“Lökten sā ngam tökööl nö yih nö ing panam nö lökten i tö hĕng tak tarik, lökten im tökööl inrē ngam kinpaha; ngaich ngatī ngam kinpaha nö söl i taṙòkhöre tarik, kūö e ngaich nö ṙòkhöre nö kööl.”—RŌMA 5:12.

Vīlöngö nā Ātöm nā Ēva tö ngam Tēv nö töhet, kôlò el alaha hēk öthěngö invah inrē. Kē-ěkūö cha inrē ngam Tēv tö ök chūök cha nö iyöng, ngam panô-òn Ētěn tö ṙô. Mihôiṅ cha-a nö keuheūt nyahā re tö nuk ṙòng chōn el ök panô-òṅ, höng haměng mā ök chōn ök sinôtö kūö cha nö nyā, sön pöri cha-a nö nyā ṙòng ò. Tökiröng angū-ö nö fālen. (Ranehlö 2:15-17; 3:1-19) Kūö cha nö öt hang chööngö, lökten cha-a nö ha-uknyu tö ngam Tēv nö ṙā-ang el ök panô-òṅ. Kihngen ngaich cha-a unôichrit e. Ngatī inrē yik kūön cha nö kihngen. Köinyngö inrē ngaich kapah. (Ranehlö 3:23; 5:5) Kūön cha ayī-ö inrē, lökten öi vahavö, köinyngö hēk kapah inrē.

“Akahalōn in tö hī ayī-ö aṅ im Tēv, ngaich ṙòkhöre ngih panam nö hulalhaka nö im tötlöök.”—1 YÔHAN 5:19.

Urēhěkūö tö köṅnyu samyeūheu ök töhěng tak ma-ahāṅnga töt köp nö hang chööngö ngam Tēv. “Sī-ö” ngöṙô ön ngam Töhet Līpöre tö ò. (Yôhan 8:44; Inmeukhömat 12:9) Asīntöre hēk yik tahëng ma-ahānga nö in ò ngaich la-al ngam Tēv. Halō-ongkūö tarik inrē  cha-a pòṅ hòṅ ṙūöhngöre cha tö ngam Tēv. Hōten tarik inrē nö ötlöngö la-en. (Salmai 106:35-38; 1 Timôtī 4:1) Ṙamlōn ngam Sī-ö yěn meukö hī kihngen.

“Hamūl ṙòng taneūichre ön min ngòh tarik.”—KALATĪ 6:7.

Kūö ngam tökööl nā Ātöm hěnghöre tī ngam Sī-ö në kanihngen hī töngamuh. Ṙōlheuh pöri öi höng kūö tī re öi kihngen. Öi sitih inlahen? Yēḵ hī öre vaichö la-en hēk vaichö katöllö, ngaich meuk ṙòng nup la-en re ayī-ö nöng ötlöng. Yēḵ hī pöri löngö la-en hēk löngö atöllö inrē, ngaich yöölen min ayī-ö. Sā öp tarik yěn töt michūḵṙen hēk töt ṙāhata inrē nö la-envö ngaich teunglen min anga-aṅ nö ha-aṅkö nômö ngam mikūönö re, ṙamlōn inrē min ngam mikūönö ò. Yēḵ ò pöri nöng nyamamkö rupīö (Gambles), mihiyōi hēk tö ṙāhata inrē nö la-evṙen ngaich höng pōi hötṙeh min anga-aṅ, lāinyten ngam mikūönö ò nö öt ṙamlōn. Lōnu ön ngam Tēv tö hī öi “kirööngen lanāmö”, lökten yēḵ hī hang nup chööngö ò ngaich höng yanöölen hī min anū-ö.—Salmai 119:165.

“Nup kanihngen min nö yih i nup manā-aṅ sakāmö . . . , pò tarik min nöng töhāngen töre, töhāngen tö rupīö, . . . maha-ôngen yöngre, . . . töt kô nö hayöngöre, tötainy, öttöhāngen tö tölöök.”—2 TIMÔTĪ 3:1-5.

Sā ṙô ngam Töhet līpöre nö ha-ehangen ṙô, pōyen töngamuh yip tarik tömeukö tö hī nö ngatī tinrīken in në “manā-aṅ sakāmö.” Vë-eny inrē angū-ö tö minë kinyūngö min nö ōt, inyāichö inrē tö nya-aṅkūö, kumyeūnö hěnghöre minë tölëlngö kūö inrē invah. Meuk minë töngatī in ngaich töngamuh. (Mëtiv 24:3, 7, 8; Lūkös 21:10, 11) Pōyen tarik töngamuh tö kihngen hēk tö kapah tö kūö u.