1. Asuh nup mihòiṅ kanihngen la-al yip tarik ngam Tēv Yāvē?

ŌT HÒNG kanihngen meh? Ōt lohten yip prötör sistör aṅ el ngam Māṅ tö haṙivlōn tī tö meh. (Yāk. 3:2) Hēk yip aṅ el Iskul meh mahaköp hēk mi-ichūök meh la-evṙen nö hayë-e meh pöm Vamënyen Yāvē. (1 Pīt. 4:3, 4) Hēk yip aṅ patī meh nö asökngen meh chuh el mitīng hēk ahang kö ngam tölöök inhānga. (Mët. 10:35, 36) Yěi yīhivö ṙung tö nup tökiröng kanihngen, ngaich chöngṙen ṙung öi öt kô la-al u. Kööpölōn pöri, öp töng yòh kanihngen, hayööken meh min ang Yāvē. Kētö ngam mikah hēk kumlēḵ meh min anga-aṅ öm la-al u.

2. Sā ṙô ngam Rōma 15:4 asūp min yanöölen hī yěi haköp mat ngam Paipöl?

² Kūich höt inlahen yip tarik imat ngam Paipöl ang Yāvē yip tö īnu tö manööyö hē el ṙētak kanihngenre. Kūöyòh anga-aṅ nö kūichhöt inlahen cha? Hòṅ hī öi haköplu in cha. Angu-ö ngih ṙô tö kūichi nö löktö in Pôl. (Vë-evkūö Rōma 15:4.) Teūngen in tö inngëkö alahare hēk inreuskö alahare yēḵ hī haköp inlahen cha. Öt kô pöri öi höng haköp. Pön nup haköp hī tö lökngöre tī tö minë mufē hī hēk el kūilōn hī. Yēḵ meh la-al nup kanihngen ngaich hayööken meh min në tö fën pòëṅt (1) Vinë-ekūötēv, (2) Asehkūöre, (3) Fēken nup haköpre, hēk (4) Kēkö kaha nup haköpre. In ngih ātiköl in min kakkö ngam inlahenre öi sitih inlahen öi kēken u. * Mikahtökūöre hēk min ayī-ö in në tö fën pòëṅt nö sitih inlahen nö hayööken hī öi kēḵ haköplöre öi in minë tinrīken nā Rachā Tāvit hēk Pôl.

3. Hòṅ asup la-en meh urēhěkūö meh öm haköp mat ngam Paipöl, ngaich kūö yòh?

 ³ (1) Vë-ekūötēv. Yēḵ meh haköp mat ngam Paipöl vë-ekūö Yāvē më-eṅ öm vë-ekūötēv hòṅ meh yöölen tö nup haköpre. Yěn ōt kanihngen meh, ngaich havëkö inyöökenre më-eṅ in Yāvē öm teūngen öm chöh nup chööngö lamökngörit ngam Paipöl hòṅ meh öm la-al nup kanihngenre.—Filip. 4:6, 7; Yāk. 1:5.

4. Sitih inlahen öm asehkūöre öm fēkö yip tarik aṅ mat ngam Paipöl tö nup inlahen cha?

⁴ (2) Asehkūöre. Kētö heuneu-en hī an Yāvē öi asehkūöre. Yēḵ meh öm haköp inlahen öp tö hěngtak tarik, mihôiṅ meh öm aseh kūöre tö inlahen ò, asup nup aṅ chīṙö-ò, hēk sitih mufē anga-aṅ, sā ṙēngen öp nyat öp tarik tö halöinyköre min angu-ö nö ellōn meh.

5. Asup manah ngam infē-a? Ngaich hòṅ asuh nup hatön meh yēḵ meh fē-a?

⁵ (3) Afēkö. Ngam manah ngam infē-a, nup haköp meh ngaich hòṅ chumkūöṙen më-eṅ öm fēken u ngaich hòṅ akahakūö meh töp yanöölen meh löktö in ngam haköpre. Mihòiṅ man öm fēken minë haköpre öm hamūlten nup tufömngöre öm in nuk tö urěhngöre haköpre. Ngaich siöplöre min ngam mikah meh. Yēḵ meh öt fēken nup haköpre, höng sā ṙēngen mahalēn nup hol nya-aṅ kūö min më-eṅ, öl pöri öm vīlen u. Mihôiṅ öm hatöönö re yēḵ meh fē-a ‚‘Sitih inlahen öp ihih tö vënyu nö la-al ngam kanihngenre? Sitih inlahen ang Yāvē nö hayööken ò? Hēk asup haköplö chu inrē öich i inlahen ngòh tö vënyu?’

6. kūöyòh öi hòṅ kēkö kaha nup haköp re?

⁶ (4) Kēkö kaha u. Ngöṙô ök Yēsū yěn ōt töt kamëkö kaha nup haköpre. sā ṙēngen öp vamī patī re anga-aṅ nö ikūö kuyāyö. Ṙòkhöre nöng yanëngen ngam inlahen ò nö i vīni-i patī re pòn hëmngö min ngam patī ò tö kūö kumlēḵ kuföt hēk ṙanööingö inrē. (Mët. 7:24-27) Ngatī inlahen, yēḵ hī vë-kūötēv, aseh kūöre, fēkö nup haköpre ngaich öt kēkö kaha u pöri nöng yanëngen hī min anu-ö. Pòn yěn ōt min inkihten meh hēk kanihngen meh ngaich öt köp min ngam ṙinātö ellōn meh, yēḵ meh pöri kēkö kaha nup haköpre ngaich lööngötī min më-eṅ öm kēḵ fësla re, teūngen tö lanāmö elkuilōn re, hēk ngön min ngam ṙinātö ellōn meh. (Isa. 48:17, 18) Tā-a chěi töi chumkūöṙen ngëichkö inlahen Rachā Tāvit. Ngëichkö minë tö fën pòëṅt inrē nö sitih inlahen nö hayööken hī öi kēkökaha nup haköpre.

7. Inchōḵ elmat chīö öp ihih min tö ngëichka tö hī imat ngam Paipöl?

⁷ Ōt hòng hol meh hēk hol maneuk meh tö haṙivölōn tī tö meh öm hěng höre lakūki ellōn tö tī ò? Ngatī inlanken ök inrē Rachā Tāvit nö hachīlö tö öp kūönre Apsalem, hēk hòṅ kēḵ öp chūök ò anga-aṅ nö hayöng.—2 Sa. 15:5-14, 31; 18:6-14.

8. Asup ṙô meh vë-kūötēv öm vë-ekūö Yāvē?

⁸ (1) Vë-ekūötēv. Chumkūöṙen më-eṅ öm fēkö ngam inlahen Tāvit öm vë-eny ṙô elkūilōn re hēk kanihngen re öm in Yāvē öm sitih inlahen mufē tö u. (Sal. 6:6-9) Ngaich havëkö inyööken re më-eṅ. Hòṅ meh teungen öm chöh nup chööngö lamökngrit in ngam Paipöl öm la-al minë kanihngen re.

9. Rahëichyen ṙô man vë-eny inlahen nā Tāvit nā Apsalem?

⁹ (2) Asehkūöre. Asehkūö re man tö mufē Rachā Tāvit hē e. Sitih mufē ök hē e tö lōn meh. Samyeūheuv rò-òten ang Absalom nö holtö mana-anyre nö hòṅ mihòiṅ  nö tūökngö ellōn yik tarik. (2 Sa. 15:7) Ngaich kēḵ öp tölöng ṙētakre anga-aṅ nö tīnten yik mahayun nö chuh Israel pön lōnu anga-aṅ tö yip tarik nö rāchavö lōn tö ò. Lā in re tī inrē ang Apsalem tök hol Tāvit hēk chūök ṙinatö ellōn ò ang Ahitopēl. Ngaich vë-eny re inrē anga-aṅ nö rācha hēk vī inlahen re nö hòṅ fëlngen Tāvit. (Sal. 41:1-9) Akahalōn ang Tāvit tö ngam finëlngöre ngaich falngöre anga-aṅ nö ṙa-ang Yērusalem. Kiyung ngaich yik tarik alaha Apsalem tö yik tarik Tāvit. Öt mihôiṅ pöri ngaich yik tarik Apsalem.

10. Asup öre tö mihôiṅ nö inlahen Rachā Tāvit?

¹⁰ Aseh kūöre man nö sitih mufē ang Tāvit. Hangenlōn anga-aṅ tö ök kūönre Apsalem hēk ṙatö ellōn re anga-aṅ nö in ök holre Ahitopēl. Nët tak pöri cha-a nö hachīlö ò nö hòṅ fëlngen ò. Mihôiṅ öre nö hö-övö ngam ṙinātö ellōn Tāvit nö in yip tahëng. Mihôiṅ öre inrē anga-aṅ nö katööngalōn nö ikui cha nö holṙen Absalom. Ngaich yěn lōnu anga-aṅ ngaich mihôiṅ nöng fēken re nöng hěngtak nö falngöre nö laklöm nômöre. Hēk mihôiṅ nöng haṙivlōn. Hö-ö pöri anga-aṅ nö ngatī inlahen pön la-al minë kanihngenre nö holtö öt pinhë-ekūöre. Kūöyòh anga-aṅ nö mihôiṅ nö ngatī inlahen? Ta-a töi ngëicha.

11. Sitih inlahen ang Tāvit nö la-al nup kanihngenre?

¹¹ (3) Afēkö. “Sitih inlahen ök Tāvit nö nö la-al minë kanihngenre?” Öt vöö ök Tāvit hēk öt veut alaha inrē nö kēḵ fësla re. Öt heūlngöre inrē anga-aṅ tö kūö vanööṙöre Pön havëkö inyöökenre anga-aṅ nö in Yāvē. Kēḵ inyöökenre inrē anga-aṅ nö in yip holre. Ngaich öp mufē ò ilööṙen anga-aṅ nö kē-ělkūö alahare. Pòrô ök Tāvit nö haṙivlōn, ngaich öt inu pöri anga-aṅ tö kumnyah lōn. Höng iṙūöhen anga-aṅ nö ṙatö ellōnre nö in Yāvē hēk in yip holre inrē.

12. Sitih inlahen ang Yāvē nö hayööken Tāvit?

¹² Sitih inlahen ang Yāvē nö hayööken Tāvit? Yēḵ meh min öm mikahtö kūöre ngaich kôti kūö min meh tö inlahen tī Yāvē nö hayööken Tāvit nö la-al nuk kanihngenre. (Sal. 3:1-8; superscription) Kētö inkôlò nuk fësla kahë Tāvit anga-aṅ. Ngaich ik sā yip tarik alaha Tāvit nö laklen ò nö la-al yik tarik Absalom, ngaich holṙen cha ang Yāvē.

13. Yěn ōt mumiṙivngölōn meh ngaich sitih inlahen më-eṅ öm asīnken Tāvit? (Mëtiv 18:15-17)

¹³ (4) Kēkö kaha u. Hatöönöre man, ‘Yěn ōt mumriv ngö lōn chu, ngaich sitih inlahen chū-ö asīnken Tāvit?’ Ilöören man kē-ělkūö alaha re. Yěm lōnu ngaich mihòiṅ öm kēḵ ngam inlēnö kahëtö Yēsū in ngam ngam Mëtiv 18. (Vë-evkūö Mëtiv 18:15-17.) Um veut alaha kē-ělkūö alahare möthë yēḵ meh öm tāiny. Holtö manöiyöre man öm la-evṙen hēk havëkö inyöökenre in Yāvē. Iṙūöhen man öm ṙatö ellōnre in Yāvē. (Inch. 17:17) Mötlö ngam inlahen meh öm hòṅ kēḵ nup inlēnö aṅmat ngam Paipöl.—Inch. 3:5, 6.

14. Asup chūök meh teungen tö inreuskö alahare löktö in ngam līpöre 2 Timòtī 1:12-16; 4:6-11, 17-22?

¹⁴ Yěh yip aṅ patī meh nö la-al kūö meh hēk yěm sōtu öm ahangkö ngam tölöök inhanga in ap kamngö meh. Yěn ngatī, ngaich siöplöre min ngam inreuskö alaha hī tö tī ngam līpöre? Kahūich Pôl im 2 Timòtī 1:12-16 hěḵ 4:6-11, 17-22. * Ik sā Pôl nö el chēl, hē e anga-aṅ nö kūich e.

15. Asup ṙô meh öm vë-ekūö Yāvē öm vë-ekūötēv?

 ¹⁵ (1) Vë-ekūötēv. Urēhěkūö meh haköp në miröökö ngaich keuheutnyöṙôre më-eṅ in Yāvē öm vënyö nup kanihngenre öm sitih inlahen mufē tö u. Ngaich havëkö inyöökenre më-eṅ in Yāvē hòṅ meh teungen tö nup inlēnö imat ngam Paipöl hòṅ meh heuveu-en la-al nup kanihngenre.

16. Rahëich yen ṙô man vë-eny inlahen Pôl?

¹⁶ (2) Asehkūöre. Fēkö inlahen Pôl man, haköövö anga-aṅ nö el chēl nö i Rōm. Ngaich ök inrē nö urěhngöre nö hachēliyö. Akahalōn inrē anga-aṅ töre min nö fëliyö. Ōt yik rīkre hol ò ṙamangen ò hēk öt kalēḵ-en el alaha inrē anga-aṅ.—2 Tim. 1:15.

17. Asuh öp öre inlahen Pôl?

¹⁷ Yěn lōnu öre Pôl ngaich mihôiṅ anga-aṅ nö afē-a, Yēḵ chu öre öt Kristīön, ngaich öthō öre öich ngatī inlahen. Öt chaphötvö inrē öre chū-ö öich el chēl Mihôiṅ öre nö ōt ngam kumnyah lōn ò tö yip prötör aṅ Ēsiā ṙamangen ò hēk hö-öv öre ngam ṙinatö ellōn ò nö in cha Hö-ö pöri ang Pôl nö ngatī inlahen. Iṙūöhen anga-aṅ nö ṙātö ellōnre nö in yip holre hēk ṙatö ellōn anga-aṅ nö in Yāvē tö ò min nö kētö raneushö ò. Kūöyòh anga-aṅ nö ngatī ṙinatö ellōn?

18. Sitih inlahen ök Pôl nö la-al nup kanihngenre?

¹⁸ (3) Afēkö. Fē-a man “Sitih inlahen ök Pôl nö la-al nuk kanihngenre?” Röhta ngam kinpaha Pôl ngaich öt afē-vö pöri anga-aṅ tö e—Lōnu anga-aṅ töre nö hòṅ örheūheu nö ha-öiny ngam minë-eny Yāvē. Lōnu inrē anga-aṅ nö hareuskö alaha yip prötör sistör (2 Tim. 1:3) Iruhen anga-aṅ nö vë-ekūötēv nö vë-ekūö Yāvē ngaich hayönglenre nö in ò. Öt haṙivlōn anga-aṅ nö fēkö inlahen yip ṙamangen ò, pön yip hamòlṙen ò pöri el ṙētak kanihngen ngaich kētö nöönyö cha anga-aṅ. (2 Tim. 3:16, 17; 4:13) Haköp ṙô ngam töhet līpöre inrē anga-aṅ. Ngamuh pöri tökirööngen ṙinatö ellōn ò tö na Yāvē na Yēsū nö öthō nö ṙāngen ò.Pön hangenlōn acha-a tö ò.

19. Sitih inlahen ang Yāvē nö hayööken Pôl?

¹⁹ Vë-eny nang Pôl ang Yāvē tö ò yěn kētöre min nö Kristīön ngaich ōt min nup kanihngen la-al ò. (Inl. 21:11-13) Hö-ö pöri Yāvē nö ṙāngen ò nö hěngtak, pön hayööken ò. Nö sitih inlahen? (2 Tim. 4:17) Hang nup ṙô Pôl anga-aṅ nö vë-ekūötēv ngaich kētö kumlēḵ ò kētö ṙinatö ellōn Pôl ang Yāvē tö ò min nö öthō nö teungen tö raneushöre töm manööyöre nö la-evṙen. Vīlö ellōn yip hol ò inrē anga-aṅ nö hayööken ò.

20. Sā ṙô ngam Rōma 8:38, 39 sitih inlahen öi mihôiṅ asīnken ò?

²⁰ (4) Kēkö kaha u. Hatöönöre man, ‘Asup mihôiṅ inlahen chu asīnken Pôl?’ Ngatī inkihten ṙinatö ellōn min më-eṅ sā Pôl. (Māk. 10:29, 30) Yēḵ meh hòṅ chiplö in Yāvē ngaich vë-ekūötēv më-eṅ hayönglenre öm in ò hēk vë-ekūö ngam Paipöl öm örheūheu. Kööpölōn pöri, töt ṙanangen ngam inlahen hī ha-öönyö Yāvē. Ṙatö ellōnre pöri tö Yāvē nö öthō nö ṙāngen meh hēk öt ōt min nö harēvngen meh tö ngam hanangelōn ò tö meh.—Vë-evkūö Rōma 8:38, 39; Hep. 13:5, 6.

21. Sitih inlahen na Āyōko na Hëktör nö la-al minë kanihngen re?

²¹ Yēḵ meh haköp inlahen yip tarik aṅ mat ngam Paipöl, ngaich teungen min më-eṅ tö nganötöre hēk mihôiṅ inrē öm la-al nup kanihngen re. Töi hang ṙô öp painīör kanānö hī, aṅ chapān ang Āyōko. Tö vöö anga-aṅ nö ahānga nö ikūö taṙòkhöre, Ngaich  pöri nö kūönngöre ngam pinhë-eṅkūö ò pòn haköp inlahen Yôna anga-aṅ nö imat Paipöl. Hëktör inrē ök aṅ Intonisīā tö ngö ṙô öt mi-im kanô-en nap yöng ò. Haköp inlahen Rūt pöri anga-aṅ nö i mat ngam Paipöl nö haköpluvö tö inlahen Yāvē ngaich löklōn ò ngaich anga-aṅ.

22. Sitih inlahen öm kò-òren yöölen lökten in minë Paipöl Trāmā tö minë tö ōttit töhakööpö?

²² Isuh öm teūngen tö mikahkūöre tö inlahen yip tarik aṅ mat ngam Paipöl? I mat nup vitiō, nup natök töhakööpö nö i nup miröökö hēk in ngam sringköla “Asīnköm Ṙinatö-ellōn Cha.” * Urēhěkūö meh, meūkö e, hāngö e hēk hakööpö e ngaich vë-ekūö Yāvē meh ngaich keuheutnyôre öm vënyö öp tòpik chūök meh öm lōntö inyöökenre. Asehkūöre më-eṅ tö inlahen öp tarik tö vënyu inlahen, asup mufē ò, hēk sitih inlahen lōn anga-aṅ. Fēkö nup inlahen ò meh nö sitih inlahen ang Yāvē nö hayööken ò. Ngaich nup haköp meh ngaich asīnken u më-eṅ. Nup tī Yāvē nö in meh, ngaich kētö nöönyö ò më-eṅ hēk hareuskö alaha yip tahëng ngaich hayööken cha.

23. Asup kinlēḵngô Yāvē nö in ngam līpöre Isayā 41:10, 13?

²³ Öt lööṙen in iyöng ikūö ngih panam ngam Sī-ö. Hēṙu ṙung öi öt akahakūö tö inlahenre. (2 Tim. 3:1) Öt kô pöri öi pa-ekūö, pön akahakūö ang Yāvē tö kanihngen hī. Kilēḵngôre anga-aṅ nö ṙapken hī min nö aṅtī tö ngam lahāmö këlre el ṙētak nup kanihngen hī. (Vë-evkūö Isayā 41:10, 13.) Mihôiṅ in ṙatö ellōnre tö Yāvē nö hayööken hī hēk hangönö hī nö löktö im Paipöl hòṅ hī mihôiṅ la-al nuk kanihngen.