Skip to content

Hatôichngöre im table of content

TÖHAKÖÖPÖ ĀTIKÖL 14

Yī-ö Minṙöinylen, Iṙūöhen Asīnken Pôl

Yī-ö Minṙöinylen, Iṙūöhen Asīnken Pôl

“Ma-asīnken chu yin yēḵ yī-ö.”—1 KÒR. 11:1.

TINKÖÖKÖ 99 Më Tö Kööṅnyu Ṙôken Prötörs

RAHËICHTAMAT *

1-2. Asuh öp haköplö yip minṙöinylen nö in Pôl?

 HĀNGENLŌN takô ang Pôl tö më holmaneuk re. Ma-anyre anga-aṅ nö hayööken cha. (Inl. 20:31) Lökten yik holmaneuk ò inrē nö hangenlōn tö ò. Ik sā yik minṙöinylen aṅ Efisös nö akahalōn töre nö öt hēk min nö meuk kūö Pôl “ṙòkhöre cha-a ngaich nö peuiny.” (Inl. 20:37) Ngatī inlahen töngamuh më minṙöinylen nö hangenlōn tö më prötör sistör hěnghöre hayööken cha inrē nö öt ṙākenre. (Filip. 2:16, 17) Hēṙu ṙung pöri nö kihngen më minṙöinylen nö kēken nup la-en re ngaich hòṅ sitih inlahen cha-a?

2 Haköplu yin më minṙöinylen nö in Pôl. (1 Kòr. 11:1) Hö-ö ök nö aṅhavin tö tö harīkngöre kumlēḵ pön ngatī inrē anga-aṅ nö töthet, lökten anga-aṅ nö ma-anyre nö kēken minë tölöök la-en. (Rōm. 7:18-20) Pōyen inrē nup kanihngen lamākūö ò, mihôiṅ inrē öre anga-aṅ nö ṙāngenre kūöṅnngöre inrē ngam ṙanamlōn ò. Hö-ö pöri anga-aö nö halöngngenre nö ngatī inlahen. Ngatī inlahen më minṙöinylen nö haköplu nö in Pôl tö cha nö sitih inlahen nö el minë kanihngen re hēk holtö ṙanamlōn re nö löklōn Yāvē.

3. Asuh nup min haköp hī in ngih ātiköl?

3 Fën nup min kahakkö hī el ngih ātiköl inlahen më minṙöinylen nö ōt min nup kanihngen cha la-en : (1) kēnyö ṙētak re cha-a nö im inhānga pòrô nö kēken nup tahëng inrē la-en, (2) holtö hanangenlōn re cha-a nö chumkūöṙen tö më prötör sistör, (3) ṙāpöre cha-a nö in minë ötkumlē-en re. (4) havai mat re inrē cha-a nö in yip tahëng. Ta-a chěi töi mikahtökūöre nö sitih inlahen anga-aṅ nö kēken u. Haköplu inrē min ayī-ö öi sitih inlahen asīnkö më minṙöinylen.

KĒNYÖ ṘĒTAK RE CHA-A NÖ AHĀNGA PÒRÔ NÖ IN NUP TAHËNG INRĒ LA-EN

4. Kūöyòh yip minṙöinylen nö kihngen nö kēnyö ṙētak re nö im la-en inhānga?

4 Kūöyòh cha-a nö kihngen. Pōyen la-en yin më minṙöinylen hěnghöre hayōmkö ngam la-en inhānga, tö sā cha nö kö haṙīken höö nö ngëichkö minë mīting el hôi ngam afta. Hēk kamëtö ngam inköpö ṙô Paipöl inrē el ngam māṅ. Hēṙu ṙung cha-a nö kētö minë minkahten hēk harunten yip mahayööken töla-evṙen inrē hēk hareuskö alaha më prötör sistör inrē. (1 Pīt. 5:2) Ōt yip minṙöinylen mi im la-en minānö Patī pūlngö hēk chumkūöken e inrē. Hěng pöri ngam töt ṙanāngen la-en cha, ngam inhangköm tölöök inhānga nö sā inlahen yip tahëng el ngam māṅ.—Mët. 28:19, 20.

5. Sitih inlahen ök Pôl nö ahangköm tölöök inhānga?

5 Asuh ök inlahen Pôl. Ngöṙô anga-aṅ im Filipī 1:10, Mikahtökūö re tö nup töt ṙanāngen ṙô Asīnken u inrē anga-aṅ. Kē-ěvkūö anga-aṅ tö ngam la-en inhangköm tölöök inhānga. Ngaich söl mana-aṅ anga-aṅ nö mötlö elmat tö e nö la-en re. Ikūö tömaṙôngö hēk chuh kūö patī tarik anga-aṅ nö ahangken e. (Inl. 20:20) Rö-ö anga-aṅ nöng inup töhalēniṙen sakamö nö ahangköm tölöök inhānga pön yěn ṙētakvö ngaich vë-ekūö tarik anga-aṅ. Tö sā ngih, ik sā ò nö hökken yik hol re nö i Ĕtën, in e anga-aṅ nö vë-eny nang yik tö akahaka tarik tö ngam tölöök inhānga ōtre ngaich yik in cha vamītöre nö Kristīön. (Inl. 17:16, 17, 34) Pòrô anga-aṅ nö haköövö söönen anga-aṅ nö öt ṙākenre nö ahangkö ngam tölöök inhānga nö ikūö yip taṙòkhöre tarik.—Filip. 1:13, 14; Inl. 28:16-24.

6. Asuh ök haköptö Pôl nö in yik holre?

6 Yěn ahangkö ngam tölöök inhānga ang Pôl, ngaich haköpten yik holre anga-aṅ inrē. Töi ngëichkö ngam inlahen ò. Ngam raneh van ò nö misönörī, holten Yôhan Mākös anga-aṅ ngaich ngam innët van ò nö misönörī ngaich holten Timôtī anga-aṅ. (Inl. 12:25; 16:1-4) In e anga-aṅ nö haköpten cha tö nup la-en ngam māṅ nö kö harīkngöre kinëken. Tö sā minë inlahen cha nö chumkūöṙen tö yip prötör sistör hēk inlahen cha nö vīten cha nö tö heuveu-en nö mahaköphöti.—1 Kòr. 4:17.

Asīnken Pôl öi örheūheu lēntöhëichṙen vë-eny nang holre tö ngam tölöök inhānga (Ngëichköm perekrāf 7) *

7. Sitih inlahen yip minṙöinylen nö hang ngam inlēnö kahëtö Pôl im Efisös 6:14, 15?

7 Haköp hī. Mihôiṅ yin më minṙöinylen nö sā inlahen Pôl nö rö-ö nöng chuh kūö patī nö ahangköm tölöök inhānga pön öp töng yòh ṙētak cha nö kô-òren nö ahangköm tölöök inhānga. (Vë-evkūö Efisös 6:14, 15.) Tö sā inlahen në yēḵ cha nö havah nup lōn re nö el tukān hēk ichūök cha nö kamān. Mihôiṅ cha-a nö in e nö ahangköm tölöök inhānga. Yēḵ cha nö kēken ngam la-en minānö ngaich in ngam töröhta chūök cha nö havah nup chehen ngaich mihôiṅ cha-a nö in e nö ahānga. Mihôiṅ më minṙöinylen nö asīnken Pôl yēḵ cha nö ṙònghöichṙen nö ahānga, ngaich mihôiṅ nö haköpten yip tahëng inrē, tö sā më mahayööken töla-evṙen.

8. Asuh nup mihôiṅ inlahen yip minṙöinylen?

8 Ötkô yip minṙöinylen nöng sānlen nö in minë la-en ngam māṅ la-en ngam sörkit inrē nö öt ṙētakvö nö im la-en inhānga. Lökten cha-a nö mihôiṅ nö hakūönngö minë la-en re. Yē më minṙöinylen nö kē-ěvkūö tö minë la-en ngaich urěh cha-a nö vë-ekūötēv ngaich mihôiṅ cha-a nö fēken u. Nö sitih inlahen cha-a? mihôiṅ nö fēken minë la-en kinë-ekūö re. Yěn ōt tit hòng min nup ṙētak nup tahëng la-en cha tö sā ngam manūlö mikūönö i töhěng afta nö kēkaren hēk in ngam la-en inhānga hēk holṙen yip kūön re nö ahānga hēk haköpten cha. Ōt yip minṙöinylen tö kihngen ṙô nö sō-en minë la-en, ṙātö-ellōnre Yāvē nö in cha töp lāinyngen cha nö sō-en minë la-en. Pön akahakūö anga-aṅ tö cha nö chumkūöṙen nö ngëichkö nup tahëng inrē la-en.

HOLTÖ HANANGENLŌN RE HAṘŪÖTKEN MË HOLMANEUK RE

9. Asuh nup kanihngen më minṙöinylen tökūö cha nö sānlen?

9 Kūöyòh öi mihôiṅ kihngen. Yīhivö yin më tarik ngam Tēv tö kanihngen ing mana-aṅ sakamö. Lökten nö töt ṙanāngen ngam inlahen hī hayööken höö im inreuskö alaha. Ōt yip prötör sistör töhòṅ hayöökaṙen nö ṙūöhngöre tö minë tötlöng la-en. (1 Tös. 5:14) Ötkô pöri më minṙöinylen nö ṙūöhngö kanihngen më prötör sistör. Sön pöri ang Yāvē nö lōnu tö më Yōm sīṅp nö chumkūöṙen hēk laklen më sīṅp re. Nö sitih inlahen më minṙöinylen yěn ha-eheten nö aṅhavin tö minë töpōyen la-en re ngaich sitih inlahen min cha-a nö hayööken më prötör sistör?

Eūḵ la-en holre hēk hareuskö alaha cha inrē (Ngëichköm perekrāf 10, 12) *

10. Sa ṙô ngam 1 Tösalònikē 2:7, sitih inlahen ang Pôl nö chumkūöṙen tö më holmaneuk re?

10 Sitih inlahen ang Pôl. Yěn ṙētakvö anga-aṅ ngaich hareuskö alaha më prötör sistör. Holtö hanangenlōn re anga-aṅ nö chumkūöṙen tö më prötör sistör nö vai angū-ö nö inchōḵ elmat më minṙöinylen. (Vë-evkūö 1 Tösalònikē 2:7.) Kētö ṙinātö-ellōn më prötör sistör anga-aṅ tö ò nö hangenlōn tö cha hēk hangenlōn inrē ang Yāvē. (2 Kòr. 2:4; Efi. 2:4, 5) Holrevölōn anga-aṅ tö cha lökten nökēnyö ṙētak re nö in cha, kūö ngam ṙinatö ellōn re inrē. Lökten anga-aṅ nö keuheūtnyö ṙô ellōn re. Vë-eny inrē anga-aṅ töre nö aṅhavin tö öt kumlē-en re. (2 Kòr. 7:5; 1 Tim. 1:15) Rö-ö pöri nö kūö re nö hòṅ ngëichka, pön höng hòṅ hayööken cha anga-aṅ lökten nö vë-eny minë kanihngen re.

11. Asuh nuk inlēnö kahëtö Pôl nö in yik holmaneuk re?

11 Hēṙu ang Pôl nö kētö inlēnö yik holmaneuk re hö-ö pöri anga-aṅ nö holtö tananyö re pön holtö hanangenlōn re nö kētö inlēnö. Pò ò nö paṙūtalōn tö cha hēk laklen cha inrē nö in minë kanihngen. Ngaich mikahtölōn cha inrē nö isuh nup chūök cha nö hòṅ halööktit re. Akahakūö inrē anga-aṅ yē yip holmaneuk ò nö halēnö ngaich sitih mufē min cha-a tö sā ngamuh ik sā ò nö kūich chitri yik Kristön aṅ Kòrin nö halēnö cha. Ngaich unôichrit e hēk anga-aṅ nö tīnten Taitös nö chuh in cha pön hòṅ mikahtökūöre anga-aṅ tö inlahen mufē më holmaneuk ò tö minë inlēnö. Ngaich ik sā ò nö akahalōn tö cha nö hang minë inlēnö ngaich pōyen ṙanamlōn anga-aṅ!—2 Kòr. 7:6, 7.

12. Asuh nup la-en më minṙöinylen nö kētö inreuskö alaha më minṙöinylen?

12 Haköp Hī. Mihôiṅ inrē yip minṙöinylen nö asīnken Pôl nö kēnyö ṙētak re nö in më prötör sistör. Ngam raneh inlahen, urēhěkūö ngam mīting cha-a nö yihtikūö hòṅ cha nö ṙētakvö nö ṙòngnyökūö ellōn re nö vë-ekūö më prötör sistör. Yēḵ më minṙöinylen nöng rahëichta ṙô nö vë-ekūö më prötör sistör ngaich kô-en min cha-a nö teūngen tö inreuskö alaha re. (Rōm. 1:12; Efi. 5:16) Mihôiṅ inrē yip minṙöinylen nö asīnken Pôl nö löknyö mat ngam Paipöl ṙô nö hameukhömat cha hēk hangön ngam ṙinātö-ellōn cha inrē ngaich ṙātö-ellōn re min cha-a tö Yāvē nö hangenlōn tö cha. Ngaich ngam tahëng inrē inlahen cha nö in minë ṙô re hēk löktö in minë inlahen re nö hameuktö ngam hanangenlōn re nö in më prötör sistör. Mihôiṅ inrē cha-a nö in minë ṙētak nö vë-ekūöre ngaich yěn meukkūö re cha-a ngaich kö hareuskö alaha höö. Ngaich yēḵ öp minṙöinylen nö kētö inlēnö öp prötör sistör ngaich hòṅ löknyö imat ngam Paipöl ṙô anga-aṅ nö halēn. Havai ṙô re anga-aṅ hēk holtö hanangenlōn re nö kētö inlēnö,hòn hāngö ngam inlēnö kahëtö ò.—Kal. 6:1.

ṘĀPÖRE CHA-A NÖ INUP TÖT KUMLĒ-EN RE

13. Sitih mufē yip minṙöinylen tö minë ötkumlē-en re?

13 Kūöyòh cha-a nö kihngen. Pön sā hī inrē më minṙöinylen nö töthet. Kö vaichköreṙen inrē cha-a. (Rōm. 3:23) Pi-a lohten yip minṙöinylen nö yahlö mufē tö nup ötkumlē-en re lökten min nö mihôiṅ nö haṙivlōn. Ngölōn inrē cha-a töre nö ötkô min nö ṙāp ngam öt kumlē-en re. Ngaich pi-a inrē yip minṙöinylen nö öt chumkūöṙen nö ngëichkö ngam ötkumlē-en re ngaich mihôiṅ cha-a nö ngölōn nö ötkô nö halööktit re.

14. Sā ṙô ngam Filipī 4:13 Asuh ök inlahen Pôl tö kūö ò nö aṅhavin töm inyāichngö?

14 Sitin inlahen ang Pôl. Aṅhavin ök Pôl tö inyāichngö lökten anga-aṅ nö ngölōn töre nö ötkô nö la-al minë tötkumlē-en re. Hòṅ kēḵ ngam kumlēḵ re anga-aṅ nö in Yāvē. Urěh ök misī nö töt lamëken yik Kristīön. Unôichngöre anga-aṅ nö akahalōn töre nö vaich, lökten anga-aṅ nö halööktit re. (1 Tim. 1:12-16) Hayöökaren ang Pôl tö Yāvē lökten nö inu tö ngam hanangenlōn inu inre tö ngam mikūöṙen tö ngam inyāchngö inrē nö töhěng tak nö minṙöinylen. Pōyen nuk tötkumlē-en ò hö-ö pöri anga-aṅ nö yahlö mufē tö u. Ṙātö-ellōn re pöri anga-aṅ tö Yāvē nö aṙēle ò. (Rōm. 7:21-25) Öt yahlö mufē anga-aṅ nö in re pön öp töng kanô-òṅ ò ngati inlahen nö la-envö. Asīöp minë tövai anga-aṅ tinrīken re nö ma-anyre nö in u. Kūö ò nö hayāchngöre lökten anga-aṅ nö hayönglenre nö la-evṙen nö in Yāvē.—1 Kòr. 9:27; Vë-evkūö Filipī 4:13.

Ma-anyre la-al nup tötkumlē-en (Ngëichköm perekrāf 14-15) *

15. Sitih inlahen yip minṙöinylen nö ṙāpöre nö in minë tötkumlē-en re?

15 Haköp Hī. Ngatī inrē më minṙöinylen nö töthet. Ngaich lōnu ang Yāvē tö cha nö hō-en minë vanaichö re ngaich hòṅ halööktit re. (Efi. 4:23, 24) Mihôiṅ cha-a nö haköpmat ngam Paipöl ngaich halööktit re. Ngaich ngëichkö minë inlahen re inrē nö asuh nup töhòṅ halööktitvö tö cha. Ngaich hayööken cha min ang Yāvē hòṅ cha nö ṙamlōn hēk kaheukö inrē nö tö akaha nö minṙöinylen.—Yāk. 1:25.

HAVAI MUFĒ RE CHA NÖ NGËICHKÖ YIP TAHËNG

16. Yēḵ ngòh minṙöinylen nö yahlö mat nö ngëichkö ötkumlē-en tahëng ngaich asuh min öp mihôiṅ inlahen ò?

16 Kūöyòh cha-a nö kihngen. Yēḵ yip minṙöinylen nö kēnyö ṙētak re nö in më prötör sistör hēk holṙen cha nö la-envö ngaich hē e cha-a nö mihôiṅ nö ngëichkö ngam tötkumlē-en cha. Lökten yēḵ ngam minṙöinylen nö öt chumkūöṙen tö inlahen cha mihôiṅ min anga-aṅ nö līplö hēk öt vayö inlahen inrē min nö in cha hēk öt vayö mufē min inrē nö mihôiṅ ngaich angū-ö lōn ngam sī-ö inrē tö ngòh Kristīön nö ngatī inlahen. Lökten ang Pôl nö halēn ngòh Kristīön.—2 Kòr. 2:10, 11.

17. Sitih inlahen mufē ang Pôl tö më holmaneuk re?

17 Sitin inlahen ang Pôl. Havai ngam mufē re anga-aṅ nö in më holmaneuk re pön akahakūö tö minë ötkumlē-en cha hēk vaichköreṙen inrē. Pò cha nö ṙōlheuh nö mumṙivngölōn ò nö in minë la-en re. Akahalōn pöri anga-aṅ tö yip holmaneuk ò nö vaichköreṙen. Öt tö ngö manah pöri angū-ö tö cha nö tötlöng. Pön hangenlōn ang Pôl tö më holmaneuk re lökten nöng ngëichkö nup tövai inlahen cha. Akahakūö inrē anga-aṅ tö më holmaneuk re nö kēkö tölöng la-en hēk hòṅ pītnyöre nö halööktit re. Lökten cha-a nö lōnu tö inyööken re.

18. Asuh öp haköp hī im inlahen Pôl nö hayööken na Yū-ötiā nā Sintěki? (Filipī 4:1-3)

18 Töi ngëichkö inlahen Pôl nö hayööken nak tönët tak sistör aṅ Filipī. (Vë-evkūö Filipī 4:1-3.) Lā-alkūöre nā Yū-ötiā nā Sintěki. Hö-ö pöri ang Pôl nö hatainyken cha. Öt vënyö minë vanaichö cha inrē. Pön ngëichkö minë tövai tinrīken cha. Pò cha nö tö marô-òten nö löklōn ngam Tēv Yāvē. Köplōn ang Pôl tö Yāvē nö hangenlōn tö cha, lökten cha nö hōtu nö kö aṙēlen höö. Kūö inlahen Pôl nö vayö mat nö ngëichkö më holmaneuk re lökten nö vai ngam innôlö cha nö ihôi höö.

Kalah öi ui ilöö vaichö mufē tö inlahen holre (Ngëichköm perekrāf 19) *

19. (a) Sitih inlahen yip minṙöinylen nö havai mufē re nö in yip holmaneuk re? (b) Asuh öp haköplö meh in ngam nyat hol ngih perekrāf?

19 Haköp Hī. Yī-ö minṙöinylen chumkūöṙen yin tö më tövayö tinrīken prötör sistör. Ṙòkhöre in el ngam māṅ öi töthet, ōt pöri minë tövai tinrīken. (Filip. 2:3) Kô-en ön ngam inlahen më minṙöinylen nö halööktit minë mufē më prötör sistör. Hòṅ sā Pôl pöri cha-a nö havai mufē re nö in më prötör sistör. Ötkô cha-a nö yahlö mat nö ngëichkö minë törahëichyen vanaichö cha. Hòṅ chumkūöṙen inrē ayī-ö tö cha nö hāngenlōn tö Yāvē lökten cha-a nö ma-anyre nö halööktit re nö i linökölōn ò. Yēḵ më minṙöinylen nö havai mufē re nö in më prötör sistör ngaich sīöp min ngam hanangenlōn töm hinëngö nö el ngam māṅ.

IṘŪÖHEN ASĪNKEN PÔL

20. Sitih inlahen öich më minṙöinylen yěn hòṅ chöh nup haköp re nö in Pôl?

20 Yī-ö minṙöinylen, yēḵ yīö öi iṙūöhen haköp inlahen Pôl ngaich pōyen yanöölen min. Tö sā ngih inchōḵ elmat mihôiṅ öi haköpmat ngam līpöre Kövahī Tō tö ngam prosör inrē Sampurnö Pövitrö Sāströ. Hatönöre tö ngih intönö yěi vë-ekūö u, ‘Asuh nup mihôiṅ haköp chu in Pôl yēḵ chu hòṅ ṙamlōn in minë töng la-en kinë-ekūöre re?’

21. Asuh öp mihôiṅ ṙinātö ellōn më minṙöinylen?

21 Yī-ö minṙöinylen, köpölōn yin tö Yāvē nö öt yaha lōn nö in hī pò hī öi töng öthet. Höng ngam kuilōn ò tö hī öi chiplö öi in ò, öi keuheūtngö minë la-en kinë-ekūö re. (1 Kòr. 4:2) Ngatī ök inrē Pôl nö tö chiplö ngaich ma-anyre inrē anga-aṅ nö inuk la-en re, lökten Yāvē nö ṙamlōn nö in ò. Ngatī inrē ayī-ö yěi ma-anyre in minë la-en re ngaich mihôiṅ ayī-ö ṙinātu-ellōn tö Yāvē min nö ṙamlōn nö in hī. Pön rö-ö anga-aṅ nö “nö tövaichngö tö la-en yīö ngam hanāngenlōn inrē, hameuktö yīö lā i mine-eny Ò, tī yīö meukṙen yip töhet.”—Hep. 6:10.

TINKÖÖKÖ 87 Ta-a Töi Kē Hanöhlöre

^ Par. 5 Ha-öiny tī më minṙöinylen in nö hayööken hī! Öt tö lööṙen pöri ngam inlahen cha. In ngih ātiköl in min öi ngëichkö nup tö fën chūök më minṙöinylen nö haköplu nö in Pôl. In e min ayī-ö öi akahakūö tö më minṙöinylen nö kô-en nö kihngen nö kēken minë la-en re. In e inrē min ayī-ö öi ṙūöhlöng alaha öi hōtu hāngenlōn tö më minṙöinylen hēk keuheūttö inlahen re öi holṙen cha tö minë la-en.

^ Par. 61 VAMË-ENY INLAHEN NGAM NYAT: Hěng tak ngam prötör kinheūten ò nö la-envö vënyö nang ngam holre anga-aṅ töm tölöök inhānga.

^ Par. 63 VAMË-ENY INLAHEN NGAM NYAT: Hěng tak ngam minṙöinylen vamë-ekūö ngam prötör töt uroh nö nôlta nö i holre.

^ Par. 65 VAMË-ENY INLAHEN NGAM NYAT: Ōt öp miṙivlōn ngam prötör holtö hanangenlōn re ngam minṙöinylen nö kētö inlēnö ò.

^ Par. 67 VAMË-ENY INLAHEN NGAM NYAT: Hěng tak ngam prötör tö kētu la-en öt chumkūöṙen anga-aṅ öt tainy pöri ngam minṙöinylen nö in ò.