Ōt yip Kristīön yamūs minë tufömngöre talöökö tī samööm mësēch yěn hòṅ vë-ekūö yip aṅ patī re hēk hol re inrē vamë-eny. Hang ṙô ngih inlēnö pöri min ngòh tö akaha Kristīön: “Hayunngöre ön ngòh tarik tö akaha yěn meuk kanihgen, iṙūöhöröön pöri ngòh töt akaha ngaich palā-aiṙen.”—Inch. 27:12.

Hòṅ laklen hī ang Yāvē tö nup kanihngen. Öt hanôl yip tarik in yip töt ṙamlōn nö meuk ngam hinëngö hī, yip tö ha-uknyu inrē, hēk yip kamumtö tö nup tövaich inköphöti. (Rōm. 16:17; 1 Kòr. 5:11; 2 Yôhan 10, 11) El ngam māṅ yip min umuh hēk yamihtökūö nö el ngam māṅ inrē nö kò-òren, nö töt uroh nö vāyö tinrīken. (2 Tim. 2:20, 21) Hòṅ köplōn ayī-ö tö u yēḵ hī hòṅ vī holre. Pöi öt uroh keuheūtlöre mikah kūö tö tinrīken cha öi löktö in minë ëp samöömkö mësēch, töp tömihôiṅ nö hol hī hēk töp tötkô.

Mötlö hēk öi hòṅ akaha yěi hamūlhötre el nup tökiröng mësēching krup. Tö sitih inlahen yip tarik el ngam krup, löng öi min yěi hanôlö cha, ṙën in ngatī ṙô pön ōt ngaich tö pala-aiṙen tö kūö tö ngatī. Höichngen yěn kirööngen takô yip prötör sistör nö el ngam krup. Pöi ötkô keuheūtlöre mikah kūö min tö cha tö minë tinrīken cha inrē nö im ṙô ngam Tēv. Ngö ṙô an ngam Salmai tö 26:4: “Rö-ö chin ūichhak holtöṙah tötöl: öt rēhĕn chin holröön mahanyatkö elmat kiröönngöre.” Lökten yěi hòṅ laköre tö yip tö ngatī inlahen. Öt vai hòng angū-ö yěi höng sööm mësēch yip töng mikah kūöre?

Pôrò inrē nö töng kun öp mësēch krup sön öi höng hòṅ akaha, hòṅ ngëichkö rò-òten re ngòh Kristīön tarik nö kūich hēk vë-ekūö minë mësēch. Pön mihôiṅ min anū-ö nö yëngentī tö ṙētak hī. Ngö ṙô ang Pôl nö fēḵlen Timôtī nö vënyö inlahen yip tarik “töng ameūkö töng yô-òv, tamūölngö ṙô, hēk kamhòkkö nup töt ṙô cha öre.” (1 Tim. 5:13) Ngaich mihôiṅ min tarik töngamuh nö ngatī inlahen nö yūs minë ëp nö sööm mësēch.

Ngaich öthō min ngòh tö akaha Kristīön nö ngatī inlahen nö sööm mësēch nö hachōichngö minë-eny yip hol maneukre. (Sal. 15:3; Inch. 20:19) Öthō min cha-a inrē nö vë-ekūö nup tö ngatī mësēch. (Efi. 4:25) Mihôiṅ in höng ngëichken minë prōkrām el ngam JW Pròtkasting më-el ngam jw.org vepsāit minë tö kaheuk chingëṅt inmeuknyi söö yěi meūkö u pön tökô-en minë tö vënyu ripōt nö imat u.

Ōt yip prötör sistör yamūs minë ëp nö havahkö nup chehen, hēk kētö kinmānö yip tahëng inrē. Vënyö inlahen nup chehen inrē cha-a nö löknyö el minë ëp. Halēnö hī an ngam Paipöl nö ngö ṙô “Ui aṅhaṅv in tö hanangen tö rupīö.”—Hep. 13:5.

Ngaich sitih inlahen min yěi yūs minë ëp öi hamūllö rupīö nö inyööken yip hol hī töpala-aiṙen? Kūö hī öi hòṅ hayööken yip hol maneukre pöi hangenlōn tö cha. (Yāk. 2:15, 16) Yēḵ hī pöri min ngatī inlahen ngaich mihôiṅ min minë tangatī inlēnlö inyööken töngam mupākö òfis hēk tö më minṙöinylen el minë māṅ nö pasū tö tī hī. (1 Tim. 5:3, 4, 9, 10, 16) Ötkô in ayī-ö ngatī kahëken yěn öt hakeun löng anū-ö nö el ranôṙö hī.

Hòṅ kēken nup taṙòkhöre ayī-ö la-en nö nöönyö ngam Tēv. (1 Kòr. 10:31) Lökten in hòṅ chumkūöṙen öi im yinūsö minë ëp samööm mësēch tö minë ṙòng u inrē ngaich sitih inlahen min öi hīnöre tö u.