1. Asuh öp tö hòṅ katöllö hī töngamuh?

 HÒṄ ṙòkhöre in töngamuh öi katöllö lōn re, yēḵ hī öi hòṅ holṙen ngam Tēv Yāvē ngam tö Keuheūttöre Chööngö hēk yěi holṙen ngam Sī-ö. Ötkô pöri ayī-ö öi nëtö katöllö. Sā ngam katöllö hī töngamuh, ngatī min nup yamih ṙētak hī. (Mët. 25:31-33, 46) Yěn kahòkkaṙen min tarik hē ngam “yöng kanihngen,” hē e min öi akahakūö tö yip töt kô-òngvah hēk yip tö ha-eti inrē.—Inm. 7:14; 14:9-11; Isi. 9:4, 6.

2. (a) Asuh öp hinôtö hī im Heprāi 10:35-39? (b) Yēḵ hī min köplōn töm ṙô Inmeukhömat ngaich asuh min öp inlahen hī?

² Vë-evkūö Heprāi 10:35-39. Yēḵ meh öm atöllö lōn re öm i rītö Yāvē ngaich tölöng angū-ö nö inlahen meh. Pi-a lohten inrē öm hòṅ hayööken yip tahëng nö ngatī atöllö. Lökten më-eṅ öm chumkūöṙen im līpöre Inmeukhömat tö minë ṙô u. Pön rö-ö angū-ö nöng vë-eny inlanken yip la-al ngam Tēv min, pön vë-eny inlahen yip tö chiplö inrē nö i linökölōn Yāvē ngaich asuh min nup inkôlò cha. Ngaich yēḵ meh min öm vë-ekūö në töngatī ngaich fēken u inrē, ngaich yěn yih min minë kanihngen ngaich iṙūöhen min më-eṅ öm i linökölōn Yāvē, hěnghöre mihôiṅ inrē min öm hayööken yip tahëng tö cha nö löklōn Yāvē nö atöllö lōn re ngaich köp inrē nö in e.

3. Asuh nup min kahakkö hī intöönö in ngih ātiköl?

³ Nët min nup intöönö kahakkö hī in ngih ātiköl. (1) Sitih inlahen yip min hamòlṙen ngam inyööngö tö Yāvē? (2) Sitih inlanken min yip tarik hamòlṙen ngam töturëṙö kaha töṙeūla?

4. Achiö yip maheuṅk Yôhan nö hol Yēsū nö el halīöngö?

⁴ Nët kangen më tarik maheuṅk Yôhan nö el ngam heūvö ò, yip hamòlṙen ngam inyööngö tö Yāvē min. Kě-ěvkūö min cha-a tö ngam nômö tö-örheūheu-aṅ. Raneh më tö 1,44,000 ṙôken. (Inm. 7:4) Tö katöllöng cha-a nö ṙā-ang ing panam hòṅ cha nö hol Yēsū nö el halīöngö nö hayöng. (Inm. 5:9, 10; 14:3, 4) Meuk më tö 1,44,000 ṙôken ang Yôhan nö hol Yēsū nö söktöheich nö ikui ngam rôngö Siyôn nö el halīöngö.—Inm. 14:1.

5. Sitih inlahen yip min chööḵ in yip töhachamö elkui in nup yamih ṙētak?

⁵ Löktökūö ik raneh senchurī ngam kintöllö më tö 1,44,000, köṅnyu ṙôken ngaich yip in cha chamuh el halīöngö. (Lūk. 12:32; Rōm. 8:17) Vë-eny nang hī ang Yôhan tö yip tö ōt tit chööḵ cha min, nöng rahëichtit ing manā-aṅ sakamö. Im ranultökūö ngam yöng kanihngen min cha-a nö ‘mikahayö māl’. (Inm. 7:2, 3; 12:17) Ngaich hē ngam yöng kanihngen min cha-a nö kě-ě nö chuh el halīöngö. Ṙòkhöre min më tö 1,44,000 nö hol Yēsū nö hayöng nö el halīöngö.—Mët. 24:31; Inm. 5:9, 10.

6-7. (a) Achīö öp maheuṅk Yôhan ngaich kūich inlahen chiö anga-aṅ unôichrit ò nö meuk më tö hachamö elkui? (b) Pôrò öi maheuṅkkuvö el halīöngö hēk ing panam inrē kūöyòh ayī-ö öi hòṅ meuk taneungtökūö ngam Inmeukhömat im tö 7 mirulö?

⁶ Unôichrit Yôhan nö meuk më tö 1,44,000, meuk më “tömaṙôngö” hēk anga-aṅ töt kanṙeuken tarik. (Inm. 7:9, 10) Achiö öich cha-a më “tömaṙôngö” tarik? Ngöṙô ang Yôhan, “Cha-a yin vē ṙamā-ang el ök yöng kanihngen, ngaich cha-a nö söich minë tö aṙū-uti inyutre nö i mahām ngam pöököre.” (Inm. 7:14) Unôichrit inlahen më “tömaṙôngö” min töt kanṙeuken tarik nö ṙā-ang el ngam tökiröng kanihngen, örheūheu min cha-a nö aṅ nö ikūö ngih panam ngaich teūngen min tö minë töpōyen inkôlò re.—Sal. 37:9-11, 27-29; Inch. 2:21, 22; Inm. 7:16, 17.

⁷ Kô-òren öi fē-a, yěn teungta ṙô min ngam Inmeukhömat tö 7 mirulö, ngaich sitih inlahen lōn min ayī-ö? Kô-en min nö kirööngen ngam ṙanamlōn hī, pòrô öi tö maheūṅkku el halīöngö hēk ikūö ngih panam inrē. Ṙòkhöre min ayī-ö öi ṙamlōn pô hī öi i rītö Yāvē. Ta-a pöri töi ngëichkö inlanken yip lā-al ngam Tēv min hē öp yöng kanihngen.—Mët. 24:21.

8. Ihē öng min nö rultenre ngam yöng kanihngen, ngaich kūötö yih min yip tarik ip hē e?

⁸ Sā maheuk hī ngaich in nuk urěh ātiköl tö minë inyööngö ing panam min nö ha-etngen ngam Tökiröng Pēpilön, minë taṙòkhöre tövaich tinlööken ikūö në panam. (Inm. 17:16, 17) Angū-ö min ngih ranulten ngam yöng kanihngen. Yěn ha-etiyö min nup tinlööken, ngaich pōyen hòng min yip tarik töhòṅ ha-öiny ngam Tēv Yāvē? Hö-ö. Kūichiyö ön im Inmeukhömat tö 6 mirulö tö cha min nö hayunngöre nö el kinluhu, tö ngö manah angū-ö, tö cha min nö ṙātö-ellōnre nö in më mahayöng hēk in më mi-inyiha inrē. Öt i rītö ngam inyööngö min cha-a tö ngam Tēv, lökten min Yāvē nö kaheukö cha nö lamā-al.—Lūk. 11:23; Inm. 6:15-17.

9. Sitih inlahen yip tarik ngam Tēv nö harīkngöre mineukö hē öp yöng kanihngen min, ngaich sitih inlanken min cha-a?

⁹ Hē ngam yöng kanihngen min yip tarik ngam Tēv Yāvē tö harīkngöre mineūkö. Höng cha-a min tö köpsören nö ha-öiny ngam Tēv re ngaich öt holṙen ngam “töṙeūla” min cha-a.  (Inm. 13:14-17) Yěn meuk inlahen cha min yip lamā-al ngam Tēv ngaich tainy min cha-a ngaich holṙen re min nö hakihten yip tarik ngam Tēv. Kinyūngö tö ngam Kōk aṅ Makōk ngöṙô ngam Paipöl nö vënyen e.—Isi. 38:14-16.

10. Yěn ötlēkaṙen min yip tarik Yāvē sitih inlahen min anga-aṅ? (Inmeukhömat 19:19-21)

¹⁰ Yěn ötlēkaṙen min yip tarik ngam Tēv Yāvē, sitih mufē min anga-aṅ? Ngöṙô anga-aṅ nö vë-eny nang hī, “hachohlöngö min ngam lanīnö chu.” (Isi. 38:18, 21-23) Vënyu nang in im tö 19 mirulö Inmeukhömat nö sitih inlahen min ang Yāvē. Tīnten Yēsū min anga-aṅ nö laklen më tarik re nö la-al me tö kunyaha elmat. Ōt min inrē yip kumyung nö hol Yēsū yip ma-ahānga. Hēk tö yip tö 1,44,000 inrē. (Inm. 17:14; 19:11-15) Asuh min öp ṙòng ngam kinyungö? Yip lama-al ngam Tēv Yāvē min, ṙòkhöre min cha-a nö ha-etiyö!—Vë-evkūö Inmeukhömat 19:19-21.

11. Asuh öp manā-aṅ tövënyu im līpöre Inmeukhömat?

¹¹ Yěn keuheūtngöre min yip la-al ngam Tēv nö ha-etiyö, ṙamlōn min yip tarik ngam Tēv ip hē e. Ngaich sitih inlahen min yip el halīöngö? Ṙamlōn inrē min yip el halīöngö yěn ha-etiyö ngam Tökiröng Pēpilön. Ōtre pöri min hēk öp töhěng ṙanamlōn el halīöngö. (Inm. 19:1-3) In ngam mana-aṅ ṙô ngam Inmeukhömat angū-ö nö vënyu ngam ‘inpīhö ngam Sīṅp’ min.—Inm. 19:6-9.

12. Sā ṙô ngam Inmeukhömat 21:1, 2, ihē ang min ngam inpīhö ngam Sīṅp?

¹² Ihē ang min ngam inpīhö ngam Sīṅp? Hamūlöre min më tö 1,44,000 nö el halīöngö, urěh hë tö ngam kinyūngö Armakētòn. Hö-ö pöri nö hē e ngam inpīhö. (Vë-evkūö Inmeukhömat 21:1, 2.) Yěn höng keuheūtngöre min nö ha-etiyö yip la-al ngam Tēv nö ip kinyungö Armakētòn, unôichrit e min ngam inpīhö ngam Sīṅp.—Sal. 45:3, 4, 13-17.

13. Tö sitih manah öng ngam inpīhö ngam Sīṅp?

¹³ Yěn hapīhö ṙung ngam kikōnyö töm kikanö kaheukö ngaich cha-a nö töng hěng nö alaha. Ngatī ṙēngen min hē ngam inpīhö ang Yēsū nö hamūltöre nö in ngam “pīhöre kikānö” më tö 1,44,000. Holṙen re min cha-a nö 1,000 samyeūheu rô-òten nö hayöng nö ing panam.—Inm. 20:6.

14-15. Sitih vinënyi aich më 1,44,000 nö im Inmeukhömat tö 21 mirulö? (Ngëichkö ngam lamā-uk nyat.)

¹⁴ Im Inmeukhömat tö 21 mirulö nö vënyu më tö 1,44,000 nö sā öp tövai panam. “Tufömngöre Yerūsalem” ön ngam minënyö ngam panam. (Inm. 21:2, 9) Söktöheich angū-ö nö ikui minë tö 12 chūök röönti machööḵlö. Ikui minë ihong nö kūichi nup “minë-eny yip tö nët sīön tak mahaköp.” Pingangkūö lohten ang Yôhan ik sā ò nö meuk. Pön ōt ngam minënyö ò nö kūichiyö nö in ngam ihong. Keheūtnyöre anga-aṅ lohten tö ṙanamlōn re!—Inm. 21:10-14; Efi. 2:20.

¹⁵ Tö harīkngöre ön ngih elpanam. Pön höng hěngren ngam rô-òlòng e, ṙôktāk e hēk ngam rôtòng e inrē ik sā e nö kalaha. Ngaich ök talöökö ngam elpanam nöng töt katēhě nö humlum. Nup tö 12 inkūp nöng tasëhe töpōiṙāi. Hanyöötö nuk chūök rööntö machööḵlö hēk nuk kinlōngö ngam elpanam tönuk töṙōlkangen töpōiṙāi ihong. (Inm. 21:15-21) Hěng pöri öp chehen töt mi-im panam. Vë-eny nang hī ang Yôhan nö ngöṙô, “Öt maheūṅku chū-ö tö töhet chūök in e: pò  ngam Mā Tēv Tökeuheūttöre chöngö, tö ngam pököre inrē, nö töhet chūök nö umuh. Ngaich ngam elpanam nö öt hòṅ tavūöyu ötrěhěn nö hòṅ chingëṅtu tö mahayangtö kui e, pô ngam kanôlò ngam Tēv nö hanyatngö kui e ngaich ngam pöököre eṅavö e.” (Inm. 21:22, 23) Ngaich ṙòkhöre më tö hachamö elkui Kristīön nö chuh el halīöngö nö hol Yāvē hēk Yēsū inrē. (Hep. 7:27; Inm. 22:3, 4) Lökten nā Yāvē nā Yēsū nö kaheukö nö töhet chūök nö im elpanam.

16. Asuh nup min inkôlò yip tarik in ngam inyööngö tö 1,000 samyeūheu?

¹⁶ Inmeuktö më tö hachāmö elkui ön ngam tufömngöre Yerusalem, sön pöri më tö maheūṅkku nö ing panam nö hòṅ chumkūöṙen tö minë tövënyu inlahen e. In ngam tö 1,000 samyeūheu min yip tarik mi-iyöng kūö ngih panam nö teūngen tö inkôlò re tö tī ngam tufömngöre Yerūsalem. Vënyen minë inkôlò ang Yôhan nö sā ṙēngen ngam “tahël mak nômö.” Lā taseū ngam tahël “ap chōn nômö” ngaich nuk rōi ök chōn nö inlanken yik pumnāmö tarik. (Inm. 22:1, 2) Ngam “tahël” hēk tö ngam “chōn”, inmeuktö minë halēnlö ngam Tēv anū-ö ip tö 1,000 samyeūheu min. Minë mahayööken tarik min nö hiṙeūtkenre nö chuh im hanetö. Öthěng tak min tö vāhavö ötrěhěn min nö chanöku.—Inm. 21:3-5.

17. Sā ṙô ngam Inmeukhömat 20:11-13 achiö yip min tö teūngen tö inkòlô in öp tö 1,000 samyeūheu?

¹⁷ Achiö yip min tö teūngen tö minë inkôlò in ngam tö 1,000 samyeūheu? Urěh min yip tömaṙôngö töt kanṙeuken, yip töt kô-òngvah nö im Armakētòn. Ngaich yěn kūönu min cha-a nö el öp tufömngöre panam, teūngen inrē më kūön cha tö inkôlò. Vënyu inlahen inrē yip tökapah nö ha-aṅlöng min nö im Inmeukhömat tö 20 mirulö. (Vë-evkūö Inmeukhömat 20:11-13.) Yip “tölöök tötlöök” min tö ha-aṅlöng. (Inl. 24:15; Yôh. 5:28, 29) Tö ngö manah hòng angū-ö tö yip tö kapah min nö ṙòkhöre nö ha-aṅlöng ip tö hěng köṅny samyeūheu? Hö-ö. “Tölöök” tarik ngöṙô in tö cha yip samöl kinpaha re nö löklōn Yāvē. Ngaich “tötlöök” tarik ngöṙô ayī-ö tö cha yip töt teūngen tö ṙētak re nö haköp inlahen Yāvē ngaich kapah. Acha-a pöri yip tö teūngen tö ṙētak re nö löklōn Yāvē sön nö öt kētöre nö löklōn ò, cha-a min tö ha-etiyö, öt ha-aṅlöng inrē  min cha-a.—Mët. 25:46; 2 Tös. 1:9; Inm. 17:8; 20:15.

18. Asuh nup min tömeukö hē kinheūten ngam tö 1,000 samyeūheu?

¹⁸ Yěn ngaich min nö chuh i kinheūṅten ngam inyööngö tö 1,000 samyeūheu, ngaich ṙòkhöre min yip tarik ing panam nö havan hanëtöre. Öt köpsören min ngam tökööl kahëtö Ātöm. (Rōm. 5:12) Ngatī inlahen min më tarik më tökapah sin tö kūö ngam tökööl, nö havanlöre min nö aṅ im kinheūten ngam tö 1,000 samyeūheu.—Inm. 20:5.

19. Asuh öp lāinyngen ngam manā-aṅ kinlaha?

¹⁹ Yěn keuheūt min ngam tö hěng köṅny samyeūheu, ṙānyu min ngaich ngam Sī-ö nö ṙā-ang el öp ṙeūvö, ngaich halō-ongkūö yip töhet tarik min anga-aṅ nö māngenre. (Inm. 20:7) Ngatī inlahen misī anga-aṅ nö kalaha Yēsū. Köp pöri ang Yēsū nö löklōn ngam Yöngre. Teūngen inrē min yip töhet tarik tö ṙētakre ip manā-aṅ kinlaha, nö hameuktö re yěn köp nö lā rītö Yāvē hēk yěn hö-ö. Öp tö köp min nö lā rītö Yāvē anga-aṅ min tö teūngen tö ngam nômö tö-örheūheu aṅ. (Rōm. 8:21) Ngaich öp töt köp pöri, anòngngö vah ngam Sī-ö tö yip ma-ahānga ò min anga-aṅ nö ha-etiyö.—Inm. 20:8-10.

20. Sitih lōn öm ing sā meh ngëichkö minë ṙô ngam līpöre Inmeukhömat?

²⁰ Sitih lōn öm ngaich, ing sā meh ngëichkö minë ṙô ngam līpöre Inmeukhömat? Hö-ö hòng më-eṅ saṙeūnylöng hē meh asehkūöre tö inlahen re min öm ōt yěn teungtökūö minë tö eūka imat ngam līpöre? Öt yīhi ngatötö hòng më-eṅ öm hòṅ hayööken yip tahëng inrē nö löklōn ngam Tēv Yāvē? (Inm. 22:17) Sön ayī-ö lohten öi hòṅ asātô re in Yôhan öi ngöṙô, “Āmen! ta-achö, Mā Yēsū.”—Inm. 22:20.