1-2. (a) Kūö yòh nap tö tufömngöre pamīhöre nö hôṅ ṙinātu-ellōn nö in Yāvē? (Salmai 37:3, 4) (b) Asuh öp min haköp hī el ngih ātiköl?

TÖHÒṄ kēḵ ngam pinīhö ömeh, hēk töfömngöre inpīhö ṙöng? Yěm hòṅ, sön öm ṙamlōn lohten öm afēkö inlahen re öm in öp hanangenlōn re min. Heūṅ, kanihngen nup muh min lākūö meh, ngaich pōyen inrē nup tö hòṅ atöllö meh. Nup atöllö meh ing töngamuh, anū-ö min vamënyö inlahen nā yěn ṙamölōn hēk yěn höö. Yēḵ nā pöri min kēḵ inyööken re in Yāvē, ngaich löngö atöllö min na-a, ngön inrē min ngam innôlö nā an in Yāvē, ṙamölōn min nā-a. Yěn öt ngatī pöri, ngaich mihôiṅ nö kēngö nup ṙanamlōn nā min nup kanihngen yamih.—Vë-evkūö Salmai 37:3, 4.

² Pòrô ön ngih ātiköl nö chö-öny tö yip tö fömtören nö hapīhö, minë kanihngen pöri tövënyu nö imat e, ṙòkhöre yip pamīhöre nö meukö u. Haköp inlahen ngam pinīhö min ayī-ö öi in yik tarik imat ngam Paipöl yik ṙamātö-ellōnre nö im Tēv. Ngëichkö haköp re inrē min ayī-ö in yip pamīhöre in në ṙētak hī töngamuh.

3-4. Asuh nup tömihôiṅ nö kanihngen nap tö tufömngöre pamīhöre?

³ Mihôiṅ min yip tahëng nö tölṙô nap pamīhöre nö asīnkö nup töng nehngenre nö inlaha pamīhöre. Sā yip aṅpatī min nö kò-òren nö hōten cha nö fēkö inlahen re  nö hòṅ kūönu hēk yip hol cha min nö tölṙô cha nö vīlö patī re öp chūök cha nö hamūl nup chehen inṙamngölōn cha.

⁴ Yēḵ minā pamīhöre pöri min nöng hang ṙô cha, ngaich mihôiṅ min cha-a nö vāichö atöllö, ngaich fônglö kui tö hötṙeh re. Höng lamöhnyö minë hötṙeh re min cha-a ngaich öt ṙētakvö nö haköp mat ngam Paipöl, hēk öt hol ṙô re tö mikūönöre inrē nö haköp, hēk öt ṙētakvö nö chuh el fīl hēk chuh el mīting inrē. Löhlötī min cha-a tö minë ṙētak tö mihôiṅ öre nö kahëtö cha nö i linöökö lōn Yāvē.

5. Asuh öp haköplö hī im inlahen nā Klôs nā Merisā?

⁵ Ngaich in ṙung meuk yip pamīhöre tö aṅhav in tö nup chehen inṙamngölōn, sön nöng öt ṙamölōn. Sā inlahen nā Klôs nā Merisā. * Ik ranehten cha nö pīhöre, nëtre tak cha-a nö kamān pön sōḵ nö hēngö hanakten tö nup töng kuilōn re. Ötrēhěn pöri cha-a nö ṙamölōn. Ngö ṙô ang Klôs: “Keuheūttöre minë töng lōn āi chehen inlööten, öt afēku pöri āi tö inlahen re öi ṙūöhnyö minë la-en re i linöökö lōn ngam Tēv, höng örheūheu öi afēkö nup la-en re.” Pi-a man më-eṅ inrē öm kôtökūö tö ngam finchūrit minë chehen inṙamngölōn nö öt kētö ṙanamlōn hī. Um hakūöṅnngö ellōnre yěm hòṅ halöktitre. Mihôiṅ man asīnken minë tövai inchō kūöre imat ngam Paipöl. Ta-a töi ngëichkö haköp yip töpīhövö kikōnyö nö in ök Rācha Yēhōsafāt.

6. Sitih inlahen ök Rācha Yēhōsafāt ik sā ök tökiröng kanihnhen nö yih nö ikūö ò? (Inchōḵ-oṙô 3:5, 6)

⁶ Yī-ö töpīhövö kikōnyö, ngö lōn öi ṙunghöre, sitih inlaha öich vö min ngëichkö nômö ngih mikūönö re? Yěm ngatī mufē, ngaich kô-òren öm ngëichkö inlahen Rācha Yēhōsafāt. Töölô misī ang Yēhōsafāt nö ngëichkö ök panam Yūta. Tö kiröng ngam la-en ò. Sitih inlahen ök pökeh? Nup töng kanô-òṅ ò la-en, anū-ö kahëken ò. Tö sā ò nö hangönlö ök kinlōngö ök panam Yūta ngaich halēnlö yik kumnyung tö 11,60,000 ṙòken. (2 Kin. 17:12-19) Unôich pöri ngaich nö yih ngam tö kiröng kanihngen nö ikūö ò. Hòṅ kiyung yik aṅ Amön, aṅ Mō-ap tö yik aṅ Sēir inrē nö la-al ò. (2 Kin. 20:1, 2) Ṙatö-ellōnre pöri anga-aṅ nö in Yāvē ngaich havëkö inyööken re nö in ò. Asīnkö ṙô ngam inlēnö anga-aṅ imat ngam Inchōḵ-oṙô 3:5, 6. (Vë-evkūö.) Lökten im ṙô Yēhōsafāt in nö vë-ekūötēv öi akahakūö tö ṙôken ngam ṙinatö-ellōn ò  nö in Yāvē im 2 Kinṙötngö 20:5-12. Hangö ṙô hòng anga-aṅ tö Yāvē nö vë-ekūötēv?

7. Sitih tī ang Yāvē nö sapṙô Yēhōsafāt nö vë-ekūötēv?

⁷ Lökten in Yahasī-el ṙô ang Yāvē nö vë-ekūö Yēhōsafāt nö ngö ṙô: “Kē chūôkre yin sök hak unhalöinyköre, ngëichkö minhôiṅyö ngam Mā Tēv nö lā in yī-ö.” (2 Kin. 20:13-17) Akahakūö ayī-ö tö hī öt hěngheuh ngatī inlahen yěi kiyung. Lamöktö in Yāvē pöri minë inlēnö cha. Lökten ang Yēhōsafāt nö ṙatö-ellōnre nö in Yāvē ngaich kēkö kaha minë inchöngten re tötī ò. Ik sā ò nö kirööngöre nö kiyung, öt ṙātö yik kumyung anga-aṅ nö lā kūöre pön ṙatö yik tumkökṙôre. Ngaich sā ṙô Yāvē ngatī inlahen ngaich cha-a nö ötkô-ôtī tö yik la-al re.—2 Kin. 20:18-23.

8. Asuh öp haköplö ngam tö pīhövö kikōnyö nö in Yēhōsafāt?

⁸ Yī-ö töpīhivö kikōnyö, yī-ö yin tö kē-ěvkūö tö ngam la-en nginëichkö minë mikūönöre. Yěn yih nup kanihngen nö ikūö meh, um hěngheuh ngö lōn töre min öm mihôiṅ kahngenre öm la-al u. Ṙatö-ellōnre pöri öm ikui Yāvē. Vë-ekūötēv öm kahngenre hēk holṙô ngam pīhöre inrē. Vë-ekūö ngam Paipöl tö minë līpöre inrē mahayööken hī akah elnang tö ṙôm Paipöl, ngaich kēkö kaha nup inlēnö tö kētu nö imat e. Ōt yip min umuh töt ṙamlōn nö ngëichkö minë atöllö meh, hayiölngen meh min inrē. Ngö ṙô inrē min cha-a, höng ngam rupīö ön kòl tö ṙamölōn tī töm mikūönö meh. Köpölōn pöri më-eṅ tö Yēhōsafāt. Pòrô nö ngön ök kinlōngö ök panam tö tī ò, pōyen inrē yik kumyung, sön anga-aṅ nöng ṙatö-ellōnre nö in Yāvē ngaich hang nup inchöngten re tö ò. Chiplö anga-aṅ nö ikūö Yāvē, lökten Yāvē nö öt ṙāngen ò. Öthō an inrē min nö ṙāngen meh. (Sal. 37:28; Hep. 13:5) Asuh nup pökeh tö mihôiṅ nö la-en minā pamīhöre hòṅ cha nö ṙamölōn?

9. Tö sitih inlahen ök pròfět Isayā tök pīhö ò inrē?

⁹ Mööḵlö lōn nā Isayā tök pīhö ò tö ngam linöökö lōn Yāvē. Pròfět ang Isayā, ngaich vënyö nang hī ngam Paipöl tö ök pīhö ò inrē nö “kikānö nö pròfět.” (Isa. 8:1-4) Tövai cha-a nö inchōḵ elmat yip töfömtören nö pīhöre pön urěhlö minë la-en ngam Tēv cha-a!

10. Sitih inlahen öich kò-òren minā pamīhöre yēḵ cha nö hòṅ tānyö ṙòkti minë la-en re nö i linöökö lōn Yāvē?

¹⁰ Mihôiṅ yip Kristīön pamīhöre töngamuh nö asīnken Isayā tö ök pīhö ò inrē nö pōyen la-en nö i linökölōn Yāvē. Mihôiṅ cha-a nö haköp inlahen minë pròfěsī imat ngam Paipöl ngaich kakkö inlahen taneung tö kūö u töngamuh. Yēḵ cha min nö ngatī inlahen ngaich ngönlöre ṙinatö-ellōn cha-a min nö ikui Yāvē. * (Tai. 1:2) Mihôiṅ inrē cha-a nö afēkö inlahen re nö sitih inlahen nö hateūngngö minë pròfěsī töngamuh. Tö sā ngam pròfěsī inlahen inhangkö ngam tölöök inhanga urěhěkūö yanihi ngam manāngen, mihôiṅ cha-a nö fēkö nup tīre nö i inteunngö ngam pròfesī. (Mët. 24:14) Yēḵ cha min  nö meuk taneungtökūö minë pròfěsī ngaich ngönlöre min ngam kuilōn cha nö hòṅ tānyö ṙòken minë la-en re nö i linöökö lōn Yāvē.

11. Asuh ök inlahen nāṅ Prisilā nāṅ Akula nö i Kòrin ngaich kūö yòh?

¹¹ Haköplu më töfömtören nö hapīhö nö in nāṅ Prisilā nāṅ Akula. Yahūti cha-a nö mi-iyöng Rōm pöri. In e cha-a nö teūngen töm tölöök inhānga ngaich vītöre nö mahaköp nö in Yēsū. Ṙamlōn sin cha-a nö im kamngö chūk re, hanöng saha ök mahayöng ang Klòtiös nö kētö chööngö yik Yahūti nö ṙāngö Rōm. Kiröngö kanihngen ngaich cha-a, pön hòṅ ṙāngö ngam patī re mu-urěh ngaich chöh tufömngöre patī re, ngaich havanlö ngam pisnes(business) re inrē vinī inrukui. Unôichngö minë la-en ngam Tēv hòng pökeh ngaich cha-a tö kūö minë kanihngen re? Hö-ö, pön urěhlö ngam Pūngö ngam Tēv cha-a. Ik sā cha nö i Kòrin, ngaich holṙen Pôl cha-a nö hayööken yik hol maneukre aṅ el ngam māṅ hěnghöre hareuskö alaha cha inrē. Ngaich chuh in nup tahëng acha-a panam nup tö öl nö teunghu töm kanô-en. (Inl. 18:18-21; Rōm. 16:3-5) Iṙūöhen ngaich cha-a nö i linöökö lōn ngam Tēv ngaich ṙamlōn!

12. Kūö yòh yip pamīhöre nö hòṅ vë-ekūö höö tö nup la-enre min nö i linöklōn ngam Tēv?

¹² Mihôiṅ yip tufömngöre pamīhö re nö asīnken nāṅ Prisilā nāṅ Akula nö urěhlö minë la-en ngam Tēv. Mihôiṅ cha-a nö urěhkūö re nö hapīhö nö vë-ekūöre tö minë kahëken re min la-en i linöklōn Yāvē. Ngaich yēḵ cha ngaich nö pīhöre ngaich holṙen höö cha-a nö in minë la-en. Meuk minë inkòlô re min cha-a tö tī Yāvē yēḵ cha nö ngatī inlahen. (Mum. 4:9, 12) Kò-òṙen öi ngëichkö inlahen nā Rösöl nā Elisapet. Ngö ṙô ang Rösöl: “Urěhekūö ai öi hapīhö vë-ekūöre ai tö minë la-en re min öi löklōn Yāvē.” Ngö ṙô ang Elisapet: “Kūö inlahen ai öi vë-ekūö höö öi urěh lökten ngaich ai öi lööngö  atöllö ngaich teūngen öi kēken minë la-en re.” Unôichrit e ngaich nā Rösöl nā Elisapet nö chuh Maikronesiā ngaich in e nö la-evṙen ngam chūökö tö lōntö tarik ma-ahangköm tölöök inhanga.

13. Yē hī min öi ṙatö-ellōnre in Yāvē sā ṙô ngam Salmai 28:7 sitih inlahen min ayī-ö?

¹³ Pōyen yip pamīhö re tö sā inlahen nā Rösöl nā Elisapet nö öt hatāilö tinrīken re, pōihata pöri cha-a nö kētö ṙētak re nö i inhangkö ngam tölöök inhanga hēk inköptö yip tahëng inrē tö ṙô ngam Tēv. Yöölen yip pamīhöre yěn afēkö minë kahëken re la-en ngaich teūngten nö kēken u pön meuk inlahen ngam Tēv Yāvē min cha-a nö chumkūöṙen tö cha, ngönlöre inrē min ngam ṙinatö-ellōn cha nö i kui ò ngaich möl cha-a nö teūngen tö ngam tökô-en ṙanamlōn.—Vë-evkūö Salmai 28:7.

14. Asuh ök ṙinatö-ellōn Pītör tö ök pīhö ò inrē nö in Yāvē? (Mëtiv 6:25, 31-34)

¹⁴ Mihôiṅ yip pamīhöre nö haköplu nö in Pītör tök pīhö ò inrē. Unôichrit tö tafūöl chumngeṅtö hēk ang Pītör nö meuk kūö Yēsū, ngaich tölṙô ò ang Yēsū nö keuheūttö ṙētakre nö im inhangköm tölöök inhanga. Tökiröng angū-ö nö fësla Pītör, pön ōt ngam mikūönö ò töhòṅ ngëichka nômö tö ò. Kamēḵ kāḵ ang Pītör nö chöh anaha nômö ngam mikūönö re. (Lūk 5:1-11) Löngö atöllö pöri ang Pītör, ngaich kētöre holṙen Yēsū nö ahangköm tölöök inhanga. Holuṙen inrē anga-aṅ tö ök pīhöre. Vë-eny nang hī ngam Paipöl tö inlahen Pītör nö kumtö ök pīhöre nö yěn havötaröön nö ahangköm tölöök inhānga. (1 Kòr. 9:5) Kô-en nö tö akaha ök pīhö Pītör. Lökten ang Pītör nö öt piyu-uṙô nö kētö inlēnö yik pamīhöre. (1 Pīt. 3:1-7) Ṙinatu-ellōn nā Pītör nö in Yāvē tö cha min yěn urěhlö minë kuilōn ngam Tēv ngaich öt löktu ang Yāvē nö öt chumkūöṙen tö cha.—Vë-evkūö Mëtiv 6:25, 31-34.

15. Asuh öp haköplö hī in nā Tiyāko nā Estör?

¹⁵ Yēḵ nā ngaich an tövai ṙò-òten an pīhöre, sitih inlahen ön min asīöp ngam kuilōnre ön ṙūöhlö inlahen re i linökö lōn ngam Tēv? Mihôiṅ nā-a ön haköp inlahen yip pamīhöre tö vënyu inlahen el minë ātiköl tö ngö kui “Unhône Kusī Kusī Kut Kō Pës Kiyā.” Ngatī yanöölen nak nā Tiyāko nā Estör minā aṅ Prāsil hē cha nö vë-ekūöm ātiköl. Ngö ṙô ang Tiyāko: “Ik sā ai öi vë-ekūö minë ekspīriön ngaich meuk tī Yāvē ai nö hayööken më tarik re, ṙūöhlöre ngaich ngam kuilōn āi öi löklōn Yāvē pöi meuk hanangenlōn Yāvē töre.” Unôichrit e ngaich cha-a nö chuh Perakvē, ngaich hayööken më ṙamôtöm ëlô Pòrtukīs, nö löktökūö ik samyeūheu tö 2014. Ngö ṙô ang Estör: “Ööilōn āi takò Efisös 3:20. Pöi ṙōlheuh öi kòtamat meuk taneungtö kūö e.” Vënyu nang in tö Pôl öi in e tö nup töng havëkö hī ikūö Yāvē, mötlö tī ang Yāvē nö kē-ěkūö hī tö u!

16. In chīö nāp pamīhöre nö kē inlēnö re yěn fēkö nup la-en tö hòṅ kēkaṙen tö cha?

¹⁶ Yēḵ nā an töfömtöre ön pīhöre, ngaich mihôiṅ nā-a ön kē haköp re in yip holmaneuk hī, nö hameuktö ṙinatö-ellōn  re nö in Yāvē. Tö sā yik Kristīös pamīhöre tö pōyen nö maṙò-òten nö keuheūttö ṙētakre nö i linöökö lōn ngam Tēv. Mihôiṅ më-eṅ öm kē inlēnö re öm in cha. Tö hěngkangen angū-ö nö inlahen meh hameuktöre öm ṙatö-ellōnre öm in Yāvē. (Inch. 22:17, 19) Mihôiṅ man inrē kē inyööken re in yip minṙöinylen.

17. (a) Sitih inlahen nak nā Klòs nā Merisā? (b) Asuh öp haköplö hī öi in cha?

¹⁷ Hēk pi in ṙung öi öt teūngten in nup lōn re la-en i linöökö lōn nagm Tēv. Sā inlahen nā Klòs nā Merisā unôichrit tö lūöi samyeūheu inlahen cha-a nö pīhöre. Chuh in ngam mupākö òfis cha-a i Finlēn pön hòṅ la-evṙen nö im minānö. Ip taneūngö cha pöri ngaich nö Finlēn hangöre cha-a nöng tafūöl chumngëṅtö nö iyöng in e. Haṙivölōn ngaich cha-a. Unôichrit e hēk cha-a nö havë-iyö nö haṙunöre tö ngam ëlô Arepi. Ngaich nāṅ töngamuh nö la-evṙen nö im kamngö chūök ngam ëlô Arepi. Ngö ṙô ang Merisā: “Yēḵ hī öi afēkö nup la-en re törīkngöre i linöökö lōn ngam Tēv, lohten sin min öi vööim raneh hòṅ ṙatö-ellōnre pöri ayī-ö öi in Yāvē. Pön anag-aṅ min mahayööken hī nö im töt sā mufē hī tī ò nö hayööken hī. ngaich chi töngamuh öich ṙūöhlre ṙòken ṙinatö-ellōn öich in Yāvē.” Löktö in ngih inchōḵ elmat re in öi akahalōn tö inlahen re yěi ṙatö-ellōnre öi in Yāvē ngaich öt löktu anga-aṅ nö öt hakôlò hī.

18. Sitih inlahen öich mihôiṅ minā pamīhöre nö hameuktö ṙinatö-ellōnre nö in Yāvē?

¹⁸ Inlōnti ön ngam pinīhö nö ṙa-ang in Yāvē. (Mët. 19:5, 6) Lōnu anga-aṅ tö hī öi ṙamölōn öi im pīnihö. (Inch. 5:18) Lökten man chumkūöṙen tö inlahen tī re töm kinē-ëkūö re. Mihôiṅ öm ṙūöhlö inlahen re i linöökö lōn Yāvē? Vë-ekūötēv më-eṅ öm vë-ekūö Yāvē. ngaich chöh minë mahayööken meh min ṙô imat ngam Paipöl, hō yěm halēnö tö Yāvē. Yēḵ meh min öm kētö ṙētakre i linöökö lōn Yāvē, öt löktu nā-a min ön öt ṙamalōn im pīnihö tö nā!