Hö-ö yik tö 70 haköptö Yēsū nö im Mā nö nyā ngam Töhet Inmūlkūö, öt tö ngö manah pöri angū-ö tö Yēsū nö öt ṙamlōn nö in cha hēk ṙāngenre cha-a nö tömrit ò. Kūö re pöri anga-aṅ nö hòṅ holkūö më tö chiplö tanīnöṙô nö nyā ngam Töhet Inmūlkūö.

Ṙamölōn ang Yēsū nö in yik tö 12 tak tanīnöṙô hēk tö yik tö 70 haköptöre. Havëtö yik haköptöre anga-aṅ, ngaich katöllö yik tö 12 taka nö in cha, ngaich kaheūkö cha nö tanīnöṙô. (Lūk. 6:12-16) Ik sā Yēsū nö i Kelelī, “Havëtö yik tö 12 tak mahaköp ngaich ang Yēsū nö in re. Tīnngörit cha ngaich anga-aṅ nö ahangkö ngam Pūlngö ngam Tēv hēk halanken tövāhavö inrē.” (Lūk. 9:1-6) Ik sā Yēsū ngaich nö i Yūta in e hēk anga-aṅ nö katöllö yik tö “70 mahaköp” ngaich “nët nët tahôl tī anga-aṅ nö tīnngen cha.” (Lūk. 9:51; 10:1) In e öi akahakūö tö më haköptö Yēsū nö parātiyö nö ahangkö ngam inlahen ò.

Yěn yih misī ngam ṙētak infēkö ngam Pāska, hol mikūönöre misī yik haköptö Yēsū nö fēken ngam Pāska. (Man. 12:6-11, 17-20) Chuh Yērusalem ök misī Yēsū nö holten yik tanīnöṙô nö fēken ngam Pāska urěhěkūö kinpahare. Hö-ö pöri anga-aṅ nö havëten yik haköptöre aṅ Yūta, Kelelī hēk aṅ pīriā nö i Yērusalem nö fēken ngam Pāska. In meuktö Yēsū angū-ö nö hòṅ kēnyö ṙētak re nö hanôl yik tanīnöṙô. Ngö ṙô anga-aṅ nö in cha, “Hòṅ hōlukūö takô chin tö yīö, öich nyā ngih Pāska, urěhēkūö kanihngen chu.”—Lūk. 22:15.

Hěng ön inrē ngam chööḵnyö Yēsū. Kūö ò nö “Sīṅp ngam Tēv” nö kēngö nômöre min nö “kamëḵngö tökööl ngih panam.” (Yôh. 1:29) Ṙòkhöre misī nuk tökētu nö in Yavē nö i Yērusalem, lökten lang ang Yēsū nö hòṅ kēngö nômöre nö i Yērusalem. Ngam sakāmö nyinā-aṅ ngam Pāska, nö infēkö inlahen nup tī Yavē nö ṙānyen më aṅ Israel nö ṙa-ang i Aikup. Mööḵlö pöri ngam kahëtö Yēsū, tö ngam sīṅp tökētu nö in ngam Pāska. Löktö in ngam kahëtö Yēsū më taṙòkhöre tarik nö teūngen tö ṙinānyöre nö ṙa-ang im tökööl hēk kinpaha. (1 Kòr. 5:7,8) Lökten im tö kētu tö Yēsū inrē më tö 12 tak tanīnöṙô nö vītöre nö machööḵlö ngam mā. (Efi. 2:20-22) Ngamuh inrē inlahen minë tö 12 machööḵlö nö el halīöngö Yērusalem nö sökhaka nö ikūi minë ihong, ngaich kūchi minënyi më tö “12 tak tanīnöṙô ngam Sīṅp nö ikūi minë ihong.” (Inm. 21:10-14) Cha-a yin vē tö 12 tak tanīnöṙô nö mahateung ngö kuilōn Yavē. Lökten in e ayī-ö akahakūö töp chö-öny Yēsū nö kūö yòh nö holkūö cha nö nyā ngam manā-aṅ Pāska hēk ranulten kinëken ngam Töhet Inmūlkūö ngam Mā.

Kô-en yik tö 70 haköptö Yēsū hēk tö yik tahëng mahaköp nö öt in ngam töhet inmūlkūö. Ṙòkhöre pöri öre më tö chiplö mahaköp nö teūngen tö yanöölenre nö löktö im töhet inmūlkūö hēk yik rīkre mahaköp öre tö hachāmö ël kūi tö ngam töhet kumlēḵ, ngaich vītöre cha-a nö in ngam kinlēḵngô Yēsū inyööngö kahëtö ò nö in yik tanīnöṙô ik hatööm.—Lūk. 22:29, 30.