TÖHAKÖÖPÖ ĀTIKÖL 45
Löktö Im Inyööken Re Tö Yāvē Öi Mihôiṅ Teungten Ahānga
“Akahalōn yip min tö cha nö inu misī tö pròfět.”—ISI. 2:5.
TINKÖÖKÖ 67 “Ahangkö ngam Ṙô”
RAHËICHTAMAT a
1. (a) Ṙòkhöre yip min tarik nö hang ṙô hī yěi vë-eny nang cha tö ngam tölöök inhānga? (b) Asuh pöri mihôiṅ öp ṙinatö-ellōn hī?
AKAHALŌN in tö yip tarik min nö öt ṙòkhöre nö hō nö hang ngam tölöök inhānga. Pòn ōt min tö sō nö hang ṙô hī. Akahakūö ayī-ö tö e min nöng iṙūöhen nö ngatī inlahen. (Tan. 11:44; 2 Tim. 3:12; Inm. 16:21) Mihôiṅ pöri ayī-ö öi ṙatö-ellōnre tö Yāvē min nö hayööken hī. Kūö yòh? Pön ngatī inlahen misī ngam Tēv nö hayööken yik tarik re yěn kētö la-en cha. Sā inlahen ò nö hayööken ök tarik re ang pròfět Isikīěl. Kihngen hē e ang Isikīěl nö ahangtö nang yik Yahūti yip tö haköövö nö i Pēpilön, hayööken ò pöri ang Yāvē. Ta-a töi ngëichkö inlahen tī Yāvē nö hayööken ò.
2. (a) Tö sitih tinrīken yik tarik tö ṙô Yāvē yik vahë-eny nang Isikīěl? (Isikīěl 2:3-6) (b) Asuh nup min haköp hī in ngih ātiköl?
2 Tö Sitih tinrīken yik tarik vahë-eny nang Isikīěl? Vënyu cha-a tö Yāvē nö “ma-ahôngen,” “töngë-eṅ ellōn” hēk “lamā-al” inrē. Asīntu cha-a inrē nö in nuk tö chökhu kaha chōn hēk sā inlahen minë tö kanaptörit re inrē minë tö chökhu kūö. Lökten ang Yāvē nö ṙōlheuhṙô nö ngöṙô nö in Isikīěl: ‘Um pa-ekūö tö cha.’ (Vë-evkūö Isikīěl 2:3-6.) Ṙën pöri ang Isikīěl nö teungen nö ahangkö ngam tölöök inhānga kūö ò nö, (1) tö tīntu tö Yāvē, (2) kē-ěvkūö inrē tö ngam töhet kumlēḵ Yāvē, hēk (3) kūö ò inrē nö hareuska alaha tö Yāvē. Mikahtökūöre in min in ngih ātiköl öi sitih inlahen kò-òren ayī-ö öi haköplu im inlahen Isikīěl hòṅ hī öi ahangkö ngam tölöök inhānga.
YĀVĒ TAMĪNTEN ISIKĪĔL
3. Sitih inlahen tī ang Yāvē nö kētö nganötö Isikīěl hēk kētö ṙinatö-ellōn Isikīěl inrē töre min nö hayööken ò?
3 Ngöṙô ang Yāvē nö in Isikīěl: “Tīnten meh chin.” (Isi. 2:3, 4) Mihôiṅ ang Isikīěl nö ngönlöre hē ò nö hang ṙô Yāvē, pön fē-ělre lohten anga-aṅ tö inlahen Yāvē nö ngatī ṙô inrē misī nö in nap tarik re nā Môsös nā Isayā ik sā ò nö kētö la-en cha. (Man. 3:10; Isa. 6:8) Akahakūö anga-aṅ tö nuk la-en cha nö öt lööṙen, teungen pöri cha-a nö kēken nuk la-en re pön holuṙen tö Yāvē. Lökten ik sā ṙô Yāvē nö nët heuhṙô nö ngöṙô nö in ò: “Tīnten meh chin,” ngaich ngönlöre ngam ṙinatö-ellōn ò tö Yāvē min nö öt löktu nö öt hayööken ò. Ṙōlheuh tī inrē ang Isikīěl nö kūich ngam tö ngöṙô: “Yih ngam ṙô ngam Mā Tēv nö in chu.” (Isi. 3:16; 6:1) In e mikahlōn ayī-ö tö Isikīěl nö ṙinatu-ellōn takô tö Yāvē nö anga-aṅ tamīnten ò. Ngaich sā mikahlōn hī inrē tö ök yöng Isikīěl nö kūönṙô. Öt löktu lohten anga-aṅ nöt vë-eny nang ök kūönre tö inlahen ngam Tēv Yāvē nö hayööken yip tarik re tö kētu la-en tö ò. Tö sā ṙēngen hē Isak, Yāköp hēk Yarimiā inrē. Ngöṙô ngam Tēv nö in cha: “In meh chin.”—Ran. 26:24; 28:15; Yar. 1:8.
4. Asuh nuk ṙô Yāvē tö höhlö tī tö Isikīěl?
4 Sitih inlahen yik rih tarik, yik vahënyö nang Isikīěl tö ngam tölöök inhānga? Ngöṙô ang Yāvē nö vë-eny inlahen cha: “Hö-ö pöri min öp patī Israel nö hangṙô meh, pò cha nö öthōḵ nö hangṙô chu.” (Isi. 3:7) Löktö in e mikahlōn ngaich ang Isikīěl tö yip tarik min nö öt ṙòkhöre nö hang ṙô ò. Rö-ö pöri nö kūö ò nö öt heuveū-en tö ngam la-enre, tön kūö cha nö sō nö hang ṙô Yāvē. Vë-eny nang Isikīěl inrē ang Yāvē töre min yěn kētö sācha yip tarik, ngaich möl min cha-a nö fē-ělre töre nö ‘inu misī tö pròfět.’ (Isi. 2:5; 33:33) Teūngen ang Isikīěl tö hanöhlöre yēḵ ò nö hang ṙô Yāvē, ngaich öt pa-ekūö ngaich anga-aṅ nö keuheūtngö ngam la-enre.
YĀVĒ INRĒ TAMĪNTEN HĪ
Löhten in ayī-ö sā inlahen Isikīěl yē hī ahangkö ngam tölöök inhānga nö öt chumkūöṙen yip tarik nö hang ṙô hī hēk ötlēken hī inrē, hòṅ köpölōn pöri ayī-ö tö Yāvē nö holṙen hī (Ngëichköm perekrāf 5-6)
5. Sā ṙô ngam Isayā 44:8 asuh öp tö ngönlöre tī tö hī?
5 Öt pa-ekūö in inrē ayī-ö töngamuh kūö hī öi akahakūö tö Yāvē nö anga-aṅ tamīnten hī öi ahangkö ngam tölöök inhānga. Kaheukö hī inrē ang Yāvē öi “vamënyen” ò. (Isa. 43:10) Sitih inlahen pöri ayī-ö yěn ōt yip tö hòṅ asökngö inlahen hī öi ahangkö ngam tölöök inhānga, ötkô ayī-ö öi vöö tö cha pöi hòṅ köpölōn tö Yāvē nö anga-aṅ tamīnten hī hěnghöre holṙen hī inrē. Ngaich sā ò misī nö sōten Isikīěl nö pa-ëkūö, ngatī anga-aṅ töngamuh nö sōten hī inrē öi pa-ekūö.—Vë-evkūö Isayā 44:8.
6. (a) Asuh ök ṙô Yāvē nö kilēḵngôre nö in hī? (b) Asuh öp ṙô tö ngönlöre tī tö hī hěnghöre kamëtö hanöhlö hī inrē?
6 Kētö ṙinatö-ellōn hī ang Yāvē töre min nö holṙen hī. Vënyen hī anga-aṅ öi ameūken ò. Urēhěkūö e pöri anga-aṅ nö kilēḵngôre nö in hī nö ngöṙô: “Yē meh lök el mak, in meh chū-ö min; lök el tahël inrē ngaich anū-ö min nö öthōḵ nö pökngö tī tö meh: yē meh lök kūö tameūyö, ngaich öthō me-eṅ min ökngö; öt rēhĕn min ngam töhū kūö nö pachôllöngkūö nö i kui meh.” (Isa. 43:2) Yē hī ṙung öi ahangkö ngam tölöök inhānga. Ngaich ṙōlheuh nup kanihngen lamākūö hī, nö sā ṙēngen tahël nö ma-asānngö röön hī hēk sā ṙēngen ngam tameūyö inrē nö mihôiṅ nö ökngö tī tö hī. (Isa. 41:13) Yē hī pöri holuṙen tö ngam Tēv Yāvē ngaich mihôiṅ ayī-ö öi lā-al u, ngaich iṙūöhen öi ahangkö ngam tölöök inhānga. Ṙōlheuh pöri yip tarik nö öt hang ṙô hī, sā ṙēngen yik tarik misī nö öt hang ṙô Isikīěl. Öt tö ngö manah pöri angū-ö tö hī öi öt heuveū-en öi im la-enre. Mihôiṅ ayī-ö öi köplōn tö ngam Tēv Yāvē nö ṙamlōn yěn meuk inlahen hī öi la-evṙen, hayööken hī inrē min anga-aṅ yěn yih nup kanihngen hòṅ hī öi iṙūöhen ahangkö ngam tölöök inhānga. Vë-eny ök inrē Pôl tö hī öi tö ‘teūngen tö raneushöre sā ngam la-enre.’ (1 Kòr. 3:8; 4:1, 2) Ngönlöre ayī-ö yěi hang ngih ṙô teūngen inrē tö hanöhlöre. Sā ṙô ök ihih sistör töhěng tak, ök tö marônyen nö im la-en painīör, ngö ṙô anga-aṅ, “ṙamlōn chin yěich fēkö inlahen ngam Tēv Yāvē nö chumkūöṙen tö minë la-en hī, ngaich kētö raneushö hī anga-aṅ nö asā minë la-en hī.”
KĒ-ĔKŪÖ ISIKĪĔL ANG YĀVĒ TÖ NGAM TÖHET KUMLĒḴRE
Hěngheuh ang Isikīěl nö meuk heūvö ngam inröl Yāvē el halīöngö, lökten ngaich anga-aṅ nö ṙātö-ellōnre tö Yāvē nö hayööken më tarik re nö ahangkö ngam tölöök inhānga (Ngëichköm perekrāf 7)
7. Sitih lōn ök Isikīěl yěn afēkö ngam maheukre inlahen ngam inröl el halīöngö? (Ngëichkö ngam lama-uk nyat.)
7 Hameukhu mat ang Isikīěl tö ṙôkö kumlēḵ ngam töhet fanöinylö ngam Tēv. Meuk inlahen ngam töhet fanöinylö ngam Tēv anga-aṅ nö hachōkūö më ma-ahānga el halīöngö, tö ngam inröl inrē el halīöngö nö havötköre angū-ö öp töng kū-ö ngam töhet kumlēḵ nö hachōkūö e. (Isi. 1:20, 21) Pingangkūö takô ang Isikīěl nö meuk ngam maheuk re lökten ò nö ‘fātngökūöre ngaich afukngöre.’ (Isi. 1:28) Sön lohten ang Isikīěl nö ngönlöre ṙinatö-ellōn yěn afēkö ngam maheuk re nö iṙūöhen nö kēken ngam la-enre pön ṙinatū-ellōn anga-aṅ tö ngam töhet kumlēḵ ngam Tēv min nö hayööken ò nö keuheūtngö ngam la-enre.
8-9. (a) Sitih inlahen ök Isikīěl hē Yāvē nö tölṙô ò nö söklö röön re? (b) Sitih inlahen tī ang Yāvē nö hayööken Isikīěl hòṅ ò nö vë-eny nang yip töngë-eṅ ellōn tarik?
8 Unôichrit inlahen Yāvē nö hameukhömat Isikīěl töm tö meukö ngaich ngöṙô anga-aṅ nö in ò, ‘Kūön tarik, söklöröönre man, hòṅ chu vë-ekūö meh.’ Sitih inlahen ngaich unôichrit e? Meuthöt ngaich öp Töhet Fanöinylö nö in Isikīěl ngaich kētö kumlēḵ ò lökten ò nö söklö röön re. (Isi. 2:1, 2) Unôichrit e ang Yāvē nö kē-ěkūö Isikīěl tö ngam töhet fanöinylö ngaich vë-eny nang ò tö nup la-en ò. Lökten ang Isikīěl nö vënyö ngam kël ngam Tēv Yāvē nö örheūheu nö ikui ò. (Isi. 3:22; 8:1; 33:22; 37:1; 40:1) Löktö in ngam töhet fanöinylö anga-aṅ nö teūngen tö nganötöre nö ahāngtö nang më “töngë-eṅ ellōn” tarik. (Isi. 3:7) Ngö ṙô ang Yāvē nö in Isikīěl, “vī ngam kūö meh chin nö ngëḵ nö havöötu nö i kūö cha. Sā töngëḵ tö ta-ök tameūyö ihong tī chu. um pa-ekūö tö cha, um rēhĕn ngangngökūö tö mineūkö cha.” (Isi. 3:8, 9) Sā tö ngöṙô ang Yāvē nö in Isikīěl, ‘Uh man öm vöö tö ṙô vē tarik töngë-eṅ ellōn tön in meh chin chū-ö chin min kamëtö kumlēḵ meh.’
9 Unôichrit e ngaich ngam töhet fanöinylö Yāvē nö hachōkūö Isikīěl nö chuh im chūök ò nö ahangkö ngam tölöök inhānga. Ngöṙô anga-aṅ, “kalēḵ ngam kël ngam Mā Tēv nö in chu.” Tö ngö manah angū-ö tö ngam töhet kumlēḵ ngam Tēv nö hayööken Isikīěl hòṅ ò nö vë-eny nang yik tarik tö ngam ṙô lamöktö in ngam Tēv. Hòṅ urěh pöri anga-aṅ nö akahakūö tö ngam vahë-eny re ngaich möl min anga-aṅ nö heuveū-eu nö vë-eny nang yip tarik. Lökten ò nö sat sumkam nö ip chūökre nö iyöng. (Isi. 3:14, 15) Ngaich möl ngaich ang Yāvē nö tölṙô ò nö chuh in ngam tö ṙā-akūö panam ngaich chūök ngam ‘töhet fanöinylö ngam Tēv nö meuthöt nö in ò.’ (Isi. 3:23, 24) Ngaich takô ang Isikīěl nö lēn nö im inhangkö ngam tölöök inhānga.
KĒ-ĔKŪÖ HĪ ANG YĀVĒ TÖ NGAM TÖHET FANÖINYLÖ
Achīöp mahayööken hī öi im la-en inhangkö ngam tölöök inhānga töngamuh öi sā inlahen Isikīěl? (Ngëichköm perekrāf 10)
10. Achīöp mahayööken hī ahangkö ngam tölöök inhānga ngaich kūö yòh öi hòṅ hayöökaṙen?
10 Hayöökaṙen ök Isikīěl tö ngam töhet fanöinylö Yāvē nö ahangkö ngam tölöök inhānga. Ngatī inlahen in ayī-ö töngamuh öi hòṅ hayöökaṙen tö ngam töhet fanöinylö Yāvē yēḵ hī öi ahangkö ngam tölöök inhānga öi in yip tahëng. Kūö yòh? Kūö ngam Sī-ö nö asökngö röön hī öi ahangkö ngam tölöök inhānga. (Inm. 12:17) Yěi ngëicha kò-òren tö ngam Sī-ö nö mötlö kumlēḵ tö hī. Yēḵ hī pöri ahangkö ngam tölöök inhānga, ngaich hameuktöre ayī-ö öt pa-ekūö tö ngam Sī-ö. Ngaich in e ngam Sī-ö nö öt kanô-òv tö hī yē hī ahangkö ngam tölöök inhānga. (Inm. 12:9-11) Kò-òren in öi fēkö inlahen re töngamuh öi ötlēkaṙen, sön pöri ayī-ö iṙūöhen öi im la-en inhangkö ngam tölöök inhānga. In e mikahkūö ayī-ö tö Yāvē nö kē-ěkūö hī tö ngam töhet fanöinylö re hēk ṙamlōn inrē nö in hī.—Mët. 5:10-12; 1 Pīt. 4:14.
11. Sitih inlahen tī öng ngam töhet fanöinylö nö hayööken hī, ngaich sitih inlahen ayī-ö yěi hòṅ teūngen tö e?
11 Kò-òren öi fēkö inlahen Isikīěl ik sā ò nö ahangkö ngam tölöök inhānga nö in yip töngë-eṅ ellōn tarik, ngaich hangönken ò ang Yāvē. Ngaich ngatī inlahen min ang Yāvē nö kētö ngam töhet kumlēḵ re nö hangönken hī, hòṅ hī öi lā-al minë kanihngen re yē hī ṙònghöichṙen öi im la-en inhangkö ngam tölöök inhānga. (2 Kòr. 4:7-9) Hòṅ asūp inlahen hī hòṅ hī teūngen tö ngam töhet fanöinylö? Hòṅ örheūheu ayī-ö vë-ekūö Yāvē hēk ṙatö-ellōnre inrē ayī-ö tö ò nö öthō nö öt hang ṙô hī. Ngöṙô inrē ang Yēsū nö in yik haköptöre, ‘havë-a man . . . lūka man . . . kurönga inrē. Ngaich ngam aṅ el halīöngö Yöng yīö, nö kētö ngam töhet fanöinylö nö i yip mahavë-a nö in ò.’—Lūk. 11:9, 13; Inl. 1:14; 2:4.
LÖKTÖ IN MINË ṘÔ YĀVĒ ANG ISIKĪĔL NÖ NGÖNLÖRE
12. Lamöktö yih ök tö löömö līpöre ök kinë-ekūö Isikīěl ngaich asuh öp tö kūichö nö imat e? (Isikīěl 2:9–3:3)
12 Kē-ěkūö Isikīěl ang Yāvē tö ngam töhet kumlēḵ re, pön hōten ò nö un pa-ekūö nö ahangkö ngam tölöök inhānga. Hangönlö alaha ò pöri anga-aṅ nö löktö in minë ṙô re. Hameukhumat ang Isikīěl tö tī Yāvē tö ngam tö meūkö ngam chūök ò nö kē-ěvkūö tö ngam tö löömö līpöre. (Vë-evkūö Isikīěl 2:9–3:3.) Lamöktö yih ngam tö löömö līpöre? Asuh nup tö kūichö nö imat e? Sitih inlahen ang Isikīěl nö ngönlöre tö minë tö kūichö nö imat e? Ta-a töi ngëichken e. Lamöktö in Yāvē ngam tö löömö līpöre. Lohten angū-ö nö kahëtö ök töhěng ma-ahānga, ök in yik töfën tak tömeūkö tö Isikīěl sin ik urěh maheuk ò. (Isi. 1:8; 10:7, 20) Kūichö ngam ṙô lamöktö in ngam Tēv Yāvē nö imat ngam tö löömö līpöre ngam vinë-eny nang yik töt hamang chööngö aṅ Israel tö cha min nö haköövö. (Isi. 2:7) Nët lā kinūichö mat ngam tö löömö līpöre tö ngam ṙô lamöktö in ngam Tēv.
13. Sitih ṙô ngam Tēv Yāvē nö in Isikīěl unôichrit ò nö kētö ök tölirōlö linöömö ngaich kūö yòh ang Isikīěl nö pachāka elvāng tö e?
13 In ngam tömeūkö ang Isikīěl nö töölöṙô tö Yāvē nö nyā ök tölirōlö linöömö nö hatööḵngen re. Hang ṙô Yāvē ngaich Isikīěl ngaich nyā ngam tölirōlö linöömö. Tö sitih manah öng ngam inlahen ò? Tö ngö manah angū-ö, tö Isikīěl nö hòṅ urěh nö akahakūö tö minë vahënyöre urēhěkūö ò nö vë-eny nang më tahëng, pön möl min anga-aṅ nö holtö ṙinatö-ellōnre nö vë-eny nang cha. Ik sā Isikīěl ngaich nö nyā ngam tölirōlö linöömö ‘pachāka angū-ö nö elvāng ò nö sā ṙēngen hönī.’ (Isi. 3:3) Ngam tö ngö manah, tö Isikīěl nö ṙamlōn kūö Yāvē nö katöllen ò nö ma-ahāngtö nang yik tarik.—Sal. 19:8-11.
14. Asuh ök mahayööken Isikīěl nö keuheūtngö ngam la-enre?
14 Unôichrit e hēk ang Yāvē nö ngöṙô nö in Isikīěl, “ṙòkhöre nup ṙô chu vë-ekūö meh min kē-ĕ u ellōn meh, hang inrē minë elnang meh.” (Isi. 3:10) Tölṙô Isikīěl ang Yāvē nö haköplōn re tö minë tö kūichi nö imat ngam tö löömö līpöre, ngaich fēken u inrē. Ik sā Isikīěl ngaich nö ngatī inlahen ngaich ngönlöre ngam ṙinatö-ellōn ò, öt pa-ekūö ngaich anga-aṅ nö vë-eny ngam vahë-enyö re nö in yik tarik. (Isi. 3:11) Keuheūthötre minë ṙô ngam Tēv Yāvē nö elkuilōn Isikīěl lökten ò nö holtö ṙinatö-ellōnre ngaich nö vënyen e.
NGÖNLÖRE AYĪ-Ö INRĒ TÖ MINË ṘÔ YĀVĒ
15. Asūp inlahen hī öi iṙūöhen im la-en inhangkö ngam tölöök inhānga?
15 Hòṅ ngatī in inrē ayī-ö sā inlahen Isikīěl öi hòṅ köplōn tö minë ṙô Yāvē ngaich haköpngen u nö elkuilōn re. Ngaich ngönlöre min ngam ṙinatö-ellōn hī hēk iṙūöhen inrē min öi ahangkö ngam tölöök inhānga pòrô öi īnu tö minë kanihngen re. Ngatī in ayī-ö inrē töngamuh öi löktö in minë ṙô ngam Paipöl öi akahakūö tö minë ṙô ngam Tēv. Hòṅ asuh pöri öp inlahen hī yěi hòṅ lōnu tö minë la-enre hēk minë mufē re nö asā ṙô ngam Paipöl?
16. (a)Asūp haköplö hī in ngam tömeūkö tö löömö līpöre? (b) Hòṅ Asūp inlahen hī yěi hòṅ akah elnang tö minë haköp re aṅ mat ngam Paipöl?
16 Yēḵ hī ṙung öi nyā ngaich tööḵngen ayī-ö, löktö in e ngam kumlēḵ hī ngön inrē ayī-ö. Ngatī inlahen yěi haköp mat ngam Paipöl hēk fēken minë haköp re, ngaich ngönlöre ngam ṙinatö-ellōn hī. Angū-ö haköplö hī in ngam tömeūkö tö löömö līpöre. Sā inlahen Isikīěl nö hatööḵngen re nö nyā ngam tö löömö līpöre. Ngatī lōn ang Yāvē tö hī öi akah elmat tö minë ṙô ò, ngaich sā mahatööḵngen re min ayī-ö. Lūöi nun minë tö hòṅ inlahen hī. Ngam raneh, hòṅ vë-ekūötēv ayī-ö hòṅ hī akah elnang tö minë ṙô ngam Tēv hòṅ halēn ngam elkuilōn re inrē hēk hòṅ chumkūöṙen inrē öi haköp mat ngam Paipöl. Ngaich fēken minë haköp re inrē. Yē hī min ngatī inlahen ngaich akah elnang min ayī-ö tö ṙô minë tö kūichi imat ngam Paipöl ngaich ngön inrē min ngam ṙinatö-ellōn hī.
17. Kūö yòh nö töt ṙanāngen ngam inlahen hī öi fēken minë tö kūichi aṅ mat ngam Paipöl?
17 Kūö yòh öng nö töt ṙanāngen ngam inlahen hī öi vë-ekūö ngam Paipöl hēk fēken minë haköpre inrē? Pöi yēḵ hī min öi ngatī inlahen ngön min ayī-ö töngamuh öi im la-en inhangkö ngam tölöök inhānga. Ngaich mihôiṅ min ayī-ö öi vënyö ngam ṙētak kinṙôka öi in cha ip yamih ṙētak. Ngaich yē hī inrē öi fēken minë ṙô aṅ mat ngam Paipöl ngaich akahakūö min ayī-ö tö minë tinrīken Yāvē hēk tö sitih inlahen anga-aṅ nö Tēv. Yē hī min ngatī inlahen ngaich ṙöhta ayī-ö min in Yāvē hēk teungen inrē min ayī-ö tö ngam lanāmö elkuilōn re. Ngaich höng örheūheu min ayī-ö ṙamlōn.—Sal. 119:103.
YĀVĒ AN MAHAYÖÖKEN HĪ PÒRÔ ÖI KIHNGEN
18. Yē yip tarik min nö kahôkkaṙen ngaich asuh min öp tö hòṅ hanga tö cha nagich kūö yòh?
18 Öt pròfět in ayī-ö öi sā Isikīěl, sön pöri ang Yāvē nö kē-ěkūö hī tö nup tö sā la-en ò. Lökten öi hòṅ vë-eny nang yip tarik tö ngam tölöök inhānga lamöktö in Yāvē hēk iṙūöhen ayī-ö öi kēken ngih la-en hanöng sa ngih la-en nö öl nö keuheūtlöre nö imat Yāvē. Lökten yěn yih min ngam ṙētak Yāvē nö kahôkken tarik, ngaich öthěng tökô min nö ngöṙô töre nö vaichiyö tö ngam Tēv nö öt vënyu nang. (Isi. 3:19; 18:23) Hòṅ ṙatö-ellōnre cha-a tö ngam tö vënyu tölöök inhānga nö lamöktö in ngam Tēv.
19. Asuh nup ihih ṙô tö hòṅ chumkūökaṙen tö hī hòṅ ngön öi im inhangkö ngam tölöök inhānga?
19 Nup tö lūöi i ṙô löktö nganönö Isikīěl ngaich yē hī min köplōn tö u, ngaich holtö nganötöre min ayī-ö öi ahangkö ngam tölöök inhānga i ngih ṙētak. Hòṅ köplōn inrē ayī-ö tö Yāvē nö tamīnten hī, kē-ěkūö hī inrē anga-aṅ tö ngam töhet kumlēḵ re hēk ngönlöre inrē min ngam ṙinatö-ellōn hī yěi chumkūören tö minë tö kūich aṅ mat ngam Paipöl. Yih nun min minë kanihngen hī köplōn pöri ayī-ö öi holuṙen tö Yāvē. Löktö im inyööken ò ayī-ö öi ngöt öi im la-en inhangkö ngam tölöök inhānga ngaich ‘köp min ayī-ö söl ip manāngen.’—Mët. 24:13.
TINKÖÖKÖ 65 Iṙūöhöröön Kū-urěh!
a Haköp inlahen ök pròfět Isikīěl in min öi el ngih ātiköl öi meuk inlahen tī ngam Tēv Yāvē min nö hayööken ò nö ahangkö ngam tölöök inhānga. Mikahtökūöre inrē min ayī-ö tö minë tö lūöi inlahen tī ngam Tēv Yāvē nö hayööken ò, ngaich ngönlöre min ngam ṙinatö-ellōn hī tö Yāvē min nö ngatī inlahen tī inrē nö hayööken hī töngamuh hòṅ hī öi ahangkö ngam tölöök inhānga.