PŌYEN tö akahakūö tö yik aṅ Aikup nö vī chūök tī kamūich nö aṅtī töm papirös. * Hāngö inrē yik Krīk tö yik aṅ Rōma nö kūich nö imat papirös. Öt pōyen pöri hamang inlahen vamī chōngre nö chehetī tö ngam papirös.

Pōyen tö tö 2,700 samyeūheu rô-angen, ök pròfět Isayā nö kūichngö inlahen yik tarik “mi-iyöng taseū tahël nö i Itiōpiāi” tamīnngö “yik tarikre lamökngö el mai nö el nup chōngre papirös.” Asīntu kinröönngö inrē në sakamö hī nö sā chanuhu “tafūyu kupòk” tö Yōp.—Isa. 18:1, 2; Yōp 9:26.

Kahūich ngam Tēv an ngam Paipöl. Akahalōn yik ṙamatö ellōn re nö im Paipöl tö yip chamöh min yěn chöh cha-a, ngaich kôtökūö min tö inlahen yik tarik misī vahënyö ngam Paipöl nö kô-en nö vī chōngre tö papirös. (2 Tim. 3:16) Kô-en pöri nö pōyen minë vahënyöm Paipöl tö yik aṅ Aikup misī nö vī chōngre tö papirös.

Löktö in minë tö trô-īngö ikui kupah më aṅ Aikup in akahalōn tö inlahen tī cha misī nö vī chōng nö aṅtī tö minë papirös. Fang minë papirös min më tarik ngaich sā nyinëkö nup tö miköchre min anū-ö ahō nö kun kūnö nyinëkö pön hōtu anū-ö nö ngön. Hěng ap līpöre i Aikup vamë-eny rôtòng minë kupòk hēk chōng lohten anū-ö nö 55 feet rôta misī. Pōyen chūök inrē yip kumchūt mihôiṅ nö söm hēk nët sīön tak nö hěng lā nö el nuk kupòk misī.

Pōyen nun minë papirös nö meunylö nö i taseū ngam tahël Naël. Öt kihngen inrē yěi vī minë chōng öi yūs minë papirös. Unôichngöre tarik nö vī chōngre tö chōn, sön pöri më kamë kāḵ tö më mahacheū nöng iṙūöhen nö vī chōngre tö papirös.

Marò-òten yinūsö nun minë chōng papirös. Ngatī ṙô ök ihih töhěngtak kamūich ang Plūtòk nö vë-eny nang hī tö minë tö ngatī chōng nö yūsö nö söl inuk sakamö yik tanīnöṙô.