Lōnu misī ang Yāvē tö yik Israel nö töhetö tinrīken nö tarik ò. Lökten anga-aṅ nö ngö ṙô tö cha: “Uh man havöt inrē sā sumlô nyā-aṅ i vē tarik meh: um rēhĕn sökhak lā-al i mahām öp hol meh: Chū-ö Chin Mā Tēv.”—Lēv. 19:2, 16.

Ngam ṙô “sökhak lā-al i mahām” töhapōilöng angū-ö nö ṙô yěn iṙô Heprāi? Ngöṙô ök ih töhěng līpöre Yahuti vamë-eny ṙô ngam La-en Lēvī: “Kihngen in öi vënyö manah ngam miröökö, pöi öt akahakūö töp tökô-en manah ngam töhapōilöng ṙô.”

Ngöṙô yip töpōihöl mahaköp tö e nö vënyu manah nö im mu-unôichrit e miröökö, ngam tö ngö ṙô: “Uh man tī tö tötchip im inkaha fālen: uh man atölten yāich, um rēhĕn milēḵṙen töp tarik tökirööngö chöngö: im chanīpen pöri öm akah fālen ngam holre.” (Lēv. 19:15) Yěn ngatī pöri, ngaich tö ngö manah min ngam ṙô ‘lā-al i maham holre’ tö yik Israel nö ötkô nö michūṙen yěn akah fālen holre, ötkô inrē nöng ngëichkö faita re. Kô-en in öi ötkö kēkö në töngatī la-en. In ngam tö 16 miröökö pöri ayī-ö öi ṙūötu mikah elnang tö manah ngam ṙô.

Yēḵ hī ngëichkö ngam ranehnyô ngam miröökö, meuk ṙô Yāvē ayī-ö nö sōtö yik tarik re nö sūöchkö inlahen holre. Mööḵlö ötlanöngö ön ngam sinūöchlö fālen holre tö ngam vinë-eng nang. Rö-ö pön palaiṙen tī inrē ngam vinë-eng nang holre. (Inch. 10:19; Mum. 10:12-14; 1 Tim. 5:11-15; Yāk. 3:6) Öp samūöchkö fālen holre pöri, tölngenre anga-aṅ nö ṙôtö inlahen öp holre tö nup töt kò-en, kūö re nö hòṅ hachōchngö minë-eny ò, mihôiṅ inrē nö kapahatī töm sahūchkö fālen re. Fēkö inlahen ök tarik man samūöchkö inlahen Nēpòt, uroh ang Nēpòt nö öhtö kapah pön kulehe kui, öt kūö yô-òv pön höng kūö sinūöchkö inlahen re. (1 Rā. 21:8-13) Kô-en ngòh samūöchkö fālen holre nö sā samökhak nö la-al nômö holre sā ṙô ngam La-en Lēvī 19:16.

Ōt yip umuh samūöchkö fālen holre tö kūö re nö kunyah elmat töp holre. Ngöṙô ngam 1 Yôhan 3:15: “Ngòh sumrīkhö holre, famël tarik an anga-aṅ, ngaich akahalōn yī-ö tö ngòh famël tarik nö öt īnu tö ngam nômö tö-örheūheu-aṅ.” Ngëichkö ṙô ngam Tēv unôichrit ṙô ò nö sōtö yip tarik re nö lā-al mahām holre, ngö ṙô anga-aṅ im tö 17 miröökö, “Uh man kunyāṅha ellōn ip makalaha meh.”—Lēv. 19:17.

Tökiröng ön nö inlēnö hī öi Kristīön ngam tökūichi imat ngam La-en Lēvī 19:16. Ötkô ayī-ö ötlēnö mufē i holre, ötkô inrē öi sūöchkö inlahen cha. Yēḵ hī min kūö ranānyngöre hēk kuö re inrē öi öt ööire töp holre, lökten öi sūöchkö inlahen ò, töng kunyah elmat ayī-ö töp holre, ‘la-al ngam nômö ò’ min inrē ayī-ö. Ngaich tötkô angū-ö nö inlahen Kristīön.—Mët. 12:36, 37.