Ngöṙô ang Pôl im 1 Kòrin 15:8, “Manā-aṅ takô chū-ö meūkan, öich sā ṙētö töt hē finötnyöre.” Ngö mufē in sin ik raneh tö manah ngam ṙô Pôl, tö ò nö vënyö ngam hē re nö meūkö Yēsū nö ūichhak nö el halīöngö. Kūöyòh pöri ayī-ö öi ngatī mufē sin? Pön öl sin hē e nö hěngtak i më tö hachāmö elkui, tö hachohlöng nö chuh el halīöngö, ngaich pöri ang Pôl nö meūkö Yēsū nö el heūvö. Lökten ik sā Pôl nö vë-enyre nö sā öp nyīö töt ip ṙētak re finötnyi, ngaich tö ngö manah angū-ö tö lōn hī tö ò nö hachohlöng nö el halīöngö urēhěkūö inchohlö më tahëng tö hachāmö elkui. Kūö hī pöri öi hakūötenre haköpmat ngam Paipöl, kôtökūö ngaich ayī-ö tö ngam mikah elmat re nö vaich ngaich hòṅ halööktit e ayī-ö.

Vënyö ngam ṙētak ang Pôl nö ihih, hē ò nö vītöre nö Kristīön. Tö sitih manah pöri ngam ṙô ò hē ò nö vë-enyre nö sā öp nyīö töt ip ṙētak re finötnyi? Ṙōl nun mihôiṅ minë manah ngam ṙô ò.

Höng rötlö ang Pôl tö re nö vītöre nö Kristīön, kihngen inrē anga-aṅ. Sā inlahen nap inyööngö tö rötlö, yěn urēhěkūö öp ṙētak re öp kūön cha nö fötnyuvö. Ngatī inlahen takô ang Pôl (ngam tö Sôl invëka sin) nöng rötlö pön öt mufē-ěv anga-aṅ töre nö vītöre min nö Kristīön. Pò ò nö mahakihten yik Kristīön sin. Hē ò pöri nö chuh Tamaskös, el talöökö ngaich anga-aṅ nö rötlö tö inmeukhömat re tö Yēsū. Meūkö Yēsū anga-aṅ nö el halīöngö. Unôichrit e ngaich anga-aṅ nö vītöre nö Kristīön. Pingangkūö inrē lohten yik Kristīön nö hang inlahen ò ngaich nö vītöre nö Kristīön. Ngaich unôichrit ngam inlahen ò inrē nö meūkö Yēsū ngaich kūönngöre maheūṅk anga-aṅ lökten nö kihnge inrē.—Inl. 9:1-9, 17-19.

“Vaich ngam ṙētak” ò nö vītöre nö Kristīön. Ngam tö ngöṙô yěn i ṙô krīk, ‘sā öp nyīö töt ip ṙētak re finötnyi’ vamënyö öp nyīö angū-ö öp tö vaichö ṙētak finötnyi. Ngö kinūichngö angū-ö nö imat ngam The Jerusalem Bible “sā inlahen öp nyīö chin öp tö fötnyuvö nö im töt hē lōn.” Lökten nö tö ngö manah ngam ṙô Pôl tö ò nö vë-enyre nö “vaichö ṙētak” nö vītöre nö Kristīön. Kūöyòh pöri anga-aṅ nö ngatī ṙô? Urēhěkūö Pôl nö ṙô-òvö tö ngam ṙô re im 1 Kòrin 15:8 ngaich vënyö inlahen yip tarik anga-aṅ yip mameūkö Yēsū urēhěkūö ò nö chuh el halīöngö. (1 Kòr. 15:4-8) Hē Yēsū pöri nöng rötten nö meūkö tö Pôl ngaich sā “tövaich pöri ngam ṙētak” ò nö meuk kūö ò.

Vë-enyre ang Pôl nö manā-angkūö i tumtak yip tanīnöṙô. Töt löng misī yip nyīö inuk ṙētak tö ṙô yik tarik yěn urěhnyi kinyônyi tö öp ṙētak finötnyö re. Lökten hē Pôl nö asīntö ngam inlahenre nö in öp nyīö tö ngatī inlahen. Ngaich lohten anga-aṅ nö vë-enyre nö manā-angkūö takô, ötrēhěn nö kô anga-aṅ nö tanīnöṙô invëka. Tön ngatī ṙô anga-aṅ in minë mu-unôich miröökö, “Pò chu manā-angkūö kanūönö yip tanīnöṙô, tölökten chu ötkô tanīnöṙô invëka, pò chu öt hakôlò ngam Māṅ ngam Tēv. Kūö lōn ngam Tēv pöri, chū-ö öich sāre töngamuh.”—1 Kòr. 15:9, 10.

Sā ahang hī ngaich tö ngam ṙô Pôl im 1 Kòrin 15:8, nö lohten nö tö ngö manah angū-ö tö ò nö rötlö tö ngam inlahen re nö meukkūö Yēsū. Hēk lohten nö kūö ò nö vaichö ṙētak nö vītöre nö Kristīön. Hēk yěn kūö ò nö manā-angkūö elmat nö meūkö re. Öp töng yòh manah ngam ṙô ò, hěng pöri ngam mikahkūö hī tö ngam maheuk ò nö töpōiṙāi nö ikūö ò. Pön löktö in e nö ngönlöre ngam ṙinātö-ellōn ò tö Yēsū nö kô-en nö hachohlöng nö ṙā-ang i tökapah. Lökten öp töng hē ò nö vë-eny ngam invanlö Yēsū ngaich ṙôtö ngam inlahen re anga-aṅ nö meukkūö Yēsū.—Inl. 22:6-11; 26:13-18.