1. Kūöyòh öi hòṅ ha-öinyö Yāvē pön kētö ngam Paipöl nö in hī?

 HA-ÖINYÖ Yāvē in kūö ò nö kē-ěkūö hī tö ngam Paipöl. Imat e nun minë tövai inlēnö, yěi hāngö u min ngaich heuveū min öi la-al nup kanihngenre. Löktö in e tī anga-aṅ inrē nö kētö ngam tövai maheūkkö hī. Ngam tömötlö pöri in u nö ṙòkhöre, löknyö mat ngam Paipöl ṙô anga-aṅ nö vënyö inlahen re nö Tēv, tö minë tinrīken ò inrē. Yēḵ hī min chumkūöṙen öi kēnyö ṙētakre öi afēkö minë tinrīken ò, ngaich ṙamlōn min ayī-ö, sīöp min inrē ngam kuilōn hī öi hòṅ hol ò.—Sal. 25:14.

2. Asuh nuk löktö ṙô Yāvē nö vë-eny inlahenre nö in yik tarik?

² Lōnu Yāvē tö tarik nö akahakūö tö ò. Lökten anga-aṅ misī nö vë-eny inlahen re nö in yik tarik nö löktö i heūvö, inmeukhömat hēk löktö i ma-ahāngö inrē. (Kin. 12:6; Inl. 10:3, 4) Asehkūöre man, yěn öt hěngtak öre tarik kamūichngö minë inlahen ò ngaich sitih inlahen öre ayī-ö öi akahakūö tö ò. Lökten ang Yāvē nö katöllö yik tarik kamūichngö minë inlahen ò nö imat öp “töhěng līpöre.” (Yar. 30:2) Vai nup töng sitih la-en kahëken Yāvē, ‘ṙòkhöre anū-ö nö tö teung.’ Lökten öi ṙinātu-ellōn tö ò nö löngö inlahen nö halēnlö yik kamūich ngam Paipöl. Yēḵ hī min vë-ekūö e ngaich yöölen min ayī-ö.—Sal. 18:30.

3. Asuh öp haköp hī inlahen Yāvē yěi meuk ngam Paipöl töngamuh nö ṙömöng ōt nö in hī? (Isayā 40:8)

³ Vë-evkūö Isayā 40:8. Kūichö ngam Paipöl misī nöng imat nuk tö veūtö chinhūngö. Urěh anū-ö nö kūichö nöng imat nuk tölömö līpöre, ngaich anū-ö töngamuh nö öt hěngtit. Sön pöri minë tövai inlēnö tökūichhötvö tö ngam Tēv misī nö imat ngam Paipöl nö yöölen tī tö yik tarik mahayönglen re nö in ò. Nö sitih inlahen? Pön chumkūöṙen ang Yāvē nö halēnlö insīnkö kinūichö ngam Paipöl. Höng sā hī yik misī tarik nö töthet yik ma-asīnkö kinūichö ngam Paipöl, lökten yik nö chumkūöṙen nö asīnkö nuk kinūichö e hòṅ cha nö öt vāichö tī. Kò-òren hang ṙô ök ihih tö hěngtak kamūich, nö ngö ṙô, “Öt hěng līpöre tö sā ngam hötṙeh  kinlēḵngô nö töt haṙī-ingre kinūichö nö sölta nö in hī.” Kūöyòh öi mihôiṅ ngatī ṙô? Pòrô ngam Paipöl nö köönyu samyeūheu rô-angen kinūichö nö ngaich, kūichö inrē nöng imat nuk töng veūtö chinhūngö, töng sā hī inrē yik tarik ma-asīnkö kinūichö e nö töthet. Sön öi mihôiṅ ṙātö-ellōnre tö minë haköpre aṅmat ngam Paipöl töngamuh tö u nö anū-ö tinöölö ṙô yik kamūich tö Yāvē, hö-ö anū-ö nö haṙī-ingre.

4. Asup min kahakkö hī in ngih ātiköl?

⁴ Ṙòkhöre nup “tölöök inlōnti, nup töteung inlōnti inrē, nö ṙamā-ang in Yāvē.” (Yāk. 1:17) Ōt hòng kamë-ekūö meh tö töngatī inlōnti kūö meh öm lōnu tö töngatī? Inmeuktö öp tarik angū-ö nö akahakūö tö meh tö nup kuilōn meh inrē. Töhěng an inrē ngam Paipöl nö inlōnti. Yěi vë-ekūö e min ngaich meūkö Yāvē min ayī-ö nö akahakūö takô tö hī, akahakūö inrē tö nup kuilōn hī. Akahakūö inrē min ayī-ö tö minë tinrīken ò yēḵ hī öi vë-ekūö ngam Paipöl. Tö ò nö tö akaha, tölöngö tī nö kahôka, hangenlōn takô inrē anga-aṅ tö hī. In ngih ātiköl in min öi mikahtökūöre tö minë tölūöi tinrīken ò. Töi mikahtökūöre chěi tö hī yěi haköpmat ngam Paipöl ngaich sitih inlahen min öi akahakūö tö Yāvē nö tö akaha takô.

5. Sitih löktö mikahkūö öi in minë tökūichi aṅmat ngam Paipöl tö ngam Tēv nö tö akaha takô?

⁵ Akahakūö ang Yēvē tö hī öi tö hòṅ halēnö lökten anga-aṅ nö kūichhöt minë tövai inlēnö hī nö imat ngam Paipöl, ngam kahëtö ò nö inlōntö hī. Pōyen ngaich tarik töyöölen, kūöre nö hang minë inlēnö aṅmat ngam Paipöl, vailöre minë tinrīken cha. Inmeuktö Yāvē anū-ö nö tö akaha takô nö Tēv. Hangihtöre tö ṙô Môsös hē ò nö kūich minë raneh tö taneui līpöre, ngö ṙô anga-aṅ nö in yik tarik ngam Tēv: ‘Pòn rö-ö anū-ö nö töng töl nö ṙô nö in yīö; pöi löktö in u min öi teūngen tö nômö re.’ (Chöö. 32:47) Yip tarik hamang minë inlēnö aṅmat ngam Töhet līpöre, teūngen min cha-a tö kumchikṙen. (Sal. 1:2, 3) Tökô-en minë ṙô inuk ṙētak misī, inë ṙētak hī inrē töngamuh. Pòrô nö köinyu samyeūheu rô-angen ngam Paipöl ngaich nö kūichö sön nö mihôiṅ nup tinrīken yip tarik nö vailöre yěn hang minë inlēnö aṅmat e. Kò-òren öm chuh el ngam jw.org öm ngëichkö minë ātiköl “Haṙīngö Tinrīken Tarik An Ngam Paipöl” pōyen tö tö lūöi anāi ṙôken yip tarik tö vënyu inlahen nö in e. In e öi akahakūö tö yip tarik ṙamatö-ellōnre nö in ngam ṙô ngam Tēv ngaich kô-en cha-a nö lökngöre.—1 Tös. 2:13.

6. Kūö yòh öi mihôiṅ ngöṙô tö ngam Paipöl nö töt insā-avö nö līpöre?

⁶ Öt hěng līpöre ing panam tö sā ngam Paipöl. Kūö yòh öi mihôiṅ ngatī ṙô? Yěi ṙô tö minë tahëng līpöre, öt hōḵ më kamūichö u nö öt kapah, unôichngöre ngaich minë inlēnö ṙô cha nö öt yanööluṙen tī tö hī. Tö kalēḵ kūö tökalēḵ pöri ang Yāvē ngam kamūich ngam Paipöl nö töt ranehlu töt manāngenvö, tö akaha takô inrē. Höng örheūheu öi yöölen tö minë inlēnö aṅmat ngam Paipöl. Örheūheu inrē öi yöölen tö minë tökūichi aṅmat ngam Paipöl. Ngatī yik mu-urēhěkūö hī misī tarik nö yöölen, ayī-ö inrē töngamuh. Yēk hī öi haköpmat ngam Paipöl, afītöre inrē tö minë haköp re ngaich kē-ěkūö hī min ngam kamūichö e tö ngam töhet kumlēḵre hòṅ hī öi akaha elnang tö minë ṙô e kēkö kaha u inrē. (Sal. 119:27; Mal. 3:16; Hep. 4:12) Yěn hööngöre ngam kamūichö e nö hòṅ hayööken hī ngaich kūö yòh min ayī-ö öi öt haköpmat e hòṅ hī öi yöölen?

7. Sitih inlahen yik tarik ngam Tēv misī nöng köptī tö ngam hinëngö?

⁷ Ngam Paipöl an tö tī-ivö tö më tarik ngam Tēv nö köp ngam tö hinëngö nö ihôi cha. Hē yik Israel misī nö teung nö im panam kinlēḵngô, ngaich marôvat nuk chūök cha nö iyöng tö höö, kö harīkngöre inrē nuk la-en cha tö höö. Ōt yik kamë kāḵ, ōt maharuk töṙeūla, vamī panò-òṅ yik umuh in cha. Mihôiṅ öre cha-a nöng lööṙen nö vaichngö tö më hol maneukre më  tö marôvat chūök tö cha. Öt halöngten cha pöri ang Yāvē nö ngatī. Lökten anga-aṅ nö kētö chööngö nö hōten cha nö hēṙu nö hamūlöre nö hěng kang chūök el töhěng samyeūheu nö haköp Ṙô ngam Tēv. (Chöö. 31:10-13; Nah. 8:2, 8, 18) Asehkūöre, töp töhěngtak Israel yěn chuh Yērusalem, ngaich lohten min anga-aṅ nö meukkūö yip tö lāku ṙôken holmaneukre tö tahëngö löktö. Ngaich pōyen ṙanamlōn lohten anga-aṅ nö meukkūö cha! Unôichrit u hēk yik Kristīön nö vīlö nuk māṅ, ṙōlkangen minë ëlô cha. Ōt in cha tökòlô, ōt yik yāich, ōt yik töpōihöl nö haköp ōt yik tö kūönhöl. Ṙòkhöre pöri cha-a nö hangenlōn tö ngam töhet līpöre. Lökten cha-a nöng köp nö hēngòng ellōn nö ha-öiny ngam Tēv. Öt ṙākenre cha-a nö hamūlöre tö yik tahëng holmaneukre, ngaich lökten in u cha-a nö yöölen nö akaha elnang tö minë tö kūichi ṙô aṅmat ngam Paipöl.—Inl. 2:42; 8:30, 31.

8. Sitih inlahen tī ang Yāvē töngamuh nö haköpkö ngam hinëngö nö ihôi më tarikre?

⁸ Ngatī inlahen töngamuh ang Yāvē nöng löknyö mat ngam Paipöl ṙô nö haköptö tarik, nö haköpkö ngam hinëngö nö ihôi cha. Nö sitih inlahen? Höng löktö im Paipöl öi akahakūö tö ngam kanô-en inlahen Yāvē. Rö-ö nöng anū-ö, pöi ṙòkhöre öi yihtökūö öi chuh el mīting, ësemplī hēk könvensön inrē minë chūök hī töngamuh öi haköp minë ṙô ngam Tēv öi mikahtu elnang, vënyö nup haköpre inrē. Ngatī inlahen ang Yāvē nö hateungngö ngam kuilōnre hòṅ yip tarik ò nö ‘holṙenre nö im linöklōn ò. (Sef. 3:9) Kô-en ngam Tēv hī Yāvē nö tö akaha.

9. Höng achīö yip tarik tö akaha elnang tö minë tö kuichi aṅmat ngam Paipöl? (Lūkös 10:21)

 ⁹ Ngëichkö ngam tahëng hēk, löktö mikahkūö hī tö ngam Tēv hī Yāvē nö tö akaha takô. Ṙōl minë ṙô tökūichhötvö tö ò imat ngam Paipöl, höng yip tarik pöri töyāichö ellōn tö mihôiṅ nö akaha elnang tö u. (Vë-evkūö Lukös 10:21.) Pōyen tarik töngamuh ikūö ngih panam mahaköp mat Paipöl. Ngatī ṙô inrē ök ihih kamūich nö vënyö inlahen ngam Paipöl, nö ngö ṙô, “Angū-ö ön ngih līpöre töhaköpömat tö töpōyen tarik nö holtö chumkūöṙenre.” Ngam maheuk hī pöri in cha nö ṙòkhöre, nöng më tö yāichö ellōn tö akaha elnang tö minë ṙô e hēk kēkö kaha minë haköpre inrē aṅmat ngam Paipöl.—2 Kòr. 3:15, 16.

10. Asup öp hēk ṙô ngam Paipöl nö vënyen Yāvē nö tö akaha takô?

¹⁰ Ngih hēk mikahkūö hī öi löktö im Paipöl tö ṙôken mikah ngam Tēv hī Yāvē. Rö-ö anga-aṅ nöng haköpten yip tarik töhěngkang chūök nö mūl, pön haköpten hī öi hěng hěngtak, hareuskö alaha hī inrē. Yēḵ hī min öi haköpmat ngam Paipöl, ngaich akahaiṙen ayī-ö tö Yāvē nö chumkūöṙen takô tö hī öi ṙòkhöre. (Isa. 30:21) Ngaich öm ṙung akahaiṙen tö chumkūöṙen ò, aṅhavkūö më-eṅ töp kanihngenre, haköpmat ngam Paipöl ngaich më-eṅ, ngaich ngö ṙô öm in re, ‘höng lumnööṙö chu ön ngih miröökö nö kūichö?’ Ngamuh inrē pinngangkūö mufē më tö lāku ṙôken tarik aṅ ikūö ngih panam tö inlahen ngam Paipöl. Nö sitih inlahen min ngam tö ha-ehangen kinūichö līpöre nö yöölen tī tö taṙòkhöre tarik töngamuh? Kūö ngam kamūichö e nö mötlö ṙôken mikah tö taṙòkhöre.—2 Tim. 3:16, 17.

11. Sā kinūichngö e nö imat ngam Paipöl öi sitih löktö mikahkūö öi tö Yāvē nö töt atöltuṙen tö tarik?

¹¹ Ngam tövai hēk tinrīken Yāvē pön töt atöltuṙen yěn kahôka. (Chöö. 32:4) Örheūheu anga-aṅ nö kēken nup tölöng la-en öt atöltuṙen inrē tö tarik. (Inl. 10:34, 35; Rōm. 2:11) Im inlahen ò inrē nö kūich ngam Paipöl nö ṙōlkangen ëlô. Ṙô Heprāi nun sin misī minë raneh tö 39 ṙôken līpöre nö kūichö, pön angū-ö ëlô heuneū-euṙô yik tarik ngam Tēv misī. Pōyen pöri ngaich yik tarik tö heuveū-euṙô tö ṙô Krīk hē sanölta ngam raneh senchurī. Lökten minë mana-aṅ tö 27 ṙôken līpöre nö kūichö nö i ṙô Krīk. Öt ngö lōn ang Yāvē, hökngen ngam ṙô chu nöng köp nöng hēngö ëlô. Hevhöre pilīön (billion) ṙôken yin ngaich vē tarik töngamuh nö ikūö ngih panam, ṙōlkangen inrē minë ëlô cha, ngaich sitih inlahen min cha-a tarik töngatī ṙôken nö akahakūö tö Yāvē?

12. Kūö yòh öi mihôiṅ ngöṙô tö ngam Taniěl 12:4 nö teung inë ṙētak hī töngamuh?

¹² Löktö in ök pròfět Taniěl ṙô ang Yāvē nö vënyö inlahen nup yamih min ṙētak tö ngam ‘tökô-en mikah’ aṅmat ngam Paipöl nö ṙūöhölre ṙôken min ip mana-aṅ sakāmö ngaich pōyen min yip tarik tökôtökūö tö e. (Vë-evkūö Tanīěl 12:4.) Kô-en ngaich öi meuk tö ngatī inë ṙētak hī töngamuh. Trānslētö, katānö hēk katööli inrē ngam Paipöl tö minë līpöre hēk mekesīn töngamuh nö i tarik, lökten ngaich nö pōyen tö ṙūöhölre ṙôken mikahkūö tö ngam kanô-en aṅmat ngam Paipöl. Öt hěng līpöre tö ngatī tumkangen ëlô nö ōt, vë-evkūö inrē nö keuheūtngöre chūök. Ngaich töngamuh minë chūök kintānö līpöre nö katān minë Paipöl tö ṙōlkangen ëlô, hēṙu pöri ṙung anū-ö nö pōiṙāi yěn inyihka. Ngaich yin inrē më tarik ngam Tēv Yāvē nö translēt ngam Paipöl nö keuheūtlöre, hēk ōt nöng haroh tūmö, tö minë tahëng līpöre tö katānö, nö pōyen tö tö 240 ëlô, mihôiṅ inrē öi teūngen tö ngam Paipöl pòrô öi öt ṙāyu tī öi in re. Lökten yin më tarik töngamuh tö keuheūtngöre chūök ikūö ngih panam nö teūngen nö hang ngam “tölöök inhāngkö ngam pūlngö” ngam Tēv urēhěkūö öp manāngen nö yih. (Mët. 24:14) Tö löngö tī ngam Tēv hī yěn kahôka  töt atöltuṙen inrē. Kētö ṙētak tarik anga-aṅ nö haköp mat ngam Paipöl mikahtökūöre inrē tö ò, kūö ò nö hangenlōn tö taṙòkhöre tarik.

13. Sitih inlahen mikahkūö öi löktö im Paipöl tö Yāvē nö hangenlōn takô tö hī? (Yôhan 21:25)

¹³ Löknyö mat ngam Paipöl in inrē öi akahakūö tö tinrīken ngam kamūichö e nö Tēv hanangenlōn. (1 Yôh. 4:8) Akahakūö anga-aṅ tö nup ṙô tö hòṅ kūichhötvö nö imat ngam Paipöl.Tö sā në, Sitih inlahen öi mihôiṅ ṙūöhtöre in ò öi hol ò, sitih inlahen öi teūngen töm ṙanamlōn hēk sitih inlahen öi teūngen tö ngam nômö tö örheūheu-aṅ. Akahakūö ang Yāvē töp tölngö kanò-òṅ hī öi haköp ngaich höng anū-ö vahënyö ò nö imat ngam Paipöl. In e mikahkūö ayī-ö tö ò nö hangenlōn takô tö hī.—Vë-evkūö Yôhan 21:25.

14. Asuh öp hēk löktö mikahkūö hī im Paipöl tö Yāvē nö hangenlōn takô tö hī?

¹⁴ Löktö in minë ṙô tö kūichhötvö tö Yāvē nö imat ngam Paipöl in inrē öi akahalōn tö ò nö hangenlōn takô tö hī, milēḵṙen inrē anga-aṅ tö hī. Öt höng keuheūt höt minë chööngö anga-aṅ minë inlēnö hī, öi inup kahëkenre la-en nö sā ṙô re nö halēn yip nyīö töt īnu tö mikah. Pön höng kētö minë tövai anga-aṅ inlēnö, tö minë tö eūka kinlēḵngô, inlahngen hēk tinrīken yik tarik inrē töpōyen, anū-ö tö kūichhötvö tö ò. Lökngöre ellōn takô ayī-ö öi hāngö u, ngaich sīöp ngam hanangenlōn hī tö Yāvē hòṅ hang minë chööngö ò inrē.

15. (a) Sitih löktö mikahkūö öi yěi haköpmat ngam Paipöl tö Yāvē nö chumkūöṙen takô tö hī? (b) In ngam nyat tö hameuknyu, inlahen ngam kun nyīö, ngam ṙālö prötör hēk ngam tö köinyö ṙēti sistör nö fēkö inlahen më tarik tö vënyu imat ngam Paipöl? (Ran. 39:1, 10-12; 2 Rā. 5:1-3; Lūk. 2:25-38)

¹⁵ Löktö im vinë-ekūö mat ngam Paipöl in inrē  öi akahakūö tö Yāvē nö chumkūöṙen takô tö hī. Pön kūichhöt inlahen yik tarik anga-aṅ nö imat ngam Paipöl yik tö sā ta ‘tinrīken hēk mufē nö in hī.’ (Yāk. 5:17) Lökten ayī-ö öi akahakūö tö inlahngen cha. Rö-ö pöri nöng anū-ö pöi haköplu tö inlahen Yāvē tö minë tinrīken ò inrē, yēḵ ò nö vë-ekūö yip tahëng, in e mikahkūö ayī-ö tö Yāvē “nö tö tööḵlö tö miṙēḵlōn tööḵlö inrē tö neūkölōn.”—Yāk. 5:11.

16. Sitih inlahen ang Yāvē yěn vaichköreṙen yip tarik ò? (Isayā 55:7)

¹⁶ Löktö im Paipöl in inrē öi akahakūö tö Yāvē nö öt hō nöng ilöö ṙāngen hī yěi vaichköreṙen, aṙēlen hī pöri anga-aṅ. In e mikahkūö ayī-ö tö ò nö kirööngen hanangenlōn tö hī. Sā inlahen ò nö in yik Israel misī, pòrô cha-a nö ṙōlheuh nö ha-ôngen minë chööngö ò, yēḵ cha pöri nö holtö ellōnre nö halööktitre ngaich aṙēlen cha anga-aṅ. (Vë-evkūö Isayā 55:7.) Akahakūö yik inrē Kristīön ik raneh senchurī tö Yāvē nö hangenlōn tö cha. Sā inlahen ök ihih töhěngtak tarik tö kirööngen fālen ngaich holtö ellōnre pöri anga-aṅ nö halööktit re, lökten ang Yāvē nö löktö in ök tanīnöṙô ang Pôl nö kūich ngam chitri nö i më holmaneukre nö hōten cha nö ‘aṙēlen ò hēk kētö inreuskö alaha ò’ inrē. (2 Kòr. 2:6, 7; 1 Kòr. 5:1-5) Öt höng ilööṙen ang Yāvē nö ṙāngen yip tarikre pòrô cha-a nö vaichköreṙen, holtö hanangenlōnre pöri anga-aṅ nö hayööken cha, halēnö cha hēk havëten cha nö in re. Ngatī inrē töngamuh ang Yāvē nö aṙēlen yip tarik hamòltö ellōnre nö halööktitre.—Yāk. 4:8-10.

17. Kūö yòh öi mihôiṅ vënyö ngam Paipöl nö tövai nö inlōntö hī?

¹⁷ Kô-en an ngam Paipöl nö tökiröng nö inlōntö hī nö aṅ in Yāvē. Kūö yòh öi mihôiṅ ngatī ṙô? Sā minë haköp hī ngaich öi in ngih ātiköl tö Yāvē nö tö kirööngen mikah, tö löngötī yěn kahôka hēk tö kirööngen hanangenlōn inrē tö hī. Kūichhöt minë inlahen tinrīken re inrē anga-aṅ nö imat ngam Paipöl. In e mikahkūö ayī-ö tö ò nö lōnu tö hī öi mikahtökūöre tö ò. Lōnu inrē anga-aṅ tö hī öi hol ò.

18. Sitih inlahen öi min hameuktö minlēḵṙenre tö ngam Paipöl?

¹⁸ Hòṅ chumkūöṙen in tö ngam inlōnti kinë-ekūöre ngam Paipöl. Ötkô öi höhö lōn. (Yāk. 1:17) Ta-a chěi töi hameuktö minlēḵṙen re tö e. Öi sitih inlahen? Öi haköp minë ṙô tö kūichi imat e ngaich fēken u inrē. Yēḵ hī min öi ngatī inlahen ngaich ṙātö-ellōnre min ayī-ö in ngam kamūichö e tö ò nö öthō min nö öt kētö inkòlô hī hēk teūngen min ayī-ö töngam “mikah ngam Tēv.”—Inch. 2:5.