Keuheūt nyöre chū-ö tö vanööṙöre im hatööm. Hēten tö e ngaich chū-ö öich hòṅ mikahtökūöre tö ngam Tēv. Urēhěkūö chu pöri vë-eny nang yīö tök ranötlö chu ik hatööm, töich vë-eny nang yīö töm inlahen chu, töm kuilōn chu inrē hòṅ haköp inlahen ngam Tēv.

Fötnyu chū-ö ik 1937 ikūö ngam panam Kënön lā lòhngö Frāns. Tö la-evṙen më tarik aṅ in e nö ul minë kōila. La-evṙen inrē ök yöng chu nö in e. Haköpten chu anga-aṅ öich uch ṙahata, kahòklö kui re inrē. Meuk ötlinëken më tarik anga-aṅ tö la-evṙen nö ul minë kōila. Pōyen nuk kanihngen cha nö la-evṙen. Lökten anga-aṅ nö hòṅ kahòklö kui cha. Öt ööire anga-aṅ tö nuk la-en yik pöötrī. Pön öt hēngö kanihngen cha-a, ngaich sön nöng havëkö nya-aṅkūöre, pësa re inrē nö in vē yāich tarik. Lökten ök yöng chu nö öt ööire tö cha, öt ööire inrē nö vë-ekūö ngam Tēv.

 Kuchīken chū-ö öich nyamtô öich in më nyīö ṙama-ang tahëng panam. Örheūheu öich holröön cha nö sut. Meuk inlahen më aṅ Frāns chū-ö nöng öt milēḵṙen tö më tahëng, minūö elmat inrē tö holre. Hòṅ kahòklö kui cha chū-ö. Öt aṅ Frāns ök yöng chu kikānö. Pön aṅ Pōlënt. Ngö lōn chū-ö! Söö öre yěn ōt öp ṙētak yěn keuheūt ngöre chūök ngam lanāmö, öt ōt inrē ngam intöltenre.

Katöllöng chū-ö ik 1957 öich chuh im kinyūngö öich chuh Ölchīriā. Ngölōn chū-ö im hatööm tö yik la-al chu nö yih lökten chū-ö öich vöö. Unôichngöre pöri chū-ö öich akahalōn tö ök ṙënṙô lamöktö lā-uk chu, nö rö-ö nö yik la-al chu pön höng ök hanchōn Köttö tö hāngö ṙënṙô tö chu, lökten chū-ö ngaich öich öt vöö. Haṙī-ingre ngaich ngam tinrīken chu unôichrit ngam kinyūngö, kiröng takô ngaich ngam mufē chu. Pōyen minë intöönö nö el kuilōn chu. Kūö yòh öi vīlöngö? Kô-en ang ngam Tēv nö chumkūöṙen tö hī? Yih öng min ngam lanāmö nö ikūö ngih panam?

Hē chu ngaich öich chuh patī re ngaich meukkūö ök töhěngtak chū-ö Vamënyen Yāvē. Kē-ěkūö chu anga-aṅ tö Paipöl hěng. Unôichrit invānö chu ngaich öich chuh Ölchīriā, in e ngaich öich vë-ekūö e. Pingang chū-ö öich vë-ekūö ngam Inmeukhömat 21:3, 4. ngöṙô angū-ö, “Hol tarik an ngam inrūkui ngam Tēv, ngaich Anga-aṅ min nö iyöng in cha, ngaich cha-a min nö tarik Ò, hakôtenre ngam Tēv min inrē nö in cha, nö Tēv cha: Ngaich chūtngö mak mat min Anga-aṅ, nö ṙā-ang i mat cha, öt ōtngöre min inrē ngam kinpaha, ötrēhĕn min miṙivlōn nö umuh, öt pineūnyu, öt chanöku nö hēkngöre; ngaich nuk raneh inlahen nö chuhngöre.” * Ngö lōn chū-ö, ‘Kô-en ön vö min në?’

Unôichrit chu keuheūten töm la-en re öich kumyung im 1959 meuk kūö Frānsvāṅ ngaich chū-ö ök töhěngtak Vamënyen Yāvē. Vë-eny nang chu anga-aṅ tö ṙô ngam Paipöl. Tö sā ngam minënyö ngam Tēv. Nö Yāvē (Sal. 83:18) Ngam kamëngen në ötlanöökö min nö ikūö ngih panam, ngaich vī ngih panam min nö Peretāis, Inmeukhömat 21:3, 4.

Minë ṙô Frānsvāṅ, löng anū-ö ṙamlōn inrē chū-ö tö u. Akahalōn inrē ngaich chū-ö tö nup ṙô yip pöötrī nö öt lamöknyö mat ngam Paipöl. Lökten öich yīhi tanānyö. Ngö ṙô chū-ö töich hameukhömat cha tö cha nöng vāchö haköpti. Hòṅ sā öp yöngre chū-ö öich hòṅ kahòklö kuire.

Ṙaptöm tanānyö chu ang Frānsvāṅ tö yik hol ò inrē. Halēnö chu nö ngö ṙô. Öt la-en Kristīön an ngam vinīlö fālen holre, inhangköm tölöök inhānga pöri, pön angū-ö la-en Yēsū misī, tölṙô yik haköptöre anga-aṅ nö ngatī la-en. (Mët. 24:14;  Lūk. 4:43) Pōitöre nup tö hòṅ hakööpö tö chu. Tö sā ngih, Yěn öt hō-o ṙô ngam Paipöl öp tarik, ngaich sitih inlahen öich holtö hanangenlōnre öich mikahtö elmat ò. Ngö ṙô ngam Paipöl, “Ngòh mahalanṙen ngam Mā, un lamā-alkūö, ṙēm pöri nö i taṙòkhöre.”—2 Tim. 2:24.

Halööktit re ngaich chū-ö ngaich kēḵ ngam vinôkö ik sörkit asemplī ik 1959. Meuk kūö Angèle ngaich chū-ö. Ngaich hangenlōn āyö tö höö. Örheūheu ngaich chū-ö chuh el mīting, ik 1960 ai hapīhö. Tö akaha anga-aṅ nö kikānö nö kahëtö Yāvē nö raneushö chu.—Inch. 19:14.

Im rò-òten chu ngaich öich haköp pōyen haköplö chū-ö in yip hol maneukre tö heuveū-en. Yěi hòṅ vāyö la-en tö nup kahëtö Yāvē la-en ngaich hòṅ aṅhav in ayī-ö tö ngam inyāichngö, yēḵ hī min ngatī, ngaich hamang ngam inlēnö min ayī-ö im Inchōḵ-oṙô 15:22. Ngam tö ngö ṙô, “Ṙōlö ṙô pöri mahalēn teunglen anū-ö.”

Hē chu ngaich öich 27 samyeūheu, rultenre ngaich chū-ö öich la-evṙen tö la-en sörkit ovörsīör, chöhken minë māṅ öich hareuskö alaha më prötör nö haröhtöre nö im Tēv. Kūö chu öl öich yaha heuneū-en höng vaich vaichköre inlahen chū-ö öich inup la-enre. Pōyen haköplö pöri chū-ö öich in yip tö heuveū-en hol maneuk re. kôtökūö chū-ö tö nup ṙô cha hēk nup inlahen cha nö tölöök nö “inlēnö.”

Köplōn chin tök ṙētak ranulten chu öich chöhkö minë māṅ minë i Përis, hěngtak ök minṙönylen mahatöönö chu nö ngöṙô, mihôiṅ öich hatöönö meh tö ngih töhěng intöönö. Ngaich ngö ṙô chū-ö “Hòṅ yěh,” kò-òren man.

Ngaich ngö ṙô ò, “Lūis, yěn chuh patī öre öp tòktör achīö öp min urěh chahöhkö ò?”

“Öp tövahavö,” ngö ṙô chū-ö.

Ngaich ngö ṙô anga-aṅ: “Löng takô. Meūkö meh pöri chū-ö öm höng hanôl yip tö kôlò el alaha. Nöng pōyen yip prötör sistör hī töt kalēḵ nö im ṙô ngam Tēv, tö  tufömngöre hēk tö sirōngkūö yip muh. Sön yip min nö ṙamlōn yěm chuh patī cha mihôiṅ inrē öm nyā öm holkūö cha.”

Ṙòkhöre minë ṙô ngam prötör inlēnö chu nö löng. Lökngöre ngam ellōn chu töm hanangenlōn ò tö minë sīöṅp Yāvē. Ilööṙen öich kēkö kaha minë töng ṙô ò nö halēnö chu. Ha-önyö Yāvē pöich kē-ěvkūö tö töngatī hol.

Nët nuk könvensön tö kēkaṙen ik 1969 töm 1973, Kētuṙen chū-ö hayōmken ök tö hěng Tipātment, öich la-en tö inlēnlö nya-aṅkūö më yamihtökūö nö im könvensön nö i Kolömpös Përis. Lohten nö 60,000 ṙôken më tarik tö halēnö nya-aṅkūö nö taneui sumkam. Yöölen hēk chū-ö tö ṙô ngam inlēnö im Inchōḵ-oṙô 15:22—havëkö hinòlṙen re. Ngatī inlahen ngaich chū-ö öich hatöntöre in yip kamhul, mi-inyih kö alaha, tameūch karī. Ngaich holṙenre öi kēken ngam tökiröng la-en kinë-ekūö chu.

Havëtu āyö tö pīhöre ai la-evṙen ai el Petěl i Frāns im 1973. Ngam raneh la-en tökētu nö in chu nö tökihngen. Pöich hòṅ asöltö minë līpöre öich in yip hol maneuk hī i Kemrūn ingam panam Afrikā, im chūök ngam la-en hī nö sō-oiṙen im 1970 töm 1993. Ngölōn chū-ö hö-ö chin min kô tö ngih la-en. Ilööṙen ngaich yik prötör nö yihtöre nö in chu nö ngö ṙô, ha-euk takô yip hol hī tö në töhakööpö, pöh töi hayööken cha. Kô-en ngaich īhö öi ngatī inlahen.

Ṙōlvan chū-ö öich chuh in minë panam ranghö Kemrūn pô chu hòṅ meuk kūö më minṙöinylen aṅ Kemrūn. Pōyen tī ang Yāvē nö hakôlò ngam la-en ih. Lökten më hol maneuk hī nö teūngen tö minë līpöre nö 20 samyeūheu rò-òten pôrò ngam la-en  nö sō-oiṙen nö in e. Öt hěng hang ātiköl töt taneūngen cha, nöng kūö lōn ngam Tēv.

Ngön ngam innôlö Angèle nö in Yāvē löktökūö raneh, lökten öich yöölen tö tī ò. Meūköm inlahen tinrīken ò nö im pinīhö ai. Tölṙô chu anga-aṅ öich vë-elkui ai hòṅ ai keuheūttö ellōnre ai löklōn Yāvē. Ngaich kētö sanapṙô ai ang Yāvē.

Angèle inrē mahangönlö ngam ṙinatö ellōn chu öich in Yāvē. Tö sā ngih hē ai Havëtu ai chuh el Pētěl ik 1973, sō chū-ö lang pöich kuchīken öich im la-en sörkit. Fēḵlen chu pöri anga-aṅ tö ai kamëtöre löklōn Yāvē. Ngaich yòh mihôiṅ hòng min ai öt hang yēḵ ai havëtu töm söngkötön ò? (Hep. 13:17) Lökten öich ötkô öich öt hang ṙô ò! Chuh el Pētěl ngaich āyö. Pōyen yanöölen chū-ö tö minë fësla ò pön löng anū-ö.

Ṙamlōn chū-ö pöich teūngen tö pīhöre tö tö akaha kikānö. Tö sā ngih, Hòṅ chuh el minë iskul ngam söngkötön āyö, minë töng ṙamô ingki. Kalēḵ alaha ngaich āyö ai haköp ngam ëlô ingki hē ai ngaich 75 samyeuheu ṙēḵti. Kö hayööken höö āyö. Hakôlò minë la-en ai ang Yāvē.

Ngam tökiröng inkôlò yamih nö in ai ik 2017. Teūngen āyö tö ṙētakre ai yihtö kūö el ngam iskul më Prāṅch Kömitī Mempör tö më pīhö cha inrē, ngam tö kēkaṙen nö el ngam Watchtower Educational Center i Patterson, New York.

Kô-en Yāvē nö tökiröng nö mahaköphöti. (Isa. 30:20) Lökten yip tarik ò nö öt pingang—tököiny hēk tö ayal—teūngen cha-a töm tövai inkööpö! (Chöö. 4:5-8) Lökten, chin meuk tököiny hēk tö ayal yěn höng hamang chööngö Yāvē ngaich öthō acha-a nö ötkū-ö urěh. Ngö ṙô ngam: Inchōḵ-oṙô 9:9 nö fēlen hī: “Haköptö tö akaha tarik, ngaich anga-aṅ nö ṙūölen re nö akahaṙa; haköptö tölöök tarik, ngaich ṙūölenre anga-aṅ min nö haköp.”

Hēṙu chin öich fēkö ök tö sangūla hatööm i Ölchīriā, hē chu höng hěngtak öich keuheūtnyöre tö vanööṙöre. Öt akahalōn chū-ö töre tö ngatī inlahen taneūngen töm ṙanamlōn töngamuh. Pōyen haköplö chin öich in yip tahëng! Yāvē an kamë-ekūö chu tö u, tö ngòh tö akaha pīhö chu inrē ang Angèle, töpōiṙāi nö inkôlò chu. Ngam tökiröng haköplö chu tö chu hòṅ haköp öich in Yāvē in yip hol maneukre inrē.