CHUMKŪÖṘEN öm më-eṅ tö inlahen vē tarik töngamuh ing panam nöng ngamëichköre? Ngöṙô lōn cha-a töre nöng hòṅ cha-a tökiröngö kamngö nö in yip tahëng, ngaich höng hòṅ cha-a inrē tö minā-av nö inup töng sitih. Pòrô öp tö yòh ṙôken kinë-ekūö cha, ngaich hēk cha-a nö hòṅ pīttö ṙôken taneūngenre. Töng lōntöre yin cha-a vë tö ngatī inlahen tarik, ötrēhěn inrē nö maha-öiny kinë-ekūöre. Ha-ehangen vinënyö nang in tö ngam Paipöl tö hī min öi meuk yip tö ngatī inlahen tarik ip manā-aṅ sakāmö.—2 Tim. 3:2.

Ngatī inlahen yik misī inrē tarik inuk urěh ṙētak. Tö sā hī yěi ngëichkö inlahen nā Ātöm nā Ēva, höng kahngenre cha-a misī nö kē fëslare nö in ngam tölöng hēk tövaich. Lökten töngamuh ayī-ö öi fukhukui töm tötlöng ṙòng ngam inlahen cha. Unôichngöre hēk nö ngatī inlahen ang rācha Usiyā, kētöre anga-aṅ nö föng ngam tö tahusa nö el ngam chūök vinë-ekūö Yāvē, nö la-en yip kūönṙô angū-ö misī. (2 Kin. 26:18, 19) Ngölōn inrē misī yik Feresī hēk tö yik Satukī tö cha nöng hòṅ cha-a tö teūngen tö minë inkòlô lamöktö in Yāvē, kūö cha nö lamöknyö in Aprahām.— Mët. 3:9.

Havīlöng in inrē ayī-ö töngamuh tö më tarik töng famëkö inlahenre hēk tö tailö inrē. Mihôiṅ inrē min ayī-ö öi sāḵngö mufē in cha. Lohten min ayī-ö öi ngö mufē tö hī öi hòṅ kiröngö mineukö tö yip tahëng hēk höng hòṅ ayī-ö tö minā-av inup töng sitih. Hòṅ asup pöri öp inlahen hī yěi sō öi ngatī mufē? Hòṅ urěh ayī-ö öi mikahtökūöre tö ngam mufē Yāvē. Ta-a chěi töi höng lökten in nup i tönët lökngörit chööngö öi mikahtö elmatre.

Höng Yāvē an tö minā-av hēk tö mikahavkūö tö nup tö hòṅ kinë-ekūö hī. Töi chumkūöṙen tö në rīkre inlahen.

•   Yěi ngëichkö ngam el ngam mikūönö, ngaich hòṅ hangenlōn ngam töpihövö kikōnyö tö ngam pīhöre kikānö, ngatī inlahen inrē ngam töpihövö kikānö nö hòṅ hangenlōn tö ngam pīhöre kikōnyö. (Efi. 5:33) Unôichrit ngam inpīhöre inrē minā pamīhöre nöng hangenglōn tö höö. (1 Kòr. 7:3) Hòṅ meukṙen më kūönre inrē minā inyööngö hěnghöre hameuktö ngam hanangenlōnre inrē tö cha. Ngaich më nyīön nö hòṅ hang chööngö minā yöngre.—2 Kòr. 12:14; Efi. 6:2.

• Më aṅ el ngam māṅ prötör sistör hòṅ milēḵṙen cha-a tö më minṙöinylen, pön kalēḵ alaha cha-a nö la-evṙen nö in minë la-en nö chö-öinyten hī. (1 Tös. 5:12) Ötkô pöri min më minṙöinylen nöng vī chööngöre nö ikui më prötör sistör.—1 Pīt. 5:2, 3.

• Yěi ngëichkö më mahayöng ing panam, ngaich hòṅ hameuktö minlēḵṙen re ayī-ö in cha öi kētö minë teks.—Rōm. 13:1, 6, 7.

Urēhngöre tī ang Yāvē nö kē-ěkūö hī tö minë ör kanò-òv hī öi teūngen tö e. Kūö ngam tökööl ayī-ö tarik töngamuh öi teunghu tö ngam kinpaha. (Rōm. 6:23) Kūö ngam töt chanuhuvṙen hanangenlōnre pöri öi teūngen tö minë töpōyen inkòlô lamöktö in Yāvē. (Sal. 103:10, 11) Minë lamöktö in ò inkòlô nö ṙòkhöre anū-ö nö inmeukhtö ngam tökiröng miṙēḵlōn Yāvē ngam töt kanò-òv nö taneūngen hī.—Rōm. 12:6-8; Efi. 2:8.

Laklöre tö minë mufē ngih panam. Lohten min ayī-ö öt akahngenre öi sāngö mufē öi in më tarik ing panam öi ngölōn töre, öi höng hòṅ ayī-ö tö mötlö kinë-ekūö tö minë chehen tö yip tahëng. Angū-ö ṙô Yēsū nö mikahtö elnang hī öi löktö in ngih inchō elmat. Ngöṙô anga-aṅ nö vënyö inlahen öp mākūö ngam panò-òṅ angkūr nö im peuheū anga-aṅ nö havëten yip rīkre tö la-evṙen nö el ngam panò-òṅ. Hō më tö la-evṙen nö hěng tinār ṙôken taneungen. Hēk pöri ngam mahalanṙen nö kē yip rīkre tarik nö la-evṙen nö im la-en. Im lā harap ṙētak kinë-ekūö cha nö minë raneushö cha, ngaich höng ṙòkhöre cha-a nöng hěng tinār ṙôken taneūngen. Ngaich ik sā yik tarik lamöktökūö peuheū nö el ngam tavūöi nö la-evṙen, ngöṙô cha- nö vë-enyre tö cha nö hòṅ möltö ṙôken kinë-ekūö öre tö më töng hěng kanta ṙò-òten mu-unôichrit cha nö la-evṙen. (Mët. 20:1-16) löktö in ngih inchō elmat ayī-ö öi haköptu tö Yēsū, tö hī öi höng hòṅ ṙamlōn öi in nup kinë-ekūöre tö Yāvē.

Ha-öiny kinë-ekūöre, um yahlö maheukkö tö nup lōnre. (1 Tös. 5:18) Mihôiṅ öre ang Pôl nö lōnu töre nö ṙô-òv nö in më prötör sistör aṅ Kòrin nö  hateungngö minë kuilōn ò, hö-ö pöri anga-aṅ nö ngatī inlahen. (1 Kòr. 9:11-14) Ngatī inrē ayī-ö töngamuh öi höng hòṅ ha-öiny minë töng kinë-ekūöre hēk ui höng örheūheu öi lōnu tö yip tahëng nö möltö mat nö ngëichken hī.

Hayāchngöre. Yēḵ ngòh töhěng tak nö mötlö mufē töre tö yip tahëng ngaich mihôiṅ min anga-aṅ nö hòṅ mötlö lōn tö nup kinë-ekūöre tö yip tahëng. Lökten öi hòṅ aṅhav in tö ngam inyāchngö yěi sō-en në tötlöng mufē.

Tövai ang pròfět Tanīěl nö inchō elmat hī nö im inyāchngö. Tökòlô misī ngam mikūönö ò, tövayö mineūkö inrē anga-aṅ, tö īnu tö mikah hēk pōyen aṅ in inrē tö minë heuneū-en. Öthěng anga-aṅ nö ngö mufē tö ngam taneūngen ò mināv-av ò nö mööḵlö taneūngen anga-aṅ tö yip tahëng. (Tan. 1:3, 4, 19, 20) Īnu pöri anga-aṅ tö ngam inyāchngö töp lökten Yāvē nö pōiṙāi mat ò.—Tan. 2:30; 10:11, 12.

Ta-a chěi ui asīnken më tarik ing panam töng lōntöre hēk tö tāilölōn inrē. Pöi hòṅ ṙamlōn in nup töng aṅ in re köpölōn tö u nöng lamöktö in ngam tökiröng miṙēḵlōn Yāvē anū-ö.