Inlahen Hī Yěi Hòṅ Vī Lanāmö I Taṙôkhöres
Vë-eny nang hī ngam Tēv tö inlahen hī yěi hòṅ vī ngam lanāmö i holre. Pōyen yip tö yöölen kūö re nö hang minë inlēnöre. Lēn cha-a nö i pati, i chūök cha nö kaman, i holre inrē. Ta-a chěi töi ngëchkö minë inlēnöre kahëtö ngam Tēv.
Kö Aṙēlen Höö
“Kö aṙēlen höö, yĕn tarīku tö miṙivulōn nö i töng holre.”—KÒLÒSĪ 3:13.
Ṙòkhöre in kö vaichköreṙen. Pi-a öi haṙivölōn tī tö holre hēk pī cha-a nö haṙivölōn tī tö hī. Lökten ayī-ö kö hòṅ aṙēlen höö. Yē hī aṙēlen öp holre, ngaich öt köptī ayī-ö töp miṙivlōn re la-in ò. Öt havahal tö chōch ayī-ö tö töchōch, hēk öt fēḵlen ò tö nup vanachö ò. (Rōma 12:17) Ōt pöri nup ṙētak hī öi kihngen havaichngöre tö nup miṙivlōn re tö tī yip holre. Ngaich hòṅ sitih inlahen ayī-ö? Hòṅ yihtöre ayī-ö vë-ekūö öp holre hòṅ hī halāmtöre in höö. Rö-ö nö kūö hī hòṅ vë-eny re tölöng ngaich vë-eny ngam holre nö vaich.—Rōma 12:18.
Hayāchngöre Hēk Milēḵṙen Tö Taṙòkhöre
“Im inyāichngö ellōn pöri, kö taṙeūḵ tölōnre tö yip tahëng.”—FILIPĪ 2:3.
Lōnu in ṙòkhöre hanòl yip tö yāchö ellōn, tö milēḵṙen, öt tölngenre anga-aṅ nö chökhuti töp holre. Öt lōnu pöri hanòl öp tarik töng lamöklōnre hēk tö kiröng tö el matre.
Um Atöltuṙen
“Ngam Tēv nö töt atöltuṙen tö tarik; I tum mihëṅṙö vē tarik pöri, ngòh töpa-ekūö tö Ò, töla-evṙen inrē tö tölöök anga-aṅ tö hōḵov tö Ò.”—INLAHEN 10:34, 35.
Hēngren in imat ngam lamatulöng, pòrô öi kö tinrīkenre ikūö në panamre, kö ëlôre, pòrô yāch, hēk tökòlô. “Ngaich Anga-aṅ nö vīlö ngòh tarik nöng hĕng, nö iyöng kūö në taṙòkhöre panam,” lökten in ṙòkhöre höng hol maneukre. (Inlahen 17:26) Yē hī havai tinrīkenre i holre, ngaich ṙāmölōn cha-a hēk ayī-ö inrē. Mötlö ṙānamlōn pöri ngam vamīlen hī aṅ latulöng.
Hameuktö Ṙanëmen I Taṙòkhöre
“Hayutlöre tö . . . ṙanëmen.”—KÒLÒSĪ 3:12.
Yē hī tö ṙēmen, lööṙen ṙô yip vamë-ekūö hī. Hēk yē hī vachköreṙen ngaich öt piyu-u ṙô cha-a nö vë-eny nang hī, pòn akahalōn cha-a tö hī öthō öi tainy. Yēn pòrô öp vamë-ekūö hī nö öt lēnöṙô, ṙēmöṙô ayī-ö sapṙô ò, ngaich öthō öp tanānyö ò nö öt ṙātöre. Ngö ṙô ök tö akaha tarik, “Havööngö kūö lanīnö an ngam töṙēm sanap ṙô, harunlö tanānyö pöri ngam tö kesṙô.”—Inchōḵ-oṙô 15:1.
Ha-öiny Kinë-ekūöre Hēk Um Ma-iöṅhtīre Kē-ětī
“Mötlö kanôlò an ngam kinëḵeṅti, tö ngam kinëḵeṅ.”—INLAHEN 20:35.
Pōyen yip tarik töngamuh yamikhanga, lökten nöng ngëchköre. Kô-en ṙanamölōn in yē hī hayööken holre. (Lūkös 6:38) Yip tö inu töm hanangenlōn ,Mötlö hanangenlōn cha-a tö tarik tö nup chehen. Yē cha nö kē-ěvkūö ngaich holtö ellōnre nö ha-öiny nup kinë-eṅkūöre. (Kòlòsī 3:15) Achih öp lōn meh hanôl meh öp mahyööken hòng öp tö milīp ṙòng? Öp maha-öny kinë-eṅkūöre, öp töt maha-öiny ti holre ṙòng? Mihôiṅ öm chěi më-eṅ mahayööken hēk maha-öiny kinë-eṅkūöre.—Mëtiv 7:12.
