1. Kūö yòh öm min pingangkūö yěm rěhnyôre öm vë-eny ngam kanô-en aṅmat Paipöl?

KÖPLŌN ÖM tök ṙētak re teūngen töm kanô-en aṅmat ngam Paipöl? Öt kihngen man hē e öm hāngö u. Ngölōn më-eṅ, öthō in öt ṙòkhöre min öi ṙamlōn yěi hāngö u. Ṙamlōn hē e më-eṅ öm hang ngam tölöök inhānga. (Sal. 119:105) Ngaich ilööṙen öm vë-eny nang yip aṅ patī re, holre inrē. Kūö yòh pöri öm pingangkūö? Pön öt ṙòkhöre nö hō yip vahë-eny nang meh.

2-3. Iṙôken yik tarik ṙamatö ellōnre nö hang nuk ṙô Yēsū misī?

² Hö-ö in pingangkūö töngamuh yěn sō vē tarik nö hang ngam tölöök inhānga. Pön höng ngatī inlahen cha-a inuk sakamö Yēsū misī, pôrò cha-a nö meuk nuk pinngangkūö tī ò. Tö sā ngam, inchohlö Lāsörös. Ötkô cha-a inrē nö mahngen e. Sön yik mākūö yik Yahuti nö öt ṙatö-ellōnre tö ò nö Mesayā. Uroh nö hòṅ fëlngen ò nö anòng ngö vah Lasörös!—Yôh. 11:47, 48, 53; 12:9-11.

³ Akahalōn Yēsū tö yik tarik min nö öt ṙatö-ellōnre tö ò, nö Mesayā. (Yôh. 5:39-44) Ngö ṙô anga-aṅ nö in yik haköptö Yôhan ök Vamôk: “Tökôlò ön ngòh töt samökngöre töpòkūö Chu.” (Mët. 11:2, 3, 6) Kūö yòh nö ngatī ṙôken yik samô-en Yēsū?

4. Asuh öp min haköp hī in ngih ātiköl?

⁴ In ngih ātiköl, hēk öp unôichrit e min, öi ngëichkö minë tö pōyen lāinyngen yik tarik ik raneh senchurī nö öt ṙatö-ellōnre nö in Yēsū. Ngëichkö minë lāinyngen vē tarik in min  inrē inë sakamö hī nö kūö yòh nö öt ṙatö-ellōnre nö in Yēsū.

5. Asuh nuk lāinyngen yik tarik nö kihngen nö ṙatö-ellōnre tö Yēsū tö ò nö tö kilē-ěyö nö Mesayā?

⁵ Pōyen yik tö kavē-ěre tö kūö ngam lökngörit inruklö Yēsū. Pôrò nö akahakūö tö ò nö tö heuveū-euṙô nö haköphöti, hameuktö pinngangkūö inrē. Kūö ò pöri nö kūön ök töng yācha kārpentör. Kayônyu inrē anga-aṅ nö i Nasöret ngam töng kūönö nö panam. Hang ṙô Netenīěl, ök mahaköp nö in Yēsū, nö ngö ṙô: “Tölööku hòng kò-òren, ṙama-ang Nasöret?” (Yôh. 1:46) Pön öt ööire anga-aṅ tö ngam panam Nasöret ngam chūök kinyônyö Yēsū, chūök ò inrē nö iyöng. Köplōn lohten anga-aṅ tö ṙô ök pròfĕt, im Maika 5:2, töp Mesayā min nö fötnyu nö i Petlihem, rö-ö nö i Nasöret.

6. Hòṅ sitih inlahen yik öre tarik yěn hòṅ akahakūö tö Yēsū nö Mesayā?

⁶ Sitih ṙô öng ngam Töhet Līpöre? Urěh ngöre ṙô ngam pròfĕt Isayā nö vë-eny inlahen yik tö kunyāha elmat tö Yēsū “tö cha min nö öt hòṅ kalahtenre nö ngëichköm tumkölchap ngam Mesayā.” (Isa. 53:8) Yēḵ cha öre nö hòṅ ngëicha ngaich öthō cha-a nö öt akahakūö tö Yēsū nö Mesayā nö tö fötnyu min nö i Petlihem nö lökngörit in Rācha Tāvit. (Lūk. 2:4-7) Kô-en inrē Yēsū nö in e chūök kinyônyi sā inlahen ṙô minë tö ha-ehangen vinënyi inlahen ò. Hö-ö pöri cha-a nö hòṅ ngëichken u, ngaich nöng sō nö ṙatö-ellōnre tö Yēsū tö ò nö Mesayā.

7. Kūö yòh yip rīkre töngamuh nö sō nö vënyu nang tö vē tarik Yāvē?

⁷ Ngatī inlahen aich vē tarik töngamuh? Heūṅ. Ngatī mufē yin vē tarik töngamuh tö vē Vamënyen Yāvē nö töng öt akaha nö tarik; hēk “töt pōi höl inrē nö haköp.” (Inl. 4:13) Ngaich ngö ṙô cha-a sitih inlahen aich min nö haköpten hī tö ṙô ngam Paipöl yěn öt chuh el minë iskul chūök mahaköptö ṙô ngam Paipöl. Höng “tinlööken aṅ Amërikā” nyin inrē ngam tinlööken vē Vamënyen Yāvē tö ṙô cha, pôrò nöng öt pōyen yip Vamënyen Yāvē nö in e pön in minë tahëng panam nö kirööngen. Ōt vamënyen cha inrē nö öt ṙatö-ellōnre nö in Yēsū. Lökten ngaich më tarik nöng sō nö hang ṙô më Vamënyen Yāvē yěn vë-eny nang cha töm tölöök inhānga.

8. Sā ṙô ngam Inlahen 17:11, hòṅ sitih inlahen aich vē tarik yěn hòṅ kô-en mikahkūö tö vē tarik Yāvē töngamuh?

⁸ Hòṅ sitih inlahen öm yēḵ meh sō fukngö? Hòṅ chumkūöṙen man tö nup töng ahangre yēḵ u nö tökô-en. Pön ngatī ang Lūkös nö chumkūöṙen nö kūich nuk ahangre inlahen Yēsū. Ngö ṙô anga-aṅ “Tölöök an, tö lōn chu, öich töṙēmen mahaköp i ranëhel rit u.” Hōten yik vamë-ekūö minë kahūich re anga-aṅ “nö kô-en mikahkūö tö inlahen Yēsū” tö nuk taṙòkhöre inrē ahang cha inlahen ò. (Lūk. 1:1-4) Ngatī inlahen inrē yik aṅ Pěröiya hē cha nö hang ngam tölöök inhānga inlahen Yēsū, ngaich öt hěng hang sumkam cha-a nö ngëichkö mat ngam töhet līpöre yēḵ minë ahang cha nö tökô-en hēk yěn hö-ö. (Vë-evkūö Inlahen 17:11.) Hòṅ ngatī inlahen yin vē tarik töngamuh. Kò-òren inrē nö ngëichkö löklö sanīöplö më tarik Yāvē hòṅ cha nö öt höng lök ṙô re tö inlahen cha, tö kūö nup töng ahang re.

9. Sitih inlahen yik tarik hē Yēsū nö sō nö hameuktö pinngangkūö lamöktö el halīöngö?

⁹ Nuk ṙô Yēsū misī inköphöti, öt ṙamlōn yik tarik tö u nö ṙòkhöre. Pön öltöre lōn cha-a tö nuk minkahngö vinënyö ò nö Mesayā. Lökten nö tölṙô ò nö hēngö “hameuktö tö minkahngö lamöktö el halīöngö.” (Mët. 16:1) Lohten cha-a nö rahëichtöre mikah elnang tö ngam vahë-ekūö re im līpöre Tanīěl tö 7:13, 14. Ngam tö öl nö teungtö kūö vinë-eny inlahen Yēsū. Yěn ngëichkö minë ṙô ò öre cha-a inköphöti ngaich öthō cha-a nö öt ṙatö-ellōnre tö ò nö Mesayā. Hē Yēsū pöri nö sō nö hameuktö tahëng pinngangkūö ngaich öt hòṅ ṙatö-ellōnre cha-a tö ò nö Kristū.—Mët. 16:4.

10. Sitih inlahen ang Yēsū nö hateung ngöm ṙô Isayā tö minë tökūichi inlahen ngam Mesayā?

¹⁰ Sitih ṙô öng ngam Töhet līpöre? Hang ṙô Isayā nö vë-eny inlahen ngam Mesayā: “Öt hū-a öp min öt rēhĕn nö pōitö ṙô, öt rēhĕn öp ṙô ò min nö hāngö nö el talöökö.” (Isa. 42:1, 2) Öt hěng heuh Yēsū nöng kūöre nö hòṅ meūkö tö tarik nö la-evṙen. Öt vīlö tökiröng chūök vamë-ekūötēv anga-aṅ. Öt chōk inyut re tö nup tö tohtöre mineūkö. Sō anga-aṅ nö havëka tö yik tarik nö mā. Öt hameuktö pinngangkūö anga-aṅ nö ikūö ök Rācha Heròt hē ranöhta ngam kinpaha ò. (Lūk. 23:8-11) Kô-en pöri anga-aṅ nö hameuktö pinngangkūö inuk tahëng ṙētak, ngam inhangköm tölöök inhānga tömötlö nö la-en ò. Lökten ò nö ngö ṙô, “angu-ö an lökten Chu yih.”—Māk. 1:38.

11. Asuh nup vanāchö mufē yip tarik ṙung?

¹¹ Meuk tö ngatī inlahen öi tö ngamuh kanihngen? Heūṅ. Pōyen tarik töyal nö vīlö tökiröng chūök vamë-ekūötēv töngamuh. Yal inrē nö havëka nö mā. Ṙamlōn nö kēken nup tökiröng sakamö nup töng  öt sāta nö i ṙô ngam Paipöl. Pô cha nö ngölōn tö u min nö haröhten cha nö in ngam Tēv. Öt rēhěn pöri cha-a nöng rahëichyen haköplö nö in u. Pōyen pöri minë haköplö hī kò-òren, öi el mīting më Vamënyen Yāvē. Öt rēhěn nö tohtöre vinī-i minë Patī pūlngö, het pöri anū-ö. Öt tohtöre inlahen nup chehen yip minṙönylen. Öt lōnu cha-a töre nö havëka nö mā. Höng aṅmat ngam Paipöl nup haköptö cha. Öt höng mahaṙamlōn tarik nup ṙô cha inköphöti, lökten yip tarik nö öt yal nö hang ṙô cha.

12. Sā ṙô ngam Heprāi 11:1, 6, hòṅ sitih inlahen öm yěm hòṅ ngöönö ṙinatö-ellōn?

¹² Sitih inlahen öm min më-eṅ hòṅ meh öt fukngö? Ngö rô ang Pôl tö yik Kristīön aṅ Rōma: “Lökten i hināngö an ngam ṙinatö-ellōn; ngam hināngö inrē nö lökten i ṙô Kristū.” (Rōm. 10:17) Ngatī ngam ṙinatö-ellōn nö ngön nö lökten im inkööpö mat Paipöl, rö-ö nö lökten in minë tökiröng sakamö tökēkaṙen, pôrò anū-ö nö sā inṙamkölōn. Hòṅ ngön pöri ngam ṙinatö-ellōn. Pön “Ötkô angū-ö nö ṙanāmölōn nö in Ò, yĕn öt īnu tö ngam ṙinatö-ellōn.” (Vë-evkūö Heprāi 11:1, 6.) Yēḵ meh min öm kūöten öm haköp mat Paipöl ngaich lökten in e min öm ṙatö-ellōnre tö e nö angū-ö kanô-en. Öt hō min öm havëkö minkahngö lamöktö el halīöngö.

13. Kūö yòh yik nö pōyen tö sō tö nuk ṙô Yēsū?

¹³ Öt akaha elmat yik mahaköp nö in Yôhan ök Vamôk tö lāinyngen yik haköptö Yēsū nö öt ahik. (Mët. 9:14-17) Öt lēkôre inrē yik Feresī tö Yēsū kūö ò nö öt asīnkö nuk la-en cha. Tainy acha-a nö in ò kūö ò nö öt milēken ngam töhet sakamö tö lōn cha nö halinken tö vahav. (Māk. 3:1-6; Yôh. 9:16) Vë-enyre cha-a  nö milēṙen tö ngam töhet sakamö; ngaich inyīha pöri nö el ngam töhet chūök. Tainy pöri cha-a hē Yēsū nö vënyen ngam la-en cha nö vaich. (Mët. 21:12, 13, 15) Hē Yēsū nö el ngam töhet chūök nö haköphöti ngaich ngöṙô anga-aṅ tö cha, nö sā yik Israel yik töng ngamëichköre töt aṅhav in inrē töm ṙinatö-ellōn. (Lūk. 4:16, 25-30) Öt asīnkö nuk ṙô yik tarik ang Yēsū nuk lōn cha inrē lökten cha-a nö öt ṙatö-ellōnre tö nuk ṙô ò.—Mët. 11:16-19.

14. Kūö yòh ök Yēsū nö vënyö nuk la-en nö vaich nuk töt sā ta nö im ṙô ngam Töhet līpöre?

¹⁴ Sitih ṙô öng ngam Töhet līpöre? Löktö in pròfět Isayā ang Yāvē nö ngö ṙô: “Pò vē tarik nö ṙuöhtöre nö in chu, ngaich cha-a nöng elvāng re i minuh cha inrē nö milēḵṙen tö chu, kēngö öp ellōn re pöri cha-a nö marôvat tö chu, ngaich ngam pinhe-eṅkūö cha tö chu nöng chöngö tarik nöng inköptö.” (Isa. 29:13) Lööngö ṙô ang Yēsū tö nuk la-en cha nö vaich pön öt sā ta anū-ö nö in minë ṙô ngam Töhet līpöre. Hō-o minë chööngö tarik cha-a ngaich sō-en Yāvē töm tahīntö ò inrē Mesayā.

15. Kūö yòh yip tarik nö pōyen töt ööire tö vē Vamënyen Yāvē?

¹⁵ Meuk tö ngatī inlahen öi tö ngamuh kanihngen? Heūṅ. Pōyen ṙung töhaṙivlōn yēḵ më Vamënyen Yāvē nö öt chuh in nup la-en, tö sā ngam infēkö finötnyi, Krismis, infēkö nöönyö panam hēk infēkö yip tökapah inrē. Pön ngölōn cha-a tö u nö la-en nö töhō-ov tö ngam Tēv hēk inlahen hī öi ha-öny ngam Tēv inrē tö lōn cha. Öt ngatī ṙô pöri ngam Paipöl nö haköpten hī tö u.—Māk. 7:7-9.

16. Sā ṙô ngam Salmai 119:97, 113, 163-165, asuh nup tö mihôiṅ kahëken hī ngaich asuh nup töt kô?

¹⁶ Sitih inlahen öm min më-eṅ hòṅ meh öt fukngö? Hòṅ asīöp ngam hanangenlōnre man tö Yāvē tö minë chööngö ò inrē. (Vë-evkūö Salmai 119:97, 113, 163-165.) Yēḵ meh min hangenlōn tö Yāvē ngaich öt kēken nup la-en min më-eṅ nup tö haṙivlōn tī tö Yāvē.

17. Kūö yòh yik rīkre nö öt ṙatö-ellōnre nö in Yēsū?

¹⁷ Rīkre yik tö ngö lōn tö Yēsū nö ilööṙen nö kēngö nuk kanihngen cha nö aṅtī töm inyööngö tö ò. Meūkken re cha-a nö ṙānyu tö ò, nö ṙa-ang inuk kanihngenre tö tī më mahayöng aṅ Rōm. Hē cha pöri nö hòṅ vīlen Yēsū nö rācha, ngaich sō anga-aṅ. (Yôh. 6:14, 15) Vöö yik umuh inrē tö Yēsū yěn kēḵ ngam inyööngö min nö eltī re ngaich mihôiṅ min cha-a nö löhlö tī tö minë mina-a re. Lökten nö pōyen yik Yahuti tö kavē-ěre tö nuk ṙô Yēsū.

18. Asuh nup pròfesī aṅmat ngam Paipöl tö hòṅ hakööpö inlahen tö hī?

¹⁸ Sitih ṙô öng ngam Töhet līpöre? Pōyen minë pròfesī vinënyö ngam Mesayā nö Mihôiṅ nö kiyung, ōt nun minë vinënyö ò min nö urěh nö kapah tö pôkūö në tökööl hī. (Isa. 53:9, 12) Öt chumkūöṙen pöri cha-a nö mikahtö kūöre tö inlahen minë pròfesī. Pön höng lōntö minë kanihngenre cha-a nö kē-ěyö tö ò.—Yôh. 6:26, 27.

19. Kūö yòh yip tarik nö sō nö hang ṙô yip vamënyen Yāvē yěn ahānga tö ngamuh?

¹⁹ Meuk tö ngatī inlahen öi tö ngamuh kanihngen? Heūṅ. Pōyen yip ṙung tö ṙô tö inlahen vē Vamënyen Yāvē nö öt chap vōt. Yēḵ hī pöri min öi vōt lö yip tarik ngaich samô-en ngam inyööngö min ayī-ö tö  ngam Tēv. (1 Sam. 8:4-7) Angū-ö ngih inrē lāinyngen yip tarik nö öt hòṅ hang ṙô cha nö vë-eny ngam tölöök inhānga. Nöng angū-ö töhěng tökô nö kēngö në kanihngen hī öi ikūö ngih panam.

20. Sā ṙô ngam Mëtiv 7:21-23, asuh öp la-en tötkô nö asānkaṙen kinëken tö hī?

²⁰ Sitih inlahen öm min më-eṅ hòṅ meh öt fukngö? (Vë-evkūö Mëtiv 7:21-23.) Ngam inhangköm tölöök inhānga an la-en töt ṙanangen nö kinë-ekūö yik haköptö Yēsū. (Mët. 28:19, 20) Lökten cha-a nö öt kô nö vītö sanānngen re tö nup tahëng la-en ingih panam. Kô-en yin nö hangenlōn tö tarik, haṙivlōn inrē yěn meuk tö kihngen, höng ngam Pūlngö ngam Tēv pöri min tö kô nö hayööken yip tarik nö röhta nö in Yāvē ngam tö kô min nö kēngö nup kanihngen hī.

21. Hòṅ asuh öp tölöng katöllö hī?

²¹ In ngam haköp hī ātiköl fën nun minë lāinyngen yik tarik nö sō nö hang ṙô Yēsū. Anū-ö nun ṙung inrē lāinyngen yip tarik nö sō nö hang ṙô yip tamömkörit Yēsū töngamuh. Sā ngam haköplö hī pöri in ngih ātiköl, ta-a töi katöllö ngam tölöng ngam hināngö chööngö öi hangönlö ngam ṙinatö-ellōnre öi in Yēsū! In öp tahëng in min ātiköl öi haköp nup tö fëntit lāinyngen yik tarik nö öt hòṅ hang ṙô Yēsū.