1. Sitih ṙô yip kò-òren ṙamatö-ellōn nö havëken Yāvē?

KAHEUKHÖTRE Yēsū, “ngam lanòh në tövilöngö,” nö holre tö yip töt kanṙeūken ma-ahānga nö el ngam mikūönö Yāvē. (Kòl. 1:15; Sal. 103:20) Hē Yēsū misī nö ing panam, ngö ṙô anga-aṅ, mihôiṅ yip tarik nö Yöngrevö ṙô tö Yāvē. (Yôh. 20:17) Yěi kētöre im linökölōn Yāvē öi kēḵ ngam vinôkö ngaich kaheukhötvö min ayī-ö öi tumö alaha ngam mikūönö ngam Tēv.—Māk. 10:29, 30.

2. Asuh öp min haköplö hī öi in ngih ātiköl?

² Ōt yip tö kihngen nö ṙatö-ellōn re tö Yāvē nö tö hangenlōn nö inyöngö. In ngih ātiköl in min öi mikahtökūöre tö Yāvē nö tö hangenlōn nö inyöngö. Ngaich hòṅ sitih inlahen ayī-ö öi asīnken Yāvē öi hameuktö hanangenlōn re tö yip ṙamatö-ellōnre hol maneuk hī.

3. Asup ṙô Yēsū nö tölṙô hī?

³ Tö hangenlōn ang Yāvē nö inyöngö. Hōten hī ang Yēsū öi asīnken ò, nö tö hangenlōn nö inyöngö. Hachōtô yik haköptöre anga-aṅ nö vë-ekūötēv, nö ngö ṙô: “Kayöngö.” (Mët. 6:9) Tölṙô hī inrē anga-aṅ öi havëken Yāvē nö tö “Kalēkūö tö Kalēḵ,” “Vamī-il taṙòkhöre,” hēk “Rācha töt chanuhuvṙen,” invëkö ò nun anū-ö nö aṅmat ngam Paipöl. (Ran. 49:25; Isa. 40:28; 1 Tim. 1:17) “Kayöngö” ngö ṙô inrē ang Yēsū nö havëken ò.

4. Asup tinöölöṙô hī tö Yāvē?

⁴ Kihngen öm ṙatö-ellōn re tö Yāvē nö tö hangenlōn nö inyöngö? Pōyen yip tö ngatī kanihngen kūö inruklöre. Ṙamlōn pöri ayī-ö pön keuheutlö re mikahkūö Yāvē tö hī. Lökten ò nö tölṙô hī, nö ngö ṙô: “Ṙūötöre im Tēv, ngaich  ṙūötöre min anga-aṅ nö in yīö.” (Yāk. 4:8) Hameuktöre anga-aṅ nö töt insā-av hanangenlōn nö inyöngö.

5. Sā ṙô ngam līpöre Lūkös 10:22, sitih inlahen ang Yēsū nö hachōten hī öi ṙūöhtöre in Yāvē?

⁵ Mihôiṅ ang Yēsū nö hayööken hī öi ṙūöhtöre in Yāvē. Pön keūheutlöre mikahkūö anga-aṅ tö ò, nö holre tö minë tinrīken ò. Lökten ök nö ngö ṙô: “Ngòh mameūkö Chu, ngaich meuk ngam Yöng inrē.” (Yôh. 14:9) Sā ṙēngen mëm hī anga-aṅ, nö hachōten hī öi milēḵṙen hang chööngö ngam Yöngre. Hameuknyöm tökiröng hanangenlōn Yāvē ang Yēsū tö hī. (Vë-evkūö Lūkös 10:22.) Ta-a töi ngëichkö në inchō elmat.

6. Hamang vinë-ekūöre ang ngam Tēv Yāvē?

⁶ Hamang vinë-ekūöre an Yāvē. Hang ṙô ngam kūönre misī anga-aṅ nö vë-ekūö ò, hē ò nö ing panam. (Lūk 5:16) Hē Yēsū nö havëkö hinôlṙen re nö katöllö yik tö 12 tak mahaköp. (Lūk. 6:12, 13) Hang ṙô Yēsū inrē anga-aṅ nö vë-ekūö ò, hē ò nö kihngen. Hē ò nö kē-ě, ngaich vë-ekūö ngam Yöng re anga-aṅ tö nuk kanihngenre. Rö-ö pöri nöng hang nup vinë-ekūöre ang Yāvē pön hayööken ò inrē nö tīntö yip ma-ahāngare nö hangönken ò.—Lūk. 22:41-44.

7. Hang ṙô yip tarikre ang ngam Tēv Yāvē töngamuh yēḵ cha nö vë-ekūötēv?

⁷ Hang ṙô yip tarik re an Yāvē töngamuh yēḵ cha nö vë-ekūö ò, asītö elnangre inrē tö nup ṙô cha yěn vë-ekūö ò. (Sal. 116:1, 2) Kò-òren in ngëichkö ngih inchō elmat inlahen ngòh tö hěng tak sistör aṅ Intia, hē ò nö īnu tök tökiröng kanihngenre. Ngö ṙô tī anga-aṅ nö kūich: “Sā inlahen sinap ṙô chu öich vë-ekūötēv ngam Mē 2019 JW Pròtkasting öich la-al ngam tökiröng kanihngenre.”

8. Sitih inlahen ang Yāvē nö hameuktöm hanangenlōnre nö in Yēsū?

⁸ Hangenlōn ang Yāvē tö hī nö holre tö ngam kūön ò, lökten ò nö hameukhömat ò tö nup taṙòkhöre la-enre. (Yôh. 5:20) Kē-ěkūö Yēsū anga-aṅ tö minë tölöök inlēnö, hayööken ò yěn haṙivlōn,  kē-ěkūö ò tö minë kuilōn ò. Öt ma-ihṅtīre anga-aṅ nö hameuktöm hanangenlōn re tö ò, vë-enyre inrē nö hangenlōn tö ò. (Mët. 3:16, 17) Öt ṙāngen ngam kūönre anga-aṅ nöng hěngtak nö i nup la-enre.—Yôh. 8:16.

9. Sitih inlahen ang Yāvē nö hameuktöm hanangenlōn re tö hī?

⁹ Akahaiṙen in ayī-ö inrē töm hanangenlōn Yāvē tö hī, öi sā Yēsū. Kò-òren in ngëichköm inlahen ò nö hameuktöm hanangenlōnre tö hī, hē ò nö tūökten hī öi tūmö alaha ngam mikūönö ò. (Yôh. 6:44) Akahalōn anga-aṅ inrē tö nup taṙòkhöre hanakten hī ngaich kēten u nö in hī. (Mët. 6:31, 32) Yēḵ hī min öi hameknyö minë hanangenlōnre tö ò ngaich ngatī min anga-aṅ nö hameuktöm hanangenlōnre tö hī.

10. Kūöyòh öi min öt kihngen hameuknyöm hanangenlōnre tö yip holre?

¹⁰ Hangenlōn ang Yāvē tö më prötör sistör hī. Mihôiṅ pöri min ayī-ö öi kihngen öi hameuktöm hanangenlōnre tö cha pöi kö harīkngöre inruklö. Kò-òren min cha-a nö haṙivlōn tö tī hī, pöi öthet. Sön pöri öi mihôiṅ öi hameuknyö ngam hanangenlōnre tö më aṅ ngam mikūönö ngam Tēv. Öi sitih inlahen? Yěi asīnken ngam Yöngre nö hameuktöm hanangenlōnre tö më prötör sistör hī. (Efi. 5:1, 2; 1 Yôh. 4:19) Ta-a töi ngëichkö minë inlahen Yāvē nö hameuktöm hanangenlōnre.

11. Sitih inlahen ang Yēsū nö hameuknyöm “tölngö neukölōn” Yāvē?

¹¹ Hameuknyöm “tölngö neukölōn” re ang Yāvē tö hī. (Lūk. 1:78) Yēḵ hī min ayī-ö īnu tö e ngaich lökngöre min ayī-ö tö nup kanihngen yip holre ngaich chöh talöökö tī re öi hayööken cha. Ngatī inlahen misī ang Yēsū nö hameuktöm neūkölōnre nö asīnken ngam Yöng re Yāvē. (Yôh. 5:19) Hē ò ‘nö meuk yik tömaṙôngö, ngaich aṙē-ĕlōn Anga-aṅ tö cha; pò cha nö ötkôlò, parāta inrē, sā sīöṅp töt yōmu.’ (Mët. 9:36) Halanken nuk invah cha anga-aṅ ngaich haṙamkölōn yik ‘töchei, hēk tölangan tö kumre.’—Mët. 11:28-30; 14:14.

12. Sitih inlahen öi kò-òren hameuktöm neūkölōnre öi in yip hol maneukre?

¹² Urēhěkūö hī hameuktöm neukölōre öi in yip hol maneukre, ngaich hòṅ urěh öi mikahtökūöre tö nup kanihngen cha. Tö sā öp sistör yěn vahav öre, ngaich öthō min anga-aṅ nö havëkö inyöökenre. Sön pöri min anga-aṅ nö ṙamlōn yěi hayööken ò. Mihôiṅ öi havëkö inlahenre öi kahūlen ò hēk ha-et öp patī ò inrē. Ngaich ṙamlōn min anga-aṅ. Mihôiṅ in inrē öi hayööken yip holre tö löhlö tö kinmānöre. Nö inlahen hī anū-ö öi hameuktöm neūkölōnre tö cha.

13-14. Sitih inlahen öi min ayī-ö öi asīnken Yāvē öi hameuktöm neūkölōn?

¹³ Hòṅ asīnken ngam Yöng re in Yāvē öi im inmeuktö neukölōn. (Mët. 5:45) Mihôiṅ öi rēhěre öi hayööken yip holre, un höng höknyu ṙô cha-a nö havëkö inyöökenre. Mihôiṅ pöri öi asīnken Yāvē öi hameuktöm neukölōn tö cha. Kò-òren ngëichköm tavūöi nö örheūheu nö meutlö, pòrô öi öt havëken ò. Ngaich yöölen yip tölöök hēk tötlöök inrē nö lökten in ò. Hö-ö öng angū-ö nö inmeuktöm hanangenlōn ngam Tēv Yāvē tö hī? Mihôiṅ ayī-ö öi asīnköm neūkölōn ò tö yip holre!

¹⁴ Pōyen yip hol maneuk hī ma-asīnköm neūkölōn ngam Tēv Yāvē nö hayööken  holre. Tö sā më hol maneuk hī aṅ Filipains, më tö pala-aiṙen patī hēk chehen inrē tö kūö ngam tö kalēḵ kuföt Supör Taifūn Hayan ik 2013. Hayöökaṙen cha-a tö më hol maneuk hī tö keuheutngöre chūök elkatòh ngih halīöngö nö kētu rupīö, mānlöng patī, lohten nö 750 ṙòken minë patī tö halööktitvö minānlö hē e. Pōyen yip hol maneuk hī mahayööken yip prötör sistör el ngih tökiröng invah COVID-19. Yěi kihngen tö minë ṙô ngam Tēv ngaich hayööken hī cha-a, hòṅ hī öi teūngen tö u. Ngatī inlahen cha-a nö hameuktöm neūkölōn re tö hī.

15-16. Sā ṙô ngam līpöre Lūkös 6:36, Sitih inlahen öi min yēḵ hī hòṅ asīnkö inlahen ngam Yöngre aṅ el halīöngö öi kö aṙēlen höö?

¹⁵ Tö aheūkölōn an Yāvē nö inyööngö. (Vë-evkūö Lūkös 6:36.) Akahaiṙen in töm hanangenlōn ngam Yöng hī aṅ el halīöngö. (Sal. 103:10-14) Pòrô yik mahaköp nö in Yēsū nö töthet; sön anga-aṅ, nö hangenlōn tö cha, aṙēlen cha inrē. Hō anga-aṅ nö kēngö nômö re tö pòkūö në tökööl hī. (1 Yôh. 2:1, 2) Hö-ö öm më-eṅ hòṅ yihtöre öm in Yāvē hēk Yēsū inrē kūö cha nö tö aheūkölōn?

¹⁶ Sā mahangönlöm hanangenlōn re in tö höö yěi “kö aṙēlen höö.” (Efi. 4:32) Hö-ö pöri öi lööṙen öi ngatī inlahen pò hī öi öthet. Yēḵ hī pöri min harūnöre ngaich köp min ngam hanangenlōn hī tö höö. Kò-òren in hang ṙô ök töhěngtak sistör nö vë-eny inlahen lanööktö mufēre hē ò nö haköp ök ātiköl el ngam chuökamahati (HI) ök tö ngö ṙô: “Kö Aṙēlen Höö Yin.” * Ngö ṙô tī anga-aṅ nö kūich: “Yöölen chin unôichrit inlahen chu öich haköp ngam ātiköl, pön vaita ngam mufē chu öich im inṙēlö holre. Ngö ṙô pöri anga-aṅ inrē, töm inlahen hī yěi aṙēlö yip holre, nö rö-ö nö tö ngö manah tö hī öi ṙamlōn töm inlahen tī ò tö hī. Tö ngö manah pöri angū-ö, tö hī öi hòṅ vī ngam lanāmö öi ihôi cha.” Yēḵ hī min öi lööṙen öi aṙē-ěl yip holre, ngaich ma-asīnken Yāvē min ayī-ö ngam Yöng hī aṅ el halīöngö öi kö aṙēlen höö.

17. Sā ṙô ngam Mëtiv 5:16, sitih inlahen öi min kò-òren harōilö ngam minë-eny ngam Yöng hī aṅ el halīöngö?

¹⁷ Ṙamlōn in pöi kaheukhötvö öi tūmö alaha ngam mikūönö ngam Tēv ngam tö keūheutngöre chūök elkatòh ngih halīöngö. Lōnu in inrē tö taṙòkhöre tarik nö yihtöre nö holṙô hī öi ha-öiny ngam Tēv. Lökten in öi hòṅ chumkūöṙen ngëichkö nup la-enre, hòṅ hī min öt chōichngöre tī tö ngam minë-eny ngam Tēv Yāvē, tö yip tarik ò inrē. Hòṅ la-evṙen in inrē tö nup la-en tö tūöktöre tī tö ellōn yip tarik nö in ngam tölöök inhānga.—Vë-evkūö Mëtiv 5:16.

18. Asuh öp min mahayööken hī öt pa-ekūö ṙô öi ahangköm tölöök inhānga?

¹⁸ Mihôiṅ min yip tarik nö kūönnö elmat tö hī hēk hakihten hī inrē, kūö hī öi hang chööngö ngam Yöng re ngam aṅ el halīöngö. Ngaich sitih inlahen min yěi vöö öi vë-eny ngam ṙinatö-ellōnre öi in yip tahëng? Mihôiṅ in min öi havëkö inyöökenre öi in Yāvē hēk im kūön ò inrē. Sōtö yik haköptöre ang Yēsū nö pa-ekūö tö nup ṙahònyö cha min. Kūöyòh? Ngö ṙô ang Yēsū tö cha: “Tön kē-ĕvkūö yin min, ip hē e, tö ṙôre,” ngö ṙô inrē ang Yēsū, “tön rö-ö yin yī-ö töṙô-òv; tön ngam Töhet Fanöinylö ngam Yöng Chu töṙô-òvö nö in yīö.”—Mët. 10:19, 20.

19. Vë-eny inlahen ök hol hī töt pinhë-evkūö ṙô nö ahānga?

¹⁹ Kò-òren in ngëichkö inlahen Rôpöt. Ngòh töng tufömngöre Paipöl istuten töt uròh nö pōyen mikahkūö tö ṙô ngam Paipöl, hē ò nö asöklöngö nö ikūö yip militri kòrt nö i Saôt Afrika. Öt pa-ekūö anga-aṅ nö vë-eny re nö sō nö hěngö kahë tö la-a höng hakööpngöre pöri anga-aṅ nö hangenlōn tö yip Kristīön hol maneukre. Ṙamlōn anga-aṅ töm kamtö chūök re nö el ngam mikūönö ngam Tēv! Ngö ṙô yip mā nö hatöönan “Achiö yip hol maneuk meh?” Höng ilööṙen ang Rôpöt nö kētö sanap ṙô ngam intöönö, pön ilöö fē-ěl re anga-aṅ tö ṙô ngam tēli tëks vahë-ekūö ò in ngam sakamö.  Ngam līpöre Mëtiv 12:50: “Pòn kahëm Chu, kanānö Chu, yöng Chu inrē kikānö, ngòh töla-evṙen min tö lōn ngam Yöng Chu el halīö-ngö.” Pòrô ang Rôpöt nöng tufömngöre Paipöl istuten ngaich sön ngam töhet kumlēḵ Yāvē nö hayööken ò nö kētö sanap ṙô nup intöönö ò. Lohten ngam Tēv Yāvē nö ṙamlōn nö in Rôpöt! Öt hō min inrē anga-aṅ nö öt ṙamlōn nö in hī yēḵ hī öi ngatī inlahen öi hayönglenre öi in ò, ngaich öt pinhë-evkūö ṙô öi ahangkö ngam tölöök inhānga yěn pòrô nup kanihngen nö yih nö in hī.

20. Sitih inlahen öi min hameuktöre öi ṙamlōn töm kamtö chūökre öi el ngam mikūönö ngam Tēv? (Yôhan 17:11, 15)

²⁰ Ta-a töi iṙūöhen hameuktö minlēḵṙen re tö minë inkòlô taneūngen hī öi kaheūkhötvö öi el ngam mikūönö ngam Tēv Yāvē, më tö hangenlōn tö höö. Teūngen ayī-ö töm Yöng re tö më hol maneuk hī inrē tö hangenlōn tö hī. Lökten in öt kô öi halöngten ngam Sī-ö nö chaphöt ngam kintööngölōn nö ellōn hī, tö ngam Yöng hī aṅ el halīöngö nö öt hangenlōn tö hī. Ui halöngngen ngam hinëngö tö hī nö pasū tö tī ò. Vë-ekūö ngam Yöng re ang Yēsū hòṅ ò nö aṅhten hī, hòṅ ngam mikūönö hī nö köp nö hěng. (Vë-evkūö Yôhan 17:11, 15.) Ngaich sapṙô ò ang Yāvē nö vë-ekūötēv. Ta-a töi asīnken Yēsū öi ui katööngalōn tö ngam Yöng hī aṅ el halīöngö nö hangenlōn tö hī. Ngaich iṙūöhen öi haröhtöre öi in ngam mikūönö ngam Tēv öi höng örheūheu.