HĒṘU yin më kamūich ngam Paipöl nö havīöl havīöltit tīre nö kūich minë tö hěngren ṙô. Ta-a töi chumkūöṙen öi ngëichken minë tö lūöi lāinyngen tī cha nö kūö yòh nö ngatī inlahen:

Ihē ön minë ṙô nö kūichiyö. Pōyen misī yik Israel töt aṅhavin tö minë tölömö līpöre minë tö aṅhavmat tö minë Chööngö, yēḵ cha nö hòṅ haköpö u, ngaich hòṅ chuh el ngam töhet chūök cha-a, ngaich möl min nö haköpö u yěn vë-evkūö anū-ö. (Chöö. 31:10-12) Marò-òten pöri cha-a misī nöng sökhak. Lökten lohten cha-a nöng öt chumkūöṙen nö hangihtöre tökūö ngam ṙôkenre. (Nah. 8:2, 3, 7) Yěn havīöl havīölnyu inhangnyi pöri minë chööngö, ṙô ngam töhet līpöre, ngaich lööṙen cha-a nö köplōn tö ṙô u, kēkö kaha u inrē. Köplōn inrē cha-a tö minë chööngö ngam Tēv, tö minë lökngörit chööngö inkaha fālen yěn havīölnyu vinënyi minë tökeung ṙô i alaha u.— Lēv. 18:4-22; Chöö. 5:1.

Sitih kinūichö Anū-ö? Haroh tūmö nun minë ṙô tökūichö amat ngam Paipöl tö sā kinūichö tinköökö. Tö sā ngam Salmai, Tinköökö Sòlòmön hēk tö ngam Inrāmöre. Öp chö-öny ngam töhěng tinköökö nö kūichö ngaich havīöl havīölnyu kinūichö min nup tökeung ṙô nö ikāha ngam tinköökö hòn akahakūö yip tarik tö inlahen kinūichö e hēk töp chö-öny e inrē nö kūichö. Lökten yip hamang nö lööṙen kanöpölōn tö u. Kò-òren ngëichkö ṙô ngam Salmai 115:9-11 ngö kinūichö angū-ö: “Ō Israĕl, hayönglenre im Mā Tēv: Anga-aṅ An holṙen cha, lanaklö cha inrē. Ō patī Āròn, hayönglenre yin im Mā Tēv: Anga-aṅ An holṙen cha, lanaklö cha inrē. Yī-ö tö pa-ekūö tö ngam Mā Tēv, hayönglenre im Mā Tēv, Anga-aṅ An holṙen cha lanaklö cha inrē.” Asehkūöre töp tumkökṙô re yěn havīöl havīölnyö ṙô re nö tikök ngam tinköökö ngaich köplōn min anga-aṅ töm tinköökö chaphötre angū-ö inrē nö ellōn ò.

Kūö yòh anū-ö nö kūichö. Hēṙu yin më kamūich ngam Paipöl nö havannyö tīre nö kūich minë töt ṙanāngen ṙô. Tö sā ngam chööngö tö kētu tö Yāvē nö in yik aṅ Israel, tö cha nö sōtu nö kaḵ mahām. Kūö yòh cha-a nö hòṅ ngatī inlahen? Ṙōlheuh anga-aṅ nö löktö in Môsös tī nö kūichhöt minë inlahen. Pön hòṅ fēḵlen cha tö ngam mahām nö minkahngö ngam nômö. Ṙōlheuh anga-aṅ nö löktö in Môsös tī nö kūichhöt minë inlahen. Pön feḵlen cha anga-aṅ tö ngam mahām nö minkahngö ngam nômö. (Lēv. 17:11, 14) Unôichrit e ngaich më tanīnöṙô i Yērūsalem, tö më minṙöinylen nö vë-eny nang yik Kristīön tö cha nö hòṅ rūöhöngre. Ngatī inlahen cha-a nö havannyö minë ṙô imat minë chööngö pön hōten cha nö ṙūöhöngre tö ngam mahām.—Inl. 15:20, 29.

Kò-en nun minë ṙô tö havīöl havīölnyu kinūichö nö imat ngam Paipöl, rö-ö pöri ang Yāvē ngaich nöng tamöl ṙô hī öi höng havīöl havīölnyö ṙô re tö u. Sā ngam ṙô Yēsū, tö hī ‘ötkô öi höng hěngren ṙô yěi vë-ekūötēv.’ (Mët. 6:7) Haköpten hī pöri ang Yēsū tö nup inlahen ṙô hī yěi vë-ekūötēv, nup tö ṙamlōn tī tö Yāvē. (Mët. 6:9-13) Lökten ayī-ö öi ötkô höng hěngren ṙô yěi vë-ekūötēv. Mihôiṅ pöri öi ṙōlheuh ṙô öi havëkökūö ò töp töhěng ṙô yěi vë-ekūötēv.—Mët. 7:7-11.

Sā minë tö vënyu taheūi, inlahen chö-öiny minë tö havīölnyu ṙô nö imat ngam Paipöl. Töhěng kangen pöri anū-ö nö inlahen tī ngam Tökiröng Mahaköphöti nö haköpten hī pön hōten hī öi köplōn tö u.—Isa. 48:17, 18.