Meuk Hanangenlōn Më Prötör Sistör Pòrô Nöng Öt Meuk
HOL maneukre hē Yōmara, Marsělō tö Ivör inrē nö mi-iyöng kūö öp kun vilēch i Kuātěmalā. Urěhten ang Yōmara nö istötī mat ngam Paipöl nö in më Vamënyen ngam Tēv, ngaich unôichrit ò minā kanônyö ò nö rultenre nö istötī. Hěng pöri ngam kanihngen cha. Pô cha nö töt meuk nö lūöire tak, ötrēhěn nöng heuveū tö ngam Prēl ëlô. Lökten öp prötör kamë istötī cha nöng anga-aṅ mahaköp öp perekrāf nö ha-angtö nang cha hēk vë-ekūö nup miröökö inrē tökētu.
Tahëng hēk ngam kanihngen cha. Pön 40 minit rôvat ngam patī cha töm Patī Pūlngö ngaich ötkô cha-a nöng hěngtak nö chuh el mitīng. Lökten nö halēnlö linukkö cha hēk sinöömngö cha më prötör el ngam Māṅ. Unôichngöre ngaich cha-a nö lūöire tak nö teūngen tö minë asāinment re nö el mīting. Hayööken cha më prötör sistör nöng yāt minë ṙô re, hòṅ cha vāyö inlahen nö kēten u.
Löktö kūö ik Mē 2019 ngaich ngam mitīng nö kēkaṙen nö el ngam vilēch cha. Iyöng in e inrē nak pamīhöre painīör. Hö-ö cha-a nö tö heuveū tö ngam Prēl ëlô, lōnu pöri cha-a nö hòṅ hayööken më tö lūöi tak prötör sistör tö ngam Prēl ëlô. Lökten cha-a nö chuh el ök töhěng laëprërī ngaich kē nup līpöre vamënyö inlahen ngam Prēl ëlô. Imat minë līpöre inrē nö vënyu minë inlahen tī hī öi haköptö yip tahëng tö ngam Prēl ëlô.
Kētö ansör ang Marsělo nö el mīting
Ilööṙen ngaich hē Yōmara, Marsělo hēk Ivör inrē nö heuveū tö ngam Prēl. Ngaich yin töngamuh nö lööṙen nö haköpmat minë līpöre, ngön inrē ngam innòlö cha nö in Yāvē. a Ngaich nö lūöire tak nö painīör töngamuh. Töhěng tak inrē ang Marsělo nö Mahayööken töla-evṙen nö el ngam māṅ, ngönlöre më tahëng yěn meuk inlahen cha.
Kirööngen hanangenlōn yin më prötör sistör tö më tö lūöi tak hēk chumkūöṙen inrē tö cha. Ngaich inrē më tö lūöi tak nö milēṙen tö cha. Ngö ṙô ang Yōmara, “Ik sā ih öi meukkūö më vamënyen ngam Tēv, löktökūö in e yin söl ing töngamuh nö hameuktö hanangenlōnre nö in ih. Angū-ö ön tökô-en hanangenlōn.” Ngöṙô ang Marsělo, “Pōyen yip hol ih el ngam Māṅ. Höng sā ṙēngen aṅ öp tö hěng mikūönö īhö ngam tö keuheūtngöre chūök nö ikūö ngih panam ngaich ṙòkhöre öi kirööngen hanangenlōn tö höö.” Meūka ang Yōmara töm kanònyö ò nöng hök köp ṙētak yē ngih panam min hēk nö vī-i nö Peretāis.—Sal. 37:10, 11; Isa. 35:5.
a Halēnlö öp töhěng an prōsör ngam söngkötön öp töngö minënyi Löön Tu Rīt Prēl (Learn To Read Braille). Yip tö kūön maheuk hēk töt meuk inrē, mihôiṅ cha-a nö harūnöre nö haköp Prēl hēk kūich nö löktö im prōsör.
