TÖHAKÖÖPÖ ĀTIKÖL 21
Yāvē An Min Kamëtö Kumlēḵ Meh
“Pò chu, yēḵ chu ötkalēḵen, ngaich kalēḵ chū-ö.”—2 KÒR. 12:10.
TINKÖÖKÖ 73 Alōnten Ih Töm Töt Pinhë-eṅkūö
RAHËICHTAMAT *
1-2. Asuh nup kanihngen më Tarik ngam Tēv?
TÖLṘÔ Timôtī ang Pôl nö keuheūt ngenre tö ngam la-en kinë-ekūöre. (2 Tim. 4:5) Hang ṙô Pôl ayī-ö töngamuh öi iṙūöhen löklōn ngam Tēv pòrô öi meukkūö kanihngen. Pōyen yip holmaneuk hī tö kihngen nö ahangköm tölöök inhānga. (2 Tim. 4:2) Afēkö kanihngen yip holmaneuk hī man yip mi-iyöng inup panam tö sōtu nö kēken minë la-en ngam Tēv. Sön cha-a nöng iṙūöhen nö ahangköm tölöök inhānga, pòrô nö akahakūö töre min nö hachēlhötvö!
2 Ōt minë tahëng kanihngen më tarik Yāvē, tömihôiṅ nö haṙivlōn tī tö cha. Sā në, kinëten nya-aṅkūö ngam mikūönö, linöklōn ngam Tēv, ōt yip tö kihngen kūö invah re, kūö ṙēḵti re hēk ötkô nö kunyi-inyre tö patī re. Ōt yip tö ngö mufē inrē töre nö öt pōiṙāi nö imat Yāvē. Hang ṙô sistör Mëri, * nö vë-eny nang hī nö ngö ṙô: “Hēṙu chū-ö kalē-ěröön miṙivlōn öich höng afēkö nup kanihngen re. Haṙivlōn öich fēkö inlahen re.”
3. Asuh öp min haköp hī in ngih ātiköl?
3 Sön pöri pòrô nö pōyen minë kanihngen hī, mihôiṅ ang Yāvē nö kētö kumlēḵ hī la-al u, hayööken hī inrē iṙūöhen löklōn ò. Ta-a pöri töi urěh ngëichkö tī ò nö hayööken nā Timôtī nā Pôl, hòṅ cha nö iṙūöhen nö löklōn ò.
KĒTÖ KUMLĒḴ HĪ YĀVĒ ÖI AHANGKÖM TÖLÖÖK INHĀNGA
4. Asuh nuk kanihngen Pôl?
4 Pōyen nuk kanihngen Pôl. Fōhoh anga-aṅ, hachēliyö, kulehe kui tö ihong. (2 Kòr. 11:23-25) Hēkpī anga-aṅ nö havīlöng tö nuk tötlöng mufē re. (Rōm. 7:18, 19, 24) Ōt inrē ök invah ò tö sā tö “lòklöre i alaha” ò, tölṙô ngam Tēv anga-aṅ nö kēngen e nö ṙa-ang in ò.—2 Kòr. 12:7, 8.
Ṙamā-ang yih ök kumlēḵ Pôl nö ahānga? (Ngëichköm perekrāf 5-6) *
5. Asuh nuk la-en Pôl pòrô nö kihngen?
5 Kētö kumlēḵ Pôl ang Yāvē nö iṙūöhen nö ahangköm tölöök inhānga pòrô nö ōt nuk kanihngen ò. Hē ò nö hachēliyö nö el ök töhěng patī i Rōm, höng iṙūöhen anga-aṅ nö ahangköm tölöök inhānga, vë-ekūö yik tö minā-av inrē. (Inl. 28:17; Filip. 4:21,22) Vë-eny nang yik amahati tö yik töng chamöhken ò inrē tö ngam tölöök inhānga. (Inl. 28:30, 31; Filip. 1:13) Hē e Pôl nö kūichtö chitri yik Kristīön minë tö yöölen tī tö hī töngamuh. Ngönlöre ṙinatö-ellōn inrē yik Kristīön aṅ Rōm nö meuk inlahen Pôl, lökten cha nö “ṙô-òv tö ngam ṙô ngam Tēv holtö öt pinhë-eṅkūö.” (Filip. 1:14) Hēkpī nö öt teungten nuk lōn Pôl inlahen ò lang nö löklōn ngam Tēv, sön pöri nuk la-en ò nöng “ṙinūölö ngam tölöök inhānga.”—Filip. 1:12.
6. Sā ṙô ngam 2 Kòrin 12:9, 10, asuh ök mahayööken Pôl nö keuheūtngö ngam la-en kinë-ekūö ò?
6 Köpölōn pöri ang Pôl tö ngam kumlēḵ ò nöng lamöktö in Yāvē. Ngö ṙô anga-aṅ “Yē chu ötkalēḵen, ngaich kalēḵ chū-ö.” (Vë-evkūö 2 Kòrin 12:9, 10.) Ngam töhet kumlēḵ Yāvē mahayööken Pôl nö keuheūtngö ngam la-en kinë-ekūö ò.
Ṙamā-ang yih ök kumlēḵ Timôtī nö ahānga? (Ngëichköm perekrāf 7) *
7. Asuh nuk kanihngen yamih nö ikūö Timôtī?
7 Ngatī inrē ngam ṙāl tarik hol Pôl, ang Timôtī nö hòṅ hayönglenre nö im Tēv. Ṙōlvan anga-aṅ nö holröön Pôl nö ahangköm tölöök inhānga. Hēkpī inrē nöng hěngtak nö tīniyö tö Pôl nö chöhken nuk māṅ. (1 Kòr. 4:17) Lohten ang Timôtī nö ngö lōn, öt fūra chin chū-ö ing la-en re. Lökten Pôl nö ngö ṙô tö ò: “Un tarīku mahakeūngen ṙētö meh.” (1 Tim. 4:12) Ōt inrē ök umuh kanihngen el alaha Timôtī lohten nö invah ellōn ò. (1 Tim. 5:23) Akahalōn pöri ang Timôtī tö Yāvē nö mihôiṅ nö kētö kumlēk ò nö ahangköm tölöök inhānga.—2 Tim. 1:7.
PÔRÒ NUP KANIHNGEN MIHÔIṄ YĀVĒ NÖ HAKÖPKEN HĪ
8. Sitih inlahen tī Yāvē nö kētö kumlēḵ yip tarik re töngamuh?
8 Mihôiṅ Yāvē töngamuh, nö kētö kumlēḵ hī “tö nup chamööngö minhôṅyö” hòṅ hī köp öi lök lōn ò. (2 Kòr. 4:7) Ta-a töi ngëichkö minë töfën tī ò nö hangönken hī öi köp im linöklōn ò: ngam vinë-eṅkūötēv, ngam Paipöl, ngam chinūhu el mīting, tö ngam inhangköm tölöök inhānga inrē.
Kētö kumlēḵ hī Yāvē nö löktö im vine-ekūötēv (Ngëchköm perekrāf 9)
9. Sitih inlahen ngam vinë-ekūötēv nö hayööken hī?
9 Ngönlöre löktö im Vinë-ekūötēv. Ṙūölö alaha hī ang Pôl im Efisös 6:18 “I nup tökeūheuttöre” öi vë-kūötēv. Hang ṙô hī ang Yāvē yěi vë-ekūötēv hēk kētö inngëṅkö alaha hī inrē. Höng lūk nup kanihngen yamihen Chôni mi-iyöng Pôlivia. Hēngö ṙētak öp pihö ò tö nap yöng ò nö vahavö. Öt lööṙen Chôni nö meukṙen cha. Unôichngöre ök yöng ò kikanö nö kapah, ngaich marò-òten ök yöng ò kikōnyö nöng öthē nö lööken. Vë-eny ngam ṙētak kanihngenre ang Chôni nö ngöṙô, “Havīlöngö chū-ö tö pinṙūtölōn. Teūngen pöri chū-ö tö inngëṅkö alahare löktö im vinë-ekūötēv. Vë-eny ngam mufē elkuilōn re chū-ö in Yāvē.” Ngòh minṙöinylen aṅ Pôlivia ang Rōnalt nö akahakūö anga-aṅ tö ök yöng re kikanö nö kensör. Unôichrit tö hěng chumngëṅtö ngaich ök yöng ò nö kapah. Ik ṙētak ngam kanihngen ò nö teūngen anga-aṅ tö inngëṅköre nö löktö im vinë-ekūötēv. Ngö ṙô anga-aṅ, “Yēḵ chu öich vë-ekūötēv, ngaich keūheutnyö ṙô ellōn re chū-ö öich vë-ekūö Yāvē. Ṙātö ellōn re chū-ö in ò nö akahakūö töm kanihngen chu.”–Rōm. 8:26, 27.
Kētö kumlēḵ hī Yāvē nö löktö im Paipöl (Ngëchköm perekrāf 10)
10. Sā ṙô ngam Heprāi 4:12, kūö yòh öng nö töt ṙanāngen ngam vinë-ekūö Paipöl hēk töm infēkö minë töhakööpö?
10 Ngönlöre löktö im Paipöl. Hòṅ asīnken Pôl in öi haköp mat ngam Paipöl. Teūngen in tö inngëṅkö alaha re hēk inreuskö alaha inrē. (Rōm. 15:4) Yēḵ hī öi haköp mat ngam Paipöl hēk fēkö nup haköpre, ngaich hayööken hī min ngam Töhet kumlēḵ Yāvē. Akahakūö ayī-ö tö yanöölen minë inlēnö aṅ mat ngam Paipöl. (Vë-evkūö Heprāi 4:12.) Rōnalt ngam kahakkö hī. Ngöṙô anga-aṅ, “Örheūheu chin haköp mat Paipöl el hatööm hēk fēkö minë tinrīken Yāvē inrē. Fēkö inlahen tī Yāvē inrē nö sitih inlahen anga-aṅ nö chumkūöken yip tarik re i nuk urěhngöre ṙētak. Ṙamlōn chin öich vī ngam tövai inlahen re öich haköp. Teūngen chū-ö tö inngëṅkö alahare löktö in e.”
11. Sitih inlahen öng ngam Paipöl nö ngönlöre tī tök sistör töhaṙivlōn?
11 Yēḵ hī öi fēkö nup ṙô ngam Tēv, ngaich löng ngam mufē hī. Ngëichkö ngòh kanānö hī, tö kapah löng tö pīhöre. Haṙivlōn anga-aṅ. Hěng heuh ök minṙöinylen nö töl ṙô ò nö vë-ekūö öp līpöre Yōp. Hē ò nö haköp ngaich vāchö mufē anga-aṅ tö Yōp. Ngöṙô anga-aṅ nö ellōnre lōn, “Yōp! Höng fēkö minë kanihngenre man kòl! Öt tö löng ön angū-ö.” Löktö in ngam Paipöl anga-aṅ nö teūngen tö inyöökenre nö fēkö minë kinlēḵngô Yāvē. Höhlö ngaich anga-aṅ töm miṙivlōn re tö ṙināngöre tök pīhöre.
Kētö kumlēḵ hī Yāvē nö löktö in më holmaneuk hī Kristīön (Ngëchköm perekrāf 12)
12. Sitih inlahen yip prötör sistör nö hangöngken hī?
12 Ngönlöre löktö im manūlö Kristīön. Löktö in më prötör sistör tī Yāvē nö kētö nganöönö hī. Ngö ṙô tī Pôl, paṙūtölōn chin öich hòṅ meuk kūö yip prötör sistör hī, hòṅ cha “Nö kö hareuskö alaha höö.” (Rōm. 1:11, 12) Ngëichkö ngam inchōḵ elmat Mëri ngam tö urěh ngöre vinënyi. Ṙamlōn anga-aṅ nö kē-ěny ṙētak re nö in yip prötör sistör. Ngöṙô anga-aṅ, “Löktö in më prötör sistör tī ang Yāvē nö kētö inreuskö alaha chu. Ṙô tö nup tövai ṙô cha-a nö in chu hēk kūich tö kart chu inrē, pòrô acha-a nö öt akahakūö tö öp kanihngen chu. Ṙamlōn inrē öich vë-ekūö yip sistör tö sā kanihngen chu. Haköplu chū-ö öich in cha, öich sitih inlahen la-al minë kanihngen re. Kētö ṙinatö-ellōn chu yip minṙöinylen inrē tö chu öich pōiṙāi el ngam māṅ.
13. Sitih inlahen öi mihôiṅ hareusken höö el mīting?
13 Në yih kò-òren inlahen hī hareuskö alaha höö öi el mīting. Mihôiṅ öi vë-enyre hangenlōn hēk milēḵṙen tö yip holre. Ngatī inlahen ök ihih minṙöinylen ang Pītör. Hē ò nö chuh in ök kanānö hī. Töt mi-im kanô-en ök pīhö ò, ngö ṙô anga-aṅ tök kanānö hī, “Örheūheu chin meukö meh öm halēn më kūön re yěn chuh el mīting, vayö ṙô inrē cha-a nö kētö sanapṙô, ṙamlōn öich meuk inlahen cha.” Peuny ngaich ngam kanānö hī kūö ṙanamlōn re pön hareuskö alaha tö ngam minṙöinylen.
Kētö kumlēḵ hī Yāvē nö löktö im la-en inhānga (Ngëichköm perekrāf 14)
14. Sitih inlahen öng ngam inhangköm tölöök inhānga nö hangönken hī?
14 Ngönlöre löktö im la-en inhānga. Ṙamlōn in ayī-ö yěi ahānga, pòrò yip tarik nö hang ṙô hī hēk hö-ö. (Inch. 11:25) Ngëichkö inchōḵ-elmat ngòh kanānö hī Istēsi. Ik sā öp aṅ patī ò nö ha-uknyu el ngam Māṅ ngaich haṙivlōn anga-aṅ. Ngölōn anga-aṅ, ‘Mihôiṅ öich öre asökngen ò nö kēkö ngam tövaich la-en?’ Köpngö angū-ö nö elkuilōn ò. Asuh ngaich pöri öp mahayööken ò? Ngam inhānga. Ik sā ò nö ahānga ngaich öt fēkö ngam kanihngenre anga-aṅ pön fēkö mufē yip tarik. Ngö ṙô anga-aṅ, “Löktö i inyöökenre chū-ö tö Yāvē öich teūngen tö istötī re nö kūö la-urěh nö haköp. Kūö ngam inhānga chū-ö öich mihôiṅ öich la-al minë kanihngen re.
15. Asuh öp haköplö meh in minë ṙô Mëri?
15 Ōt yip tahëng, tö kūö kanihngenre nö öt teūngten nö im inhangköm tölöök inhānga. Hòṅ köpölōn in öp tö yòh kanò-òṅ hī hòṅ holtö ellōn re ayī-ö la-evṙen in e, ngaich ṙamlōn min ang Yāvē. Töi hēk ngëichkö ngam inchō-elmat inlahen Mëri. Hē ò nö ahānga nö i ëlô tö tufömngöre nö in öp tahëng panam, öt uroh anga-aṅ nö heūveu-en. Ngö ṙô anga-aṅ, “Kihngen öich kētö sanap ṙô el mīting höng haköp nup miröökö chū-ö aṅ mat ngam Paipöl, ngaich yēḵ chu öich ahānga in yip tarik ngaich höng kētö līpöre chū-ö eltī cha.” Ngöṙô lōn anga-aṅ töre nö töng hö-övö nö ikūö yip tahëng tö akahakūö töm ëlô. Akahakūö pöri ngaich anga-aṅ tö nup töng kanô-òṅre la-en ngaich höng anū-ö min kahëken ò. Mihôiṅ ngam Paipöl nö halööktit ngam tinrīken ngòh tarik. Öt uroh öi hòṅ heūveu ṙô tö nup tahëng ëlô.
16. Sitih inlahen yip töt kumnyī-inyre tö patī re nö teūngen tö kumlēḵre nö löktö im inhānga?
16 Akahalōn ang Yāvē tö inlahen yip hol hī tö vahavö töt kô nö kunyi-inyre tö patī re nö ahangköm tölöök inhānga. Mihôiṅ pöri cha-a nö chöh nup tahëng inlahen re nö ahānga. Tö sā cha nö mihôiṅ nö vë-ekūö yip tôktör, nörs hēk yip tahëng inrē. Yēḵ cha min nö fēkö nuk inlahenre nö kalēḵ alaha sin nö la-evṙen nö im linöklōn ngam Tēv, ngaich mihôiṅ min cha-a nö yihi miṙivlōn. Yēḵ cha pöri min nö akahakūö tö Yāvē nö öt timten cha nö pōyen kahëtī tö ṙētakre nö im inhangköm tölöök inhānga, ngaich angū-ö min tö tī-iv tö cha nö köptī töm ṙanamlōn re nö im inhangköm tölöök inhānga.
17. Sā ṙô ngam Mumkahten 11:6, kūö yòh öi sōtu ṙangenre öi ahānga?
17 Öt akahakūö in ayī-ö tö ngam kanô-en tö teūichtu, tö e min yěn sīöp hēk yěn hö-ö. Lökten öi öt kô ṙangenre öi ahangköm tölöök inhānga. (Vë-evkūö Mumkahten 11:6.) Hěngtak ön ngòh kanānö hī ang Pārparā, ngòh tö ngaich nö pōyen samyeūheu tö tö 80, höng el fūn hēk kūich chitri anga-aṅ yěn ahānga. Hěng heuh ngaich anga-aṅ nö vachö tī nö söömngö chitri nöng löö in nak pamīhöre tö marô-angen nö ha-uknyu nö el ngam māṅ. Holröön tö ngih Chūökamahati ök chitri kahūich ò, ngam tö ngö kui: “Pörmēsvör Nē Apkē Liyē kiā Kiyā?” Vë-ekūö ngam līpöre ngaich minā pamīhöre. Ngaich sā ṙēngen tö vë-evkūö ngam kikōnyö tö Yāvē. Havantö re ngaich cha-a nö chuh el mīting, unôichrit tö 27 samyeūheu. Teūngen ngam kanānö hī ang Pārparā tö kumlēḵre nö löktö im inlahenre nö ahangköm tölöök inhānga.
Kētö kumlēḵ hī Yāvē nö löktö im (1) vinë-ekūötēv, (2) ngam Paipöl, (3) manūlö Kristīön, tö (4) ngam inhānga (Ngëichköm perekrāf 9-10, 12, 14)
18. Sitih inlahen öi yěi hòṅ teūngen tö yanöölenre öi im kumlēḵ ngam Tēv?
18 Haköplu in öi in ngih ātiköl tö inlahen Yāvē nö kētö kumlēḵ yip tarikre, nöng iṙūöhen nö ahangköm tölöök inhānga. Pōyen nun minë tī ò tö sā në, Vinë-ekūötēv, Paipöl, yip prötör sistör hī hēk tö ngam la-en inhānga. Yēḵ hī min kēḵ yanöölenre in u, ngaich hameuktöre min ayī-ö öi ṙatö-ellōnre öi in Yāvē tö ò min nö kētö kumlēḵ hī. Ta-a chěi töi örheūheu hayönglen re öi in ò, “Ngam mahameuktö minhôiṅyöre nö lā in yip tö chiplö ellōn nö in ò.”—2 Kin. 16:9.
TINKÖÖKÖ 61 Yī-ö Vamë-eny kū-ö Urěh Yin!
^ Par. 5 Pōyen minë kanihngen hī töngamuh, hayööken hī pöri ang Yāvē öi la-al u. Mikahtökūöre in min in ngih ātiköl tö inlahen tī Yāvē nö hayööken nā Pôl nā Timôtī nö iṙūöhen nö löklōn ò pòrô nö pōyen nuk kanihngen cha. Mikahtökūöre inrē min tö nup töfën kangen tī Yāvē nö hayööken hī töngamuh la-al nup kanihngen re.
^ Par. 2 Harīkiyö nun minë minë-eny.
