a, hòṅ cha nö akahakūö töp ṙētak manāngen Yērusalem, töm inyööngö inrē tö më Yahūti. Rö-ö pöri ang Yēsū nöng vënyö manāngen ngam inyööngö tö më Yahūti, pön vë-eny inlahen ngih manā-aṅ sakāmö inrē anga-aṅ, në ṙētak hī töngamuh, öi aṅ ikūö ngih panam. Ihē pöri min öp manāngen, ngöṙô anga-aṅ. “Öt hĕng tak pöri tö-akahalōn töp sakāmö angū-ö, ṙētak inrē; öt rēhĕn yip ma-ahānga el halīöngö; öt rēhĕn ngam Kūön; höng ngam Yöng.” Lökten anga-aṅ nö ngö ṙô nö yik haköptöre: “Hīnöre yī-ö; aṅhaṅtī, ve-ekūötēv inrē.”—Māk. 13:32-37.

2. Kūö yòh yik nö hòṅ hīnöre raneh senchurī Kristīön?

² Hòṅ hīnöre yik raneh Senchūri Kristīön misī. Pön mihôiṅ min cha-a nö kapah yěn öt hīnöre, aṅ pöri min cha-a yěn hang. Sitih löktö mikahkūö pöri yik mahaköp tö ranöhta manāngen ngam inyööngö tö më Yahūti? Ngö ṙô ang Yēsū: “Hē yīö pöri min meūkö Yerūsalem nö havīlöngö tö kumyung; akahalōn yī-ö tö öp ötkanôlò e nö röhta.” Ngaich yěn teung ngih ṙô Yēsū nö meūkö tö cha, ngaich hòṅ “falngöre cha-a nö chuh kui rôngö.” (Lūk. 21:20, 21) Sitih inlahen yik tö chumkūöṙen nö hang ṙô Yēsū? Hē yik kumyung aṅ Rōm ngaich nö ahetngen Yerusalem ngaich ötkô-òngvah cha-a.

3. Asuh nup min kahakkö hī in ngih ātiköl?

 ³ Ngaich in inrē ayī-ö töngamuh öi ing manā-aṅ sakāmö. Lökten öi hòṅ örheūheu öi aṅhen hēk hīnöre inrē. In ngih ātiköl in min öi kakkö në inlahngen ngih panam ngaich sitih inlahen öi hīnöre, hēk chumkūöṙen inrē öi ngëichköre yěi lööngö tī öi yūs ngam ṙētak, ngam töng rahëichtit nö in hī.

4. Kūö yòh öi hòṅ chumkūöṙen öi ngëichkö minë inlahngen ikūö ngih panam yěn teungtökūö minë pròfesī aṅmat ngam Paipöl?

⁴ Hòṅ lōnu in ṙung öi ngëichkö inlahen ngih panam töngamuh, tölöng angū-ö inrē pöi hòṅ meuk taneungtökūö minë pròfesī min aṅmat ngam Paipöl. Tö sā në vahënyö Yēsū misī minkahngö töp manāngen ngih panam ngam Sī-ö ngaich nö röhta takô. (Mët. 24:3-14) Hōten hī inrē ang Pītör öi chumkūöṙen tö minë tö vënyu minkahngö aṅmat Paipöl nö sitih inlahen anū-ö töngamuh ngaich nö teungtökūö, ngaich ngönlöre min ngam ṙinātö-ellōn hī. (2 Pīt. 1:19-21) Ngatī ṙô inrē ngam ranehnyô ngam līpöre Inmeukhömat, nö ngö ṙô: “Ngam Inmeukhömat aṅ in Yēsū Kristū, ngam kahëtö ngam Tēv nö in Ò, tö hameuktu nö i yip tanöölöṙô Ò.” (Inm. 1:1) Lökten ayī-ö öi chumkūöṙen öi ngëichken minë inlahngen ikūö ngih panam öi ngëichken minë pròfesī tö u yěn teungtökūö hēk yěn hö-ö. Ngaich lohten öi hòṅ kakken u öi in yip tahëng.

5. Asuh öp tötkô nö inlahen hī? (Ngëichkö ngam nyat.)

⁵ Yēḵ hī öi kakken minë tö-eūka kinlēḵngô aṅmat ngam Paipöl ngaich ötkô ayī-ö öi höng lökṙôre. Pò hī min yěi ngatī, ngaich mihôiṅ min nö taṙōl ngam Māṅ. Öt lōnu pöri ayī-ö tö e nö ngatī. Tö sā hī yěi hang ṙô më mahayöng ing panam nö vë-eny inlahen re nö ngaich nö kēngö në kanihngen, ngaich vītö ngam lanāmö töm kumchikṙen inrē nö ing panam. Ngö mufē hòng min ngaich ayī-ö tö u, nö taneungtökūö ṙô ngam 1 Tösalònike 5:3, ngaich kakken u öi in yip holre? Hö-ö, pöi hòṅ hayönglenre öi in minë tötufömngöre minkahtölōn lamöktö in ngam söngkötön Yāvē. Ngaich yēḵ hī min asīnkö minë minkahtölōn öi kakken u in höö, ngaich ‘hěng min minë mufē’ hī ngaich köp min ngam hinëngö nö el ngam Māṅ.—1 Kòr. 1:10; 4:6.

6. Asuh öp haköplö hī im 2 Pītör 3:11-13?

⁶ Vë-evkūö 2 Pītör 3:11-13. Vë-eny nang hī ön ngih miröökö tö hī yěi hòṅ ngëichkö öp töhěng pròfesī aṅmat ngam Paipöl ngaich hòṅ chumkūöṙen ayī-ö öi ngëichkö minë mufēre tö u. Hōten hī ang Pītör öi köplōn tö ngam ‘sakāmö Yāvē nöng röhta yanīhi.’ Kūö yòh öi ngatī? Rö-ö nö kūö hī öi hòṅ akahakūö ‘tö öp sakāmö hēk ṙētak’ yanīhi öp Armakētòn. Kūö hī pöri hòṅ lööngö tī öi yūs ngam tö ōttit ṙētak öi in ngam linöklōn ngam Tēv, havai ngam tinrīken re inrē.’ (Mët. 24:36; Lūk. 12:40) Tö ngö manah angū-ö, tö hī, lōnu tö minë tinrīkenre nö sā kuilōn Yāvē. Hòṅ hī hameuktöre öi hangenlōn tö ò. Yēḵ hī öi ngatī lōn ngaich hòṅ ngëichkö minë tinrīken re ayī-ö, yēḵ u nö sā lōn ngam Tēv.

7. Sitih inlahen öi haṙēmngenre? (Lūkös 21:34, 35)

⁷ Ngö ṙô ang Yēsū nö in yik haköptöre tö cha nö un höng ngëichkö nup inlahen ngih panam, hòṅ ngëichköre pöri inrē cha-a. Hěng heuh anga-aṅ nö tölṙô yik haköptöre nö hīnöre, ngih ṙô ò hē e nö in cha, “Haṙēmngenre pöri yī-ö.” (Vë-evkūö Lūkös 21:34, 35.) Ngòh tarik mahaṙēmngenre öthō min anga-aṅ nö fēkö nup tö mihôiṅ min nö pasū-utī tö ngam innôlö ò nö in Yāvē, ṙūöhöngre pöri anga-aṅ tö u. Ngatī inlahen min anga-aṅ nö haköpngöre  nö im hanangenlōn ngam Tēv.—Inch. 22:3; Yūt 20, 21.

8. Sitih ṙô Pôl nö in yik Kristīön?

⁸ Ngatī ṙô inrē ang Pôl nö in yik Kristīön nö hōten cha nö chunkūöṙen töre. Tö sā ngih ṙô ò nö in yik aṅ Efisös: “Haṙēmngenre yin i nup inlaha yīö; ui sā töt akaha, sā tö akaha pöri.” (Efi. 5:15, 16) Pön angū-ö kuilōn ngam Sī-ö nö hòṅ tiṙōl ngam innôlö hī öi in Yāvē. Lökten ngam Paipöl nö kētö inlēnö hī öi hòṅ ‘mikahtökūöre tö minë kuilōn Yāvē’ hòṅ hī öt kô-òngvah tö tī ngam Sī-ö.—Efi. 5:17.

9. Sitih inlahen öi min mikahtökūöre tö minë kuilōn ngam Tēv Yāvē?

⁹ Ōt nup ṙô tö keuheūtnyöre vinënyi tö ngam Paipöl, nup tömihôiṅ nö pasū-utī tö ngam innôlö hī öi in Yāvē. Ōt nup töt keuheūtnyöre vinënyi. Lökten ayī-ö öi hòṅ ngëichkö nup tömihôiṅ nö kahëken hī tö nup töt kanò-òṅ hī inrē nö kahëken hī. Yēḵ hī öi löngö kahë tö fësla, ngaich hòṅ mikahtökūöre ayī-ö tö nup kuilōn Yāvē. Sitih inlahen öi mihôiṅ? Hòṅ haköp mat ngam Paipöl, fēken nup haköpre inrē. Yēḵ hī min öi akah nup kuilōn Yāvē ngaich sāḵta min nup mufē hī nö ‘sā nup mufē Kristū’ ngaich ‘sā inlahen yip tö-akaha’ min ayī-ö. Löng min inrē nup kahëken hī pòrô ngam Paipöl nö öt keuheūtnyöre ṙô nö kētö chööngö nö in hī. (1 Kòr. 2:14-16) Nup ṙô tömihôiṅ nö pasū-utī tö ngam innôlö hī öi in Yāvē, ōt nup mikahkūö hī nö in u, ngaich ōt nup töt mikahkūö hī inrē.

10. Asuh nup i ṙô töhòṅ lākö tö hī?

¹⁰ Pōyen nup mihôiṅ tö pasū-utī tö ngam innôlö hī öi in Yāvē. Tö sā ngam inyikngö kikānö hēk hayikngö kikōnyö, töpōivat kin-eūtö hēk töm töyahlö ṙôkvat kam-eūt, töpōivat nö nyā, tö chökhuṙô yěn ṙô-òvö, tötlöngö hanôl, mineūkö nup sinimā famël hēk meuk minë tötlöng nyat hēk vitiō inrē. Hòṅ ṙūöhöngöre in tö u anū-ö tö ngatī. (Sal. 101:3) Pön öt ṙākenre ngam Sī-ö nö hòṅ tiṙōl ngam innôlö hī öi in Yāvē. (1 Pīt. 5:8) Yēḵ hī min öt hīnöre ngaich mihôiṅ min ngam Sī-ö nö chaphöt minë tötlöng nö elkūilōn hī. Tö sā në, mihôiṅ min öi ṙānyngö tö yip tahëng, miyôny-aṅ, michūṙen, yikngö chehen holre, tāilölōn inrē töre, asīöp lanīnöre öi i holre hēk kunyaha elmat inrē tö holre. (Kal. 5:19-21) Mihôiṅ sin anū-ö im raneh nö töng öt uroh nö tö vaich nö meūkö tö hī. Yēḵ hī pöri öi öt ilööṙen öi kēnyen u nö ṙā-ang elkuilōnre, ngaich sīöplöre min anū-ö nö sā kun chōn tö kapahukūö nö in hī.—Yāk. 1:14, 15.

11. Asuh öp töhěng ihih kanihngen öp töt meūkö nö mihôiṅ tö hī, ngaich kūö yòh ayī-ö öi hòṅ chumkūöṙen?

¹¹ Asehkūöre man töp kanihngen lākūö meh, hö-ö pöri öi meūkö e. Hēngö chūök na-a töp töhěngtak tarik an la-evṙen öp töt sā meh nö Vamënyen Yāvē. Hayööken ò më-eṅ pöm hōten ò nö vāyö mufē nö in më Vamënyen Yāvē. Hēṙu ngaich na-a an hol kūöre an nyā. I tumheuh nā ngaich holkūöre an nyā, meuk ngam tarik ngaich më-eṅ nö hēṙu nö kakkö nup tötlöng la-en. Öt chumkūöṙen sin më-eṅ tö minë ṙô ò, im rò-òtenre meh pöri ngaich öm hang, kuchiklöre elnang ngaich më-eṅ, öt uroh inrē ngaich minë ṙô ò nö töchōich nö hāngö tö meh. Hěng heuh ngaich anga-aṅ nö havëten meh öm holkūö ò nö ka-eūt, hō ngaich më-eṅ. Hěngren ngaich minë mufē nā tö ò. Sitih lōn öm, hö-ö öm min tölōnre öm asīntö inlahenre öm inup tötlöng la-en, nup kahëken ò? Hēk nup mufē ò inrē? Kô-en in tö hòṅ vāyö inlahen hēk hòṅ milēḵṙen tö holre, hòṅ köplōn pöri ayī-ö töre yěi yahlö inlahen min hanôlö cha, ngaich sā tinrīken cha min ayī-ö. (1 Kòr. 15:33) Lökten öi hòṅ köplōn tö ṙô Yēsū, öi hòṅ chumkūöṙen töre. Ngaich öthō min öi yahlö inlahen öi hanôl yip tö ngatī, yip tö sō tö minë tölöök inchöngten kahëtö Yāvē. Pöi akahakūö tö u nö vītö kanihngen hī min.—2 Kòr. 6:15.

12. Hòṅ asūp inlahen yik mahaköp nö in Yēsū nö hökkö pinyāyngö Yērusalem?

¹² Akahakūö yik mahaköp nö in Yēsū tö Yerusalem min nö payāyi, rö-ö pöri cha-a nöng suvan kalröönre nöng ūichhak ngaich hökken e. Pön kētu la-en cha-a tö Yēsū nö keuheūtngöre chūök nö ‘i Yērusalem, i Yūta hēk i Samariā inrē nö ahangkö yanīhi ngam Pūlngö ngam Tēv.’ (Inl. 1:6-8) Kô-en nö kiröng ngam la-en kinë-ekūö yik mahaköp, lökten cha-a nö hòṅ keuheūttö ellōnre nö kēken e nö yūs ngam tö rahëichtit ṙētak aṅ in re.

13. Kūö yòh öi hòṅ chumkūöṙen yěi yūs ngam ṙētak? (Kòlòsi 4:5)

¹³ Vë-evkūö Kòlòsi 4:5. Yēḵ hī min löngö tī yūs ngam ṙētak, ngaich chumkūöṙen min ayī-ö tö re. Lökten öi hòṅ chumkūöṙen tö inlahen tī re tö ngam ṙētak öi inup la-en tömihôiṅ nö yëngen tī tö e. Kūö yòh öi hòṅ ngatī inlahen? Pöi mihôiṅ min öi ‘fukkui tö kanihngen’ mihôiṅ inrē min öi kapah.—Mum. 9:11.

14-15. Sitih inlahen öi yěi hòṅ löngötī öi yūs ngam ṙētak? (Heprāi 6:11, 12) (Ngëichkö ngam nyat.)

¹⁴ Sitih inlahen öi min löngö tī yūs ngam ṙētak? Hòṅ lök nup lōn Yāvē, hangön ngam innôlöre inrē öi in ò. (Yôh. 14:21) Ngöṙô an ngam Paipöl. “Lökten, yī-ö hol chu, hakööpöre yin, ui hanlöinyken: örheūheu ṙūöhlö ngam la-en ngam Tēv.” (1 Kòr. 15:58) Yēḵ hī min öi ngatī inlahen ngaich öthō min ayī-ö öi fēḵ unôich yěn  yih pòrô ngam manāngen hēk yěn faltöre yanihī ngam kinpaha hī.—Mët. 24:13; Rōm. 14:8.

¹⁵ Keuheūtngöre chūök yin nö ngaich më haköptö Yēsū nö ahangköm tölöök inhānga nö ikūö ngih panam. Nö sā tinöölö ṙô cha tö Kristū. Löktö im söngkötön tī anga-aṅ nö haköpten hī, heuveū-en im inhānga, kē-ěkūö hī anga-aṅ tö nup töng kuilōn hī. (Mët. 28:18-20) Kô-en ang Yēsū nö hateung ngam kinlēḵngôre. Asuh pöri öp kuilōn ò nö in hī? Hanöng sā Yāvē nö öl nö ahetngen në inyöngö, hòṅ iṙūöhen ayī-ö öi haköpten yip tarik hēk vë-eny nang cha inrē tö ngam tölöök inhānga, haköpten cha nö hīnöre. Yēḵ hī min öi ngatī inlahen ngaich hamang ngam inlēnöre min ayī-ö im līpöre Heprāi 6:11, 12, ngaich ‘söl manā-aṅ’ öi köptī tö ngam maheūkköre, ngönlöre min inrē ngam ṙinātö-ellōn hī.—Vë-evkūö.

16. Hòṅ asuh öp ngaich kuilōn meh?

¹⁶ Ngaich an Yāvē nö lēnngötī töp ṙētakre nö kēngen ngam Sī-ö tö ngih tötlöng panam inrē. Sā öp sakāmö pöri nö öl, hateung minë pròfesī re min ang Yāvē nö ṙòkhöre minë aṅmat ngam Paipöl. Mihôiṅ min öi ngölōn tö öp manāngen nö öl nö yih hēk hāṅ-en inrē nö yih. Mi-ip ṙētak re pöri min angū-ö nö yih öp tö halēniṙen tö Yāvē “öt ahāṅkenre an min!” (Hap. 2:3) Ngö ṙô ngam Paipöl “hökkö ngam Tēv chin min ngam inyööken chu: hangṙô chu an min ngam Tēv chu.”—Mai. 7:7.