1-2. Achīö öp tö mihôiṅ nö hayööken ngam mahaköp Paipöl nö kēḵ ngam vinôkö?

HĚNG TAK öp i aṅ Fichī tö Emi minë-eny ngö ṙô anga-aṅ: “Ṙamlōn chin pò chu öich mikahtökūöre tö ṙô ngam Paipöl, akahakūö chin tö e nö angū-ö kanô-en. Ik sā chu pöri öich kē-ěny ṙētak re öich hanòl yip prötör sistör, ngaich halööktit minë tinrīken re chu-ö ngaich möl öich kēḵ ngam vīnôkö.” Ngam ṙô Emi haköplu in ayī-ö öi in e, yēḵ hī aṅ el ngam Māṅ öi prötör sistör hòṅ hayööken öp mahaköp ayī-ö: ngaich mihôiṅ min anga-aṅ nö kētöre nö kēḵ ngam vinôkö.

² Ṙòkhöre in ayī-ö pöplisör öi hayööken ngam Māṅ. (Efi. 4:16) Hěng tak ök ihih painīör mi-iyöng Věnu-atu tö Lënani minë-enyi, “Ngö ṙô anga-aṅ:, Ngam inruklö ngòh nyiö ṙòkhöre më aṅ ngam tuhět nö tī-ivö tö ngòh nyīö nö kiröng. Ngatī inrē ngih la-en mahaköphöti. Ṙòkhöre in öi aṅ el ngam Māṅ öi tī-ivö tö ngòh töhěngtak tarik nö yih nö el ngam kanô-en.”Ngatī inlahen inrē ayī-ö öi halēn ngam mahaköp mat ngam Paipöl, hangönkö alaha ò inrē, tövai inrē öi inchōḵ elmat ò. Löktö i inyööken re min anga-aṅ kū-ö urěh nö kēḵ ngam vinôkö.—Inch. 15:22.

3. Minë ṙahônyö hē Ena, Tēni-el Hēk Lënani, asup öp haköplö hī öi in e?

³ Yěn hěng tak öp pöplisör kamë Paipöl istötī ngaich yip prötör sistör nö hòṅ hayööken ngam mahaköp, ngaich hòṅ sitih inlahen ngam pöplisör? Ta-a chěi töi hangihtö ṙô vē painīör nö sitih ṙô cha-a. Hěng tak ök i Ispesöl Painīör aṅ Moltōva ang Ena ngö ṙô anga-aṅ: “Yēḵ ngam mahaköp nö halöktīt re öt kô më-eṅ öm höng hěng tak öm hayööken ò.” Ngatī ṙô ök i hēk Ispesöl Painīör ang Tēni-el ök mö i kamngö e, “Hēru yip ṙung prötör sistör nö lökngöre ellōn tī tö ngam  mahaköp tö nup ṙô re hēṙu chū-ö ṙung öt afēken u.” Ngö ṙô ang Lënani, “Meuk ngam hanangenlōn më prötör sistör ngam mahaköp ngaich lökten in e anga-aṅ nö akahakūö tö cha nö tarik ngam Tēv Yāvē.”—Yôh. 13:35.

4. Asup min haköplö hī öi in ngih ātiköl?

⁴ Mihôiṅ man min ngö mufē, ‘Sitih inlahen öich min hayööken ngam mahaköp yēḵ ò nö öt tö kē-ě istötī chu?’ Ta-a chěi töi mikahtökūöre yēḵ hī öi havëka öi hol kamë istötī hēk yēḵ ngam mahaköp nö chuh el mīting ngaich hòṅ sitih inlahen ayī-ö öi hayööken ò. Mikahtökūöre inrē min hēk ayī-ö tö inlahen vē minṙöinylen nö sitih inlahen nö hayööken ngam mahaköp nö kēḵ ngam vinôkö.

5. Yēḵ meh holröön öp kamë istötī ngaich hòṅ sitih inlahen më-eṅ?

⁵ La-en ngam mahaköphöti an ngam inköptö ngam mahaköp mat Paipöl. Yěn hěng tak pöri öp prötör hēk sistör mahavëten hī öi holröön ò nö kēḵ istötī öp tufömngöre ngaich hòṅ hayööken ò ayī-ö. (Mum. 4:9, 10) Hòṅ sitih inlahen öi min kò-òren hòn yöölen öp kamë istötī töp tufömngöre inrē?

6. Sitih inlahen öi min öi kēkö kaha ngam chööngö in ngam inchōḵ-oṙô 20:18 yěi kē istötī?

⁶ Halēn ngam Paipöl istötī. Urēhěkūö meh chuh im kinë-e ngam istötī hòṅ mikahtökūöre më-eṅ tö inlahen ngam tö haköptu. (Vë-evkūö Inchōḵoṙô 20:18.) Mihôiṅ man öm hatön öp kamë istötī tö inlahen öp tö haköptu: “Tö iṙēḵtī öp? Asuh öp ṙinātö ellōn ò? Achīö yip el ngam mikūönö ò? Asuh öp kui öp haköp ò? Asup min haköptö meh in ngam istötī? Asuh nup tö hòṅ ṙônyu tö meh in ngam istötī, asuh nup töt kô nö ṙônyu? Sitih inlahen öm min hareuskö alaha ò?” Hö-ö öp min kamë istötī nö keuheut nyöre ṙô nö vë-eny inlahen öp mahaköp nö in meh. Ngaich öp vahë-eny ò pöri nö in meh ngaich hòṅ ngatī inlahen tī min më-eṅ öm hayööken öp mahaköp. Vë-eny inlahen re öp ihih kananö hī ang Chôi yěn holuröön tö yip töng hamòlröön ò nö kēḵ istötī, anu-ö në kahakkö ò min nö in cha, ngö ṙô anga-aṅ: “Yip hamòlröön chu prötör sistör löktö in e mikahkūö cha-a tö inlahen öp mahaköp ngaich lööngö tī nö hayööken ò nö in ngam istötī.”

7. Yēḵ meh öm havëka holröön öp kamë istötī, ngaich kūöyòh më-eṅ öm urēhěkūö e öm hòṅ halēn öp istötī?

⁷ Yēḵ meh öm havëka holröön öp kamë istötī ngaich hòṅ halēn ngam tö vë-evkūö më-eṅ. (Esrā 7:10) Ngam kahakkö hī taheui ang Tēni-el ngö ṙô anga-aṅ: “Yip prötör sistör yěn urēhěkūöre cha-a nö halēn minë Paipöl istötī ngaich ngönlöre alaha ngam tö haköptu töchu.” Yēk meh halēn öp istötī hēk öp holröön meh inrē yěn halēnö e ngaich lökngöre min ngam tö kē-ě istötī, ngaich yēḵ meh öt ṙētakvö pöri öm halēn ngam istötī  ngaich kò-òren öm höng ngëichkö minë tö kiröng pòëṅt.

8. Hòṅ sitih inlahen öm më-eṅ hòṅ ngam mahaköp mat Paipöl nö lökngöre tö öp ṙô meh öm vë-ekūötēv?

⁸ Alaha ngam inköptö mat ngam paipöl ön ngam vinë-ekūötēv. Lökten me-eṅ öm hòṅ kööpölōn yēḵ meh öm tölööṙô öm vë-ekūötēv ngaich asuh min öp ṙahònyö meh yěm vë-ekūötēv hòn lökngöre ellōn min ngam tö haköptu. (Sal. 141:2) Mi-iyöng chapan ök ihih tö Hanāi minë-enyi kööpölōn chin tö nup vinë-ekūötēv inlaha ṙô öp sistör. Ngö ṙô anga-aṅ: “Löktö im vinë-ekūötēv chu-ö öich akahaiṙen tö ò nö ngön ngam innôlö ò nö in Yāvē. Hòṅ sā ò chin chu-ö. Yēḵ ò nö kēḵ minë-eny chu nö in ngam vinë-ekūötēv ngaich ṙamlōn chu-ö.”

9. Sā ṙô ngam Yāköp 1:19, sitih inlahen öm min yěm holröön kamë istötī?

⁹ Holṙen ngam kamë istötī man. Hěng tak ök ihih ispesöl painīör aṅ Naichiriā, ngö ṙô anga-aṅ “Akahakūö ön ngòh hamòlṙen ngam kamë istötī tö ngam inköphöti nö la-en ngam mahaköphöti, öt pōyen ṙô anga-aṅ el ṙētak ngam istötī yěn ōt nup ṙô tö hòṅ urööḵṙen ngaich möl anga-aṅ nö ṙô-òv.” Ihē öm akahalōn tö öp ṙētakṙô re öm ṙô-öv? (Inch. 25:11) Yēk ngam mahaköphöti tö ngam mahaköp, yěn ṙònghöichṙô cha-a nö vë-ekūö re hangih tö ṙô cha më-eṅ. (Vë-evkūö Yāköp 1:19.) Hē-e min më-eṅ öm akahakūö töre öm ihē öm ṙô-övö. Lökten më-eṅ öm hòṅ afītöre tö nup ṙô ò, hòṅ meh min öm öt pōyen ṙô ngaich yēḵ ngam mahaköphöti nö ṙòngmö mikahtö elnang ngam mahaköp. Ngaich yēḵ meh öm höng kaknyöre öm ṙô-öv ngaich mihôiṅ min ngam tö kiröng pòëṅt nö chatngen, harīkngöre ṙô min më-eṅ inrē tö ngam tö kakkö pòëṅt, mihôiṅ me-eṅ öm rahëichyen ṙô tö nup inchōḵelmat. Ngaich mihôiṅ öm hatöönö ò hēk mihôiṅ öm rahëichyen ṙô öm ṙô-öv ngaich yöölen min anga-aṅ. Hēṙu man ṙung öt chuökuṙô öm kakkö ngam kui ngam haköp ò, sön pöri me-eṅ öm mihôiṅ öm vënyö ngam ṙanamlōn re tö ò nö haköp ṙô ngam Paipöl, hòṅ ò min nö teungen tö ngam inreuskö alaha re.

10. Yēḵ öp mahaköp nö hang minë ekspīriön meh, asuh öp min yanöölen ò?

¹⁰ Vënyö minë ekspīriöns re. Vë-eny nang ngam mahaköp man töre öm sitih inlahen öm teūngen tö ngam kanô-en. Asuh nup kanihngen yamih lamākūö meh. Ngaich sitih inlahen ang Yāvē nö hayööken meh? (Sal. 78:4, 7) Yěn hang ngam ekspīriöns meh ngam mahaköp ngaich ngönlöre ngam ṙinātö ellōn ò min ngaich mihôiṅ min anga-aṅ nö kētöre nö im vinôkö. Ngaich yēḵ ò min nö hang minë ekspīriöns meh ngaich akahakūö min anga-aṅ tö inlahen re nö sitih inlahen nö la-al minë kanihngenre. (1 Pīt. 5:9) Hěng tak ök ihih aṅ Prachil Kēpriel minë-eny tö hěng tak nö  painīör, fēkö ngam inlahen re anga-aṅ ik sā ò nö ṙòngmö istötī ngaich asuh öp mahayööken ò. Ngö ṙô anga-aṅ: “Yēḵ chu hang ekspīriön më prötör ngaich akahakūö chu-ö tö Yāvē nö akahalōn tö hī öi la-al minë kanihngen re, ngaich yěn ngatī inlahen yip prötör sistör chu nö la-al minë kanihngenre ngaich mihôiṅ inrē min chū-ö tö u.”

11-12. Kūöyòh öi holtö hanangenlōnre öi ha-öny tö yīhi ngam mahaköp mat Paipöl yěn yihtökūö nö el mīting?

¹¹ Hòṅ örheuheū ön nö yihtökūö ngam mahaköp nö el mīting, ngaich mihôiṅ min anga-aṅ nö kēḵ ngam vinôkö. (Hep. 10:24, 25) Rö-ö ön ngam kamë istötī ò pòn anga-aṅ mahavëten ò nö yihtökūö nö el mīting, mihôiṅ pöri ayī-ö ṙòkhöre hareuskö alaha ò yēḵ ò nö yihtökūö nö el mīting. Hòṅ asup inlahen hī hòṅ ò nö örheuheū nö yihtökūö nö el ngam mīting?

¹² Holtö hanangenlōnre ha-öny tö yīhi ngam mahaköp. (Rōm. 15:7) Yěn yihtökūö ngam mahaköp nö el mīting, ngaich hòṅ ha-öny tö yīhi ò ayī-ö, hòṅ hameuktö ṙanamlōn re inrē in ò. Hòṅ hangihtö ṙô ò ayī-ö ngaich mikahtökūö ò inrē tö yip tahëng. Öt kô öi ngö lōn höng ngam kamë istötī ò ön min mumkahtö kūö ò tö yip tahëng. Hòṅ hangihtö ṙô ò ayī-ö ngaich mikahtökūö ò inrē tö yip tahëng. Öt kô öi ngö lōn höng ngam kamë istötī ò ön min mumkahtö kūö ò tö yip tahëng. Töi hangihtö ṙô öp ihih hol maneuk re ang Tīmitrī. Ngaich ön nö kamë ngam vinôkö ngaich öp tö ngamuh nö im la-en Mahayööken Töla-evṙen. Vë-eny inlahenre anga-aṅ nö ngö ṙô: “Ik sā raneh van chu öich chuh el mīting ngaich piyu-en chū-ö öich chuh el ngam Patī Pūlngö. Ngaich hěng tak ngaich ök prötör mameūkö chu, ngaich chuh in chu anga-aṅ ngaich havëhöt chu öich chu latuhět. Ōt re inrē yip umuh tö vayö ṙô nö vë-ekūö chu. Meuk ngam hanangenlōn cha chū-ö nö i hôi cha ngaich ṙamlōn chū-ö. Pô chu möl öich meuk tö ngatī.”

13. Asup min ṙinātö ellōn ngam mahaköp yēḵ ò nö meuk nup tövai tinrīken meh?

¹³ Tövai man öm inchōḵokūö. Yěn meuk nup tövai tinrīken meh min ngam mahaköp ngaich ṙatö ellōn re min anga-aṅ tö nup haköpre tö u nö kanô-en. (Mët. 5:16) Ngö ṙô ök Vītali: “Röhta maheuk chin öich ngëich ken yip prötör sistör aṅ el ngam Māṅ öich ngëichken minë mufē cha, hēk minë tinrīken cha inrē. Löktö in e ṙinātö ellōn chū-ö tö e nö angū-ö tökô-en tinlööken.” Ngaich ön tö ngamuh Vītali nö kēkö ngam la-en painīör nö i Moltōva.

14. Yēḵ meh öm tövai inchōḵ elmat ngaich asup min yanöölen ngam mahaköp mat Paipöl nö meuk nup inlahen meh?

¹⁴ Yěn hòṅ kēḵ ngam vinôkö ngam mahaköp  ngaich hòṅ asinken minë haköp re anga-aṅ. Öt tö löören ön angū-ö. Ngaich yēḵ ò pöri nö meuk inlahen meh öm asā minë tinrīken minë chööngö lamökngörit ngam Paipöl ngaich yöölen më-eṅ tö u ngaich öthō min anga-aṅ nö ngatī inlahen. (1 Kòr. 11:1) Töi chumkūöṙen chěi tö inlahen Hanai ngam tö urěh vinë-eny taheui. Ngö ṙô anga-aṅ: “Haköplu chū-ö i mat ngam Paipöl tö hī öi hòṅ hangenlōn tö yip holre, hareuskö alaha cha inrē hēk holtö ellōnre öi aṙēlen cha. Kôta mat chin öich meuk inlahen yip prötör sistör. Örheuheū cha-a inrē nö ṙô tö nup tavai inlahen yip tahëng. Löklö in e chū-ö öich yöölen öich asīnken cha.”

15. Sā ṙô ngam Inchōḵoṙô 27:17 kūöyòh öi hòṅ urööṙen öi hanôl yip mahaköp?

¹⁵ Vī yip mahaköp man nö holre. Yēḵ ngam mahaköp nö örheuheū nö yihtökūö nö el mīting, ngaich hameuk tö ngam hanangenlōnre më-eṅ öm in ò. (Filip. 2:4) Ngaich hatöönö ò më-eṅ nö tö inlahen kinëken ngam istötī ò, sitih inlahen yip aṅ ngam mikūönö ò hēk sitih inlahen öp kinmanö ò. Öt kô nup intöönö nö arě-ēv tī tö ò. Yēḵ meh öm vë-ekūö ò ngaich mihôiṅ min öm vī-i ò nö holre ngaich hayööken ò inrē min më-eṅ nö kēḵ ngam vinôkö. (Vë-evkūö Inchōḵoṙô 27:17.) Ngaich öp tö ngamuh Hanai nö painīör. Ngö ṙô anga-aṅ ik sā ò nö chuh el mīting: “Pōyen ngaich yip hanôl chu prötör sistör. Kuchik löreṙen ngaich chū-ö öich chuh el mīting. Sön chū-ö öich höng yihtökūö el mīting pòrô öich larā ing sā chu öich teungen tö vē tö tufömngöre holre ngaich ṙangen yik holre chū-ö urěh yip töt maha-öönyö Yāvē. Lōnu chū-ö tö ngam innòlöre nö ngönlöre nö in Yāvē hēk in yip prötör sistör. Lökten ngaich chū-ö kēḵ fëslare öich kēḵ ngam vinôkö.”

16. Sitih inlahen öm min hayööken ngam mahaköp nö nòlhöt nö el ngam Maṅ?

¹⁶ Yēḵ ngam mahaköp nö halööktīt minë tinrikenre ngaich fēḵlen ò më-eṅ tö ò nö alaha ngam Māṅ. Mihôiṅ më-eṅ öm havëten ò nö i patī re ngaich kē-ěny ṙētak re in ò. (Hep. 13:2) Tēnis öp tö la-evṙen tö ngamuh nö i Moltōva nö ngö ṙô anga-aṅ: “Ik sā ai tö pihöre i kēḵ istötī, ngaich örheuheū cha-a nö havëten ai chuh patī. Ngaich vë-eny inlahen re cha-a nö sitih inlahen ang Yāvē nö hayööken cha. Ngaich kētö inreuskö alaha ai cha-a. Ngaich ik sā ai hang minë ṙô cha yihtöre ellōn ngaich ai hòṅ kētöre im linöökö lōn Yāvē, in e ṙinātö ellōn ngaich āyö töre teūngen tö ṙanamlōn re yēḵ ai min löklōn ò.” Yēḵ ngam mahaköp ngaich min nö pöplisör ngaich mihôiṅ öm holröön ò nö ahanga. Hěng tak öp ihih aṅ Prachil ang prötör chiyeko ngö ṙô anga-aṅ: “Pōyen yip prötör ngamô-ò chu öich chuh el inhangkö tölöök inhānga. Pōyen haköplö inrē öich in  cha. Ngaich ngönlöre ngam innôlö chu öich in Yāvē Yēsū inrē.”

17. Sitih inlahen yip minṙöinylen nö hayööken öp mahaköp?

¹⁷ Hòṅ kē-ěny ṙētak re man in yip mahaköp. Hòṅ hameuktö hanangenlōn re yin vē minṙöinylen nö in yip mahaköp. Ngaich mihôiṅ min cha-a nö kēḵ ngam vinôkö. Ngaich yēḵ yip mahaköp nö hachônglö këlre nö kētö sanap ṙô ngaich hòṅ kēḵ minë-eny cha ayī-ö. Ngaich ṙamlōn min cha-a. Yī-ö minṙöinylen, mihôiṅ öm kē-ěny ṙētak re öm holröön yip prötör sistör öm in cha öm kēḵ Paipöl istötī? Yöölen min öp mahaköp nö löktö in e. Hěng tak öp ihih painīör sistör hī ang Chëki aṅ Naichiriā ngö ṙô anga-aṅ: “Pingangkūö yip mahaköp yēḵ chu öich holuṙöön tö yip minṙöinylen öich kēḵ istötī. Hěng tak ök mahaköp tö ngö ṙô, ‘öt hěng van yip pastör nö chuh patī chu. Pòn höng chuh patī yip tökôlò anga-aṅ yip kamëtö rupīö ò!’” Ngaich öp töngamuh mahaköp nö hol tö yip mikūönöre nö chuh el mīting.

18. Sitih inlahen yip minṙöinylen nö hateung ngö ngam la-enre sā ṙô ngam Inlahen 20:28?

¹⁸ Hayööken yip pöplisör Nö Kēḵ Paipöl istötī ngaich hareuskö alaha cha. La-en yip minṙöinylen an ngam inyööken yip prötör sistör nö in ngam inhanga hěk im kinë-e istötī. (Vë-evkūö Inl. 20:28.) Yēḵ öp holröön meh nö aṙē-ěv nö kēḵ istötī, ngaich mihôiṅ öm më-eṅ kamë istötī. Ngö ṙô ök Chëki: “Örheuheū yip minṙöinylen nö hatönken yip mahaköp nö in chu. Ngaich yēḵ chu öich kihngen ngaich harunten chu cha-a.” Mihôiṅ yip minṙöinylen nö hareuskö alaha yip prötör sistör kamë istötī, mihôiṅ nö ha-öönyö cha inrē hòṅ cha nö ngönlöre. (1 Tös. 5:11) Ngö ṙô ang Chëki: “Yēḵ yip minṙöinylen nö ngö ṙô tö chu öich vayö la-en ngaich ramlōn chū-ö. Sā tö kě-ēvkūö chū-ö töp tö ufov mak öich el ṙanāchö.”—Inch. 25:25.

19. Asup löktö ngam ṙanāmlōn hī?

¹⁹ Pôrò öi öt aṅhav in tö istötī re sön pöri öi mihôiṅ öi hayööken öp mahaköp nö kēḵ ngam vinôkö. Yēḵ hī holröön öp kamë istötī ngaich hòṅ lēn ayī-ö. Hòṅ vai nup ṙô hī öi ṙô-ôv hòṅ òn reuslöre alaha. Yěn yīhtökūö anga-aṅ nö el mīting ngaich hanôlö ò, hēk vai inrē öm inchōḵ elmat ò. Mihôiṅ yip minṙöinylen nö kēḵnyö ṙētakre nö hareuskö yip kamë istötī, ngaich harunten cha. Kò-en ngam māṅ nö tī-iv vö tö ngòh tö hěng tak tarik nö yih nö im kanô-en ngaich ṙôkhöre ayī-ö öi teungen tö ngam ṙanāmlōnre.