TÖHAKÖÖPÖ ĀTIKÖL 36
TINKÖÖKÖ 89 Hang Ngaich Ilööṙen Kētöre
“Kamëkö Kaha Ngam Ṙô”
“Kamëkö kaha ngam ṙô yin yēḵ; un höng hamang.” —YĀK. 1:22.
ASUH ÖP MIN HAKÖP HĪ?
Ṙūöhlöng alaha in min in ngih ātiköl tö hī rö-ö öi höng hòṅ haköp mat ngam Paipöl, pöi hòṅ aṙū-uti mufē inrē öi afēkö nup ṙô e hēk kalahken re inrē öi lök in u.
1-2. Kūö yòh aich më tarik Yāvē nö tö ṙamlōn? (Yāköp 1:22-25)
LŌNU Yāvē hēk Yēsū tö hī öi ṙamlōn. Asuh pöri mihôiṅ löktö ngam ṙanamlōn hī? Ngöṙô tī öp kamūich ngam Salmai tö 119 mirūlö, “Tö ṙamölōn yin vē mahaköp në chöngö Ò: vē chamöhan nö keuheūttö ellōn re.” (Sal. 119:2) Ngöṙô inrē ang Yēsū: “Tö ṙamölōn yin vē hamang ṙô ngam Tēv, ngaich haköpö e!”—Lūk. 11:28.
2 Pōyen nup lāinyngen më tarik Yāvē nö ṙamölōn. Ngih pöri tö mööḵlö, pò cha nö kaheuk sakāmö nö haköp Ṙô ngam Tēv hēk ma-ainyre inrē nö kēkö kaha u.—Vë-evkūö Yāköp 1:22-25.
3. Asuh nup min tö pōyen inkòlô hī yěi haköp mat ngam Paipöl hēk kēkö kaha u inrē?
3 Pōyen nun minë inkòlô hī yěi kēkö kaha minë ‘ṙô ngam Tēv.’ Haṙamlōn Yāvē ayī-ö yěi hang minë chööngö tö kētu imat ngam Paipöl. (Mum. 12:13) Hěnghöre kuchīken inrē ayī-ö el ngam mikūönöre hēk vai inrē ngam innôlö hī in më prötör sistör el ngam māṅ. Rö-ö nöng anū-ö, pöi laklöre inrē tö nup kanihngen nup yamih nö ikui yip töt hamang minë chööngö ngam Tēv. Kô-en ang Tāvit nö löngö ṙô, tö hī yěi hang chööngö Yāvē hēk hang minë inlēnö inrē kahëtö ò, ngaich teūngen ayī-ö tö tö ‘pōyen raneushö re.’—Sal. 19:7-11.
4. Asūp mihôiṅ kanihngen hī öi kēkö kaha ngam Ṙô ngam Tēv?
4 Yěi hòṅ kēkö kaha minë Ṙô ngam Tēv, ngaich tötṙanāngen ngam inlahen hī hòṅ haköp mat ngam Paipöl. In e min öi akahakūö tö nup lōn Yāvē nö in hī. Pōyen pöri nup la-en hī i töhěng sakāmö, lökten nö öt lööṙen ngam inlahen hī örheūheu haköp mat ngam Paipöl. Hòṅ kēnyö ṙētakre pöri öi vë-ekūö e. Halēnö in min in ngih ātiköl tö hī hòṅ örheūheu haköp mat ngam Paipöl, ngaich nup haköp hī hòṅ aṙū-uti mufē öi fēken u hēk kēkö kaha u inrē.
HALĒNNGÖ ṘĒTAKRE VË-EKŪÖ NGAM PAIPÖL
5. Asuh nup ihih mihôiṅ la-en töt ṙētakvö tī tö hī haköp mat ngam Paipöl?
5 Pōyen sanānngen in ayī-ö tarik Yāvē. Tö sā yip rīkre nö kamān pòn hòṅ hateungngö nup kuilōn ngam mikūönöre. (1 Tim. 5:8) Ōt inrē yip Kristīön ngamëichken yip yöngre tövahav hēk tököiny, hěnghöre hòṅ ngëichken yip hanöngkisanöre inrē cha-a. Hòṅ chumkūöṙen inrē ayī-ö töre. Rö-ö nöng anū-ö pön pōyen inrē minë la-en hī el ngam māṅ. Hěng inrē ngam töt ṙanāngen la-en hī ngam inhangkö ngam tölöök inhānga. Kô-en ayī-ö hòṅ pōyen kahëti tö ṙētakre yěi kētöre in në tö pōyen la-en. Sitih inlahen pöri ayī-ö örheūheu kēnyö ṙētakre im vinë-ekūö ngam Paipöl, afēkö nup ṙô e hēk kēkö kaha u inrē?
6. Asūp mihôiṅ inlahen meh yěm hòṅ örheūheu vë-ekūö ngam Paipöl? (Ngëichkö ngam nyat.)
6 Töt ṙanāngen ön ngam vinë-ekūö Paipöl nö in më Kristīön. (Filip. 1:10) Ngöṙô öp ihih töhěng tak kamūich ngam Salmai: “Im chöngö ngam Mā Tēv [Yāvē] pöri öp ööi lōn ò: sakāmö, hatööm inrē anga-aṅ nö piṙūtkö ngam chöngö ò.” (Sal. 1:1, 2) Löktö in e ayī-ö akahakūö tö hī hòṅ örheūheu kēnyö ṙētakre im vinë-ekūö ngam Paipöl. Asuh pöri öp tölöng ṙētak hī mihôiṅ öi vë-ekūö e? Lohten in öt hěngren lōn tö ṙētakre öi haköp mat ngam Paipöl. Mihôiṅ pöri öm katöllö öp töhěng ṙētakre örheūheu vë-ekūö mat ngam Paipöl. Ngöṙô ang prötör Viktör: “Ööire chū-ö el peuheū vë-ekūö ngam Paipöl. Pöich hē e öt sānngen ngaich chumkūöṙen inrē öich in ngam haköpre.” Tövai öng ngam inlahen meh öm vë-ekūö ngam Paipöl el peuheū? Yěn hö-ö, ngaich mihôiṅ öm ngöṙô hatöönöre, ‘Asuh öp min tölöng ṙētak chu vë-ekūö ngam Paipöl?’
Asūp mihôiṅ tövai ṙētak meh öm haköp mat ngam Paipöl, hē e më-eṅ kalakenre örheūheu vë-ekūö e (Ngëichköm perekrāf 6)
FĒKÖ MINË HAKÖPRE
7-8. Yěi hòṅ kē yanöölenre öi lökten im Paipöl, ngaich asuh öp tötkô nö inlahen hī? Mikahtö elmat hī.
7 Lohten më-eṅ halēnngö öp ṙētakre öm vë-ekūö ngam Paipöl. Töt ṙanāngen pöri ngam inlahen meh öm hòṅ akaha elnang hēk köpölōn tö nup haköpre. Hēṙu in ṙung ilöö vaichngö tö nup haköpre yěn pōyen. Ngatī inlahen öm më-eṅ ṙung? Ṙòkhöre in ngatī inlahen. Kô-en in ṙung hēṙu ngatī inlahen yěi haköp mat ngam Paipöl. Lohten ayī-ö öi ngöṙô lōn töre öi kaheuk sakāmö öi haköp mat ngam Paipöl, tövai ön nö inlahen hī. Hòṅ vī nup chö-önyre pöri ayī-ö hēk ma-ainyre inrē öi hateungngen u. (1 Kòr. 9:26) Ranehlö röön ön ngam vinë-ekūö ngam Paipöl. Yēḵ hī lōnu tö yanöölenre in ngam Ṙô ngam Tēv, ngaich tö hòṅ mööḵngöre hēk nup inlahen hī.
8 Töt ṙanāngen ön ngam kumṙah nö in hī hēk in minë kun chōn inrē. Yěn kalēḵ-ě röön pöri ngam kumṙah, ngaich töhngö angū-ö nö el ngam tumlat, keuheūtngöre chūök inrē ngam tilin. Öt yanööluṙen ayī-ö in ngam tö ngatī kumṙah. Yē e pöri nö öt kalēḵ-ě röön, ngaich ṙētakvö ngam tumlat nö nyòkngö ngam kumṙah, ngaich möl min minë kun chōn nö sīöplö. Ngatī ṙēngen ayī-ö yěi hòṅ kē yanöölenre löktö im Paipöl, ngaich ötkô öi höng haveutṙô re vë-ekūö e. Pön mihôiṅ min nup ṙô e nö öt chaphötre nö elkui hī. Tö ngö manah, tö hī min öi höng öt akaha elnang tö nup haköpre hēk ötköp lōn inrē.—Yāk. 1:24.
Hòṅ ṙētakvö ngam tumlat nö nyòkngö tī tö ngam kumṙah, ngaich möl min nö sīöp minë kun chōn; ngatī ṙēngen ayī-ö yěi hòṅ teūngen tö yanöölenre öi löktö im Paipöl ngaich hòṅ kēnyö ṙētakre ayī-ö fēkö ṙô minë haköpre hēk kēkö kaha u inrē (Ngëichköm perekrāf 8)
9. Asūp mihôiṅ inlahen meh yěm tö veutö ṙô vë-ekūö ngam Paipöl?
9 Haveutṙô re öm ṙung më-eṅ yěm vë-ekūö ngam Paipöl? Yěn ngatī. Asūp mihôiṅ inlahen meh? Mihôiṅ man haṙēmṙô re vë-ekūö ngam Paipöl, hòṅ meh fēkö ṙô minë haköpre. Yēḵ meh pöri kihngen ngatī inlahen, ngaich um haṙivlōn. Hö-ö ön nö tö kihngen ngam finëkö minë tö haköpö. Tö ngö manah angū-ö tö meh hòṅ aṙū-uti mufē fēkö minë haköpre. Lökten öm hòṅ kēnyö ṙētakre istötī, hòṅ meh aṙū-uti mufē fēkö minë haköpre. Mihôiṅ inrē öm höng rahëichhöl tö miröökö vahë-ekūöre, ngaich fēken u më-eṅ in nup tahëng ṙētak. Ngöṙô ang prötör Viktör: “Ka-euilö mat chū-ö tö peuheū öich höng hěnghöl mirūlö öich vë-ekūö ngam Paipöl höng fēken u chū-ö in ngam sakāmö. Öp töng yòh tumhöl meh vë-ekūö minë miröökö.” Ngih pöri töt ṙanāngen inlahen meh. Öm hòṅ ṙēmöṙô vë-ekūö minë haköpre. Hòṅ meh min yöölen in minë vahë-ekūöre. Salmai 119:97, ngëichkö ngam pòks “ Hatöönöre Tö Në Intöönö.”
10. Sitih inlahen öm mihôiṅ asīnkö minë haköpre? Kētö inchōḵ elmat. (1 Tösalònikē 5:17, 18)
10 Öp tö yòh ṙò-òtö ṙô meh hēk öp ṙòkhöl meh vë-ekūö ngam Paipöl, ngih pöri tötṙanāngen inlahen meh öm hòṅ asīnkö ṙô minë haköpre. Unôichrit meh vë-ekūö öp töhěng ṙô aṅ mat ngam Paipöl, ngaich mihôiṅ öm hatöönöre, ‘Sitih inlahen öich asīnken e töngamuh hēk in nup yamih ṙētak?’ Töi ngëichkö ngih töhěng inchōḵ elmat öi sitih inlahen haköp, tö sā meh yěm vë-ekūö ngam 1 Tösalònikē 5:17, 18. (Vë-evkūö.) Sökngöṙô re më-eṅ yěm vë-ekūö minë miröökö öm fē-a, ‘Ām heuh ṙô öich chū-ö vë-ekūötēv hēk holtö ellōnre hòng inrē öich vë-ekūötēv?’ Mihôiṅ öm fēkö nup tö lūöi inlahenre öm hòṅ ha-öinyö Yāvē. Yē meh min chumkūöṙen haköp mat ngam Paipöl hēk fēken u, ngaich höng kamëkö kaha minë haköpre min më-eṅ, rö-ö öm höng hamang. Yöölen min më-eṅ yēḵ meh kaheuk sakāmö ngatī inlahen. Ngaich kēkö kaha minë tö kūichi min më-eṅ imat ngam Paipöl. Yěn pōyen pöri nup tö hòṅ halööktitvö tö lōn meh, ngaich hòṅ sitih inlahen më-eṅ?
HALÖÖKTIT NUP LAMĀTUHĒT TINRĪKENRE
11. Asuh nup mihôiṅ mufē hī yěi haköp mat ngam Paipöl? Kētö inchōḵ elmat.
11 Yěi haköp mat Paipöl hēk fēkö minë haköpre, ngaich lohten më-eṅ akahngenre tö nup tö hòṅ halööktitvö hēk nö in meh. Asuh pöri mihôiṅ öp inlahen meh? Lohten min më-eṅ öm kihngen. Ta-a chěi töi ngëichken ngih töhěng inchōḵ elmat. Tö sā meh yěm vë-ekūö ngam līpöre Yāköp. Im raneh sakāmö më-eṅ, öm haköp inlahen më Kristīön nö öt atöltuṙen. (Yāk. 2:1-8) Ngaich lohten më-eṅ öm fē-a, ‘Töt ṙanāngen ön ngih inlahen chu öich hòṅ halööktitre, pöich hēṙu ṙung öich ngatī inlahen öich in yip tahëng.’ Tövai ön ngih nö inlahen hī fē-a! Im tahëng sakāmö më-eṅ hēk öm haköp ngam inlahen re hòṅ ṙap ngam litākre. (Yāk. 3:1-12) Ngaich lohten öm fē-a, ‘hēṙu chin chū-ö ṙung öich haṙivlōn tī töp holre öich löktö in nup ṙôre. Ngaich chin min öich ṙôtö nup ṙô, tö mihôiṅ nö reuslöre alaha tī tö yip tahëng.’ Im linūöi sumkam hēk më-eṅ öm haköp inlahen më tarik ngam Tēv nö ötkô nö hanôl ngih panam. (Yāk. 4:4-12) Ngö mufē hēk më-eṅ, ‘hòṅ chumkūöṙen chū-ö öich sitih inlahen kē minë inṙamlōn.’ Im finen sumkam hēk më-eṅ öm kihngen fēkö inlahenre, ‘sitih inlahen öich min halööktitre in në ṙô tö ngatī ṙôken.’
12. Kūö yòh öm ötkô haṙivlōn yěm akahngen nup tö hòṅ halööktitvö nö in meh? (Ngëichkö ngam futnōt.)
12 Yēḵ meh akahalōn tö nup tö hòṅ halööktitvö inlahen meh, ngaich um haṙivlōn. Inmeuktö meh min angū-ö öm īnu tö ngam inyāichngö hēk tö-akaha inrē. Akahalōn ngòh tö yāichö ellōn tarik tö nup chūökre tö hòṅ halööktitvö yěn vë-ekūö Paipöl. a Mihôiṅ inrē öm köplōn töre öm hòṅ örheūheu halööktitre hēk hayutlöre tö nup tö ‘tufömngöre tinrīken.’ (Kòl. 3:10) Asuh pöri öp mahayööken meh kēkö kaha minë Ṙô ngam Tēv?
13. Asūp mihôiṅ inlahen meh yěm akahalōn tö nup tö hòṅ halööktitvö nö in meh? (Ngëichkö ngam nyat.)
13 Yēḵ meh öm akahalōn tö nup tö hòṅ halööktitvö nö in meh, ngaich hòṅ asuh öp inlahen meh? Um ngölōn töre öm hòṅ hěnglöh tī halööktit u. (Inch. 11:2) Pöm mihôiṅ öm kūichngen nup tö hòṅ halööktitvö tö meh hēk hireutkö inlahenre öm halööktit u. Asuh öp min urěh tö hòṅ halööktitvö tö meh?
Um hěnglöh tī hatööktit minë inlahen re, mihôiṅ pöri öm hireūtkö inlahenre öm halööktit nup tö hòṅ halööktu (Ngëichkö perekrāf 13-14)
14. Asuh nup mihôiṅ tö urěh nö halööktitvö tö meh?
14 Mihôiṅ öm urěh fēkö nup tö lööṙen nö halööktitvö tö meh hēk nup töt ṙanāngen inrē tö hòṅ halööktitvö. Yēḵ meh ngaich akahakūö töp tö hòṅ halööktitvö, ngaich mihôiṅ öm rīsörch el minë pöplikēsön hī. Mihôiṅ öm chöhö u el ngam Yöhōva Kē Saksīyo Kē Līyē Kōchpīn Ka-ët hēk Vòchtavör Ònlāin Laëprërī inrē. Mihôiṅ inrē öm havëkö kumlēḵre in Yāvē öm ‘hateungngö ngam kuilōnre in ngam inlööktitre.’ (Filip. 2:13) Ngaich kē-ělkūö alahare më-eṅ in nup tö hòṅ halööktitvö tö meh. Yēḵ meh min halööktit öp töhěng inlahenre, ngaich kūyulōn min më-eṅ halööktit nup tahëng. Yē hī öre halööktit öp töhěng inlahen hēk asīöp minë tövai inrē tinrīken. Ngaich lööṙen min ayī-ö öi halööktit nup tahëng tö hòṅ halööktitvö.
HÖKNGEN NGAM ṘÔ NGAM TĒV NÖ ‘LA-EVṘEN’ NÖ IN MEH
15. Sitih inlahen nö harīkngöre më tarik Yāvē tö më tarik ing panam im vinë-ekūö ngam Paipöl? (1 Tösalònikē 2:13)
15 Pōyen yip tarik tö ṙōlheuh nö vë-ekūö ngam Paipöl tö ṙô re. Kô-en hòng cha-a nö ṙātö-ellōnre nö in minë tö kūichi imat ngam Paipöl hēk kēkö kaha u inrē? Pōyen pöri yip tarik töt ngatī inlahen. Harīkngöre pöri më tarik Yāvē tö më tarik ing panam. Pön sā inlahen yik raneh senchurī Kristīön cha-a nö ‘hō-en ngam Paipöl nö ṙô ngam Tēv nö tökô-en.’ Ngaich ma-ainyre cha-a nö kēkö kaha minë tö kūichi imat e.—Vë-evkūö 1 Tösalònikē 2:13.
16. Sitih inlahen öi mihôiṅ kamëkö kaha ngam ṙô ngam Tēv?
16 Töt lööṙen ön ngam inlahen hī haköp ngam Ṙô ngam Tēv hēk kēkö kaha u inrē. Pò hī lohten kihngen öi kēnyö ṙētakre örheūheu haköpmat ngam Paipöl. Lökten öi höng haveut ṙôre vë-ekūö e. Ngaich höng öt ṙētakvö öi fēkö nup tö aṙū-uti ṙô e. Mihôiṅ inrē öi kihngen elmat tö inlahenre öi halööktit nup tö pōyen tö hòṅ halööktitvö. Lohten minë kanihngen meh nö sā öp rôngö nö elmat meh. Mihôiṅ pöri min më-eṅ öm la-al u. Pò Yāvē nö hayööken meh. Ta-a chěi töi hang minë inlēnö lamöktö in Yāvē öi kēkö kaha minë ṙô ò, rö-ö öi höng hamang. Köpölōn, sā öp ṙôken inlahen hī min öi haköp ngam Ṙô ngam Tēv hēk kēkö kaha u, ngatī ṙôken min ngam ṙanamlōn hī.—Yāk. 1:25.
TINKÖÖKÖ 94 Ha-öönyö Yāvē Kūö Ngam Ṙô Ò
a Ngëichköm vitiō el ngam jw.org ngam tö ngö kui Sitih Ṙô Aich Më Ṙālö—Vinë-ekūö Paipöl.
