Yēḵ hī öi öt chumkūöṙen vë-ekūö në miröökö ngaich mihôiṅ ngih intöönö nö yih nö elkuilōn hī. Nët tak nan mina tarik tö Mefipōset minënyi imat ngih miröökö. Ta-a chěi töi ngëichkö inlahen cha, hòṅ hī teūnglen tö haköp re.

Sat tak kūön ang Rācha Sôl tö kikōnyö ngaich nët maneuk tö kikanö. Yônatan minë-eny ök lanòh kūön ò kikōnyö. Ngaich kūönten Mefipōset hēk anga-aṅ nö lökten in Rispa ngam yōmṙen ök pīhö ò. Ngaich sā mikahkūö hī, Mefipōset minë-eny inrē ök kūön Yônatan. Lökten nö nët tak mina tarik tö Mefipōset minë-eny aṅ patī ök Rācha Sôl. Hěng tak ngam kūön ò ngaich hěng tak ngam yōm ò.

Kunyahalōn ang Rācha Sôl tö yik aṅ Kipīön lökten ò nö hòṅ keuhūtngö vah cha nö fëli. Tövaich pöri angū-ö, pön tö chūöku ṙô yik māṅ aṅ Israel nö kilēḵngôre nö in yik aṅ Kipīön, töre nö öt hō min nö fëlngen cha.—Yôs. 9:3-27.

Söl inuk sakamö Rācha Sôl inrē ngam kinlēḵngô nö hòṅ hateūngi. Sön pöri ang Sôl nö pōihangvah tī nö fëlngö yik aṅ Kipīön. Lökten ngaich ngam mikūönö Sôl nö kaheūkö nö chūök mahām. (2 Sa. 21:1) Ik sā Tāvit ngaich nö vīlöngö nö Rācha, vë-eny nang ò yik aṅ Kipīön tö ngam tökiröng falen Sôl. Ngaich hatönö cha ang Tāvit nö ngö ṙô, asuh öp öre tī chu haṙenngen minë fālen Sôl, hòn köp ngam neukölōn Yāvē nö ikui ngih panam Israel. Havëkö kūö Tāvit ngaich yik aṅ Kipīön tö ngam nômö yik tö sat tumköl chap kūön Sôl, kūö inlahen Sôl nö vī löknyö chööḵnyöre nö hòṅ keuheūtngö vah cha nö fëli. Hang ṙô cha ngaich ang Tāvit.—2 Sa. 21:2-6.

Ngaich nö kapah nā Sôl nā Yônatan ik hē e. Ṙòngmö aṅ pöri ang Mefipōset. Löktökūö kanunkūnö re anga-aṅ nö tölum. Lökten anga-aṅ lohten nöt holṙen ök yōm re nö fëlngen yik aṅ Kipīön. Chūöku ṙô nā Tāvit nā Yônatan nö in höö, yöölen ang Mefipōset inrē töm kinlēngô pön kūön ò. (1 Sa. 18:1; 20:42) Ngö kinūichngö ön nö imat ngam Paipöl, “Aṙēlen Mefipōset pöri ök rācha [Tāvit]ök kikōnyö kūön Yônatan ök kikōnyö kūön Sôl, kūö ngam töchūöku ṙô im Mā Tēv ihôi cha ihôi nā Tāvit nā Yônatan.”—2 Sa. 21:7.

Hangṙô yik aṅ Kipīön ang Tāvit ngaich kētö yik tö sat tak tarik aṅ patī Sôl nö in cha. Nët tak nak kūön Sôl hěng tak ngam tö Mefipōset minë-eny in cha. Ngaich taneui tak yik yōm ò. (2 Sa. 21:8, 9)Löktö in e ngaich ngam inlahen Tāvit nö kēngö fālen ngam panam Israel.

Pōyen nun minë haköplö hī in ngih tövënyu inlahen. Ngö kinūichngö angū-ö nö imat ngam chööngö, “Un kumpaha yip kikōnyö yöng nö ṙënngen yip kūön.” (Chöö. 24:16) Ik sā nak kūön Sôl tö yik yōm ò nö fëliyö, ngaich rö-ö cha-a nö kūö nuk fālen Sôl nö fëliyö. Cha-a vē tö sat tak lohten hamòlṙen Sôl nö fëlngen yik aṅ Kipīön. Lökten ang Tāvit nö tölṙô finëlngö cha. “Kö kumpaha yin vē tarik nö i tökööl re” tö ṙô ngam Töhet līpöre. Yěn öt hēngö fālen öre yik tö sat tak tarik ngaich ötlöktu ang Yāvē nöt vënyen ngam finëlngö cha nö tövaich.

Haköplu ayī-ö im inlahen cha tö ngòh töhěng tak tarik nö ötkô nö ngö ṙô hēk ngö mufē töre, öt vanaichu chin chū-ö pöich töng ma-asīnkö minë tinöölô re. Ngöṙô ngam Töhet līpöre nö vë-eny nang hī: “Haṙēmngenre tö kanröönö röön meh, ngaich köp min nup talöökö meh.”—Inch. 4:24-27; Efi. 5:15.