1. Kūöyòh Yēsū nö tölṙô Yāvē nö laklen yik haköptö ò?

HANGENLŌN Yēsū tö yik haköptöre, lökten anga-aṅ nö afēkö nup kanihngen më haköptöre. Angū-ö lāinyngen ò nö tölṙô ngam yöngre nö ngëichken cha ngö ṙô, “Aṅten cha pöri tö ngam tö-ötlöök Sī-ö.” (Yôh. 17:14, 15) Akahalōn anga-aṅ tö ngam Sī-ö nö kētö kanihngen yik haköptö ò min hēk yip tö lōnu inrē nö löklōn Yāvē. Lökten ò nö lōnu tö Yāvē nö laklen cha.

2. Kūöyòh öi mihôiṅ ṙātö ellōnre tö Yāvē min nö hang ṙô hī yěi vë-ekūötēv?

² Hang ṙô Yēsū ang Yāvē yēḵ ò nö vë-ekūötēv pön hangenlōn anga-aṅ tö ngam kūönre. Yēḵ hī min ayī-ö ma-anyre haṙamngölōn Yāvē, ngaich hangenlōn min anga-aṅ tö hī. Hang ṙô hī min inrē yěi vë-ekūötēv öi havëkö linaklöre. Sā öp töhangenlōn inyööngö min ang Yāvē nö chumkūöṙen tö yip kūönre hòṅ ngam minënyö ò nö öt chōichngöre.

3. Kūöyòh öi hòṅ laklöngö töngamuh tö Yāvē?

³ Lōnu in töre öi hòṅ laklöngö tö Yāvē mötlö töngamuh. Pön suktu ngaich ngam Sī-ö na löktö el halīöngö, “nö holtö yöng lanīnöre”. (Inm. 12:12) Halō-ong kūö yip tarik anga-aṅ nö hakihten hī, hòṅ cha nö ngölōn tö cha nö “La-en tö la-en ngam Tēv”. (Yôh. 16:2) Ōt yip töt ṙamātö ellōnre nö im Tēv mahakihten hī pò hī öt sā tinrīken cha. Pòrô pöri öp tö sitih inkihten hī, öt kô ayī-ö öi vöö. Kūö yòh? Vë-eny nang hī ngam ṙô ngam Tēv nö ngö ṙô, “Tökô-en pöri ngam Mā, mahakööpö yīö min laklen yīö min inrē töm tötlöök.” (2 Tös. 3:3) Sitih inlahen Yāvē nö laklen hī? Ta-a töi kakken minë tö nët talöökö tī ò.

4. Sā ṙô ngam Efisös 6:13-17, asuh nup aṅtī hī kahëtö ngam Tēv Yāvē?

⁴ Halööten hī ang Yāvē tö minë lanaklö hī tö nup tī ngam Sī-ö nö chökṙen hī. Anu-ö nun në aṅtī hī öi laklöre öi la-al ngam Sī-ö. (Vë-evkūö Efisös 6:13-17.) Yēḵ hī min chumhenlöre tö u ngaich möl min yöölen tö u—ngaich ötkô öi luhngen u. Ta-a töi mikahtö kūöre tö u.

5. Asup manah ngam nyinëklöṙatre tö ngam kanô-en?

⁵ Nyanëkṙat ngam kanô-en: Minë kanô-en Aṅmat ngam Paipöl. Kūöyòh öi hòṅ nyëklö ṙatre tö u? Pön “yöng minyôinyaṅ ngam Si-ö.” (Yôh. 8:44) Köönyu samyeūheu ngaich anga-aṅ nö minyôiny “hachīl në taṙòkhöre panam”! (Inm. 12:9) Yēḵ hī pöri akahakūö tö ngam kanô-en ṙô ngam Tēv, ngaich öthō min ayī-ö öi lō-ongkūö tö tī ngam Sī-ö. Sitih inlahen öi min öi sā nyamëklöṙat re töm kanô-en? Yēḵ hī min haköp ngam kanô-en inlahen Yāvē, “holtö ngam töhët kumlēḵ hēk kanô-en inrē” öi ha-önyö ò, ngaich hòṅ chiplö öi i taṙòkhöre la-en.—Yôh. 4:24; Efi. 4:25; Hep. 13:18.

6. Asuh ang ngam lanöökö lanak elngòh, ngaich kūöyòh öi hòṅ hayutlöre tö e?

⁶ Lanak elngòh tö ngam lanöökö: Ṙô tö minë tölöök chööngö Yāvē. Kūöyòh öi hòṅ hayutlöre tö ngam lanöökö nö lanak elngòh? Pön laklöre min ngam ellōn hī. Sā ngòh tö hěng tak kumyung nö hòṅ laklö ngam elngòh reh. Lōnu ang Yāvē tö hī öi hòṅ holtö ellōn re öi hangenlōn tö ò hēk löklōn ò inrē. Öt lōnu pöri ngam Sī-ö tö hī öi holtö ellōn re öi löklōn ngam Tēv Yāvē. Lökten anga-aṅ nö ma-anyre nö hōten hī hangenlōn tö nup chehen ngih panam (Inch. 4:23) Lōnu pöri Yāvē tö hī öi keuheūtö ellōnre öi löklōn ò. (Mët. 22:36, 37) Hòṅ hayikngen hī inrē ngam Sī-ö tö në chehen ngih panam minë sahō- ngam Tēv. (Yāk. 4:4; 1 Yôh. 2:15, 16) Yěi öt kò-òngvah, ngaich chöh nup tahëng min anga-aṅ talöökö tī re nö chökṙen hī.

7. Asup tö hòṅ inlahen hī öi hayutlöre tö ngam lanöökö lanak elngòh?

⁷ Yēḵ hī ṙung lök in minë töhet chööngö Yāvē, ngaich sā mahayutlöre ayī-ö tö ngam lanöökö lanak elngòh. (Sal. 97:10) Ngö ṙô yip rīkre tö minë chööngö Yāvē nö kihngen tī tö hī. Yēḵ hī pöri min sō tö minë töhet chööngö Yāvē, ngaich sā ṙēngen öp kumyung ayī-ö öp tö sō nö lanāku elngòh nö kiyung pön langan anga-aṅ tö kūö e. Höng kumlō-ovö min yěi ngatī inlahen! Ngòh tö hangenlōn tö Yāvē, ngaich “öt lumngan” min minë chööngö nö in ò, pön akahakūö anga-aṅ tö e nö linaklö ngam nômö òh.—1 Yôh. 5:3.

8. Asup manah ngam tö kunröplöre tö ngam lanënen?

⁸ Ngö ṙô ang Pôl, kunrööpö töm lanënen im inhangköm tölöök inhānga. Tö ngö manah, angū-ö tö hī öi hòṅ lēnen örheūheu öi ahangkö ngam tölöök inhānga. Ngönlöre min inrē ngam ṙinatö ellōn hī. Yēḵ hī ṙung teūngen tö ṙētakre ngaich ahānga ayī-ö in yip tahëng. Tö sā në, i chūök hī kamān, el iskul, i chūök mi-inyīha hēk chuh kūö patī inrē öi ahānga, yēḵ hī vë-ekūö yip mikahkūöre hēk hol maneukre inrē. Yēḵ hī pòrô öt kunyī-inyre ṙa-ang el patī re ngaich sön pöri öi ahānga. Yēḵ hī pöri min öi vöö öi vënyöm tölöök inhānga öi in yip tahëng, ngaich sā öp kumyung min ayī-ö lamuhngö kunrööpöre el ṙētak kinyūngö. Mihôiṅ min anga-aṅ nö chök yěn öt hang chööngö ngam yōm kūö kumyung.

9. Kūöyòh öi hòṅ kēḵ ngam mikah nö lanaklö?

 ⁹ Tökiröng lanaklö aṅ im mikah hī in minë kinlēḵngô Yāvē: Sā ṙēngen lanaklö hī an ngam ṙinatö ellōn öi in minë kinlēḵngô Yāvē. Pön hayööken hī min ngam mikah nö “hanyangngö kūö nup töhūkūö vöi ngam tötlöök Sī-ö.” Kūö yòh öi hòṅ keunken e? Pön laklen hī min angū-ö tö nup inlō-ongkūö inköphöti tövaich. Mihôiṅ min inrē öi la-evṙen tö tölöök la-en. Mihôiṅ min öi vë-eny ngam ṙinatö ellōnre i nup kamngöre öi kaman hēk el iskul re. (1 Pīt. 3:15) Sō-en nup kinmanö inrē ayī-ö tö pōyen raneushö nup tö laingurën ti töhī öi öt ṙētak vö öi chu el mīting hēk ahanga. (Hep. 13:5, 6) Yěn ōt tö kunyah elmat tö hī, ngaich sön ayī-ö löklōn Yāvē. Yěi örheūheu öi ngatī inlahen öi kēḵ minë tö löng fësla re, ngaich laklen hī ngam ṙinatö ellōn hī. Öt ṙangen re öi im linöökölōn Yāvē pôrò nup inkihten hī.—1 Tös. 2:2.

10. Sitih inlahen ngam sapīöv nö hayööken hī ngaich kūö yòh öi hòṅ sumpīövlöre?

¹⁰ Ngam mineūka aṅ im nômö tö örheūheu-aṅ an tö sā ṙēngen ngam sapīöv inyööken—ngam maheūkkö hī tö hī min ṙānyu ṙa-ang im kinpaha ngam raneushö yip  lamöklōn ò. (1 Tös. 5:8; 1 Tim. 4:10; Taitös 1:1, 2) Sā ṙēngen öp sapīöv yěn ikui öp kumyung ngaich laklö ngam kui ò min angū-ö. Nö sitih inlahen? Ngam inlahen hī min kööpö mat öi in minë kinlēḵngô ngam Tēv pôrò öi havīlöng tö nup kanihngen. Sitih inlahen min öi sā tö aṅhav kui töm sapīöv re? Yěn sāḵ ta min minë mufē hī nö in minë mufē ngam Tēv. Tö sā ngih, yěi hayönglenre im Tēv öt inup kanôlòre.—Sal. 26:2; 104:34; 1 Tim. 6:17.

11. Sitih inlahen öng ngam töhët fanöinylö nö sā sanët, sitih inlahen tī öi min yūsö e?

¹¹ Ngam ṙô ngam Tēv ngam Paipöl an tö sā ṙēngen ngam sanët . Tö keut nun në sanët tö mihôiṅ nö tafūni tī töm nômö hī. Mihôiṅ kòl min ngam Paipöl nö chöh minë tanut ellōn hī nö öt kūöngu röön, söl el tangë, akah nup tanut ellōn hī (2 Kòr. 10:4, 5; 2 Tim. 3:16, 17; Hep. 4:12) Sā yamūs ngam sanët min ayī-ö yěi pörsönöl istötī hēk hang nup inlēnö kahëtö ngam söngkötön ngam Tēv. (2 Tim. 2:15) Asuh nup inrē hol minë lanaklö hī kahëtö Yāvē?

12. Asuh öp hēk kahëtö Yāvē hinòlṙen hī, ngaich kūö yòh?

¹² Akahakūö ön ngòh tö heuveū-en kumyung töre nö ötkô nöng kahngenre nö im kinyūngö pô ò nö hòṅ holtö yip holre nö kiyung. Ngatī ṙēngen min ayī-ö öi ötkô kahngenre öi kiyung la-al ngam Sī-ö tö yip hol ò inrē; pô hī hòṅ hōlu tö yip hol maneukre öi la-al ò yěi hòṅ mihôiṅ. Kahëtö Yāvē yin më prötör sistör nö aṅkūö në taṙòkhöre panam nö mahayööken hī ‘nö töhēngö ellōn.’—1 Pīt. 2:17.

13. Sā ṙô ngam Heprāi 10:24, 25, asuh öp yanöölen hī lökten in minë mīting?

¹³ Ngam töhěng tölöökö hī teūngen tö hanöhlöre Yēḵ hī yihtö kūö öi el minë mīting. (Vë-evkūö Heprāi 10:24, 25.) Hēṙu in ṙung—yīhi öt kumlēḵ alaha—ngaich teūngen tö hanöhlöre yěi chuh el mīting. Reuslöre alaha ayī-ö yěi hang ṙô yip prötör sistör re yēḵ cha nö ṙônyö nup haköp re. Ngönlöre im linöklōn Yāvē öi hang nup minkahten aṅmat Paipöl, tö nup töhameuknyu inlahen nö el mīting. Yöölen in inrē yěi veutlö chuh el mīting hēk hāṅngö chanuhu pöi reuslöre tī töre tö yip tahëng inrē. (1 Tös. 5:14) Ṙamlōn öi löktö in minë mīting minë kamëtö ṙētak hī öi hayööken yip hol maneukre. (Inl. 20:35; Rōm. 1:11, 12) Sīöpö heuneu-en in inrē öi ṙô-òvö öi löktö in minë mīting öi im inhānga. Tö sā ngih, Haköptu öi yūs minë Chehetī re öi ahānga. Lökten um vaichngö öt halēn minë mīting urēhěkūö meh öm yihtökūö. Chumkūöṙen hangihtöre yěm ūichhaka el mīting. Ngaich kēkö kaha nup haköpre öm el mīting. Ngaich kaheūkö min öm “tö akaha kumyunglen Yēsū Kristū.”—2 Tim. 2:3.

14. Asuh nup inrē tahëng tö ōt inyööken hī?

¹⁴ Yöölen in inrē lökten in yip ma-ahānga. Asehkūöre tö kumlēḵ ngòh tönghěngtak ma-ahānga! (Isa. 37:36) Öt hěngtak tö sā ta kumlēḵ nö in yip ma-ahānga, öt rēhěn yip Sī-ö nö ṙongta nö in yip kumyunglen Yāvē. Ötkô yip tökirööngen nö la-al öp töng hěngtak tarik ngam Tēv Yāvē. (Kam. 6:16) Kô-en takô an! Yěn lökṙen meh hēk ötlēkö elnang meh yip ichūök meh la-envö, el iskul, hēk yip töt ṙamatö ellōnre aṅ patī meh ngaich kihngen ṙung më-eṅ. Köplōn pöri më-eṅ, Hö-ö man höng hěng tak öm im kinyūngö. Pô meh hamang nup töng chööngö Yāvē.

15. Sā ṙô ngam Isayā 54:15, 17, kūö yòh yip min tarik ngam Tēv nö öt ansökngen ṙô?

¹⁵ Kunyaha elmat ön ngih panam ngam Sī-ö tö hī pô hī öt lā rītö ngih panam. Öt rēhěn öi kētöre inup la-en ngih panam. Höng im pūlngö ngam Tēv ngam inyönglen hī ngam töng hěng tö kô nö vītö ngam lanāmö nö ikūö ngih panam. Hameuknyu më mahayöng ngih panam nö famël tarik tö minyôinyaṅ inrē. (Yôh. 8:44) Vë-eny ngih panam ngam Sī-ö ayī-ö nö ahëtiyö. Sön ngam Sī-ö nö ötkô nö asökngö ṙô hī öi vënyen e. Sön ngam Sī-ö nö ötkô nö asökngöröön ngam tölöök inhānga nö söl inë taṙòkhöre panam. Höng Yāvē tö kô nö ngatī la-en.—Vë-evkūö Isayā 54:15, 17.

16. Sitih inlahen ang min Yāvē nö laklö yip tarikre hē öp tökiröng kanihngen?

¹⁶ Asuh öp ihih lama kūö hī? Nët nup min talöökö tī Yāvē nö laklen hī in öp yamih kanihngen. Raneh, laklen yip tarikre min anga-aṅ yěn ahetngen öp rācha ngih panam hēk tö ngam Tökiröng Pēpilön, ngam yöng kūö në tinlööken ing panam. (Inm. 17:16-18; 18:2, 4) Ngaich laklen yip tarik re min anga-aṅ yěn ahetngen ngam Sī-ö yěn yih ngam Ārmakētòn.—Inm. 7:9, 10; 16:14, 16.

17. Asuh nup min yanöölen hī yēḵ hī haröhtöre öi in Yāvē?

¹⁷ Yēḵ hī min röhta öi in Yāvē, ngaich öt kanô-òvö min ngam Sī-ö nö chökṙen hī tö nup töt hanlööktitṙen. Anga-aṅ pöri min tökeuheūti vah nö ahëti. (Rōm. 16:20) Lökten chumhenlöre tö minë lanaklö meh nö ṙòkhöre—ngaich ṙāten u nö eltī ò! Hayönglenre in ò um höng kahngenre in ngam kinyūngö. Köplōn tö yip prötör sistör re nö ōt. Hang nup inlēnöre tö Yāvē. Yēḵ meh min ngatī inlahen ngaich mihôiṅ öm ṙinatu ellōn tö ngam yöng meh aṅ el halīöngö nö kētö kumlēḵ men laklen meh inrē.—Isa. 41:10.