TÖHAKÖÖPÖ ĀTIKÖL 20
TINKÖÖKÖ 67 “Im inhānga”
Kūö Ngam Hanangenlōn Öi Ahānga!
“Hòṅ urĕh pöri sin, ngam tölöök inhānga nö ahangka, nö i vē taṙòkhöre tarik.”—MĀK. 13:10.
ASUH ÖP MIN HAKÖP HĪ?
Yěn ōt ngam hanangenlōn nö in hī ngaich holtö nganöötöre min ayī-ö ahangkö ngam tölöök inhānga.
1. Asūp vinë-eny nang hī in ngam ënuel mīting ik 2023?
KÔ-EN nö töt insā-av ngam ënuel mīting, a ik 2023. Vënyu nang ayī-ö tö nup mikah aṅmat ngam Paipöl nö halööktitvö. Ōtngöre inrē nup minkahtölōn tövai i alaha ngam tölöök inhānga. Tö sā hī öi mikahtökūöre tö yip tarik min lohten nö kētu ṙētak nö holṙen Yāvē tö yip tarik ò unôichrit inhëtngö ngam Tökiröng Pēpilön. Ngaich inrē ayī-ö mikahtökūöre ik Nòvempör 2023 tö yip pöplisör min nö öt uroh nö kūichtö nup taṙòkhöre imat nup ripōt re. Tö ngö manah hòng ngaich ngamla-en inhangkö ngam tölöök inhānga nö kūönngöre tö kūö minë tö harīki? Hö-ö öt ngatī!
2. Asā ngam ṙētak nö rahëichtit kūö yòh nö tötṙanāngen ngam la-en inhānga? (Mākös 13:10)
2 Asā ngam ṙētak nö kūönngöre, ngatī ngam la-en inhānga nö töt ṙanāngen hēk nö in hī. Kūö yòh? Kūö ngam manāngen ngaich nöng röhtayanīhi. Vënyu nang in tö ngam līpöre Mākös tö ṙô Yēsū nö tötṙanāngen ngam la-en inhangkö ngam tölöök inhānga nö in ngih manā-aṅ sakāmö. (Vë-evkūö Mākös 13:10.) Ngatī ṙô tī inrē ang Mëtiv nö kūichö e, nö urēhěkūö yanīhi ngam ‘manāngen’ min nö keuheūtngöre chūök ngam tölöök inhānga nö vënyu. (Mët. 24:14) Manāngen yòh öp ihih tö kakka? Manāngen ngam tötlöök panam ngam Satān. Urěhangen tī ang Yāvē nö halēnlö ngam ‘ṙētak hēk sakāmö’ ngam manāngen min yěn yih. (Mët. 24:36; 25:13; Inl. 1:7) Kaheuk sakāmö inrē ayī-ö haröhtöre öi in ò. (Rōm. 13:11) Iṙūöhen pöri ayī-ö ahangkö ngam tölöök inhānga, hanöng sā ngam manāngen nö öl nö yih.
3. Kūö yòh öi hòṅ ahangkö ngam tölöök inhānga?
3 Hěng ön ngih intöönö tötṙanāngen tö hòṅ fēka tö hī ṙòkhöre: Kūö yòh öi hòṅ ahangköm tölöök inhānga? Kūö ngam hanangenlōn. Ngam tölöök inhānga vahënyö hī hangenlōn ayī-ö tö e, hangenlōn inrē tö yip tarik, mööḵlö pöri ngam hangenlōn hī tö Yāvē hēk tö ngam minë-eny ò. Ta-a chěi töi kakken në tö lūöi min.
HANGENLŌN IN TÖ NGAM TÖLÖÖK INHĀNGA
4. Sitih mufē öi ṙung yěi hang nup tövai inhānga?
4 Asehkūöre man yěm hang öp töhěng tak aṅ el ngam mikūönö meh nö hòṅ kūönu hēk yěm teūngen tö kinmānöre ngaich sitih mufē më-eṅ? Keuheūtnyöre më-eṅ tö ṙanamlōnre hēk ilööṙen inrē öm vë-eny nang ngam mikūönöre hēk yip hol meh tö inlahen e. Asehkūöre öm chěi yěm hang inlahen ngam panam min nö tufömlöng, tö ngö manah yěm hang ngam Pūlngö ngam Tēv, ngaich sitih mufē më-eṅ?
5. Sitih mufē më-eṅ ik sā meh rěhtenre mikahtökūö re tö ngam kanô-en? (Ngëichkö ngam nyat.)
5 Sitih mufē më-eṅ ik sā meh rěhtenre akahakūö tö ngam kanô-en im Ṙô ngam Tēv? Ik sā meh haköp inlahen Yāvē nö hangenlōn tö meh hēk lōnu inrē anga-aṅ tö meh el ngam mikūönö ò, ngaich sitih mufē më-eṅ? Hēk ik sā meh mikahtökūöre tö ò min nö ha-etngen në töng sitih kanihngen hī, ngaich ha-aṅlen yip holmaneuk meh min nö in öp tufömngöre panam, sitih mufē më-eṅ hē e? (Māk. 10:29, 30; Yôh. 5:28, 29; Rōm. 8:38, 39; Inm. 21:3, 4) Ṙamlōn lohten më-eṅ ik sā meh hāngö u hēk lökngöre inrē ngam ellōn meh lökten öm vë-eny nang yip tahëng tö inlahen u.—Lūk. 24:32; Asātô e im Yarimiā 20:9.
Ik sā ranehtö ahang hī hang ngam tölöök inhānga, lökngöre ellōn ayī-ö tö e lökten öi ilööṙen vë-eny nang yip tahëng! (Ngëichkö ngam perekrāf 5)
6. Asūp haköplö hī in ngam ekspirīön nā prötör Örnös nā sistör Rōs?
6 Töi ngëichken ngih töhěng inchōḵ elmat. Ik sā prötör Örnös b nö söm höiny samyeūheu, kapahlöng anga-aṅ tö ök yöngre kikōnyö. Ngöṙô ngam Prötör: “Ngölōn chū-ö: ‘Chuh el halīöngö hòng ngaich öp yöng chu? Hēk höng hö-öv röng?’ Yěich meuk inlahen yip tahëng nyīö nö in yip yöngre, ngaich haṙivlōn chū-ö.” Örheūheu ngam prötör nö chuh in öp anūlö ök yöngre nö sulngöre nö vë-ekūötēv nö ngöṙô: “Plīs Tēv, vë-eny nang chu man isuh öp yöng chu.” Unôichrit ngam tö 17 samyeūheu, hěngtak öp mahatön kūö ngam prötör tö ò yěn hòṅ kē-ě istötī. Ilööṙen ngaich ngam prötör nö hōḵ. Ngaich ik sā ò nö mikahtökūöre tö yip tökapah nö sā töng maharòh hēk hachohlen cha inrē min ngam Tēv nö ip tufömngöre panam, ötkūöngö ngam ṙanamlōn ò hē e. (Mum. 9:5, 10; Inl. 24:15) Samyeūheuv ṙò-òten chū-ö öich höng fēken në intöönö, ngaich pöri öich teūngen tö sanapṙô u! Ṙamlōn ngam prötör nö haköp minë tövai ṙô imat ngam Paipöl. Holṙô ò ngaich öp pīhö ò Rōs nö haköp mat ngam Paipöl, ngatī inrē anga-aṅ nö ṙamölōn. Ik 1978 ngaich cha-a nö vōkö. Hangenlōn cha-a tö minë kanô-en aṅ mat ngam Paipöl töp lökten cha nö vë-eny nang yip aṅpatī re, holre hēk tö yip tahëng inrē. Ngaich nā prötör Örnös hēk tö ngam pīhö ò Rōs nö pōyen tö tö 70 samyeūheu nö vë-eny nang yip tahëng tö ngam kô-en hēk hayööken cha inrē nö kē ngam vinôkö.
7. Yěn ōt ngam kanô-en aṅmat ngam Paipöl nö ellōn hī, ngaich sitih inlahen min ayī-ö? (Lūkös 6:45)
7 Yěn ngaich ngam kanô-en aṅmat ngam Paipöl nö chaphötre nö ellōn hī, ngaich öt höngngöh ayī-ö pöi hòṅ vë-eny nang yip tahëng inrē. (Vë-evkūö Lūkös 6:45.) Kô-en ayī-ö sā mufē yik raneh Kristīön ik sā cha nö ngöṙô: “Tön rö-övö in ihö kô öt ṙô-òv tö nuk maheuṅkre, ahangre inrē.” (Inl. 4:20) Hangenlōn in tö ngam kanô-en lökten öi lōnu töre öi vë-eny nang yip tö pōyen tarik tö inlahen u.
HANGENLŌN IN TÖ YIP TARIK
8. Kūö yòh öi kalēḵ alaha vë-eny nang yip tarik tö ngam tölöök inhānga? (Ngëichköm pòks “ Hāngenlōn Tö Tarik—Haköpten Cha Inrē.”) (Ngëichkö ngam nyat.)
8 Sā inlahen Yāvē hēk tö ngam kūön ò in ayī-ö inrē öi hangenlōn tö më tarik. (Inch. 8:31; Yôh. 3:16) Haṙivlōn in yěi meuk yip tarik “töt Tēvu” hēk “töt maheūṅkku” inrē. (Efi. 2:12) Pōyen minë kanihngen cha, ōt pöri ngam inyööken cha aṅ in hī ngam Pūlngö ngam Tēv. Hangenlōn in tö më tarik hēk chumkūöṙen inrē tö cha, lökten öi ma-ainyre öi ahangkö ngam tölöök inhānga. Tö pōiṙāi ön ngih tölöök inhānga. Pön teūngen mihôiṅ yip tarik tö maheūṅkköre nö löktö in e, mihôiṅ inrē nö vai ngam tinrīken cha töngamuh ngaich teūngen min tö ngam ‘tökô-en nômö,’ tö ngö manah, tö cha min nö mihôiṅ nö teūngen tö ngam nômö tö örheūheu-aṅ.—1 Tim. 6:19.
Hangenlōn in tö më tarik chumkūöṙen inrē tö lökten öi öt ṙāngö ṙētak im inhangkö tölöök inhānga (Ngëichken ngam perekrāf 8)
9. Asūp min finëlö yip tarik ip yamih ṙētak hēk kūö yòh? (Isikīěl 33:7, 8)
9 Hangenlōn in tö yip tarik lökten öi vë-eny nang cha tö inlahen ngih tötlöök panam min nö röhta inhëtngö. (Vë-evkūö Isikīěl 33:7, 8.) Haṙivlōn in tö yip hanöng kisānöre hēk tö më aṅ chīṙöre, yip töng ma-haṙamngölōnre nöng inup tinrīken re hēk öt akahakūö inrē tö ranöhta ngam tökiröng öt kanòlô min ngam töt “rēhěn hēten tö ranehlö ngih panam, öt rēhěn nö unôichngöre min nö hēk.” (Mët. 24:21) Hòṅ vë-eny nang cha in tö ṙētak ngam kinṙòkken minë tövaich tinlööken hēk inhetngö ngih tötlöök panam ip Armakētòn. Ngaich unôichrit e min ngam Armakētòn nö ha-etngen ngih tötlöök panam. (Inm. 16:14, 16; 17:16, 17; 19:11, 19, 20) Lökten in öi lōnu tö cha nö chumkūöṙen nö hang ngih finëlöre hēk holṙen hī inrē öi ha-öinyö Yāvē. Sitih inlahen pöri min yip hanöng kisānö hī hēk yip tahëng töt chumkūöṙen nö hang ngih finëlöre?
10. Kūö yòh nö töt ṙanāngen ngam inlahen hī öi iṙūöhen vë-eny nang yip tarik tö inlahen nup yamih min ṙētak?
10 Sā hī ngaich öi vënyu nang in ök urěh ātiköl, tö yip tarik min yěn meuk inhetngö Pēpilön lohten min cha-a nö ṙātö-ellōnre nö in ngam Tēv ngaich öt kò-òngvah min nö ahëtiyö ip yamih ṙētak. Köpölōn: Yē hī töngamuh öi vë-eny nang cha tö ngam tölöök inhānga, ngaich lohten min cha-a nö fēken u ip ṙētak öp tökiröng kanihngen. (Asātô e im Isikīěl 33:33.) Lohten min cha-a nö fē-ěre tö ṙô yip vamë-eny nang cha tö inlahen nup tö hòṅ yamih hēk lohten inrē nö urēhěkūö ngam manāngen min nö holṙen hī öi ha-öinyö Yāvē. Lökten öm köpölōn tö inlahen ök yōm kinlōngö (jailer) aṅ Filipī nö ṙātö-ellōnre anga-aṅ nö in Yāvē unôichrit ök tökiröng kumyeūnö. Ngatī ṙēngen töngamuh yip tarik yěn öt hangihtöre tö ngam tölöök inhānga, ngaich lohten min cha-a nö meuk kinyinlö ngih panam, töngö manah yěn ahëtiyö min ngam tökiröng Pēpilön, ngaich ṙātö-ellōnre min cha-a nö in Yāvē.—Inl. 16:25-34.
HANGENLŌN IN TÖ YĀVĒ HĒK TÖ NGAM MINË-ENY Ò INRĒ
11. Sitih inlahen öi kētö nööinyö Yāvē, milēḵṙen tö ò hēk kētö kumlēḵre inrē öi in ò? (Inmeukhömat 4:11) (Ngëichkö ngam nyat.)
11 Ngam tökiröng chö-öny hī öi ahangkö ngam tölöök inhānga kūö hī hangenlōn tö Yāvē hēk tö ngam töhet minë-eny ò inrē. Yěi ahangkö ngam tölöök inhānga ngaich hameuktöre ayī-ö hangenlōn tö ò hēk hòṅ ha-öinyö ò inrē. (Vë-evkūö Inmeukhömat 4:11.) Ṙātö-ellōnre in tö Yāvē nöng anga-aṅ tö mihôiṅ nö ha-öinyö, eū-eu hēk tö minhôiṅyu inrē. Yěi hameukhö mat yip tarik tö ngam Tēv nö “vamīlen në taṙòkhöre” hēk kūö ò inrē ayī-ö öi ōt, ngaich hameuktö minlēḵṙen re ayī-ö tö Yāvē hēk kētö nöinyö ò inrē. Ngaich yěi kētö ṙētakre, kumlēḵre hēk kanòlô re in ngam la-en tölöök inhānga hēk ahānga inrē asā tölngö öp kanô-òṅ re, sā kamëtö kumlēḵre min ayī-ö in ò. (Mët. 6:33; Lūk. 13:24; Kòl. 3:23) Hangenlōn in tö ngam Tēv lökten öi ṙamlōn vënyö inlahen ò in yip tahëng. Vënyö nang cha inrē ayī-ö tö minë-eny ngam Tēv hēk minë tinrīken ò inrē. Kūö yòh ayī-ö ngatī inlahen?
Yē hī öi kētö ṙētakre, kumlē re hēk rupīö re öi im inhangkö tölöök inhānga hēk sā öp töng tölngö hī inrē ngatī inlahen öi ahānga, ngaich kamë-ekūö Yāvē ayī-ö tö u (Ngëichköm perekrāf 11)
12. Sitih inlahen ayī-ö ha-ëtlö ngam minë-eny Yāvē yěi ahānga?
12 Hangenlōn in tö Yāvē lökten öi hòṅ ha-ëtlö ngam minë-eny ò. (Mët. 6:9) Pōyen nun minë ṙô ngam Satān tö minyôny inlahen Yāvē hēk ötlēḵken ngam minë-eny ò inrē. Lōnu in töre öi kēngö ngam sinūöchkö fālen ò. (Ran. 3:1-5; Yōp 2:4; Yôh. 8:44) Höng löktö in ngam inhangkö tölöök inhānga in öi vë-eny nang yip tarik tö inlahen minë tinrīken ngam Tēv. Pöi lōnu tö cha nö akahakūö tö ngam Tēv nö tö hangenlōn hēk tö löngö tī inrē nö hayöng. Hòṅ vë-eny nang cha inrē ayī-ö tö Yāvē min nö löktö in ngam Pūlngöre tī nö kēngen minë töng sitih kanihngen ngaich kētö ngam tövai panam min nö in yip tarik, ngam tö aṅhav kūö min tö ngam lanāmö hēk ṙanamlōn inrē. (Sal. 37:10, 11, 29; 1 Yôh. 4:8) Yē hī vënyen në in yip tarik, ngaich kē la-are ayī-ö in Yāvē hēk ha-ëtlö ngam minë-eny ò inrē. Ṙamlōn in pöi köp öi asā ngam minë-enyre. Öi sitih inlahen?
13. Kūö yòh öi ṙamlōn töre öi kaheūkö Vamënyen Yāvē? (Isayā 43:10-12)
13 Katöllen hī an Yāvē öi “Vamënyen ò.” (Vë-evkūö Isayā 43:10-12.) Inuk urěhngöre samyeūheu yik Yōm La-en nö ngöṙô tī nö kūich ök chitrī: “Tökiröng ön nö minlēḵken hī kaheūkö öi Vamënyen Yāvē.” c Töi mikahtökūöre öi löktö in ngih töhěng inchōḵ elmat. Asehkūöre man, Sūöchlöng fālen më-eṅ hēk hachōichi ngam minë-eny meh, ngaich kēkaṙen kinhòklö kui meh. Achīöp katöllö meh min nö kamhòklö kui meh? Lohten min öm katöllö öp tarik tö keuheūtlöre mikahkūö tö inlahen meh hēk öp chūök ṙinātö-ellōn meh inrē. Ngëichkö öp tinrīken ò inrē min më-eṅ yěn tövai hòṅ yip tahëng nö ṙātö-ellōnre nö inup ṙô ò. Asehkūöre öm chěi tö inlahen Yāvē nö katöllen hī öi Vamënyen ò. In e ayī-ö akahakūö tö ò nö keuheūtlöre mikahkūö tö inlahen hī hēk ṙātö-ellōnre inrē nö in hī. Ṙātö-ellōnre anga-aṅ tö hī min öi vënyö ngam inlahen ò öi in yip tahëng tö ò nöng anga-aṅ tö kô-en Tēv. Kô-en angū-ö nö tökiröng nö ṙanamlōn hī. Lökten ta-a ui ṙāngö ṙētakre öi vënyö ngam minë-eny ngam Tēv öi in yip tahëng hēk hameuknyö minë sinūöchkö fālen ò inrē nö tövaich. Ngatī inlahen min ayī-ö öi köp asā ngam minë-enyre tö kētu tö ò, ṙamlōn in töre öi kaheūkö Vamënyen Yāvē!—Sal. 83:18; Rōm. 10:13-15.
HANÖNG SĀ YANIHI ÖP MANĀNGEN IṘŪÖHEN ÖI AHĀNGA
14. Asuh öp tö meukka yanīhi tö hī?
14 Ròkhöre in öi kapahare meuk minë tö hòṅ yamih ṙētak! Meūka in tö yip tarik min nö hō-en ngam kanô-en urēhěkūö yanihi ngam tökiröng kanihngen. Hěnghöre ṙamlōn inrē ayī-ö öi hang inlahen yip tarik min nö ṙāngö panam ngam Satān ngaich yihtöre nö holṙen hī öi ha-öinyö Yāvē ip ṙētak öp tökiröng min kanihngen!—Inl. 13:48.
15-16. Asuh öp ihih la-en tö iṙūöhen kinëken ngaich tö irô-òten angū-ö?
15 Pōyen nun minë la-en hī urēhěkūö yanīhi ngam tökiröng kanihngen. Hòṅ ahangkö ngam Pūlngö ngam Tēv ayī-ö nö keuheūtngöre chūök nö ikūö ngih panam, pön öt hēk min ngih la-en nö kēkaṙen. Hòṅ fēlen yip tarik ayī-ö. Hēk vë-eny nang cha inrē tö ngih tötlöök panam nö röhta inhëtngö. Yěn yih min ngam ṙētak kinṙôka ip hē öp tökiröng kanihngen, ngaich hē-e min cha-a nö möl nö akaha elmat tö ngam inhānga nö lamöktö in ngam Tēv Yāvē.—Isi. 38:23.
16 Asuh öp min inlahen hī yěi akahakūö tö u? Holtö ṙanamlōnre hēk nganöötöre min öi ahangkö ngam tölöök inhāngā, kūö hī hangenlōn tö ngam tölöök inhānga, tö yip tarik möthë tö ngam Tēv Yāvē hēk tö ngam minë-eny ò inrē. Höng iṙūöhen ayī-ö in ngih la-en, hanöng saha Yāvē nö ngöṙô, “Ngaich ön nö keuheūten ngam la-en inhānga!”
TINKÖÖKÖ 54 “Angū-ö Ön Ngih Talöökö”
a Kēkaren hē e ngam ënuel mīting ik 7 Òktopör, 2023 nö in ngam panam Amerika i Nīu Yôk el ngam Nīupörk Ësemplī Hôl. Unôichngöre angū-ö hamyeuknyu nö el ngam JW Pròtkasting. Im Part 1 ik Nòvempör 2023 angū-ö vahë nö yih ngaich in ngam Part 2 im Chönvörī 2024 inrē.
b Yěm hòṅ haköp inlahen tinrīken ngòh prötör ngaich kò-òren öm chuh el ngam vëpsāit jw.org/hi ngaich in chöh pòks öm taëp ngam “Paipöl Me Merē Söpī Sövalō Kē Chövap Milē.”
c Ngëichkö ngam Yīörpuk Òf Chēhovas Vitnesös im Mārch 2007 pěch 3.