Chumkūöṙen öm vahë haköpmat minë Chūökamahati el ngòh samyeūheu? Ta-a töi ngëichken meh yěm heuveū-eu ṙô kētö sanapṙô në intöönö:

Ngöṙô ngam Yāköp 5:11 nö vënyö inlahen Yāvē tö ò nö “tötööḵlö tö miṙēlōn, tööḵlö inrē tö neūkölōn.” Tö sitih manah angū-ö?

Kūö Yāvē nö aṅhavin töm miṙēḵlōn, lökten anga-aṅ nö aṙēlen hī tö nup tökööl hī. Rö-ö nöng angū-ö, pön hangönlö ṙinātö-ellōn hī ngam Yāköp 5:11 tö Yāvē yěn meukö hī öi kihngen, ngaich hayööken hī anga-aṅ. Ngaich hòṅ asīnken ò ayī-ö.—w21.01, pěch 21.

Kūö yòh ang Yāvē nö halēnlö më kui ngam mikūönö?

Kūö Yāvē nö hangenlōn tö minë mikūönö. Lökten ò nö halēnlö më kui ngam mikūönö hòṅ minë mikūönö nö lēnö inlahen. Akahakūö inrē cha-a tö ngam mahayōmken ngam mikūönö hēk öp kamë minë fësla inrē.—w21.02, pěch 3.

Asūp öp töhòṅ chumkūöṙen më Kristīön yěn yūs minë Ëp samöömkö mësēch?

Hòṅ chumkūöṙen ngòh tö hěngtak tarik nö hòṅ hanôl holre yěn ūs ngam ëp samöm mësech. Möthē anga-aṅ yěn el ngam mësching krup ngaich hòṅ chumkūöṙen anga-aṅ nö in e. (1 Tim. 5:13) Hòṅ chumkūöṙen inrē anga-aṅ nö ötkô nö vënyö minë töt kô-en ṙô minë töng öt mihôiṅ nö hameuktuvö. Ötkô anga-aṅ min nö kūö lōn re tö ṙupīö, nö löktö in ngam mëseching ëp nö hanôl yip tahëng prötör sistör.—w21.03, pěch 31.

Kūö yòh ang Yāvē nö hökngen Yēsū nö kihngen kinpaha?

Ngam raneh lāinyngen, hòṅ ṙānyu më Yahūti nö ṙa-ang elkatòh ngam chööngö ötinkôlò. (Kal. 3:10, 13) Innëtö lānyngen, haköpten Yēsū ang Yāvē pön anga-aṅ min unôichngöre nö makūö kūönṙô hī. Linūöyö lāinyngen, söl im kinpahare ang Yēsū nö chiplö, ngaich mihôiṅ inrē ngòh tarik nö köp nö löklōn Yāvē yēḵ ò nö kihngen. (Yōp 1:9-11)—w21.04, pěch 16-17.

Yěi öt teūngen tö cha nö i patī, ngaich asūp mihôiṅ inlahen hī?

Ngëichkö tölöng ṙētakre ayī-ö chuh in cha, ngaich hòṅ tahëng kamtö chūökre ahānga hēk chöh tahëng tinrīken tīre inrē ahānga. Tö sā ngih, mihòiṅ öm kūich chitri ò.—w21.05, pěch 15-16.

Tö sitih manah ngam ṙô Pôl tö ngö: “Pò chu lökten im chööngö kapah” (Kal. 2:19)

Haköpkö lōn hī ön ngam chööngö Môsös tö hī öi īnu tö ngam tökööl, ngaich hateungten më Israel nö in Yēsu. (Kal. 3:19, 24) Ngatī inlahen anga-ṅ nö ‘kapah nö im chööngö, aṅ pöri nö ikūö ngam Tēv.’ Öt köpsören anga-aṅ nö elkatòh ngam chööngö, elkatòh ngam Tēv pöri..—w21.06, pěch 31.

Sitih inlahen ang Yāvē nö tövai nö inchōḵ elmat hī im manööyö?

Pōyen nup i ötlinēken Yāvē, tö sā ngam minë-eny ò nö hachōchiyö, pōyen tö sōḵ nö hayöngkaṙen töm Tēv, la-al ò yik kūön ò, minë minyôinyaṅ ngam Sī-ö, kanihngen më tarik ò, miṙivlōn ò tö kinpahlöre tö yik holre, minë ötlanöökö tī tötlöök tarik, nup tötlöng la-en tarik, ötlēkaṙen mine vahīkūö kuntī ò.—w21.07, pěch. 9-12.

Kūö yòh ang Yôsěf nö tövai nö inchōḵ elmat hī in ngam manöönyö

Öt lēkaṙen anga-aṅ tö yik mëm re. Ngam chö-öny ò nö sūöchkö fālen ngaich samyeūheu anga-aṅ nö haköövö nö i Aikup.—w21.08, pěch 12.

Sā ṙô ngam Hakai 2:6-9, 20-22 asuh nup ṙòng inlahen kinyīnö vē pumnamö tarik?

Pōyen tarik yamihtöre nö im nöönyö ngam Tēv ing manā-aṅ sakamö. Hö-ö in sin tö pōyen öi ha-öiny ngam Tēv. Ṙöhta tī ön min nö kinyīngö minë pūlngö tö ngamanah nö ṙòkhöre min ahëtiyö.—w21.09, pěch. 15-19.

Kūö yòh öi ötkô ṙāken re im la-en inhānga?

Köpölōn ang Yāvē tö minë la-en hī hēk ṙamlōn inrē nö in hī. Yēḵ hī öi höng iṙūöhen ahangköm tölöök inhānga ngaich teungen min ayī-ö tö ngam nômö tö-örheūheu aṅ.—w21.10, pěch 25-26.

Sitih inlahen öi ṙatö-ellōnre im La-en Lēvī 19 i inlahen ngam tinrīken hī hòṅ het? (1 Pīt. 1:15)

Lohten angu-ö nö kētu nö in ngam La-en Lēvī 19:2. Pōyen nup tö vënyu nö in ngam 19 mirulö, töp lökten hī mihôiṅ öi örheūheu hang minë inlēnö in ngam 1 Pītör 1:15.—w21.12, pěch 3-4.