Chumkūöṙen öm vahë haköp minë Chūökamahati ing samyeūheu? Töi ngëichken në intöönö chěi, yěi mihôiṅ kētö sanapṙô u:

Hòṅ sitih inlahen tinrīken öi in më kikānö, asūp haköplö hī mihôiṅ in Yāvē?

Öt atöltuṙen ang Yāvē tö cha, hö-ö ön inrē nö mööḵlö mat tö më kikōnyö tö më kikānö. Hangihtöre ang Yāvē nö tö ṙô cha hēk chumkūöṙen anga-aṅ nö ngëichkö mufē më kikānö hēk tö nup piṙūtölōn cha inrē. Ṙatö-ellōnre ang Yāvē nö in cha, lökten anga-aṅ nö kē-ěkūö cha tö minë törōl mihërö la-en.—w24.01, pěch 15-16.

Sitih inlahen öi mihôiṅ hang ngam inlēnö im Efisös 5:7, ngam tö ngöṙô: “Ui hanôltöre in cha”?

Haṙēmngen hī ang Pôl, nö sōten hī öi hanôltöre in yip tarik mihôiṅ min nö kihngen tī tö hī öi hang minë inchöngten re tö Yāvē. Cha-a yin vē mihôiṅ, tö sā më töng ha-eh ṙung nö hanôl hī hēk yip vahë-ekūö hī inrē el ngam sōsöl mītiā.—w24.03, pěch 22-23.

Asuh nup ihih töminyôny istori töt kô nö hāngö tö hī?

Tö sā öp töhěng tak hol hī mihôiṅ nö vënyö öp ahangre, öt akahakūö pöri anga-aṅ tö e yěn tölöng hēk yěn tö vāich, hēk yěn yih öp i-mēl (email) hī nö löktö in öp töt mikahkūö hī tarik, hēk yě ōt öp apòstēt tötlöngö ṙô nö vënyö inlahen ngam kanô-en. Hòṅ lāklöre ayī-ö tö vē tö ngatī inlahen.—w24.04, pěch 12.

Asūp mikahkūö hī hēk töt mikahkūö hī im inlahen tī Yāvē nö kahòkken Rācha Sòlòmön, më tarik aṅ Sôtöm hēk Kômòra hēk tö yip tarik tö ahëti ik ṙētak ök ṙanööinyngö?

Öt akahakūö in tö mufē Yāvē yěn ahetngö yik tarik nö öt hēk min nö hachohlen cha. Ngih pöri mikahkūö hī tö Yāvē nö keuheūtlöre mikahkūö anga-aṅ hēk tö pōyen aṅ in inrē anga-aṅ tö ngam miṙēlōn.—w24.05, pěch 3-4.

Kaheukö ang Yāvē nö “ihong” chūök innyatlö,” Kūö yòh öi mihôiṅ ṙatö-ellōnre? (Chöö. 32:4)

Mihôiṅ in hanyatlöre in Yāvē. Chūök ṙinatö-ellōn an Yāvē hēk örheūheu inrē nö hateungngö minë kinlēngôre. Tö köp anga-aṅ nö sā ngam töngëḵ ihong, öt harīngöre ngam tinrīken ò hēk ngam kuilōn ò inrē.—w24.06, pěch 26-28.

Sitih inlahen öm hanôltöre el ngam tufömngöre māṅ?

Hayönglen in Yāvē. Sā inlahen ò misī nö hayööken yik tarik, ngatī inlahen min anga-aṅ nö hayööken meh. Um asāten ngam tufömngöre māṅ re nö in ök mu-urěh māṅ re. Ihôiṅ më prötör sistör man ngaich holṙen kētöre in minë la-en. Rö-ö nöng angū-ö, pöm kalahten re inrē öm vī tufömngöre holre.—w24.07, pěch 26-28.

Asuh öp haköplö hī in minë tö lūöi inchōḵ elmat tö kētö nö in ngam Mētiv tö 25 miṙūlö?

Haköplu in öi in minë sīṅp hēk tö minë pöököre tö hī öi hòṅ chiplö in Yāvē. Ngam haköplö hī in më tö-akaha rēlö hēk më töt akaha rēlö öi hòṅ lēntöhěich hēk hīnöre inrē. Hēk ngam haköplö hī in ngam kinlah coin chantī tö hī öi hameuktöre ma-ainyre la-evṙen hēk holtö ellōnre inrē.—w24.09, pěch 20-24.

Irô-òlòng ök varanta ök chūök vinë-ekūötēv vahī Sòlòman?

In nuk rīkre töhötṙeh menu-iskrip ngam 2 Kinṙötngö 3:4 nö “120” kinūichngö ngam rô-òlòng ngam varanta nö imat e, töngö manah nö 175 fīt (53 fīt). In nuk rīkre tö akahka menu-iskrip, chūök hī mihôiṅ ṙātö-ellōnre nö “20 sumkôngö,” töngö manah nö lohten nö 30 fīt (9 fīt). Lohten nö ngatī ṙò-òlòng ngam varanta ngam chūök vinë-ekūötēv nö sā kunfëyö ngam tanang e.—w24.10, pěch 31.

Sitih manah öng ngih nö im inlahen ngòh töhěng tak mahayööken töla-evṙen nöng hòṅ ‘hěngtak pīhö tö kikānö’? (1 Tim. 3:12)

Töngö manah angū-ö tö cha nö hòṅ hěngtak pīhö tö kikānö ngaich ötkô nö asěhkö tahëng. Rö-ö nöng angū-ö, pön ötkô nö yahlö inlahen nö hanôl yip tahëng kikānö hòn öt yih nup töchōich ellōn.—w24.11, pěch 18-19.

Kūö yòh öi mihôiṅ ngöṙô tö Yēsū in ngam Yôhan 6:53 nö rö-ö nö ṙòtö ngam inlahen hī öi sitih inlahen kēken ngam töhet inmūlkūö?

In ngam Yôhan 6:53 nö vënyu ngam alaha ngam kūön tarik nyā-aṅ hēk òk ngam mahām inrē. In yik yahuti anga-aṅ tömaṙôngö nö ṙô-òv tö e ik 32 C.E i Keleli. Ngaich unôichrit tö hēng samyeūheu pöri ang Yēsū nö rultënre nö kēken ngam töhet inmūlkūö nö i Yērūsalem. Ṙôten yip tarik pöri ang Yēsū yip hamòlṙen ò min nö hayöng nö el halīöngö.—w24.12, pěch 10-11.