Ngöṙô tī ang tanīnöṙô Pôl nö kūichtö chitri ngam minṙöinylen holre Timôtī: “Tölṙô meh chin i kūö ngam Tēv, Kristū Yēsū inrē, yip tökatöllöng ma-ahānga inrē, öm haköp nö öm um chanöku; öt kahëkuṙen tö intölten.”—1 Tim. 5:21.

Urěh in sin öi ngëichkö inlahen vë ma-ahānga nö hö-ö cha-a nö kô nö më tö 1,44,000 töhachāmö elkui Kristīön. Kūö yòh? Pön ik sā Pôl misī nö kūich ngam chitri Timôtī, ngaich öl hē u anū-ö ṙētak misī nö hěngtak yamônlö nö el halīöngö nö in yik tanīnöṙô tö yik tahëng inrē tö hachāmö elkui, lökten öi ötkô kaheūkö cha nö ‘tö katöllöng nö ma-ahānga.’—1 Kòr. 15:50-54; 1 Tös. 4:13-17; 1 Yôh. 3:2.

Öt rěhen kô öi ngö ṙô tö cha nö cha-a vë hē e ma-ahānga fumlal chööngö ngam Tēv ik ṙētak ök ṙanööiyngö. Pön yik ma-ahānga ik hē e ngaich mi-iritö ngam Satān cha-a, ngaich vī-ingre nö tö kunyaha elmat tö Yēsū. (Ran. 6:2; Lūk. 8:30, 31; 2 Pīt. 2:4) Suktuvö min cha-a nö el öp ṙeūvö öp tötlātaṙeū-euv nö ip tö 1,000 samyeūheu ngaich unôichrit e min cha-a nö anòngngen ngam Satān nö ha-etiyö.—Yūt 6; Inm. 20:1-3, 10.

Chumkūöṙen tö më ṙô Pôl “Tökatöllöng ma-ahānga” nö hol kinakkö nā Yāvē nā Yēsū inrē cha-a. Ngaich lohten ang Pôl nö kakkö më ma-ahānga më tö hangenlōn tö nā Yāvē nā Yēsū, më hamòlṙen cha inrē.

Öt kanṙeūken ṙôken yin më ma-ahānga el halīöngö më töchiplö nö i linökö lōn Yāvē. (Hep. 12:22, 23) Ngaich lohten ang Yāvē nö kö kē-ěkūö cha tö la-en cha. (Inm. 14:17, 18) Tö sā ṙēngen ök töhěng tak ma-ahānga hē e nö kētu la-en nö fëlngen yik tö 1,85,000 ṙôken kumyung aṅ Asīriā. (2 Rā. 19:35) Lohten nö pōyen yip ma-ahānga tö kētu la-en nö ‘mahamūl yip tarik nö ṙòkhöre ip inyöngö min tö Yēsū yip tö pò-òvkūö tī tö yip tahëng tarik nö kēken nup tökööl, hēk cha-a inrē yip tö la-evṙen tö tötlöök.’ (Mët. 13:39-41) Lohten min yip tahëng ma-ahānga nö kētu la-en nö ‘mahamūl yip tö katöllöng tö Yēsū nö chuh el halīöngö.’ (Mët. 24:31) Ngaich më rīkre ma-ahānga nö tö tölöṙô cha-a nö ‘laklen hī in nup töng sitih talöökö hī.’—Sal. 91:11; Mët. 18:10; asātô e im Mëtiv 4:11; Lūkös 22:43.

Më tö vënyu taheui “Tökatöllöng ma-ahānga” im 1 Timôtī 5:21 nö lohten cha-a nö më tö kētu la-en nö ngamëichkö minë māṅ. Kūö yòh öi mihôiṅ öi ngatī ṙô? Pò hī öi akahakūö öi löktö in minë tö röhta miröökö tö Pôl nö vë-eny nang yik minṙöinylen misī nö sitih inlahen cha-a nö hòṅ hateungngö nuk kinë-ekūöre la-en hēk hòṅ milēkaṙen inrē tö ngam māṅ. Ngö ṙô anga-aṅ tö më minṙöinylen yěn hòṅ hateungngö minë kinë-ekūöre la-en ngaich ötkô cha-a nö urěhnyi ṙô nö vīlö inlahen öp holre hēk ötkô inrē nö tö atöltuṙen, ötkô inrē nö veutö kahë tö nup fëslare. Ṙën angū-ö nö ngatī pò cha nö la-evṙen nö ‘i kūö ngam Tēv, Kristū Yēsū inrē hēk i kūö yip tökatöllöng ma-ahānga inrē,’ tö ngö manah tö cha nö ṙòkhöre mat nö meuk inlahen më minṙöinylen nö sitih inlahen cha-a nö chumkūöken ngam māṅ. Lökten in mihôiṅ öi ngö ṙô tö yip rīkre ma-ahānga nö kētu la-en nö mahayööken ngam māṅ, tö sā cha nö aṅten më tarik ngam Tēv, holṙen cha nö im la-en inhānga, ngaich vënyö nup maheukre inrē cha-a nö in Yāvē.—Mët. 18:10; Inm. 14:6.