TÖHAKÖÖPÖ ĀTIKÖL 47
Sitih Inlahen Öi Ṙūöhlö Ngam Hanangenlōnre Tö höö
“Kahōlö; ta-a töi kö hāngenlōn tö höö, tön aṅ im Tēv an ngam hanāngenlōn.”—1 YÔH. 4:7.
TINKÖÖKÖ 109 Löknyö Ellōnre Hangenlōn
RAHËICHTAMAT a
1-2. (a) Kūö yòh ang Pôl nö ngöṙô tö ngam hanangenlōn nö “tö mötlö”? (b) Asuh nup min intöönö tö ngëichka tö hī?
HĚNGHEUH ang Pôl nö kakkö ngam mikah, mineūka hēk töm hanangenlōn ‘mötlö pöri ngam hanangenlōn nö in u.’ (1 Kòr. 13:13) Kūö yòh pöri ang Pôl nö ngatī ṙô? Kūö hī min öt hēk öi ṙātö-ellōnre in minë kinlēḵngô ngam Tēv yē hī min ikūö öp tufömngöre panam, hěnghöre öt meukken u inrē. Pò u ngaich min nö ṙòkhöre nö teungtökūö. Yē hī pöri kakkö ngam hanangenlōn ngaich hòṅ iṙūöhen ayī-ö öi hangenlōn tö Yāvē hēk tö yip tarik ò inrē. Ngaich sīöp min ngam hanangenlōn hī tö cha.
2 Hòṅ iṙūöhen in öi hangenlōn tö höö. Lökten min öi chumkūöṙen ngëichkö në tö lūöi intöönö. Raneh, kūö yòh öi hòṅ hangenlōn tö höö? Innëtö, sitih inlahen öi hameuktö ngam hanangenlōnre tö höö? Linūöyö, sitih inlahen öi ṙūöhlö ngam hanangenlōnre tö höö?
KŪÖ YÒH ÖI HÒṄ HANGENLŌN TÖ HÖÖ?
3. Kūö yòh öi hòṅ hangenlōn tö höö?
3 Kūö yòh nö töt ṙanāngen ngam inlahen hī öi hangenlōn tö höö? Pōyen nun minë lāinyngen hī. Ngam töhěng lāinyngen tö ngam hanangenlōn nö minkahngö më tökô-en Kristīön. Ngöṙô ang Yēsū nö in yik tanīnöṙô: “In e inkaha yin min tö taṙòkhöre tarik, öi mahaköp in Chu, yē yīö kö hāngenlōn tö höö.” (Yôh. 13:35) Yē hī inrē öi hangenlōn tö höö ngaich köp min ngam hinëngö nö ihôi hī. Ngöṙô ang Pôl ‘ngam hanangenlōn ön mahaköpken hī öi im hinëngö.’ (Kòl. 3:14) Ngam tö mööḵngöre hēk lāinyngen hī hangenlōn tö höö. Ngöṙô ang Yôhan nö in yik Kristīön: “Ngòh töhāngenlōn tö ngam Tēv, hāngenlōn tö holre inrē.” (1 Yôh. 4:21) Tö ngö manah angū-ö yē hī öi hangenlōn tö höö ngaich inmeuktö hī angū-ö öi hangenlōn tö ngam Tēv.
4-5. Kētö inchōḵ elmat hī, sitih inlahen öng nö hěngṙen ngam hanangenlōn hī tö ngam Tēv hēk tö më holmaneuk hī inrē.
4 Sitih inlahen öng nö hěngren ngam hanangenlōn hī tö ngam Tēv hēk tö më holmaneuk hī inrē? Ta-a töi mikahtö elmatre tö inlahen ngam fanöinylö hī nö sitih inlahen angū-ö nö taptöre nö in minë tahëng tum mupaka alaha hī. Yē öp tòktör nö ngëichkö ṙòng rahë hī, ngaich in e anga-aṅ nö akahakūö tö inlahen ngam fanöinylö hī yěn fehnguṙen hēk yěn hö-ö. Ngaich ngatī inlahen angū-ö nö im hanangenlōn.
5 Löktö im ṙòng rahë hī ṙung ngam tòktör nö akahakūö tö inlahen ngam fanöinylö hī nö öt fehnguṙen. Ngatī inlahen ayī-ö yěi meuk ngam hanangenlōnre tö më holmaneukre nö pōyen, ngaich in e mikahkūö inrē ayī-ö tö ngam hanangenlōn hī nö ngön nö in ngam Tēv. Yěi akahngen ngam hanangenlōnre tö më holmaneuk hī nö kūönngöre, tö ngö manah angū-ö tö ngam hanangenlōn hī inrē tö ngam Tēv nö kūönngöre. Yē hī pöri min iṙūöhen öi hangenlōn tö më holmaneukre, ngaich in e mikahkūö min ayī-ö töre öi kiröngen hanangenlōn tö ngam Tēv.
6. Yěn kūönngöre ngam hanangenlōn hī tö më prötör sistör, ngaich kūö yòh min angū-ö nö kanihngen hī? (1 Yôh. 4:7-9, 11)
6 Yěn kūönngöre ngam hanangenlōn hī tö më holmaneuk hī, ngaich mihôiṅ min angū-ö nö kanihngen hī. Töngö manah min angū-ö tö ngam innôlö hī in ngam Tēv nö kūönngöre. Vë-eny inlahen e inrē ang Yôhan nö ngöṙô: “Pò ngòh töt hāngenlōn tö holre tö ngòh maheuṅkre, ötkô nö hāngenlōn töm Tēv, ngam töt maheuṅk ò.” (1 Yôh. 4:20) Asuh öp haköplö hī in e? Tö hī yěi ‘hangenlōn tö höö,’ ngaich ṙamlōn ang Yāvē nö in hī.—Vë-evkūö 1 Yôhan 4:7-9, 11.
SIITIH INLAHEN ÖI HAMEUKTÖ HANANGENLŌNRE TÖ HÖÖ?
7-8. Sitih inlahen öi mihôiṅ hameuktö ngam hanangenlōnre tö höö?
7 Ṙōlheuh vinënyi ön nö in ngam ṙô ngam Tēv tö hī hòṅ “hangenlōn tö höö.” (Yôh. 15:12, 17; Rōm. 13:8; 1 Tös. 4:9; 1 Pīt. 1:22; 1 Yôh. 4:11) Lohten in öi aṅhav in töm hanangenlōnre tö më prötör sistör. Öt hěngtak pöri tökô nö meuk ellōn hī yěi hangenlōn tö öp holre hēk yěi hö-ö. Lökten öi hòṅ hameuknyen u. Öi sitih inlahen? Löktö in minë ṙô re hēk tinrīkenre inrē.
8 Pōyen nun minë inlahen hī mihôiṅ hameuktö ngam ‘hanangenlōnre tö më prötör sistör. Tö sā ṙô ngam Paipöl nö ngöṙô: “Kö ṙôtö kanô-en yin i holre.” (Sak. 8:16) “Ngaich kö kuchīken in höö.” (Māk. 9:50) “Kö ngö-aṅlö ellōn tö höö im minlēḵṙen.” (Rōm. 12:10) “Lökten yin kö hōḵen höö.” (Rōm. 15:7) “Kö aṙēlen höö.” (Kòl. 3:13) “Keunhökūö höö yin tö lumnganre.” (Kal. 6:2) “Lökten yin haṙamkölōn höö tö në ṙô.” (1 Tös. 4:18) “Lökten kö hangëken höö.” (1 Tös. 5:11) “Kö ve-elkui höö inrē.”—Yāk. 5:16.
Sitih inlahen öi mihôiṅ hayööken yip prötör sistör tö kihngen? (Ngëichköm perekrāf 7-9)
9. Kūö yòh öi mihôiṅ ngöṙô tö ngam inlahen hī hareuskö alaha yip tahëng nö inmeuktö ngam hanangenlōn? (Ngëichkö ngam nyat.)
9 Ngam kahakkö hī in minë urěh perekāf inlahen hī hameuktö ngam hanangenlōn töi chumkūöṙen ngëichken e. Chumkūöṙen in min öi ngëichkö ngam inlēnö kahëtö Pôl: “Lökten yin haṙamkölōn höö tö në ṙô.” Ngam inreuskö alaha töhěng angū-ö nö inmeuktö ngam hanangenlōn. Kūö yòh öi mihôiṅ ngatī ṙô? Hěng öp ihih līpöre vamë-eny inlahen ngih miröökö aṅ mat ngam Paipöl nö ngöṙô: Ngam ṙô ‘inreuskö alaha’ tö ngö manah angū-ö tö hī öi hòṅ ilööṙen öi yihtöre öi hareuskö alaha öp holre tökihngen. Yē hī inrē hareuskö alaha yip prötör sistör tö haṙivlōn ngaich sā ṙēngen kamëtö këlre ayī-ö öi hòṅ hayööken cha, hòṅ cha nö iṙūöhen nö kū-ö urěh nö lök in ngam talöökö nômö. Yē hī ṙūng hareuskö alaha yip prötör hēk sistör öi inup kanihngen cha ngaich mahameuktö ngam hanangenlōnre min ayī-ö öi in cha.—2 Kòr. 7:6, 7, 13.
10. Kūö yòh öi hòṅ īnu tö ngam neūkölōn yěi hòṅ hareuskö alaha yip tahëng? Mikahtö elmat hī.
10 Yěi hòṅ hareuskö alaha yip holre ngaich hòṅ urěh ayī-ö öi aṅhav in tö ngam miṙēlōn. Kūö yòh? Kūö ngòh tarik yěn meuk öp töhěng tak nö haṙivlōn ngaich yihtöre anga-aṅ tö kūö ngam miṙēlōnre nö hayööken ò hēk hareuskö alaha ò inrē. Töngö manah angū-ö tö hī yěi akahaiṙen tö kanihngen më prötör sistör hēk yěi īnu inrē tö ngam miṙēlōnre, ngaich teungten min ayī-ö hareuskö alaha cha. Ngatī ṙô ang Pôl nö kakkö inlahen Yāvē. Ngöṙô tī anga-aṅ nö kūich: Yāvē an “Ngam Yöng nup neūkölōn, Tēv inngëḵkö inrē nö ṙòkhöre.” (2 Kòr. 1:3) Ngam manah ngam “neūkölōn,” tö hī öi hòṅ īnu tö ngam miṙēlōnre tö yip tahëng. Vënyen Yāvē ang Pôl nö “yöng nup neūkölōn” pön löklö in ò ngam neūkölōn. Kūö ngam ‘neūkölōn re ngam Tēv nö hangëken hī inup kanihngen hī.’ (2 Kòr. 1:4) Sā inlahen öp tarik amôk öp töhëm mak nö ufovtöre nômö ngatī inlahen ang Yāvē nö hangëken yip tö haṙivlōn ngaich teūngen cha-a tö hanöhlöre. Hòṅ sā inlahen Yāvē in hòṅ aṅhav in tö ngam miṙēlōnre tö yip tahëng hēk hareuskö alaha cha inrē. Öi sitih inlahen? Hòṅ asīöp ngam tinrīken re ayī-ö öi i inreuskö alaha yip holre. Töi ngëichken e angū-ö tinrīken.
11. Asuh nup tinrīken tö hòṅ asīöpö tö hī, hòṅ hī iṙūöhen hangenlōn tö yip tahëng hēk hareuskö alaha cha inrē? (Kòlòsi 3:12; 1 Pītör 3:8)
11 Hòṅ sitih inlahen öi yěi hòṅ iṙūöhen hareuskö alaha höö hēk hangenlōn inrē tö höö? Hòṅ akahakūö ayī-ö tö kanihngen höö hēk hangenlōn inrē tö höö, ngaich hòṅ aṅhav in inrē ayī-ö tö ngam miṙēlōnre tö yip holre. (Vë-evkūö Kòlòsi 3:12; 1 Pītör 3:8.) Yē hī min öi ngatī inlahen ngaich mihôiṅ min ayī-ö ilööṙen hayööken yip holre yip tökihngen hēk hareuskö alaha cha inrē. Ngöṙô inrē ang Yēsū: “Nup yamih nö ellōn hī anū-ö min tö ṙônyu nö im rōi litāk hī. Ngòh tölöök tarik kē-ĕny tölöök chehen, aṅ i nup tölöök chehenre.” (Mët. 12:34, 35) Töt ṙanāngen ön ngam inlahen hī öi kētö inreuskö alaha yip prötör sistör tö kihngen. Löktö in e min cha-a nö akahakūö tö ṙôken ngam hanangenlōn hī tö cha.
SITIH INLAHEN ÖI ṘŪÖHLÖ NGAM HANANGENLŌNRE TÖ HÖÖ?
12. (a) Kūö yòh öi hòṅ hīnöre? (b) Asūp min intöönö tö ngëichka tö hī?
12 Ṙòkhöre in lōnu töre “kö hangenlōn tö höö.” (1 Yôh. 4:7) Hòṅ kööpölōn pöri ayī-ö töm ṙô Yēsū nö ngöṙô, “Öp hanāngenlōn yip tömaṙôngö min nö ufovngöre.” (Mët. 24:12) Öt tö ngö manah pöri ngam ṙô Yēsū, tö ngam hanangenlōn më haköptö ò nö ufovngöre min pön ṙôten më tarik anga-aṅ töngamuh nö kūönngöre ngam hanangenlōn cha. Lökten ayī-ö öi hòṅ höngöre öi ui sā cha. Ta-a chěi töi chumkūöṙen öi ngëichken ngih töt ṙanāngen intöönö: Sitih inlahen mikahkūö öi töre yěi ṙömöng hangenlōn tö më prötör sistör?
13. Sitih inlahen öi min ngëichkö ṙôken ngam hanangenlōnre tö yip prötör sistör?
13 Hěng ön ngam inlahen hī, hòṅ chumkūöṙen ayī-ö tö nup inlahen re yē hī öi hòṅ haköpken ngam hanangenlōnre tö më prötör sistör. (2 Kòr. 8:8) Hěng öp ihih inlahen vahënyö Pītör ngöṙô anga-aṅ: “Möthë tö u, öi kô-en hanāngenlōn inrē; tön hanyatngö nup töpōyen tökööl an ngam hanāngenlōn.” (1 Pīt. 4:8) Tö ngö manah angū-ö tö më prötör sistör hī yěn vaichköreṙen hēk miṙivngölōn hī inrē, ngaich löktö in ngam tinrīken hī min nö meūkö ngam ṙôken ngam hanangenlōn hī tö cha.
14. Sā ṙô ngam 1 Pītör 4:8, tö hòṅ sitih inlahen ngam hanangenlōn hī tö më prötör sistör? Mikahtö elmat hī.
14 Töi ngëichkö minë ṙô Pītör. Ngöṙô ang Pītör nö vë-eny nang hī nö im raneh alaha ngam tö 8 miröökö tö hī öi hòṅ “kô-en hanangenlōn tö höö.” Ngam ṙô Pītör hanangenlōn nö im ṙô Krīk tö ngö manah angū-ö tö ‘tūöknyu ṙòktak.’ Im innëtö alaha ngam miröökö ayī-ö öi vënyu nang tö hī, yē hī min öi ngatī hanangenlōn tö më prötör sistör re ngaich sā mahanyatngö minë tökööl cha min ayī-ö. Sā tamūök öp hīla min ayī-ö öi ‘afahtökui nup taṙòkhöre tökööl’ cha. Ik sā Pītör nö ṙôtö minë ‘innyatngö tökööl’ ngaich tö ngö manah angū-ö, tö hī öi aṙē-ěl tökööl yip holre. Sā ṙēngen hī ṙung yěi hanyatngö nup mum töp hīla. Ngatī ṙēngen ayī-ö öi hanyatngö nup öt kumlēḵ-en yip holre tö ngam hanangenlōnre.
15. Sitih inlahen öi min yěn kiröngen ngam hanangenlōn hī tö më prötör sistör? (Kòlòsi 3:13)
15 Mihôiṅ in öi aṙē-ěl tökööl yip prötör sistör re yē hī aṅhav in tö ngam hanangenlōn, pòrô angū-ö nö kanihngen nö in hī. Meūkö ngam hanangenlōn hī tö më prötör sistör yē hī aṙēlen cha. (Vë-evkūö Kòlòsi 3:13.) Ngaich ṙamölōn inrē ang Yāvē nö in hī. Asuh nup mihôiṅ inlahen hī aṙē-ěl yip holre pòrô nup ṙô cha nö tö līnötī tö hī? Ta-a töi ngëicha.
Sā inlahen hī öi haṙemken nup tövai nyat ngaich tilitngen nup töt vai ayī-ö nyat, ngatī ṙēngen ayī-ö yěi fēkö nup tövai inlahenre in yip prötör sistör ngaich havaich ngöre ayī-ö tö nup töt vai inlahenre. (Ngëichköm perekrāf 16-17)
16-17. Asuh nup ṙô tö mihôiṅ nö hayööken hī öt chumkūöṙen tö nup töng rahëichyen vanāichö yip tahëng? Mikahtö elmat hī. (Ngëichkö ngam nyat.)
16 Hòṅ chumkūöṙen ayī-ö tö nup tövāi tinrīken yip prötör sistör, un ngëichka nup tövaich. Tö sā ngih inchōḵ elmat. Yē hī ṙung öi mūl in yip prötör sistör öi haṙamlōnre. Ngaich urēhěkūö hī ṙung hòṅ kirööngöre ngaich kē fotō re ayī-ö. Rö-ö pöri ayī-ö höng hēngö kahë tö fotōre, pöi nët hēk lūöiyö kahë inrē, pön yěn öt vai nup tahëng min nyat ngaich ōt min minë tövai. Ngaich unôichngöre kò-òṙen min öi chumkūöṙen ngëichkö nup nyat ngaich mihôiṅ min öi kēngen nup töt vai.
17 Nup fotō tö haṙēmkaṙen tö hī, inköpkölōn hī anū-ö tö nup inlahen hī in më prötör sistör. Fēkö öp inlahen man yěn hěngtak öp prötör hēk sistör mumṙivngölōn meh. Asūp min inlahen meh? Ötkô hòng min më-eṅ havaichngöre tö u öm sā inlahen tī re öm tilitngen öp töt vai nyat? (Inch. 19:11; Efi. 4:32) Mihôiṅ in öi havaichngöre tö nup tö rahëichyen vanāichö öp prötör, pön ōt nup tövai inlahen hī in öp prötör. Ngaich lōnu ayī-ö töre öi haköpkölōn re tö u.
KŪÖ YÒH TÖNGAMUH NÖ TÖT ṘANĀNGEN NGAM INLAHEN HĪ HANGENLŌN TÖ HÖÖ?
18. Asuh nup ngaich taheui haköp hī in ngih ātiköl inlahen ngam hanangenlōn?
18 Kūö yòh öi hòṅ kirööngen hanangenlōn tö höö? Ngaich in taheui mikahtökūöre in ngih ātiköl tö hī yěi hangenlōn tö më prötör sistör, ngaich lökten in e mikahkūö ayī-ö töre öi hangenlōn tö Yāvē. Sitih inlahen pöri ayī-ö öi hameuktö ngam hanangenlōnre tö më prötör sistör? Hěng ön ngam inlahen hī, hòṅ hareuskö alaha höö. Yē hī inrē min öi aṅhav in tö ngam miṙēlōn ngaich iṙūöhen min ayī-ö öi “kö hareuskö alaha höö.” Sitih inlahen pöri ayī-ö öi ṙūöhlö ngam hanangenlōnre tö höö? Kö aṙēlen höö, pòrô öi kihngen öi ngatī inlahen.
19. Kūö yòh öng töngamuh nö töt ṙanāngen ngam inlahen hī hēk öi hangenlōn tö höö?
19 Töt ṙanāngen takô ön töngamuh ngam inlahen hī öi hangenlōn tö höö. Kūö yòh? Töi chumkūöṙen ngëichköm lāinyngen e ṙô Pītör. Ngöṙô tī anga-aṅ nö kūich: ‘Röhta an ngam manāngen në taṙòkhöre. Lökten yin, . . . kô-en hanāngenlōn tö höö.’ (1 Pīt. 4:7, 8) Asā ranöhtö manāngen ngih tötlöök panam, ngatī inlahen sanīöpö minë ötlanöökö. Ngatī ṙô inrē ang Yēsū nö in yik haköptöre: “Surīkhu yin min tö taṙòkhöre tarik töpòkūö Mine-eny Chu.” (Mët. 24:9) Ma-ainyre töngamuh ngam Sī-ö nö vīlö tinrōlen nö ihôi hī. Yěn ōt pöri ngam hinëngö nö ihôi hī, ngaich mihôiṅ min ayī-ö la-al ò. Lökten ayī-ö hòṅ aṅhav in tö ngam hanangenlōn yē hī hòṅ köptī tö ngam hinëngö, pön ngam ‘hanangenlōn mahaköpken hī öi im hinëngö.’—Kòl. 3:14; Filip. 2:1, 2.
TINKÖÖKÖ 130 Asīnken Yāvē In Ngam Inṙē-ěl
a Töt ṙanāngen ön töngamuh ngam inlahen hī öi hameuktö hanangenlōnre tö më prötör prötör. Kūö yòh? Asūp inlahen hī hēk mihôiṅ ṙūöhlö ngam hanangenlōnre öi in höö?
