KIHNGEN öm ṙung kē-ěny ṙētakre pörsönöl istötī öm kaheuk afta, hēk pōring hòng ṙöng inrē? Ṙòkhöre in hēṙu öi ngatī mufē. Yěi ngëicha pöri, pōyen nup la-en kahëken hī tö kaheuk afta hēk kaheuk sakāmö inrē, sā hī örheūheu öi vōk. Kô-en öi pōyen ṙētak öi vōk, pöi hòṅ ha-et ngam alahare. Ṙamlōn pöri yěi keuheūtö kaha öi vōk! Ngatī min ayī-ö, yěi haköp mat Paipöl öi sā “vamôk ngam mak ngam ṙô ngam Tēv” öi hëtö elkuilōn, ṙamlōn inrē.” (Efi. 5:26) Ta-a chěi töi ngëichkö nup tö hòṅ inlahenre min, yěi hòṅ kē-ěny ṙētakre öi haköp mat ngam Paipöl:

• Vī nup sëtiūl re man. Töhěngkangen an ngam pörsönöl istötī nö ‘tötṙanāngen nö in minë töng sitih la-en.’ (Filip. 1:10) Lökten yin vē tökô-en Kristīön nö hòṅ örheūheu nö istötī mat ngam töhet līpöre. Kò-òren min öm vī öp sëtiūl ṙētak lōn meh hòṅ haköp. Ngaich havai chūök e nö hapanlöng, hòṅ meh lööṙen meūkö e, mihôiṅ nö ikaha öp frich meh. Hēk hönglöö vītö alām öp fūnre, nö sā famëḵlen meh töp ṙētak meh öm pörsönöl istötī.

• Afēkö öp rò-òtenre öm istötī. Kuchīken hòng öm örheūheu hěng kanta rò-òten öm istötī? Kuchīken ṙöng öm höng rahëich-rahëichyen haköp? Höng më-eṅ tö akahakūö töp tövai rò-òtenre öm istötī, ngaich mihôiṅ öm ngatī rò-òten. Yěn yih pöri nö ngaich ngam ṙētak meh öm hòṅ istötī, öt kūyulōn pöri më-eṅ, ngaich kò-òren öm höng söm minit rò-òten öm istötī. Ĕhten öm höng rahëichtaṙô, töp inlahen meh höng öt haköp. Mihôiṅ min më-eṅ haköplu in minë tö söm minit. Lohten min më-eṅ unôichngöre öm kuchiklöre ṙô haköp.—Filip. 2:13.

• Hòṅ akahakūö öm urĕh tö nup haköpre. Yĕm öt urěhngöre mikahlōn tö nup haköpre min, ngaich öt ‘lööngötī min öm hō, yūs ngam ṙētakre.’ (Efi. 5:16) Lökten nö hòṅ urěhangen kinūichngö nup kuilōn meh ātiköl tö nup tòpik inrē. Yěn ōt inrē nup intöönö yamih nö el kuilōn meh yěm ṙönghöichṙen öm haköp ngaich kò-òren öm kūichngen u. Yěm hòṅ ṙūöhtö mikahkūöre tö u ngaich pōyen min nup tòpik aṅ in meh nö tö hòṅ hakööpö tö meh, yěm ngatī inlahen.

• Hööngöre yĕm hòṅ haṙīngö inlahenre öm istötī. Pi-a min öm hòṅ haköp inlahen öp töhěng tòpik tö lōnre, öt teungten pöri më-eṅ. Ngaich hòṅ hööngöre öm haṙīngö inlahenre. Kô-en nö töt ṙanāngen ngam inlahen meh hòṅ ṙētakvö öm haköp, hòṅ akahakūö inrē tö nup tö hòṅ hakööpö tö meh, töm rò-òten meh inrē yěm haköp, mötlö pöri tö u nö ṙòkhöre ngam inlahen meh hòṅ örheūheu öm kaheuk afta öm haköp.

Yēḵ hī min kaheuk afta öi haköp, yöölen min ayī-ö. Röhta inrē min öi in Yāvē, ngaich vāyö kahë min tö nup fësla, teūngen min inrē tö nup ṙanamlōn.—Yôs. 1:8.