TÖHAKÖÖPÖ ĀTIKÖL 40
“Yip Tömaṙôngö Havöötukūö Nö Im Tölöök”
“Cha-a inrē yip tömaṙôngö havöötukūö nö im tölöök, sā taneūsömat nöng öt chanūhuvṙen.”—TAN. 12:3.
TINKÖÖKÖ 151 Hachohlen Cha Min Yāvē
RAHËICHTAMAT *
1. Asuh öp ṙētak tö hökka tö hī?
ASEHKŪÖRE man tö ngih, ngaich ang Yēsū nö rulten re nö hayöng im töhěng köiny samyeūheu, ngaich hökken öp ṙētak re më-eṅ öm meukkūö yip hanangenlōn re yik tökapah sin. Teungtökūö ngaich ngam ṙētak, kirööngen ṙanamlōn më-eṅ öm kôta mat meūkö u! Keuheūtngöre chūök ngam ṙanamlōn ip hē e. Pön ṙòkhöre yip tarik nö meukkūö yip hanangenlōnre, fūölö cha inrē. Ròkhöre in ayī-ö öi hökken öp töngatī ṙētak, ngatī inrē ang Yāvē nö kapahare nö hökken e angū-ö sakāmö. (Yōp 14:15) Yěn töfömngöre ṙen öp hanāngenlōn meh nö kapah, ngaich lohten min anga-aṅ nö in yip tarik tö urěhlö inchohlö in yip tökapah. * Tö sā öp haköp hī in ök urěh ātiköl, inlahen yip “tölöök” hēk “tötlöök” tarik, nö ha-aṅlöng nyöre min cha-a. Kūichi minë-eny yip “tölöök” tarik nö im līpöre nômö, lökten min cha-a nö ha-aṅlöng nö “im invanlö nômö.” Ngaich yip “tötlöök” tarik pöri nö öt teūngen cha-a tö ṙētak re nö haköp inlahen Yāvē hēk löklōn ò inrē, lökten min cha-a nö ha-aṅlöng “im invanlö kinṙôka.”—Inl. 24:15; Yôh. 5:29.
2-3. (a) Sā ṙô ngam Isayā 11:9, 10 asuh öp min la-en tö kirööngen kinëken? (b) Asūp min haköp hī in ngih ātiköl?
2 Pōyen haköplö yip min tö ha-aṅlöng. (Isa. 26:9; 61:11) Lökten nö kirööngen pumnamö min tö haköptu ip hē ē. (Vë-evkūö Isayā 11:9, 10.) Yěn ha-aṅlöng min yip “tötlöök” tarik, ngaich haköp inlahen Yēsū min cha-a, haköp inlahen ngam Pūlngö ngam Tēv inrē hēk tö ngam tökitaknyu mahām Yēsū inrē. Haköptu inrē cha-a tö ngam minë-eny ngam Tēv nö hòṅ örheūheu nö ha-etlöng, hēk inlahen ngam Tēv inrē nöng anga-aṅ tö mihôiṅ nö hayöng nö ikūö ngih panam. Ngatī inrē min yip “tölöök” tarik nö pōyen haköp yěn ha-aṅlöng. Pön hòṅ mikahtökūö re min cha-a tö ngam kuilōn Yāvē töng panam. Ha-aṅlöng inrē min yip tarik ngam Tēv yik tö kapah urēhěkūö kinūichö ngam Paipöl ngaich haköptu min cha-a.
3 In ngih ātiköl min ayī-ö öi chöh sanapṙô në tö nët intöönö: Sitih inlahen kinëken öng min ngam tökiröngen la-en inköphöti? Ngaich yip tarik min töhaköptu, ṙòkhöre hòng min cha-a nö kūichhötvö minë-eny nö imat ngam līpöre nômö? Yē hī hòṅ akahakūö tö sanapṙô në intöönö, ngaich hòṅ chumkūöṙen ayī-ö öi ngëichkö minë tö eūka tö Tanīěl hēk in ngam līpöre Inmeukhömat inrē. Mikahtökūö re inrē min ayī-ö tö ngam tö halööktitvö minkahelnang hī tö ṙô ngam līpöre Tanīěl inlahen yip tö kapah nö hachohlöng. Rö-ö nun min në pön töteung in nup yamih ṙētak, mikahtökūö re pöri min ayī-ö öi kūö yòh töngamuh öi hòṅ chumkūöṙen tö minë ṙô tö eūka. Ta-a töi ngëichkö ngam tö vënyu im Tanīěl 12:1, 2.
“YIP MAHAṘÒH NÖ EL PITUNG NGAM TUMLAT NÖ AṄHEN MIN”
4-5. Asuh öp ṙô ngam līpöre Tanīěl 12:1 nö vë-eny inlahen ngam manā-aṅ sakāmö?
4 Vë-evkūö Tanīěl 12:1. Vënyu nang in tö ngam līpöre Tanīěl tö inlahen nup tömeukö min pinngangkūö ip manā-aṅ sakāmö. Sā ṙô ngam līpöre Tanīěl 12:1 nö vë-eny inlahen Maiköl ngam tö vënyu nö Yēsū Kristū, min nö ‘sökhak nö lāritö yip tarik ngam Tēv.’ Teūngtökūö ngih tö eūka nö ik 1914 hē Yēsū nö vīlöng nö Rācha ngam Pūlngö ngam Tēv nö el halīöngö.
5 Vënyu nang inrē ang Tanīěl tö inlahen Yēsū, nö hē e min nö ‘sökhaka’ yěn yih ngam “hē kanihngen, tötha-eh misī hēten tö pumnāmö tarik.” Tö sitih manah angū-ö? Ngam “hē kanihngen” vahënyö Tanīěl, ṙôtö ngam “yöng ötkanôlò” angū-ö ngam tö vënyu nö im Mëtiv 24:21. Lökten yěn sökhaka ang Yēsū hē ngam kanihngen, ngaich tö ngö manah angū-ö tö ò min nö laklen yip tarik ngam Tēv ip Armakētòn ngam manā-angrit ngam yöng ötkanôlò. Yip tö lāklöng min tö Yēsū, vënyu cha-a nö ‘tökiröng kiteūm’ nö in ngam līpöre Inmeukhömat vē ṙamā-ang el ngam “yöng kanihngen.”—Inm. 7:9, 14.
6. Asūp min inlahen më tökiröng kiteūm yěn öt kò-òngvah ip ṙētak öp kanihngen? Mikahtö elnang hī. (Yěm hòṅ ṙūöhtö mikahkūöre tö inlahen yip tarik tö ha-aṅlöng nö ikūö ngih panam ngaich kô-òren öm ngëichkö ngam ātiköl “Hatön Meh” imat ngih Chūökamahati.)
6 Vë-evkūö Tanīěl 12:2. Asūp min inlahen më tökiröng kiteūm yěn öt kò-òngvah ip ṙētak öp kanihngen? Sā ṙô ngam miröökö nö vë-eny nang hī tö ‘yip tö pōyen mahaṙòh nö el pitung ngam tumlat, nö hachohlöng min.’ Ngö mufē in sin ik urěh tö ngih miröökö nö vë-eny inlahen ngam ṙētak ing manā-aṅ sakāmö, hē yik tarik ngam Tēv nö sā tö hachohlöng, ik sā cha nö havanlö inlahen re nö ahāngkö ngam tölöök inhānga unôichrit ngam inkihten cha ik 1918. * Ngaich pöri nö halööktu ngam mikah elmat hī. Asūp lāinyngen e nö halööktitvö? Chumkūöṙen tö ṙô ngam Tanīěl 12:2. Ṙôtö inlahen yip tarik angū-ö mahavantöre nö el pitung ngam “tumlat.” Ngatī ṙô ök inrē Yōp hē ò nö vënyö ngam kinpahare, ngaich vë-enyre anga-aṅ nö “yôkti [nö] el pitung” hēk el “chūök kupah” inrē. (Yōp 17:16) In e mikah elmat ayī-ö tö ngam līpöre Tanīěl 12:2 nö ṙôtö ngam inchohlö yip tökapah min tarik, unôichrit ngam Armakētòn.
7. (a) Tö sitih manah öng ngam inlahen yip rīkre min tarik tö ha-aṅlöng nö im ‘tö-örheūheu-aṅ nômö’? (b) Tö sitih manah ngam vinënyö cha min nö teūngen tö “tölöök invanlö tö kapah”?
7 Ngö kinūichngö ön nö im Tanīěl 12:2 tö yip rīkre min tarik tö ha-aṅlöng nö im ‘tö-örheūheu-aṅ nômö’. Tö sitih manah angū-ö? Pōyen yip min tarik tö ha-aṅlöng ip töhěng köiny samyeūheu, yip tö iṙūöhen pöri nö haköp inlahen nā Yāvē nā Yēsū hēk hang minë chööngö cha inrē, höng cha-a min tö teūngen tö ngam nômö tö örheūheu-aṅ. (Yòh. 17:3) Vënyu inlahen inrē cha-a tö ngam Paipöl nö teūngen tö ngam “tölöök invanlö” tökapah. (Hep. 11:35) Pò yik tarik misī tö hachohlöng nö ṙa-ang im kinpaha nö hēk cha-a nö kapah. Yip tarik pöri min tö ha-aṅlöng nö in öp tufömngöre panam ngaich iṙūöhen inrē nö haköp inlahen Yāvē, ngaich öthō hēk min cha-a nö kapah pön örheūheu min nö aṅ.
8. Tö sitih manah öng ngam inlahen yip rīkre tarik tö ha-aṅlöng nö “lamöö im sinrōngkūö i minṙēngö inrē tötchanūhuvṙen”?
8 Vënyö inlahen yip tarik inrē ang Tanīěl yip tö ha-aṅlöng nö “lamöö im sinrōngkūö i minṙēngö inrē tötchanūhuvṙen.” Tö sitih manah angū-ö? Tö ngö manah ön tö yip tarik min tö haköptu nö ikūö öp tufömngöre panam, ōtre pöri min yip töt hamang. Yēḵ cha min nö öt halööktitre ngaich öt kūichiyö min ngam minë-eny cha nö im līpöre nômö. Yip tö ngatī inlahen ngaich öt teūngen min cha-a tö ngam nômö tö örheūheu aṅ. Pò cha min nö “lamöö im sinrōngkūö” ngam tö ngö manah tö cha min nö ha-atiyö. Lökten öi mihôiṅ ngö ṙô, tö ngam līpöre Tanīěl 12:2, nö vë-eny inlahen ngam kinṙòkken yip tarik nö asā nup la-en kahëken cha unôichrit inlahen cha nö ha-aṅlöng. Ōt min yip tö teūngen tö ngam nômö tö örheūheu-aṅ ngaich ōt min yip tö ha-ati. *—Inm. 20:12.
“YIP TÖMAṘÔNGÖ HAVÖÖTUKŪÖ NÖ IM TÖLÖÖK”
9-10. Sā ṙô ngam Tanīěl 12:3 asūp min unôichrit ngam tö kiröng kanihngen? Mikahtö elnang hī.
9 Vë-evkūö Tanīěl 12:3. Sā ṙô ngam Tanīěl 12:2, ngatī ṙô ngam tö 3 miröökö nö vë-eny inlahen öp unôichrit ngam tö kiröng kanihngen.
10 Achīö yip cha-a tö sā “yanāngö el taṙul”? Teūngen in tö sanapṙô e in ngam Mëtiv 13:43, ngam ṙô Yēsū ngam tö ngö: “Ngaich min yip tölöök tarik nö sā yanāngö ngam tavūöi, nö im Pūlngö ngam Yöng cha.” Cha-a yin vē ṙô Yēsū “kūön ngam Pūlngö,” më töhachāmö elkui Kristīön hamôlṙen ò min nö hayöng ngam Pūlngö nö el halīöngö. (Mët. 13:38) Lökten ayī-ö mihôiṅ öi ngö ṙô tö ngam līpöre Tanīěl 12:3 nö ṙôten më töhachāmö elkui Kristīön, nö hamôlṙen ò min nö la-envö nö ip inyöngö töhěng köiny samyeūheu.
Yěn haköptu min më tarik im töhěng köiny samyeūheu ngaich holuṙen min ang Yēsū tö më tö 1,44,000 nö hayōmken ngam la-en nö holṙen ò (Ngëichköm perekrāf 11)
11-12. Asuh nup min la-en më tö hachāmö elkui im inyöngö töhěng köiny samyeūheu?
11 Sitih inlahen öich më töhachāmö elkui nö hachōkūö më ‘tömaṙôngö nö im tölöök’? Yěn haköptu min më tarik im töhěng köiny samyeūheu ngaich holuṙen min ang Yēsū tö më tö 1,44,000 nö hayōmken ngam la-en nö holṙen ò. Hö-ö min cha-a nöng sā më rācha nö hayöng pön sā inlahen yip kūönṙô inrē nö mameukṙen. (Inm. 1:6; 5:10; 20:6) Sā ṙēngen yip kūönṙô min cha-a nö hayööken më pumnāmö tarik nö ṙūöhngö minë invah cha, hòṅ cha nö hiṙeūtkö inlahenre nö chuh im hanëtö. (Inm. 22:1, 2; Isi. 47:12) Ṙamlōn yin min më töhachāmö elkui yěn kētöre nö in ngih la-en.
12 Achīö yip min tö hachō-okūö tö më töhachāmö elkui nö lök in ngam tölöök? Cha-a yin më tarik tö ha-aṅlöng nö ikūö öp tufömngöre panam, yip töt kò-òngvah min tö ngam Armakētòn hēk yip nyīö inrē tö fötnyuvö nö ikūö ngam tufömngöre panam. Asā ngam töhěng köiny samyeūheu min nö keūheut ngaich ṙòkhöre min më tarik nö hëtlöre. Ihē min ngam minë-eny cha nö kuichhötvö nö in ngam līpöre nômö nöng örheūheu?
MANĀ-AṄ KINLAHA
13-14. Hòṅ sitih inlahen yip min töhet tarik yēḵ cha nö hòṅ teūngen tö ngam nômö tö örheūheu aṅ?
13 Köpöölōn tö ngòh töhěng tak tarik pôrô nö töthěngö tökööl, rö-ö ngaich min anga-aṅ nö teūngen tö ngam nômö tö örheūheu. Kò-òṙen öm fēkö inlahen nā Ātöm nā Ēva tö cha sin nö töhet, öt hang chööngö Yāvē pöri ngaich cha-a, lökten ngaich cha-a nö öt teūngen tö ngam nômö tö örheūheu aṅ. (Rōm. 5:12) Tö ngö manah angū-ö tö ngòh töhěng tak tarik yēḵ ò nö het, ngaich hòṅ sön anga-aṅ nö hang chööngö Yāvē nö hameuktöre nö chiplen. Ngaich möl min anga-aṅ nö teūngen tö ngam nômö tö örheūheu aṅ.
14 Ṙòkhöre min tarik nö het im manāngen ngam töhěng köiny samyeūheu. Ṙòkhöre hòng pöri min ngaich cha-a nö holṙen ngam inyöngö tö Yāvē? Höng sā ṙēngen nā Ātöm nā Ēva ṙöng pòrô nö het sön nö öt hang chööngö Yāvē? Im manāngen ngam töhěng köiny samyeūheu min öi kôta mat meuk yip tö chiplö hēk yip töt chiplö inrē.
15-16. (a) Ihē yip min tarik nö kētu ṙētak nö hameuktöre nö chiplen i linöökö lōn Yāvē? (b) Asuh öp min unôichrit ngam manā-aṅ kinlaha?
15 Yēḵ ngam Sī-ö min nö halökiyö im töhěng köiny samyeūheu, ngaich öt heuveū-en inlahen min anga-aṅ nö hakihten tarik. Yěn keūheuten pöri min ngam töhěng köiny samyeūheu ngaich ṙānyu min ngam Sī-ö ngaich hēk min anga-aṅ nö hòṅ hachīl më tarik. Angū-ö min ngih manā-aṅ kinlaha më töhet tarik pön kētu ṙētak min cha-a nö hameuktöre yěn kô-en nö milēḵṙen tö ngam minë-eny Yāvē hēk yěn kētöre inrē nö holṙen ngam inyöngö tö ò. (Inm. 20:7-10) Hē e min cha-a nö ngëichka inlahen yěn kô nö kūichhötvö minë-eny nö imat ngam līpöre nômö hēk hö-ö.
16 Ōtre yip min tarik tö sā inlahen nā Ātöm nā Ēva nö töt chiplen nö hamòlṙen ngam inyöngö tö Yāvē. Sitih inlahen ken min cha-a? Ha-atiyö yip min. Ngö kinūichngö ön nö imat ngam līpöre Inmeukhömat 20:15: “Yěn hěng tak öp töt kôti nö kūichi nö i mat ngam līpöre nômö, suktu ngaich anga-aṅ nö el öp tötöh tameūyö.” Hö-ö in uroh akahakūö tö ṙôken yip tarik ip manā-aṅ kinlaha yip samò-en Yāvē, mihôiṅ pöri ayī-ö ngö ṙô tö yip tarik min nö pōyen yip tö chiplen nö i linöökö lōn Yāvē. Lökten min nö kūichi minë-eny yip tö chiplen tarik nö im līpöre nômö.
ASUH ÖP MIN IP “ṘĒTAK ÖP MANĀNGEN”
17. Asuh öp vinë-eny nang Tanīěl tö inlahen ngam manā-aṅ sakāmö? (Tanīěl 12:4, 8-10)
17 Keuheūtnyöre ṙanamlōn in min yěn teungtökūö minë tö vënyu in nup yamih ṙētak. Rö-ö pöri ngam līpöre Tanīěl nöng vë-eny inlahen öp yamih ṙētak, pön ṙôten ngam “ṙētak manāngen” inrē, ngih ṙētak hī töngamuh. (Vë-evkūö Tanīěl 12:4, 8-10; 2 Tim. 3:1-5) Ngö ṙô ngam ma-aṅhānga nö in Tanīěl nö i nup manā-aṅ sakāmö min ‘nö sīöp min ngam tö kô-en mikah.’ Ngam manah e, ip manā-aṅ sakāmö min yip tarik ngam Tēv nö ṙūöhlöre mikahkūö tö minë tö eūka aṅ mat ngam Paipöl ngaich in minë tö eūka inrē im līpöre Tanīěl. Ngö ṙô inrē ngam ma-aṅhānga nö in Tanīěl tö “yip tötlöök min nöng la-evṙen tö tötlöök; öt hĕng tak tötlöök min tö-akaha elmat.”
18. Sitih inlahen yip min tötlöök tarik?
18 Höng sīöpö kūöre nun në ötlanöökö töngamuh nö ikūö ngih panam. Ngaich më tötlöök nöng kumchikngen re, öt hěng tak tö ṙô-òv tö inlahen cha. (Mal. 3:14, 15) Röhten pöri ang Yēsū nö kahôkken cha. Pön haköhngen më tarik tö sā ṙēḵngen pöököre min anga-aṅ tö më sīṅp. (Mët. 25:31-33) Ip tökiröng kanihngen min nö ha-etiyö yip tötlöök tarik ngaich öt ha-aṅlöng min cha-a nö ip tufömngöre panam. Öt kūichiyö inrē minë minë-eny cha nö imat ngam līpöre ngam Tēv ngam tövënyu nö im Malakī 3:16.
19. Hòṅ sitih inlahen nup töngamuh la-en hī ngaich kūö yòh? (Malakī 3:16-18)
19 Vë-evkūö Malakī 3:16-18. Ngaich töngamuh ang Yāvē nö hamūl yip tarik re yip “töpōi ṙāi” nö imat ò. Lōnu inrē ayī-ö tö Yāvē nö vī-i hī öi ‘töpōi ṙāi’ imat ò, lökten ayī-ö hòṅ chumkūöṙen tö hī ötkô öi sā inlahen yip tötlöök öi kēken nup tötlöök la-en, hòṅ kēken nup tölöök pöri ayī-ö la-en hòṅ Yāvē nö ṙamlōn.
Yēḵ Tanīěl hēk tö yip hanangenlōn hol hī min nö hēk nö ha-aṅlöng ngaich kiröngen ṙanamlōn min ayī-ö meukkūö cha! (Ngëichköm perekrāf 20)
20. (a) Asuh ök kinlēḵngô Yāvē nö in Tanīěl? (b) Kūö yòh öm hökkö ngam kinlēḵngô tö hòṅ teung?
20 Ngaich nö pōyen töngamuh minë tö eūka tö teūngtökūö. Mööḵlö inlahen pöri min in öp yamih ṙētak. Pōyen hēk min nup tö teūngtökūö tö eūka ip hē e. Pò më tötlöök tarik min nö ha-etiyö, ngaich ngam kinlēḵngô Yāvē nö in Tanīěl, teūngtökūö inrē min angū-ö. Ngam tö ngö: “Sökhak min inrē ip tömichööḵtu chūök meh ip manāngen nup sakāmö.” (Tan. 12:13) Meūka öm më-eṅ öm hökka öp yamih ṙētak yēḵ Tanīěl hēk tö yip hanangenlōn hol hī min nö hēk nö ha-aṅlöng? Lökten öm chiplen i linöökö lōn Yāvē ing töngamuh. Ngaich möl min ngam minë-eny meh nö kūichiyö nö im līpöre nômö.
TINKÖÖKÖ 80 ‘Ngëicha Kalah Kumchik Yāvē Nö Tölöök’
^ In ngih ātiköl in min mikahtökūöre nö asūp tö halööktitvö mikahelnang hī tö ṙô ngam Tanīěl 12:2, 3. Ngaich hēk min öi chumkūöṙen kakken e tö inlahen yip tarik min töhaköptu nö ip tufömngöre panam nö keuheūtngöre chūök hēk achīö yip min tö nôlhöt nö in cha. Mikahtökūöre inrē min ayī-ö, yěn haköptu yip tarik hē e min cha-a nö hīnöre tö ngam manā-aṅ kinlāha re unôichrit ngam töhěng köiny samyeūheu.
^ Lohten min nö uěhlö chanôhlö yip tarik, yip tökapah hē ngam manā-aṅ sakāmö. Ngaich unôichrit cha ha-aṅlöng yip tarik mu-urěhkūö cha nö aṅ. Ngaich ngatī inlahen min ngam tö hěng köl chap nö höngkökūö ngam töhěng köl chap ngam mu-urěhěkūö ò nö aṅ, ngam mikahkūö ò inrē. Hö-ö in öi uroh akahakūö tö yip tö ha-aṅlöng, ṙātö-ellōnre pöri ayī-ö tö e min nö ngatī. Lökten nö ngö ṙô ngam Paipöl nö vë-eny, ‘lēnen inlahen’ yip min tö ha-aṅlöng nö chuh el halīöngö.—1 Kòr. 14:33; 15:23.
^ Ngam urěh sin mikah elnang hī tö ṙô ngih miröökö, vënyu inlahen angū-ö nö in ngam līpöre Chumkūöṙen tö Minë Vahënyö Ök Pròfět Tanīěl! im cheptör 17, hēk in ngam Chūökamahati iṙô ingki im 1 Chulāi, 1987 im pěch 21-25 nö vënyu. Halööktu pöri ngaich ngam mikah elnang hī.
^ Im līpöre Inlahen 24:15 pöri nö kaheūkö më tarik nö “tölöök” hēk “tötlöök” inrē, nö asā minë kahëken cha urěhēkūö kinpaha cha. Ngatī ṙô inrē ngam Yôhan 5:29 nö vënyö yip “tölöökö la-en” hēk “tötlöökö la-en” inrē ngaich ṙôtö minë la-en cha angū-ö minë kahëken cha urěhēkūö kinpaha cha.
