Ik sā Yēsū nö el halīöngö, harunöre anga-aṅ tö akaha nö holṙen töla-envö nö im yöng re. Ngatī inlahen ngaich anga-aṅ ik sā ò nö ing panam. Yēḵ hī min chumkūöṙen ngëichkö inlahen ò, ngaich kôtökūö ayī-ö tö minë tölūöi haköp re öi in ò. Mahayööken hī min öi holṙen yip tahëng. Ngaich mihôiṅ öi hēngö inlahen la-evṙen tö yip holre.

Töyāichö ellōn ön ngòh tö-akaha hamòlṙen. Öthō nöng chöh ineū-eu re. Pön hōten ngam holre inrē nö ngëichka. Haköp ngam inyāichngöre ang Yēsū nö im Yöng re. Akahakūö in tö Yāvē nö nöng anga-aṅ vamīlö në taṙòkhöre, sön pöri anga-aṅ nö hōten ngam Kūön re nö akahka nö holṙen ò nö la-evṙen. Ngöṙô ang Yāvē: “Ta-a töi vī tarik nö sā hī.” (Ran. 1:26) In e mikahlōn ang Yēsū tö Yāvē nö aṅhavin töm inyāichngö.—Sal. 18:35.

Sa Yāvē an inrē Yēsū nö inūvö töm inyāchngö. Ik sa ò nö ing panam, eu-eū anga-aṅ tö yik tarik tö kuö nuk la-en ò. Höng kētö ineu-eū ngam yöngre pöri anga-aṅ. (Māk. 10:17, 18; Yôh. 7:15, 16) Vī ngam lanāmö anga-aṅ nö ihôi yik haköptöre. Ngaich ötrěhēn anga-aṅ nö kūön kūö ngöṙô tö yip tanīnöṙô, höng holre ṙô anga-aṅ tö cha. (Yôh. 15:15) Kūö ò nö hòṅ mikahtö elmat  cha tö ngam inyāchngö nö tö uröören, lökten ò nö söchröön cha inrē. (Yôh. 13:5, 12-14) Ngati inlahen ayi-ö asinken Yēsū öi hôṅ milēḵṙen tö yip tahëng holre. Ngaich ötkô höng chöh nup ineu-eūre. Yē hī min ngati inlahen ngaich holṙenre min ayi-ö öi la-avṙen.—Rōm. 12:10.

Akahakuö an ngòh töyāchö ellōn tarik tö yip “tö ṙōlö ṙô mahalēn nö teunglen” i nup la-en re. (Inch. 15:22) Pi-a in ayi-ö lohten öi ngölōn töre aṅhavin tö minë huneu-enre pöi marò-ôten öi la-envö. Ngaich hôṅ kööpölōn pöri ayi-ö töre öt ṙòktöre mikahkūö. Ngati ṙô inrē Yēsū nö vë-enyre nö öt keuheūtlöre mikahkūö tö nup ṙô. (Mët. 24:36) Töthet yik tanīnöṙô Yēsū, sön pöri Yēsū nö hatön ellōn cha tö nup ṙô ò. (Mët. 16:13-16) Hôṅ sa Yēsū in ayī-ö öi īnu töm inyāchngö ngaich hôṅ hatön elkuilon yip tahëng holre pò hī öt ṙôkhöre mikahkuö. Yēi ngati inlahen i holre ngaich lēn min ngam innôlö nö ihôi hī. Ngaich öthō nup la-en hī nö öt “teunglen.”

Hòṅ aṅhavin yin inrē më minṙöinylen töm inyāchngö kūö cha nö tö hòṅ holṙen höö inup la-en re. Hòṅ köpölōn cha-a tö ngam töhet kumlēḵ, nöng angū-ö kamëtö heuneū-en cha nö löngö kahë tö nup töng fesla cha. Lökten yěn hē manulö më minṙöinylen ngaich hôṅ kētu ṙētak cha-a nö ṙônyö nup kuilōnre.

Milēḵ ön tö holre ngòh tö akah hamòl. Öt höng asā nup lōnre anga-aṅ, pön hangihtöre tö ṙô yip holre ngaich hōḵ nö halööktö mufē re inrē. Ṙōlheuh ang Yēsū nö meuk inlahen ngam Yöngre nö milēḵ tö tahëng. Tö sa ò nö milēḵ tö hī öi tarik, pòrö öi töng köölö fālen chamuh im kinpaha inrē. Tīnten ngam kūönre pöri anga-aṅ nö ṙāmanyen hī ṙā-ang im tökööl töm kinpaha inrē.—Yôh. 3:16.

Ngatī inrē Yēsū nö milēḵ re tö holre. Fēkö inlahen ò, pòrô anga-aṅ nö töng tīntu nö mahayööken yik aṅ Israel, sön anga-aṅ nö hayööken ök yöngnyīö aṅ Finikē. (Mët. 15:22-28) Milēḵ inrē ang Yēsū tö yik haköptöre. Öt ngö lōn anga-aṅ tö cha min nöt hěngheuh nö vaich. Pòrô ang Pitör nö mahngen ò nö ikuö yik tarik, söönen anga-aṅ nö aṙēlen ò. Unòchngöre inrē nö kē-ěkuö ò tök tö kiröng la-en. (Lūk. 22:32; Yôh. 21:17; Inl. 2:14; 8:14-17; 10:44, 45) Haköplu  ayi-ö in Yēsū tö hī ui höng i nup kuilonre hēk ui yahlö mufē inrē öi in öp holre tö ò nö öthō nö vanachuvö.Yē hī min ngati inlahen ‘ngaich akahka min ayi-ö öi tö milēḵ tö tarik.’—Filip. 4:5.

Yēḵ hī min aṅhavin tö ngam ṙinapöre. Ngaich hō min ayi-ö halööktit re, ngaich mihôiṅ inrē öi la-evṙen holṙen yip töng sitih tarik. Vāyö tinriken ök misi Yēsū nö i yik tarik, lökten cha nö hangihtöre töṙô ò. Meuk inlahen ò yik tö kunyaha elmat tö ò, ngaich ngö ṙô “Yēh meuk; ngòh tarik töpōivat, amòk vain inrē. Hol mahamul ṙāi kinëhöt chehen, tököölö fālen inrē.” (Mët. 11:19) Sitih inlahen öi ayi-ö asinken Yēsū, hôṅ hī hōlṙen tötaṙòkhöre tarik öi inup la-enre pòrô cha-a nö harīkngöre tö hī? Ngëchken Luis, hē ò nö sörkit ovörsīör hēk el pētēl nö la-envö,poyen hol anga-aṅ nö la-evṙen. Ngöṙô anga-aṅ’’itum mihëṙö më hol ò, sa tummihëṙö nup ihong tövīlöngö nö i kaha öp tökiröng pati. Kò-en ngam innôlö nö tösā ṙēngen nup ihong nö hôṅ vaiyö chuök ṙinati. Ma-anyre chin chu-ö halööktitre pò chu hôṅ holtö lanamöre la-avṙenholṙen yip holre!

Sitih inlahen öi mihôiṅ hameuktö minlēḵṙenre in yip Brothers Sisters el ngam māṅ? Köharikngöre nun minë kinë-ekuö cha la-en el ngam māṅ, ngaich kö harikngöre ṙēti inrē cha-a. Yēḵ hī holṙen cha ahangkö ngam tölöök inhanga akahakuö min ayi-ö tö inlahen cha, pi-a öi hôṅ sa inlahen cha öi hā-angkö ngam tölöök inhanga sa ṙētaklōn cha inrē, Ngaich kò-en min cha-a nö ṙāmölon nö im la-enre inhangkö ngam tölöök inhanga.

Ngòh tö akaha hol hōḵ anga-aṅ nö im inṙūötken. (1 Tim. 6:18) Ik sa Yēsū nö holṙen ngam yöngre Yāvē. Ngaich meuk anga-aṅ tö Yāvē nö öt hēngö hayunngö, ik sa ò nö vī ngam halīöngö umuh ang Yēsū, ngaich pōyen haköplö anga-aṅ nö im yöngre. (Inch. 8:27) Unôchngöre Yēsū nö vë-eny nang yik haköptöre tö minë ṙô ngam yöng ò. (Yôh. 15:15) Poyen yip töngamuh töt vamë-eny nang holretö nup mikahlōnre. Öt ngati inlahen pöri öp tö akaha hol.Pön holtö ṙanamölōnre nö vë-eny nang yip holre tö nup mikahlōnre.

Eū yip holṙenre in la-avṙen. Yēn eū-eū ṙung nup la-en hī ngaich ṙamlon ayi-ö reuslöre alaha inrē. Ngati ök misi Yēsū nö eū yik haköptöre. (Asatô e im Mëtiv 25:19-23; Lūkös 10:17-20) Ngö ṙô inrē anga-aṅ nö in cha. ‘Mötlöṙôken la-en yin min tö chu.’ (Yôh. 14:12) Urēhěkuö kinpahare anga-aṅ nö ngöṙô nö in yip haköptöre. “Yi-ö yin töng ngöhöre hol chu inup kanihngen chu.” (Lūk. 22:28) Ik sa cha nö hang ṙô Yēsū lohten cha-a nö ngönlöre alaha hēk ngötlöre inrē cha-a nö kēken nup tölöök la-en. Hôṅ kētö ineu-eū yip holṙenre in la-evṙen. Ngaich ṙamlōn min cha-a hēk holtö ellonre nö kēken nup la-enre.

Ngö ṙô Kayotē, Ötkô anga-aṅ nö tö akahahol yěn inu tö nup vanachöre, nga-aṅ pöri tö akahahol öp mahameuktö ngam ṙanamölōn nö i holre, ngaich vītö nup taṙòkhöre la-en nö lööṙen. Mihôiṅ öm më-eṅ ngati inlahen öm hol? Kò-òren öm hatön yip brothers sisters tö e angu-ö intöönö? Yē cha nö ṙamlon nö la-evṙen nö in meh, sa inlahen yik haköptö Yēsū nö ṙamölōn nö in ò. Ngaich mihôiṅ më-eṅ sa ṙô Pôl “Hamòlṙen yiö pöri im ṙanamlōn yiö.”—2 Kòr. 1:24.