TÖHAKÖÖPÖ ĀTIKÖL 10
Kūö Yòh Öi Hòṅ Kē Ngam Vinôkö?
“Havöötö ellōnre yin vōkö inrē.”—INL. 2:38.
TINKÖÖKÖ 34 Lök im Talöökö Hanangenlōn
RAHËICHTAMAT a
1-2. (a) Sitih inlahen mineūkö öng ṙung ngam ṙanamlōn yěn kē ngam vinôkö yip hol hī? (b) Asuh nup min kahakkö hī öi in ngih ātiköl?
ASEHKŪÖRE man, tö yip tarik hamöktöre nöng sökhak pön hòṅ kē ngam vinôkö. Nët nup intöönö cha urēhěkūö ngam vinôkö tö cha, ngaich pōitô cha-a nö kētö sanap ṙô u. Öt kūöngu ngam ṙanamlōn cha tö më aṅ patī cha, hēk hol cha inrē. Unôichrit chinpeukti cha nö ṙa-ang el ngam mak, pōyen më famtāk eltī re tö kūö ṙanamölōnre. Meūkö ngam tö harīkngöre ṙanamlōn nö i arëkūö cha. Ngatī inlahen më tö kööinyu ṙôken tarik kaheuk afta kamëtöre nö löklōn Yāvē, nö kē ngam vinôkö ngaich kaheuktu nö vamënyen ò.
2 Hòṅ kē ngam vinôkö öm më-eṅ? Yěm ngatī, ngaich tö pōiṙāi më-eṅ öm ikūö ngih tötlöök panam, pò meh öm “chamöh ngam Tēv [Yāvē].” (Sal. 14:1, 2) Lamöö in meh ön ngih ātiköl, pòrô öm tö köinyö ṙēḵti hēk ṙālö inrē. Yöölen yin inrē min më tö ngaich nö kē ngam vinôkö nö löktö in ngih ātiköl. Pön löktö in ngih ātiköl min nö ngönlöre ngam kuilōn cha nö im linöökölōn Yāvē. Ta-a töi ngëichkö në tölūöi lāinyngen hī kūö yòh öi hòṅ kēḵ ngam vinôkö yěi hòṅ löklōn Yāvē.
HANGENLŌN MË-EṄ TÖM KANÔ-EN HĒK LANÖÖKÖ
Köinyu samyeūheu ngam Sī-ö nö hachōchngö minë-eny Yāvē ngaich ngatī inlahen inrē anga-aṅ töngamuh (Ngëichköm perekrāf 3-4)
3. Kūö yòh yip tarik Yāvē nö hangenlōn töm kanô-en, töm lanöökö inrē? (Salmai 119:128, 163)
3 Tölṙô yik tarikre ang Yāvē nö ‘hangenlōn töm kanô-en.’ (Sak. 8:19) Ngatī Yēsū nö tölṙô yik haköptöre nö chöh ngam lanöökö. (Mët. 5:6) Tö ngö manah angū-ö tö hī hòṅ kalē-ělōn öi la-evṙen tö nup tölöng nö imat ngam Tēv, ngaich köp min öi het öi ikūö ò. Ngatī hanangenlōn man më-eṅ lohten töm kanô-en hēk töm lanöökö, surīkhö nup töchōich inrē. (Vë-evkūö Salmai 119:128, 163.) Yip tarik tö minyôiny aṅ, ma-asīnken ngam Sī-ö cha-a ngam rācha ngih panam. (Yôh. 8:44; 12:31) Hòṅ hachōichngö ngam töhet minënyö Yāvē ngam Sī-ö, löktökūö el ök panò-òṅ Ēten anga-aṅ nö ngatī inlahen. Höng sā vamīlö fālen Yāvē anga-aṅ nö tö minyôny aṅ hēk töng ngamëichköre inrē, hēk sā öp rācha öp töt heuveū nö hayöngken tarikre. (Ran. 3:1, 4, 5) Ngatī inlahen an ngam Sī-ö töngamuh nö sūöchken Yāvē nö in yip tarik nö hachōchngö elkuilōn cha, hòṅ cha nö öt ‘hangenlōn töm kanô-en.’ Ngaich yěn ngatī mufē min më tarik ngaich lööṙen anga-aṅ nö halō-ongkūö cha ngaich la-evṙen cha-a tö nup tötlöök la-en.—Rōm. 1:25-31.
4. Sitih inlahen ang Yāvē nö hameuktöre nö ‘Tēv kanô-en’? (Ngëichkö ngam nayt.)
4 ‘Tēv kanô-en’ an Yāvē ngaich haköpten yip tarik anga-aṅ töm kanô-en yip tö hangenlōn tö ò. (Sal. 31:5) Yēḵ më tarik ngaich nö haköp ngam kanô-en, akaha elmat ngaich cha-a tö re nö haköövö tö minë tövaich inköphöti ṙô ngam Sī-ö ngaich kunyī-inyre cha-a. Haköptö më tarikre inrē ang Yāvē nö örheūheu nö kò-ò ṙô hēk la-evṙen tö nup tölöök la-en. Ngaich teūngen min cha-a tö ngam lanāmö elkuilōn hēk milēḵṙen min më tarik tö cha. (Inch. 13:5, 6) Meuk inlahen Yāvē öm hē e nö haköpten meh tö në hē meh öm haköpmat ngam Paipöl? Haköp inlahen ngam talöökö më-eṅ vahënyö Yāvē nö töt insā-av yanöölen tī tö yip tarik lamök el e, akahaiṙen lohten më-eṅ inrē. (Sal. 77:13) Lökten öm hòṅ kēken nup tö löng la-en nö imat Yāvē. (Mët. 6:33) Hòṅ lā rītö ngam kanô-en më-eṅ öm minyôny ngö aṅ ngam Sī-ö, ngam samūöchlö fālen Yāvē. Öm sitih inlahen?
5. Sitih inlahen öm min hameuktöre hangenlōn töm kanô-en hēk töm lanöökö?
5 Ngam inlahen ngam tinrīken meh an mahameukten meh öm töhangenlōn töm kanô-en hēk töm lanöökö. Sā tö ngöṙô min më-eṅ, “Hö-ö chin hòṅ ṙatö-ellōnre tö minë minyôny ṙô ngam Sī-ö, pöch hòṅ lā rītö ngam kanô-en. Yāvē an rācha chu hòṅ kēken nup tölöng chū-ö inrē nö imat ò.” Hòṅ asuh pöri nup tö hòṅ inlahen meh? Hòṅ vë-enyre më-eṅ in Yāvē tö meh hòṅ kētöre öm löklōn ò ngaich hameuktöre öm ikūö yip tömaṙôngö öm kē ngam vinôkö. Yěm hangenlōn min töm kanô-en hēk töm lanöökö, ngaich öt hō min öm heūlöngre öm kē ngam vinôkö.
HANGENLŌN MAN TÖ YĒSŪ KRISTŪ
6. Asuh öp tö vënyu im Salmai 45:4 lāinyngen h īöi hangenlōn tö Yēsū?
6 Kūö yòh öm hangenlōn tö Yēsū Kristū? Hang ṙô ngam Salmai 45:4. (Vë-evkūö.) Vënyu nö in e ang Yēsū nö töhangenlōn töm kanô-en hēk töm lanöökö, hōten taṙòkhöre inrē anga-aṅ nö īnu töm inyāichngö. Yē meh min më-eṅ hangenlōn töm kanô-en hēk töm lanöökö, ngaich öthō min öm öt hangenlōn tö Yēsū. Lohten man köplōn tö nuk inlahen ò nö öt pinhë-evkūö nö kē la-a ngam kanô-en, la-evṙen inrē anga-aṅ tö tölöök. (Yôh. 18:37) Sitih inlahen pöri anga-aṅ nö ṙūöhöl alaha hī öi īnu töm inyāichngö? Töi mikahtökūöre?
7. Yěi ṙôtö ngam inyāichngö, asuh öp tinrīken Yēsū hanangenlōn meh?
7 Löktö in minë tinrīkenre ang Yēsū nö haköpten hī töm inyāichngö. Tö sā ò nö öt lōnu töre nö harōyö minë-eny, kēten u pöri anga-aṅ nö nöönyö ngam yöng re. (Māk. 10:17, 18; Yôh. 5:19) Sitih mufē öm yěm ngëichkö inlahen Yēsū nö hayāichngöre? Öt sīöp öng ngam hanangenlōn meh tö ò hēk hòṅ asīnken ò inrē? Lohten nö ngatī! Asuh pöri öp lāinyngen Yēsū nö ngatī inyāichngö? Pön hangenlōn misī anga-aṅ tö ngam yöngre ngam tö yāichö ellōn, ngaich hòṅ asīnken ò anga-aṅ. (Sal. 18:35; Hep. 1:3) Kô-en takô ang Yēsū nö sā tinrīken Yāvē. Hö-ö öng pökeh ngam hanangenlōn meh tö Yēsū nö ṙūöhölre ṙôken?
8. Kūö yòh öi hangenlōn tö Yēsū ngam Rācha hī?
8 Hangenlōn in töm rāchare ang Yēsū kūö ò nö tö akaha nö rācha. Yāvē an mahaköpten ò ngaich vīlen ò nö rācha hī. (Isa. 50:4, 5) Hangenlōn takô inrē ang Yēsū tö hī lökten ò nö kēngö nômöre tö pòkūö hī. (Yôh. 13:1) Achīöp min töt hangenlōn tö tö ngatī rācha? Lööknyi ṙô ang Yēsū tö yip tarik tökô-en hanangenlōn tö ò, hamang minë chööngö ò inrē ngaich kaheūkö cha anga-aṅ nö hol ò. (Yôh. 14:15; 15:14, 15) Tökiröng angū-ö nö inkòlô hī öi kaheuktu öi hol ngam kūön Yāvē.
9. Asuh öp tö hěngren in ngam vinôkö Yēsū tö ngam vinôkö yik haköptö ò?
9 Hěng inrē ngam chööngö kahëtö Yēsū tö yip haköptö ò nö hòṅ kē ngam vinôkö. (Mët. 28:19, 20) Ngatī anga-aṅ inrē nö vōkö. Rö-ö an pön rahëichyen inrīkngöre ngam vinôkö Yēsū hēk tö ngam vinôkö yik mahaköp. (Ngëichkö ngam pòks “ Asūp Inrīkngöre Ngam Vinôkö Yēsū Hēk Tö Ngam Vinôkö Yik Haköptö Ò?”) Sön pöri anū-ö nöng sā töng hěngren. Tö sā ngam inlahen Yēsū hē ò nö kē ngam vinôkö ngaich hameuktöre anga-aṅ nö hateungngö kuilōn ngam yöngre. (Hep. 10:7) Ngatī inlahen yik mahaköp hē cha nö kē ngam vinôkö nö hameuktöre cha-a nö ikūö më tömaṙôngö töre nö keuheūttöre nö löklōn ngam Tēv. Töngö manah angū-ö, tö cha min ngaich nö löktö kūö töngamuh nö öt höng löklōnre, lök nup kuilōn Yāvē pöri. Ngatī inlahen cha-a nö asīnken Yēsū.
10. Kūö yòh öm hangenlōn tö Yēsū ngaich kūö yòh ngam hanangenlōn ò nö līpten meh öm ngatī inlahen?
10 Pōyen nup ngaich haköp meh inlahen Yēsū im rò-òten meh öm haköpmat ngam Paipöl. Ṙatö-ellōnre man ngaich tö Yēsū nö töng hěng maneuk nö kūön Yāvē ngaich vīlen ò ngam Tēv nö rācha nö ikui hī. Akahakūö man ngaich inrē tö Yēsū nö sā ngam yöngre nö tö yāichö ellōn. Haköp inlahen ò inrē nö hanëlö yik tömaṙôngö tarik tö aheuk, yik tö haṙivlōn ngaich hareuskö alaha cha anga-aṅ hēk halanken yik tö vāhavö inrē. (Mët. 14:14-21) Akahakūö inrē ngaich më-eṅ tö Yēsū töngamuh nö kui në māṅ. (Mët. 23:10) Akahakūö inrē tö nup tökiröng la-en ò min inup yamih ṙētak yēḵ ò min nö hayöng nö im Pūlngö ngam Tēv. Sitih inlahen öm kô-òren hameuktöre öm hangenlōn tö Yēsū? Höng asīnken ò. (Yôh. 14:21) Yěm hòṅ ngatī inlahen ngaich hòṅ urěh më-eṅ öm keuheūttöre kētöre in Yāvē ngaich kē ngam vinôkö.
HANGENLŌN MAN TÖ NGAM TĒV YĀVĒ
11. Asuh öp tökiröng lāinyngen hī kē ngam vinôkö, kūö yòh öm ngatī mufē?
11 Asūp tökiröng lāinyngen hī hòṅ kē ngam vinôkö? Kētu sanapṙô ngih intöönö tö Yēsū hē ò nö ngö ṙô, ngih ön tökiröng chööngö “hangenlōn man tö ngam Mā Tēvre holtö nômöre, holtö kuilōn, i tölngöre.” (Māk. 12:30) Ngatī hanangenlōn öm më-eṅ tö ngam Tēv?
Yāvē an kamë-ekūö hī tö minë taṙòkhöre minë chūök hī öi teūngen tö ṙanamlōn re ngaich ngatī min ip yamih ṙētak (Ngëichköm perekrāf 12-13)
12. Kūö yòh öm hòṅ hangenlōn tö Yāvē? (Ngëichkö ngam nyat.)
12 Pōyen nun minë lāinyngen meh öm hangenlōn tö Yāvē. Sā haköp meh ngaich tö Yāvē nö ‘kamëtö nômö taṙòkhöre.’ Vë-eny nang hī inrē ngam Paipöl tö në ‘taṙòkhöre tölöök inlōnti, hēk nup töteung inlōnti, nö aṅ lātulöng.’ (Sal. 36:9; Yāk. 1:17) Nup töng sitih chehen inṙamlōn hī töngamuh, ṙòkhöre anū-ö nöng lamöktö in Yāvē ngam ṙamòngnyö kūö ellōnre nö kē-ěkūö hī tö u.
13. Kūö yòh öng ngam ṙāi ṙinānyi nö töt insā-avö nö inlōnti?
13 Aṅ in Yāvē an inrē ngam ṙāi ṙinānyi nö töt insā-avö nö inlōnti. Kūö yòh öi ngatī ṙô? Asehkūöre man, Tö sitih inlahen öng ngam innôlö nā Yāvē tö ngam kūön ò Yēsū? Hang ṙô Yēsū in nö ngö ṙô, ‘hangenlōn ngam yöng tö chu’ hēk “hangenlōn inrē chū-ö tö ngam yöng.” (Yôh. 10:17; 14:31) Köönyu köönyu samyeūheu ang Yēsū nö in ngam yöngre, lökten nö ngön ngam innôlö cha. (Inch. 8:22, 23, 30) Fēkö inlahen ṙôken miṙivlōn ngam Tēv man nö meukngövah ngam kūönre nö ötlēḵkaṙen kinpaha. Kô-en ang Yāvē nö hangenlōn tö taṙòkhöre tarik, hangenlōn inrē anga-aṅ tö meh, lökten nö kēngö ngam töng hěng maneuk kūönre nö chö-önyten tö hī pöi hōtu öi örheūheu aṅ öi ikūö ngih panam. (Yôh. 3:16; Kal. 2:20) Ōt hòng tö mötngöre tö ngih lāinyngen hī öi hangenlōn tö Yāvē.
14. Asuh öp öreh hēk tömötngöre tö e nö chö-öny meh?
14 Ik sā meh ngaich öm mikahtökūöre tö Yāvē, haköp inlahen ò inrē ngaich ṙūöhölre ṙôken ngam hanangenlōn meh tö ò. Ngönlöre inrē ngam innôlö nā an in höö. Lōnu inrē më-eṅ tö ngam innôlö nā nö köp. Lōnu ang Yāvē tö meh öm haṙamlōn ò, haröhtöre inrē öm in ò. (Inch. 23:15, 16) Kò-òren öm inup ṙô re hēk inlahenre öm ngatī inlahen. Löktö in minë tinrīken meh min inrē öi meuk ngam hanagenlōn meh tö Yāvē, tö meh inrē öm hòṅ haṙamlōn ò. (1 Yôh. 5:3) Töt insā-av nun anū-ö nö la-en kahëken meh.
15. Asuh öp öre inlahen meh hameuktöre hangenlōn tö Yāvē?
15 Hòṅ sitih inlahen öm öreh hòn meūkö ngam hanangenlōn meh tö Yāvē? Ngam raneh, mihôiṅ öm vë-ekūötēv öm vë-eny re hòṅ keuheūttöre öm kētöre öm löklōn ngam Tēv. (Sal. 40:8) Ngaich hameuktöre öm ikūö yip tömaṙôngö öm kē ngam vinôkö. Ngaich sā ngam raneh kahakkö hī taheui öi in ngih ātiköl, tö e min nö tökiröng nö ṙētak meh mihôiṅ öm ṙamlōn. Kūö e nö ranehlöröön ngam tufömngöre tinrīken meh. Hö-ö min ngaich më-eṅ höng chö-önytöre, chö-önyten tö Yāvē pöri öm aṅ. (Rōm. 14:8; 1 Pīt. 4:1, 2) Lohten pöri öm ngölōn, tökiröng ön ngih nö la-en, pön kô-en angū-ö nö ngatī. Uh pöri öm pa-ekūö, tön öt ōtngöre tövai nö tinrīken meh nö tö sā e. Kūö yòh nö ngatī?
16. Asuh nup min inkòlô yip tarik lamöklōn Yāvē nö sā ṙô ngam Salmai 41:12?
16 Töt milip tī an Yāvē nö Tēv. Yěm kahëkuṙen min tö nup töng sitih la-en ò ngaich pōyen tī min anga-aṅ nö reushen meh. (Māk. 10:29, 30) Yěn sāḵ ta min minë tinrīken meh nö sā nup lōn ò ngaich pōyen inkòlô min më-eṅ tö tī ò. Öt hō min öm hēngö hanakten öm ikūö ngih tötlöök panam, teūngen pöri min më-eṅ tö nup ṙanamlōn. Höng ranehtökūö u nun anū-ö në! Pön höng ranehlö röön meh ngam vinôkö öm löklōn ngam Tēv nö töt hō nö kinheūṅtu min. Hēk min nö ngönlöre ngam innôlö meh öm in ngam yöngre Yāvē, höng örheūheu min inrē öm löklōn ò. Sā Yāvē nö tö örheūheu aṅ nö Tēv ngatī min më-eṅ öm höng örheūheu öm aṅ.—Vë-evkūö Salmai 41:12.
17. Asuh öp mihôiṅ kahëtö hī öi in Yāvē öp tötkô nö inlahen ò?
17 Yē meh öm kētöre ngaich kē ngam vinôkö, töt insā-av angū-ö nö ṙētak meh öm kētö nup kahëtö re öm in ngam yöngre Yāvē. Në töng sitih taneūngen hī töngamuh ṙētak ṙanamlōn, tö në chehen inrē aṅ in hī, ṙòkhöre anū-ö nöng aṅ in Yāvē nö kahëtö ò nö in hī. Pön vahīlö ò ngih tumlat tö ngam halīöngö. Mihôiṅ pöri ayī-ö öi höng kētö ngam tötkô nö inlahen ò. Ngam inlahen hī öi höng ha-öönyö ò. (Yōp 1:8; 41:11; Inch. 27:11) Asuh öp min tö mötlö tö e angū-ö nö tinrīken hī? Hangenlōn më-eṅ tö Yāvē, ngaich angū-ö min tökiröng nö chö-öny meh öm kē ngam vinôkö.
ASUH ÖP MA-ASÖKNGÖRÖÖN MEH?
18. Asuh nup öre ṙô meh öm hatöönö re?
18 Sitih ṙô öm min, lēntöhëichṙen öm ngaich öm hòṅ kē ngam vinôkö? Höng më-eṅ man tö kô öm kētö sanapṙô ngih intöönö. Tövai pöri ngam inlahen meh yěm fēkö öp ma-asökngöröön meh öm kē ngam vinôkö. (Inl. 8:36) Köplōn tö minë tö lūöi lāinyngen kahakkö hī. Ngam raneh, hangenlōn më-eṅ töm kanô-en hēk töm lanöökö. Mihôiṅ öm hatöönöre öm ngö ṙô, ‘Meūkkö öp ṙētak öich chū-ö hē tarik min nö kò-òṙô, lööngö la-en inrē?’ Ngam innëtö, hangenlōn më-eṅ tö Yēsū Kristū. Mihôiṅ öm hatöönöre öm ngö ṙô, ‘Ṙatö-ellōnre öich chū-ö tö ngam Kūön ngam Tēv nö Rācha chu, hòṅ asīnkö inlahen ò inrē?’ Ngaich ngam linūöyö tökiröng lāinyngen, tö hī hanagenlōn tö Yāvē. Kò-òren öm hatöönöre, ‘Lōnu öich chū-ö töre öich haṙamlōn Yāvē öich im linöökö lōn ò?’ Yěn ‘heūṅ’ öp sanapṙô në intöönö, asuh öp rih min ma-asökngöröön meh öm kē ngam vinôkö?—Inl. 16:33.
19. Kūö yòh öm ötkô piyū-en kē ngam vinôkö? Hachō elmat hī. (Yôhan 4:34)
19 Yēḵ meh kihngen kētöre öm kē ngam vinôkö, ngaich kò-òren öm hang ngih töhěng ṙô Yēsū. (Vë-ekūö Yôhan 4:34.) Hang ṙô Yēsū nö haṙongten ngam nyina-aṅ nö im inteungngö kuilōn ngam yöngre. Kūö yòh anga-aṅ nö ngatī ṙô? Pô hī yöölen yēḵ hī öi nyā. Akahakūö ang Yēsū tö re min nö yöölen yěn hang chööngö Yāvē. Pön öthō ang Yāvē nöng tölṙô hī tö nup la-en töt kanò-òṅ hī. Lōnu ang rih Yāvē tö meh öm kē ngam vinôkö? Heūṅ. (Inl. 2:38) Mihôiṅ man chěi öm ṙatö-ellōnre tö re min öm yöölen yěm hateungngö nup kuilōn ò. Yěm öt piyū-en öm nyā öp tökuchik nya-aṅkūö, ngaich kūö yòh min öm piyū-en öm kē ngam vinôkö?
20. Asuh öp min kahakkö hī ip yamih ātiköl?
20 Asuh öp ma-asökngöröön yip rīkre nö kē ngam vinôkö? Ngöṙô lohten yip tahëng, ‘Öl chin chū-ö öich lēn.’ Kô-en an ngam kinë-e ngam vinôkö nö tökiröng nö fësla. Lökten öi hòṅ chumkūöṙen öi halēnlö inlahenre yěi hòṅ kē ngam vinôkö. Yēm hòṅ ngatī kuilōn më-eṅ öm hòṅ kē ngam vinôkö ngaich hòṅ sitih inlahen më-eṅ öm halēn ngam ellōnre? In öp yamih ātiköl in min öi teūngen töp sanapṙô ngih intöönö.
TINKÖÖKÖ 28 Achīö Yip Hol Yāvē?
a Töt ṙanāngen an ngam vinôkö nö in ngòh töhěngtak istutent mahaköpmat Paipöl. Asuh öp min mahareuskö alaha ò nö ngatī? Ngam hanāngenlōn. Hanāngenlōn ò tö chīö? In ngih ātiköl in min mikahtökūöre tö sanap ṙô ngih intöönö. Mikahtökūöre inrē min ayī-ö tö nup inkòlô taneūngen yip kamë ngam vinôkö.
